Nisalba ed Panaon na Saray Kalamidad — Watchtower ONLINE YA LIBRARYA

Nisalba ed Panaon na Saray Kalamidad

BIGLAN akusbo so limaran gradon department store ed Seoul, Korea, ya angulong ed nilasus a totoo! Labi-agew a nanggunaet iray manangisalba pian nisalbay dakel a bilay anggad nayari. Legan na ilalabas na saray agew, onmemelag so tsansa ed pananap na dakel nin mabilay ya atabonan na nantatapilan a konkreto tan balatyang.

Sanen naaandi lay ilalon wala ni naromog, walay makapakelaw ya agawa. Nadngel so maletletey, mandageyem ya akis manlapud dalem na geray. Sitatarantan kinotkot na saray manangisalba a kalimalima ta pian nipaway so biin mantaon na 19 ya atabonan a mabilay ed loob na 16 lan agew. Say akusbon dalanay elebetor so aporman pinagkasamben to manlapud tinolenadan mankipaplag a konkreto. Anggaman a-dehydrate tan asugatan, alegyasan toy patey!

Diad sarayan panaon, mataltalag so bulan ya anggapoy report a desyang, balanglan yegyeg, maksil a bagyo, interak na bulkan, aksidenti, odino eras. Tan saray pankelkelawan ya istorya na impangisalba tan impakaliktar so manetenyeg na interes tan manasagyat ed saray minilyon a mansusubaybay ed saray balita. Balet, say pasakbay ed onsasabin kalamidad—sakey a babaleg nen say dinanman ed awaran na too—so inkalapagan ya ibabaliwala. (Mateo 24:21) Onia so panideskribe na Biblia ed sayan onsabin nagawa: “Nia, say mauges ompaway naani a manlapu ed nasyon angga ed nasyon et sakey a baleg a bagyo so onalagey naani a manlapu ed kasampotan a kabiangan na dalin. Et saray pinatey nen Jehova sikara naani ed satan ya agew manlapu ed sakey a sampot na dalin angga met lanlamang ed sananey a sampot na dalin: Ag-ira naani napaney-eyan, tan ag-ira met natipon, no nitabon; sikara naani dutak ed tapew na dalin.”—Jeremias 25:32, 33.

Makapakebbiew iratan a salita! Balet aliwan singa saray natural a desyang tan aksidenti, sayan kalamidad et aliwan palanit a panagpatey. Diad tua, say kililiktar—kililiktar mo—so posibli!

Panaoy Inkaganatan

Pian sigpot a natebek iyan katuaan, nepeg a talosan na sakey no akin a nagawa iyan sankagloboan a kalamidad. Diad tua, satan so mogmon peteg a solusyon ed saray problema na katooan. Pigpigaran totoo natan so manliknan liktar tan maligen. Anggaman ed saray impasyan pansasagpot na siensia, mantutultuloy ni so panedesyang na makaalis a sakisakit ed populasyon na dalin. Saray bakal a resulta na saray relihyon, tribu, tan saray irangan ed politika so mangegetel ed nilibon bilay na totoo. Say eras so mamapaloor ed sinagem tan paniirap na inosentin lalaki, bibii, tan ugugaw. Say abulok a moralidad so mangukusbo ed mismon pundasyon na sosyedad; inmuuges ni ingen iray ugugaw.

Tekep na makatantandan inkasusto, dedeskribien na sakey a propesiya na Biblia a nisulat ed masulok lan 1,900 a taon ed apalabas so kipapasen tayo. Kuanto: “Nepeg mon nakabatan a diad kaunoran iran agew saray panaon so napano na kapeligroan.”—2 Timoteo 3:1, The New Testament in Modern English, nen J. B. Phillips; ikompara so Mateo 24:3-22.

Ompatnag kasin makatunongan parad sika a say maaron Dios et anggapoy panangiyansakit to ed problema tayo? Onia so ibabaga na Biblia: “Say Dios ya anibukel tan nanggawa na dalin, . . . pinalsa to ya aliwa a kibalatar, a tinibukel to ta pian sikato so panayaman.” (Isaias 45:18) On, imbes ya abuloyan a naderal iyan marakep a planeta tan amin a manaayam to et mangangga, onsalet so Dios. Say tepet so, Panoy panggawa to ed satan?

Pilien so Bilay!

Oneebat so Biblia diad Salmo 92:7: “Bangno matalobo so babagel a singa say dika, tan bangno amin na saray managgawa na kasulitan et maaligwas ira; mapatnag so kabagbag da ya agla mangangga.” Say solusyon na Dios ed saray problema ed dalin et say pamagit ed karelmengan a mismo. Makapaliket, agkabaliksan na saya ya amin a totoo et pagiten. Ta ipapaseguro ed sikatayo na Salmo 37:34: “Manalagar ka ed Jehova, tan tonton mo so dalan to, et itandoro to ka a manawir na dalin; sano napater so saray bagel, nanengneng mo.”

Ipapanengneng na sarayan salita a walay tsansa ed pakasalba ed sankabalgan a kalamidad ya ondapo ed katooan. Inikdan itayo na Dios na pampilian. Saray salita ya animbawaan nen Moises ed saray Israelita legan a manpaparaan iran onloob ed Insipan a Dalin so onaplika met ed sikatayo natan: “Inyan ko ed arap mo so bilay tan say patey, say bendision tan say ayew, sikato so makasengeg a pilien mo so bilay ta pian manbilay ka, sika tan say kapolian mo.” (Deuteronomio 30:19) Balet panon a nilaban so sakey a ‘pilien to so bilay’? Anton talagay kabaliksan na tuan kilalaban?

[Picture Credit Line ed pahina 2]

[Picture Credit Line ed pahina 3]

Yunhap News Agency/Sipa Press