Susuportaan na Korte Suprema na Connecticut so Kanepegan na Pasienti

Nen Abril 16, 1996, sinuportaan na Korte Suprema na Connecticut, E.U.A, so kanepegan na Tastasi nen Jehova ed agpangawat na panagpasaksak na dala. Binaliktar na sayan desisyon so akadkaunan impanusga na korte.

Nen Agosto 1994, si Nelly Vega, sakey ed Tastasi nen Jehova, so namparalan maong kapangianak to’d sankaunaan ya anak to. Ag-apatunda na saray sagpot so pampaparala to. Legan ya onloloor so kondisyon nen Mrs. Vega, nambanikelan na ospital so pakalay ganggan na korte a mangautorisa’d pakapangisaksak na dala. Pinirmaan la nen Mrs. Vega so medikal a panangibulos (medical release) a mangibabagan anggapoy dala odino substansyan nan-dala ya usaren ed sikato legay ka-ospital to, diad ontan et ibubulos so ospital ed antokaman ya eebatan lapud saray pansumpalan na desisyon to. Anggaman ontan, insangsang na ospital a say pangipilit ed pangisaksak na dala et parad pankaabigan na kapanyanak, ya indagdag na ospital a nakaukolan toy ina to. Mapaga met so korte a, likud ed pampaparala to, si Mrs. Vega so malangwer ni tan mabunigas a bii. Kanian, anggaman ed namparan panproprotesta na asawa nen Mrs. Vega tan say abogado to, impaakseb na korte so ganggan tan sinaksakan.

Asabi panaon, say kaso so nitarok ed Korte Suprema na Connecticut. Diman, nankakasakeyan a say aksion na ospital so anumlang ed kanepegan nen Mrs. Vega. Onia so ibabaga na pananontonan: “Say bista na korte so agawa ed kapegleyan na labi, diad silong na pirmin emerhensya iran kipapasen ya agmakatulong ed abilidad na nantupag a partido pian sigpot a natibukel iray argumento.”

Sayan pananontonan na Korte Suprema na Connecticut so makabaliksan parad totoo ya aliwa labat ed Tastasi nen Jehova. “Satan so importanti parad amin a pasienti a nayarin ag-onabobon ed saray desisyon na saray doktor da,” kuan nen Donald T. Ridley, abogado nen Mrs. Vega. “Amperen na pananontonan iray ospital manlapud paneral ed saray prinsipyo na saray pasienti, balanglan nipaakar ed relihyon odino sekular.”