Tepetepet Manlapud Managbasa

Aliketan itayo ed impanaral ed parabolo nen Jesus nipaakar ed saray karnero tan saray kanding. Diad pangonsidera ed satan a balon pakatalos a niparungtal ed “Say Panag-Bantayan” na Oktubre 15, 1995, siansia kasin nibaga tayon makapipibiang iray Tastasi nen Jehova ed panangibiig a kimey natan?

On! Natalosan, dakel so manuumameng nipaakar ed saya lapud inkuan na Mateo 25:31, 32: “Sano say Anak na too so onsabi ed gloria to, tan amin ya anghil so kaiba to, insan sikato so onyurong ed maglorian trono to. Tan amin a nasyon natipon ed arap to, tan panbibiigan to iray totoo, singa say pastol ibibiig toray karnero manlapud saray kanding.” Impanengneng na Say Panag-Bantayan na Oktubre 15, 1995 no akin a saratan a bersikulo so onaplika kayari na igapoy baleg a kairapan. Onsabi si Jesus ed gloria to a kaiba iray anghil to tan onyurong ed panangukoman a trono to. Insan, ibiig toray totoo? Diad anton pantalos? Sikatoy mangipaakseb na saray desisyon a nibase ed no anto so ginawa odino agginawa na totoo sakbay na satan a panaon.

Nikompara tayo iya ed kikukurang na sakey a kaso unong ed ley ed pakapagmaliw ton sakey a kaso ed korte. Ondarakel so ebidensia lapud ninatnat a panaon sakbay a mandesisyon so korte tan mansentinsia. Say ebidensia no kasin say totoon manbibilay natan et napaneknekan bilang karnero odino kanding so natitipon ed andukey lan panaon. Tan satan so siansia nin naaaruman. Balet sano onyurong lay Jesus ed trono to, nakompleto lay kaso. Sikato lay akaparaan ed satan a mangipaakseb na panangukom. Nibiig la ed satan iray totoo balangla’d andi-anggaan a kapegpeg odino andi-anggaan a bilay.

Balet, say bengatlan say kibibiig na totoo a mamaarap ed bilay odino ipapatey ya asalambit diad Mateo 25:32 et diad arapen ni, agkabaliksan na satan ya anggapoy panangibiig, odino panangapag, a nagawa sakbay na satan. Sasalambiten na Biblia, diad Mateo kapitulo 13 so sakey a panangibiig a kimey a nagawa ed masasakbay. Makapainteres, atukoy iya na libron Nankakasakey ed Panagdayew Diad Alenleneg a Tuan Dios, pahina 179-80, ed silong na paulon “Panangibiig ed Saray totoo”.a Oniay ibabaga na libro: “Wala met niray nikadkaduman nagawgawan matalona ya insiglaot nen Jesus ed konklusyon na sistema na bengabengatla. Sakey ed saraya et say panangibiig ed ‘saray anak na panarian’ a manlapud ‘saray anak na marelmeng.’ Saya so sinalita nen Jesus ed parabolo to nipaakar ed uma na trigo a nansibuagan na kabusol na sisanyas.”

Tutukoyen na libro so ilustrasyon nen Jesus a nidatak diad Mateo 13:24-30 tan nipaliwawa diad bersikulo 36-43. Imanoen pay bersikulo 38 a saray maabig a bukel na trigo so mangirerepresinta ed ananak na Panarian, balet saray sisanyas et mangirerepresinta ed ananak na marelmeng. Ipapanengneng na bersikulo 39 tan 40 a diad ‘konklusyon na sistema na bengabengatla’​—diad panaon a panbibilayan tayo natan​—saray sisanyas so natutugyop. Sikaray nibibiig tan diad kaunoran ed napoolan, naderal.

Say ilustrasyon so ontutukoy ed alanaan a Kristianos (a diad parabolo na saray karnero tan saray kanding et tinawag ya agagi nen Jesus). Siansia, malinew so punto a say importantin panangibiig so nagagawa legay panaon tayo, a saray alanaan so nibibiig manlapud saramay mankuan a Kristianos balet ta papaneknekan day inkasikara ya “ananak na marelmeng.”

Angiter ni Jesus na arum ya alimbawa na totoon naaapag, odino nibibiig. Tandaan ya inkuanto nipaakar ed maawang a dalan a mamaarap ed kadederal: “Dakel so saray onloob diman.” (Mateo 7:13) Aliwan komento itan lambengat nipaakar ed pinal a kasumpalan. Satan so komento nipaakar ed kaplesan a nagagawa, no panon a tua itan natan ed pigaran makakaromog ed mainget a dalan a mamaarap ed bilay. Tandaan met a sanen imbaki toray apostol, inkuan nen Jesus a walaray naromog dan makana. Arum so agmakana, tan kaukolan ya ipagpag na apostoles so salisali ra ‘a pantasi sumpad’ ontan a totoo. (Lucas 9:5) Agta tua a walay bengatlan mipadparan nagagawa legan ya itutuloy na Kristianos so mapublikon ministeryo ra natan? Arum so onkiwas, bangta say arum so agmangawat ed madibinon mensahen itatarok tayo.

Impaimano na saray artikulo ed Say Panag-Bantayan nipaakar ed saray karnero tan saray kanding: “Bangta dia ni ed maganon arapen so panangukom ya adiskribi ed parabolo, anggan natan la et nagagawa so sakey ya importantin bengatla. Sikatayoran Kristiano so mibibiang ed manangisalbay-bilay a kimey na panangiproklama ed mensahen mangaapag ed limog na totoo. (Mateo 10:32-39).” Diad satan a teksto na Mateo kapitulo 10, nabasa tayon inkuan nen Jesus a say panumbok ed sikato et pansengegan na kaapag-apag​—ama sumpad anak ton laki, anak a bii sumpad ina to.

Kaunoran, idadaulo na alanaay-espiritun agagi nen Kristo so sankamundoan a panangipulong ed mensahe na Panarian. Legan a nakakabatan na totoo tan onkikiwas a paborabli odino agpaborabli, nipapabidbir day inkasikara. Sikatayon totoo et agtayo nayarian, tan agnepeg, ya ibagan, ‘Karnero iyan too; kanding itan’ay,’ unong ed kabaliksan na Mateo kapitulo 25. Anggaman ontan, say pangipaparungtal tayo ed totoo ed maong a balita so mangiyaabuloy ed sikaran ipanengneng so tatalindegan da​—no anton klase ira tan no panon so ikikiwas da ed agagi nen Jesus. Kanian, singa ondarakel ya ebidensia ed sakey a kaso ed korte, say kaapag-apag ed baetan na saramay manusuporta ed agagi nen Jesus tan saramay agmalabay a manuporta ed sikara so napapatnagan. (Malaquias 3:18) Singa impanengneng na Say Panag-Bantayan, agmabayag et onyurong si Jesus ed trono to tan mangiyanunsio na sentinsia, maptek a mangibiig ed totoo diad say pinal a kaukoman ed bilay odino ed kapegpeg.

[Paimano ed leksab]