“Ankablin Bato na Katuaan”

“Ankablin bato na katuaan.” Ontan so panideskribe na sakey a sulat ed sanga na Tastasi nen Jehova diad Nigeria ed duaran espisyal a magasin. Say nansulat et sakey a kalangweran a laki, a mangisasalaysay:

“Nansulat ak pian ibalikas koy masimoon a pisasalamat ko’d sagpot yo diad panasaglawi ed amin lawarin pamaakaran na inagew-agew a panagbilay diad panamegley na saray magasin a Panag-Bantayan tan Awake!

“Mantaon ak na 17. Nen katantaon et angisponsor so sakey a lokal ya istasyon na radyo na panagsulat (essay) a kompetisyon ed teman ‘Mas ni Sasaglawien na Pan-aroan nen say Pisekso​—Say AIDS so Talagan Nagagawa la.’ Kaukolan a kada essay et ag-onkulang ed apatalasus a salita. Napremyoan na 1,000 a naira [$12.50, U.S.] so sankaabigan a panagsulat. Siempre, inkuanda, kaukolan a mansulat iray totoo aliwan pian makapanalo labat, noagta, pian makaaral na bengatla. . . .

“Akaromog ak na impormasyon nipaakar ed AIDS ed namparan magasin. Nipaakar ed aro, walay dakerakel ya artikulo. Inusar koray punto manlapud Awake! na Agosto 8, 1978.

“Ngalngali duay bulan kayari impangipawit ko’d insulat ko, nipalapag so resulta. Diad inkasurprisak, siak so sankaunaan ed estado na Cross River tan Akwa Ibom!

“Amin ya inusar kon impormasyon et nanlapud saray magasin. Talagan makapakelkelaw a mangitatarya si Jehova na nipanpanaon ya impormasyon parad sikatayo diad sayan magulo tan abulok a mundo. Bilang tuan Kristianos, amta tayon dakel, mas ni sasaglawien na pan-aroan nen say pisekso. Tan, siempre, protektaan itayo na malinis, maabig a panagbilay manlapud sakisakit a singa say AIDS.”

“Adagdag ak a pisalamatan ta kayo parad sarayan ankablin bato na katuaan ya andi-kesaw yon ipapalapag. Komon ta mantultuloy a bendisionan nen Jehova iray sagpot yo legan yon itutultuloy ya itatarya irayan mablin magasin.”