Panangipanengneng na Aro ed Saramay Walad Pankaukolan
NAMPARAN walaan na obligasyon tan pribilihyo iray Kristiano a mangipanengneng na aro ed agagi ran walad pankaukolan. (1 Juan 3:17, 18) Onia so insulat nen apostol Pablo: “Manggawa itayo na maabig ed saray amin, nagkalalo ed saray kaamong na pananisia.” (Galacia 6:10) Sakey ya agin lakin nanlingkor la ed si Jehova ed loob na ngalngalin apatiran dekada so agano nin akaeksperiensia’d aro na Kristianon impanaagi legay impansakit tan kayari impatey na asawa to. Insulat to:
“Nanlapulad inasikasok so asawak diad abung legan na impansakit to, agak akapantrabahon ngalngali duay bulan. Agaylan nainawaan ak sanen saray kakaaro ed kongregasyon so mabulbulos a tinmulong ed sikami! Akaawat kami na dakel a panangaron kuarta—‘pian ontulong ed kaaruman a panggastosan,’ a singa nisulat ed katekep iran kard—so imbayar ed imprinda, babayaran a koryenti tan danum, tan arum nin panggastosan.
“Duaran simba sakbay na impatey na asawak, makapaseseg a binisita kami na manangasikasoy sirkito. Impanengneng to ni ingen iray slide a bantayan na kongregasyon diad sampot na simba. Nadngel miray miting diad panamegley na telepono—pati saray miting ed lawak a serbisyo ya indaulo na manangasikasoy sirkito. Diad aminsan ed saraya, impanbabansag toray presenti parad lawak a serbisyo a mangibagay ‘hello,’ ed asawak. Diad ontan, anggaman niyarawi ed pisikal, agto niliknan manbukbukor.
“Diad loob na sakey oras kayari na impatey to, ngalngalin amin a mamatatken so walad abung ko. Masulok a sanlasus ya agagi so linma ed saman labat ya agew. ‘Mamilagron’ niwalay tagano ed lamisaan parad amin a wadman. Agko nayarian ya ibinsabinsa so amin a regalo, panangibalikas na piaambegya, makaligliwa iran salita, tan pikakasin initer ed biang ko. Talagan makapabiskeg iraya! Diad kaunoran et kaukolan kon kerewen ed agagi ya ontunda laran mangiter na nakan tan itutulong ed panaglinis na abung!
“Iner ni noagta diad organisasyon nen Jehova labat so pakaromogan tayo na onian andi-siblet a panangibalikas na panangabagey, panangiyansakit, tan panangaro? Maslak ed totoo natan et nabilang da ed sakey a lima ra so peteg a kakaaro ra. Bebendisionan itayo nen Jehova na baleg a pamilya na espiritual ya agagin lalaki tan bibii!”—Marcos 10:29, 30.