Sano Ondalaw Iray Tastasi nen Jehova

Antoy kaukolan a gawaen na saray Katoliko sano ondadalaw so sakey ed Tastasi nen Jehova diad ayaman da? Oniay imbaga na agano nin palapagan a ginawa na National Catechistic Bureau of the Italian Bishops’ Conference: “Say agpitongtong, a sipapangasi balet ta sipepekder, so aliwan kabastosan.”

Aliwan amin a Katoliko et onabobon, a singa ipapanengneng na sulat ya impatulor na sakey a lakin manaayam ed Foggia, Italya, ed inagew-agew a Gazzetta del Mezzogiorno:

“Aliwa ak a sakey ed Tastasi nen Jehova. Katoliko ak. Balet pankelawan koy pigaran totontonen ya igaganggan na simbaan ed saray membro to, a pangipapaskilen ira na paimano ed saray puerta ra ya agpatutuloyen iray Tastasi nen Jehova. Tutal, ipupulong labat na sarayan totoo so Salita na Dios, tan tutulongan daray arum a nawalaan na mas aralem a pikakabat ed Biblia. Ipanonot na saya ed siak so panaon a sanen asalot so Italya na kolera tan abilin itayo no panoy agpakaalisan.

“Diad opinyon ko, ipapanengneng na saya a say simbaan et ididikta toy dili toran totontonen ya agnononoten iray panlabayan na saray membro to. Balet diad pigaran taon la natan, a naiimanok ya anggan saray Katoliko et mankakabkaabungan, ombibisita met ed abung na Tastasi nen Jehova; tan patutuloyen da ira, pitotongtongan da ra, ya anggapoy agpapatuloyen.”

Agpipiliten na Tastasi nen Jehova iray totoo ya awaten day mensahe ra. Imbes, panggugunaetan dan inabang ed arum so ilalon iyoopresi na Salitay Dios a naiimano ran mismon makaligliwa ed sarayan magulon panaon. Diad pankakabkaabungan, ontan met ed pitotongtong ed saramay naabet da ed kalsada, inanabang na Tastasi nen Jehova so maong a balita na Panarian na Dios ed saramay mabulos ya ondengel.​—Mateo 24:14; Gawa 5:42; 17:17.