“Manlingkor Kayo ed Kriston Katawan”
DIAD intiramintin awaran, sinungdoan na minilyon a totoo so inkaaripen. Alimbawa, nilibon taon lay apalabas, nanirap a maong iray Israelita ed lima na saray Ehipsios a manangasikaso. A singa impangikuan na Biblia, sikaray “angipasen ed saray Israelitas na kapatas ta pian napairap ira ed ambelat a sasakbaten,” nagkalautla diad panaggaway laryo.—Exodo 1:11, The Jerusalem Bible.
Diad dakel a bansa natan, nayarin agliteral ya aripen so totoo, balet dakel so kaukolan a mantrabaho na dakel ya oras ed silong na matrabaho—no maminsan et agpaborabli—iran kipapasen. Sikaray nisisilong ed ambelat a sasakbaten a natawag natan a pakakaaripen ed pinansial.
Balet, wala so sakey a klasen inkaaripen ya agmakapabelat. Oniay impaseseg nen apostol Pablo ed saray kapananisiaan: “Manlingkor kayo ed Kriston Katawan.” (Colosas 3:24) Saramay disidien day paaripen ed Kristo so nainawaan manlapud ambelat a sasakbaten da. Si Jesus a mismo so nankuan: “Dago kayo’d siak, amin yon nasasagpotan tan nabebelatan, et itdan ta kayoy pampainawa. Ala yoy pakok ed sikayo, tan manaral kayo’d siak; ta mauyamo ak tan mapaabeba ak a puso; et naromog yoy inawa nipaakar ed saray kamarerwa yo. Ta say pakok mainomay, tan anlemew so awit ko.”—Mateo 11:28-30.
Say pangawat ed pako nen Jesus so agmangibulos ed sakey manlapud obligasyon a legpeten so pamilya to diad materyal a paraan. (1 Timoteo 5:8) Balet, iyoopresi to so pakalukpos manlapud dakel a pakasalpotan a materyalistikon gegemtan. Imbes a gawaen dan manunan kalat ed bilay so materyal a pakainawaan, pankokontentoan la na saray Kristiano iray manunan nakakaukolan.—1 Timoteo 6:6-10; ikompara so 1 Corinto 7:31.
Narerepreskoan met iray Kristiano ed pakakasumpal da’d responsabilidad dan ipulong so “ebanghelyo [maong a balita, NW]” na Panarian na Dios. (Mateo 24:14) Papawalaen na saya so peteg a gayaga tan inkapnek!
Pisalamatan tayo a nayarian tayon ‘manlingkor ed Kriston Katawan’!
[Picture Credit Line ed pahina 32]
Pictorial Archive (Near Eastern History) Est.