Ginawa Ra so Linawa nen Jehova

Sakey a Mautek a Biin Angipaliis na Desyang

SAKEY a masilib a biin akiasawa ed andi-kakanaan a laki​—ontan so situasyon di Abigail tan Nabal. Si Abigail so sakey a “makatalos a maong tan marakep a nengneng.” Midumaan ed si Nabal a “maramsak tan mauges ed saray gawa to.” (1 Samuel 25:3) Say nantutumbokan ya agawgawa a niparungtal nipaakar ed sayan agmakapantunosan a sanasawa so angipermanenti’d kangaranan da ed awaran ed Biblia. Nengnengen tayo pa no panon.

Kerew ya Imbaliwala

Koma-11 siglo K.K.P. ed saman sanen nilanaan si David bilang say arapen ya ari na Israel, balet imbes a manuuley et sikatoy batik-batik. Say manguuley ya ari, si Saul, so determinadon mamatey ed sikato. Bilang resulta, apilitan si David a manbilay bilang puganti. Sikato tan say 600 ya alyado to so diad kaunoran et akaromog na salimbengan diad kalawakan na Paran, abalaten na Juda tan manpaarap ed kalawakay Sinai.​—1 Samuel 23:13; 25:1.

Legan a wadman ira, nabet daray managpastol na lakin manngaran na Nabal. Sayan mayaman a kapolian nen Caleb et mankayarian na 3,000 karnero tan 1,000 kanding, tan kakatlian toray karnero to ed Carmelo, sakey a syudad ed abalaten na Hebron tan anganko et 40 kilometro manlapud Paran.a Tinulongan nen David tan say totoo to iray managpastol nen Nabal a bantayan iray pulok da sumpad saray matatakew a kiliberliber ed kalawakan.​—1 Samuel 25:14-16.

Kaleganan, panaon lay panagkatli ed saray karnero diad Carmelo. Saya so okasyon a panpiesta, a mipadpara ed panaoy panagani na saray dumaralos. Panaon met itan na inkamabunlok, sano tumangan na saray akankayarian na karnero iramay nantrabaho parad sikara. Kanian aliwan inkamapasang ed biang nen David sanen imbaki toy samploran lalaki ed syudad na Carmelo pian onkerew na tagano ed Nabal bilang bayar na ginawa ra nisesengeg ed saray pulok to.​—1 Samuel 25:4-9.

Say kiwas nen Nabal et inkasiblet. “Siopa si David?” so impanleglemew to. Insan, diad pangipapalikas a si David tan saray totoo to et takas labat ya ariripen, intepet to: “Alaen ko kasi sirin so tinapay ko tan danum ko tan asalian ko a pinatey ko nipaakar ed saray komakatlik tan iter ko ed saray lalaki a sikara so agko amta no taga-iner ira?” Sanen nadngelan nen David iya, inkuanto’d totoo to: “Ibalkes yo a balang laki so kampilan to!” Ngalngali 400 a lalaki so namparaan pian mibakal.​—1 Samuel 25:10-13.

Inkautek nen Abigail

Say abusadon impansalita nen Nabal so nipaamta ed akulaw to, si Abigail. Anganko ta aliwan saya so sankaunaan a kaukolan toy onsalet pian mikareenan parad Nabal. Diad dinanman a kaso, inmakton tampol si Abigail. Ag-ipapaamta ed si Nabal, angala na saray probisyon​—a laktipey limaran karnero tan daakan a tagano​—tan pian abeten lay David diad kalawakan.​—1 Samuel 25:18-20.

Sanen anengneng nen Abigail si David, sikatoy dinmakmomon tampol ed arapan to. “Say katawan ko, pikasik ed sika, agto komon imatleken so sayan mauges a too, si Nabal,” akikasi ed sikato. “Saya a tokdol a say aripen mo yakar to ed katawan ko, yabuloy mo komon a niiter ed saray tobonbalo a lalaki a mantumbok ed katawan ko.” Inyarum to ni: “Saya sikato [situasyon lapud si Nabal] so agkagapolan ed sika, nisay liknaen na puso ed katawan ko.” Say Hebreon salita dia a nipatalos a “kagapolan” so mangipapatnag na agpakaligey konsiensia. Kanian pinasakbayan nen Abigail si David ya agmanapurasta ed ikiwas to ta pian agto itan pagbabawian ed saginonor.​—1 Samuel 25:23-31.

Dinengel nen David si Abigail. “Bendito so karunongan mo, tan bendita ka ya angyagel ed siak ed sayan agew ed pankasalanan ed dala,” inkuanto’d sikato. “Nilikud ta nansiglat ka tan sinmabi ka ya onabet ed siak, petepeteg ya anggapo komon so nakeraan ed Nabal sano manliwawa so kabuasan ya anggan sakey a laki ya ugaw [siopaman a manisirit ed bakor, NW].”b​—1 Samuel 25:32-34.

Saray Leksion a Parad Sikatayo

Ipapanengneng na sayan salaysay ed Biblia a talagan aliwan mauges parad maridios a biin unona lan mangalay matukoy a kundang no nakakaukolan. Kinmiwas si Abigail a sumpad saray kaliktan na masiken to, si Nabal, balet ta sikatoy agbinaat na Biblia lapud saya. Diad kasuniyan et sikatoy apagalangan bilang biin mautek tan masilib. Diad inyuna lan inkiwas to ed sayan delikadon situasyon et nisalba nen Abigail so dakel a bilay.

Anggaman diad inkalapagan et say asawan bii so kaukolan a mangipanengneng na awawey na maridios a panagpasakop, manepeg labat so agto pipakna ed masiken to sano apektado laray maptek a prinsipyo. Siempre, panbanikelan ton pansiansiaen so “mauyamo tan mareen ya espiritu” tan ag-onkiwas a manbukbukor lapud impakaopendi, kinon, odino inkarebeldi. (1 Pedro 3:4) Anggaman ontan, agpadedesdes so maridios ya asawan bii a gawaey antokaman a bengatlan amta ton talagan agmakabat odino sumlang ed saray prinsipyo ed Biblia. Peteg, say istorya nipaakar ed Abigail so mangiiter na mabiskeg a katunongan sumpad saramay ipipilit dan say Biblia et ililitrato toray bibii bilang ariripen labat.

Ibabangat met ed sikatayo na sayan salaysay so nipaakar ed dangka. Panapanaon, sigpot a nipanengneng nen David iyan kualidad. Alimbawa, agto labay a pateyen so maimbel ya Arin Saul, anggaman dakel a pankanawnawan nagawaan to itan tan say ipatey nen Saul et mangitarok komon na kareenan ed si David. (1 Samuel 24:2-7) Misunian, sanen sikatoy mainsulton impulisay nen Nabal, nilawan si David et insamba toy ombales. Saya so mabitabitar a pasakbay ed Kristianos, a manbabanikel ya “aleg ya itumang yo ed anggan siopa so mauges ed mauges.” Diad amin a sirkumstansia, kaukolan dan aligen so simbawa nen Pablo: “No nayari, dia ed anganggaan na nayarian yo, manayam kayo ed kareenan ed ganaganay totoo. Aleg a sikayo a dili so ombales, inararo, noag ingen itdan na pasen so sanok na Dios.”​—Roma 12:17-19.

[Saray paimano ed leksab]

[Litrato ed pahina 15]

Angitarok si Abigail na saray regalo ed si David