Mabalor Iran Tumang ed Sagradon Serbisyo

Unong ed salaysay nen Harry Bloor

Manga sanlasus taon lay apalabas, diad saman et say lakik so inmawet a membroy Methodist Church. Sikato met so respitadon managpulong a lego, a mabunbunlok a mangiiter pian suportaay dakel a kapilya ed Stoke-on-Trent, say panagdamilian a baley ed Inglatera. Kamamangta et nairapan ed pinansyal. Pian natulongay Lakik, sikatoy pinan-garita nen tatay ko. Lisensiado so garita a manlakoy serbesa, balet sanen akabatan iya na saray Metodista, tampol dan inekal si Laki ed relihyon da.

SINMANOK si tatay tan insamba ton agto lan balot pibaliay relihyon​—tan tinoor toy imbaga to. Sikatoy nampolis, balet ta diad saginonor et sikatoy nagmaliw a makankayariay sakey a painuman. Kanian binmaleg ak ed ontan a lugar a walay nanduruman angob tan asewek na sigarilyo. Anggapoy biang na relihyon ed bilay ko, balet ta dinmunong ak a manggalaw na maslak a board games! Anggaman ontan, lapud asakbay ya impluensia nen Lakik, apansiansiak so panagrespiton maong ed Biblia, anggaman daiset ni amtak ed satan.

Naaralan koy Katuaan na Biblia

Nen 1923, sanen 24 ak ni, nampabukig ak ed Nottingham tan kinaraw koy Mary, a manaayam na ngalngali 40 kilometron kaarawi ed purok na Whetstone, abalaten-sagur na Leicester. Say ama to, si Arthur Rest, so organista ed kapilya diman, balet diad sayan panaon et sikato lay maseseg ya Estudyante na Biblia, bilang tawag nensaman ed Tastasi nen Jehova. Naynay ya itotongtong ed siak nen Arthur so karomromog ton relihyon to​—ya agko tanton naninteresan. Balet, asagyat so interes ko sanen sikatoy inibaan ko’d kapilya na Baptist diman diad Simbay ngarem, Hulyo 13, 1924, pian ondengel ed paliwawa na sakey a membro na parlamento a prominentin Baptist. Naninteresan koy tema ton, “The Teachings of Pastor Russell Investigated in the Light of Scripture.” Wala ni’d siak iray innotak ed saman.

Impulisay na saray Baptist so kerew na saray Estudyante na Biblia ya ebatan so panangataki ed saray sisiaen da. Sinmyodot ak ed saya kanian denisidek so pananap na arum a pasen a pakagawaan na ontan a miting. Dugaruga so asingger a kamarin. Pinanisan mi itan a maong, inekal iray tapa, impireg so tilyar, tan insan akaparaan kami lan amin. Anugyop kami na 70 a yurongan, tan angimprinta kami na handbills.

Sanen sinmabi si Frank Freer manlapud Leicester pian manpaliwawa, napno lan amin so yurongan, tan wala ni 70 totoon akaalagey! Asagyat ak ed malinew a panagkatunongan nen Frank manlapud Kasulatan, a singa met ed dakel niran wadman. Nanlapulad saman a manpatuloy, maples a binmaleg so melag a kongregasyon na saray Estudyante na Biblia ed Blaby ya asingger ed Leicester. Makatantandan anguman met la’d satan so bilay ko​—ontan met ed si Mary. Nen 1925 et pareho kamin angidedika’d si Jehova, nampabautismo, tan nankasal.

Espiritual Iran Bendision

Diad tinmumbok a taon, aturo ak bilang service director na Blaby Congregation. Labay min tumboken a sanasawa iray bakat na saray colporteur tan magmaliw a sigpot-panaon ya ebanghelisador, balet ta agbinmayag et pinugeran lay bunigas nen Mary so pakatumbok to’d ontan ya impasyan eskedyul. Anggaman kinmapuy lay bunigas to anggad impatey to nen 1987, sikatoy maong a kaiba tan eksilintin ministro a maabilidar ed impormal a panagtasi tan panangigapoy panangiyaral na Biblia. Maslak ed saray labi et wala kami’d aral odino manginanabang kami na saray katuaan na Biblia ed kakaabay mi.

Sakey ak ya inhinyiro tan mantratrabaho’d pabrikaay makinan panagtistis. Sasaglawien na trabahok so pirmin panagbiahe ed intiron Britanya, ontan met diad Pransya, tan lanang to ak ya iibaan nen Mary. Sarayan biahe so angiter ed sikami pankanawnawan malaklaknab a makapanpulong.

Saray Pundasyon Parad Ilalaknab

Nen 1925 et impaalagey mi so marakep a bilding parad saray miting mi diad Blaby, tan ditan mi la inggapo so impangorganisa’d epektibon programa na panagpulong. Kada Simbay kabuasan et aarkilaen mi so sakey a luganan a mangitulor ed sikami diad nanaarawian a purok tan angkelag a balbaley. Diad dalan et iyepas miray manangipalapag a manpulong, tan insan ira samaren na luganan no papawil. Legan na masalimoot iran bulan na tiagew, walaan kami nensaman na panagaral na Biblia ed ngarngarem na Simba, ya uusaren so agano nin paway na The Watchtower. Kayari to, diad alas-otso et mantitipon kami’d tindaan parad sakey a publikon paliwawa ed paway. Sakey a labi et walay dinmengel a 200 a totoo. Inletneg na sayan kimey iray pundasyon parad dakel a kongregasyon a wala natan ed loob tan kaliberliber na Leicester.

Nen 1926 et nantekep a ginaway importantin kombension ed Alexandra Palace tan Royal Albert Hall ed London. Diad satan ya inkagawa et impaway nen Joseph F. Rutherford, presidenti ed saman na Watch Tower Society, so libron Deliverance. Say resolusyon ya “A Testimony to the Rulers of the World” tan say mapuersan paliwawa’d publiko nen Brother Rutherford a “Why World Powers Are Tottering​—The Remedy” so intiramintin niprinta’d manunan peryodiko sakey agew kayari iratan a nipresinta. Nadngel na masulok a 10,000 so lektyur ed publiko, tan kayari to et 50,000,000 a kopya na resolusyon so imbunog ed sankamundoan. Pinapeles na satan a kombension so panagpulong ed Britanya.

Baleg a Kombension Kaleganay Bakal

Binmetag so komaduan guerra mundial nen Setyembre 1939, tan kasabi 1941 et walad kapetapetangan so bakal. Agew-labin onaataki iray Aleman a managbomba, tan niyimpuersa so blackout ed intiron nasyon. Daiset so nakan, tan say wala et kontroladon irarasyon. Dagdaiset so naluganan, anggano mantren. Anggaman ed sarayan ompapatnag ya agnatalonaan iran babeng, ginawa mi so limay-agew a nasyonal a kombension nen Setyembre 3-7, 1941.

Say De Montfort Hall na Leicester so apilin pankombensionan lapud say Leicester so walad sentro na England. Lapud wala ak ed tistisan, akatulong ak ed panaggaway karatulan panag-anunsio. Inyareglok met so luganan diman parad saray kombensionista. Diad asakbay ya impanaliw na saray ticket tan impanbayar na masulok nen say regular a presyo to, tuloytuloy ya ombabatik iray tram anggano Simba.

Lapud walaray panameget ed panagbiahe, say ilaloan mi et ompan 3,000 labat a Tastasi so makasabi. Isipen pay liket sanen masulok a 10,000 a delegado so angikuan ya onsabi! Balet iner so pampundoan da? Dakel so mapangasin inimbitaan na saray mibabaley ed Leicester a miayam ed sikara. Niarum ni, ngalngalin sanlibo so pinapundo’d saray toldan impaalagey ed uma a taloran kilometro manlapud pankombensionan. Say kampo a Gideon, a singa impanawag mi’d satan, so pantotongtongan a tuloy na saray walad komunidad.

Inabangan iray angkabaleg a toldan amputi pian usaren na saray departamento’d kombension tan pian panayamay dakel ya ondaragsa nin karaklan. Balet sanen naamtaan a diad pan-agaag na bulan et ompan saraya so puntiryaen na saray managbomba na Nazi, tampol da iratan a sinakbongan. Say bakal, tan nagkalalo la’d agpibibiang na Tastasi ed satan, so bengatlan pampapagaan na totoo. Nilasus a Tastasi ed saman so walad prisoan lapud nibase’d Biblian talindeg da a nipaakar ed neutralidad.​—Isaias 2:4, Juan 17:16.

Inreport na Sunday Pictorial, na Setyembre 7, 1941: “Makapakelkelaw so pakanengneng ed 10,000 a totoo, maslak et kalangweran, ya uusarey sakey simba ra pian pantongtongay relihyon ya agsasalambiten so bakal, likud labat no nibanbanan isyu.”

“Atepet ko no walaray membro na Tastasi ed Alemanya. On, nibaga’d siak, tan amin da lawari, ya onliligada’d 6,000, so walad saray panangipangawan a kampo.”

Inyarum na reporter: “On, tua a saray Nazi et kabusol, balet ta samsamet so gagawaen na Tastasi pian labanan ira, salanti dia labat ed pangibunog na saray tract tan italineng ed saray paliwawa.”

Inkalapagan a negatibo iray komento na peryodiko ed sikami, tan binmaling ni ingen iray sumusumpa ed karawalan lapud agtinmalona iray getma ra a manisturbo’d kombension mi. Ingen, apilitan ya inaksobi na Daily Mail na London: “Say inkaorganisa ra et mauk-uksoy, agmaparungtal, tan epektibo.”

Naakusa kami ed ikikisir na suplay a sigarilyo ed syudad. Balet ta impaliwawa na The Daily Mail: “Agnireklamo na Leicester nisay Tobacco Controller iray Tastasi a sosongasongen day suplay na sigarilyo ed Leicester. Ag-ira mansisigarilyo.” Ontan met, naandi iray reklamo ya inalaan na Tastasi iray manaayam diman na tagano sanen nisalaysay ya inawit day maslak ed dilin rasyon da. Diad tua, kayari na kombension et walay nidonasyon a 150 a tunggal 1.8 kilo a tinapay ed Leicester Royal Infirmary​—baleg a kontribusyon ed saraman a panaoy kakisiran na tagano.

Say kombension so makapabiskeg a tuloy ed espiritualidad na ngalngali 11,000 a Tastasi ed Britanya. Manliket ira lapud ngalngalin 12,000 so inmatendi! Magayagan akibiang iray delegado ed malaknab a panagpulong ed lansangan diad Leicester, tan binisita ray nisulinek iran purok tekep na saray presentasyon ed ponograpo.

Saray manunan paliwawa ed kombension et saramay nirekord iran paliwawa ed imbebeneg a bulan a nipaliwawa’d limay-agew a kombension na Tastasi nen Jehova ed St. Louis, Missouri, E.U.A. Say inrekord a paliwawa nen Brother Rutherford a “Children of the King” so pabitar ed kombension. Lapud agnayarin iloob iray kopya na libron Children a nipaway ed St. Louis, sakey a nikaduman edisyon na libro so pinawala’d saginonor diad Britanya. Amin ya ugugaw ya inmatendi’d kombension so pinawitan na sansakey a kopya.

Nikaduman Tinaon a Miting ed Leicester

Kayari na bakal et makapakelaw so indaak na saray manangipalapag na Panarian ed Britanya! Kasabi na asasakbay a dekaday 1980, nagmaliw a samplora so bilang na kongregasyon ed Leicester. Insan apakabatan kami a deniside na Mananguley ya Ulop na Tastasi nen Jehova a gawaey tinaon a miting na say Watch Tower Bible and Tract Society diad Leicester nen 1983. Bilang city overseer ed Leicester, siak a tampol so apiiba’d panagparaan, pati say impangabang lamet ed De Montfort Hall.

Sinmabi so labintalon membro na Mananguley ya Ulop manlapud saray hedkuarter na Sosyedad ed Brooklyn parad okasyon. Walay dagup a 3,671 a delegado​—natan et manlapulad intiron mundo, tan karaklan et ababayag lan Tasi​—so amano’d auditoryum. Say kaaruman nin 1,500 so akadngel na programa diad kabangibang ya Assembly Hall.

Si Albert D. Schroeder, ya angasikaso’d sangan opisina na Watch Tower Society ed London kaleganay bakal a kombension ed Leicester, so angimaton ed sayan tinaon a miting. Tutukoyen so linmabas a kombension nen 1941, intepet nen Brother Schroeder: “Pigara’d sikayon kaiba natan so presenti la’d saman?” Masulok a kapaldua’d dumerengel so angitagey na kalimaan da. “Agayla iyan pannenengneng lamet parad sikayon amin a matoor!” so inkelyaw to. Peteg ya agnalingwanan itan ya eksperiensia.

Diad edad a 98, siansia nin manlilingkor ak bilang sekretaryo ed kongregasyon mi tan tuloytuloy ni so panagpaliwawak ed publiko, anggaman gagawaen ko itan natan ya akayurong. Kayari na impatey nen Mary nen 1987, inasawak si Bettina, sakey lan balo a kabkabat mi nen Mary ed dakel lan taon. Pisalsalamatan koy pakakaasikasok a maong, diad pisikal tan espiritual a paraan. Anggaman ed saray limitasyon lapud makapuy a bunigas nen Mary tan natan et nisesengeg ed inkatatken ko la, aromog kon say pakawalaay daakan a kimey ed sagradon serbisyo et lawas mabalor so itutumang to.​—1 Corinto 15:58.

[Litrato ed pahina 26]

Akaparaan a mibiang ed ministeryo nen dekaday 1920

[Litrato ed pahina 26]

Saray eksenay kombension ed Leicester