Amayamay a Libro!

“Say panggawa ed dakerakel a libro anggapo so anggaan,” insulat na makabat ya Arin Solomon nen inmunan panaon. (Eclesiastes 12:12) Legan na 1995 ngalngalin sakey a balon libro so nipapalapag ed Britanya ed kada 580 na populasyon, kanian satan a bansa so manunaan ed panangipalapag na balo iran libro ed mundo. Say Tsina, a sankarakelay populasyon a bansa, so onkokomadua a walaan na 92,972 iran edisyon no nipareng ed 95,015 na Britanya. Tinumbokan na Alemanya (67,206 a titulo), insan say Estados Unidos (49,276), ontumbok so Pransya (41,234). “Say baleg a sengegan no akin a manunaan so Britanya ed mundo et lapud malaknab ya uusaren so lenguahen Ingles,” kuan na peryodiko na London a The Daily Telegraph.

Ipapanengneng na saray report ya onaabebay pakakalakoy-libro ed loob la na pigaran taon, tan natan et 80 porsiento labat na saray wala-la’d-edad ed Britanya so makakasaliw na sakey odino masulok ni a libro ed loob na sakey taon. Balet nababasa ta na totoo so amin a libron sasaliwen da?

Sakey a libron mantutultuloy a malaknab a nibubunog tan babasaen et say Biblia, natan et naala la’d saray kabiangan odino intiro ed masulok a 2,120 a lenguahe. No andian ka ni na dilin kopyam, mitalosan ed opisina na Watch Tower Society ya asingger ed sikayo pian makala ka. No walay Bibliam, ibukay mo tan tsiken iray Makasulatan a reperensia a nipapaway diad saray artikulo na sayan magasin. Diad panggawa na ontan, nadiskobrim so manangiter-bilay a pikakabat na Biblia.