Sekreton Nepeg ya Ag-iyamot na Kristianos!
“Nansalita ak dia ed maparungtal ed mundo; . . . et anggapo so sinalitak ed amot.”—JUAN 18:20.
1, 2. Anto so kabaliksan na Griegon salitan my·steʹri·on a singa inkiusar ed Kasulatan?
SAY Griegon salitan my·steʹri·on so nipatalos ed New World Translation of the Holy Scriptures a 25 danay bilang “sagradon sekreto” tan 3 danay bilang “misteryo.” Say sekreton natatawag a sagrado so talagan importantin tuloy! Siopaman ya apribilihyoan a makapikabat ed ontan a sekreto so manliknan apagalangan, ta nibilang a makanepegan ed pakapinabang na sekreto ed Supremon Dios na uniberso.
2 Pepekderan na Vine’s Expository Dictionary of Old and New Testament Words a diad maslak a kaso et say “sagradon sekreto” so mas matukoy a panangipatalos nen say “misteryo.” Oniay kuanto nipaakar ed my·steʹri·on: “Diad [Kristianon Griegon Kasulatan] mangipapatnag itan, na aliwan bengatlan agnatalosan (a singa ed salitan Ingles), balet say kabaliksan na satan a salita et labas ed pakatalos na natural ya abilidad na too, a nipatalos labat diad Madibinon panangiparungtal, tan nipakabat diad paraan tan panaon ya inggetar na Dios, tan ed saraman labat so aliwawaan na Espiritu To. Diad kaslakan a pantalos et say misteryo et ipapasabi toy abayan pikakabat; say Makasulatan a kabaliksan to et niparungtal a katuaan. Kanian no saray terminon nagkalalo lan nisisiglaot ed satan a tema et ‘inpakabat,’ ‘inpatnag,’ ‘inparungtal,’ ‘inpulong,’ ‘atalosan,’ ‘inkayat.’”
3. Panon a midumaan so Kristianon kongregasyon ed inmunan siglo ed misteryoson relihyoso iran grupo?
3 Ipapabitar na sayan eksplinasyon so baleg a pandumaan ed baetan na misteryoson relihyoso iran grupo ya inmuso ed inmunan siglo tan say kapkapanporman Kristianon kongregasyon. Bangta saramay balon membro ed saray maamot a kulto so mabetbet a nisisilong ed samba na ag-iyesel pian naalwaran daray relihyoson bangat, saray Kristiano so agbalot nisilong ed ontan a panameget. Tua a sinaglawi nen apostol Pablo a ‘kakabatan na Dios ed inkamisteryo,’ a tatawagen to itan ya “in[y]amot a kakabatan,” salanti, niyamot manlapud “saray manuley ed saya a mundo.” Ag-itan niyamot ed saray Kristianon akapangiparungtalan diad panamegley na espiritu na Dios ta pian nipalapag da itan.—1 Corinto 2:7-12; ikompara so Uliran 1:20.
Abidbir so “Sagradon Sekreto”
4. Siopa so akasentroan na “sagradon sekreto,” tan panon?
4 Nisesentro ed si Jesu-Kristo so “sagradon sekreto” nen Jehova. Oniay insulat nen Pablo: “Impakabat to [nen Jehova] ed sikatayo so misteryo na linawa to, unong ed apaabig to a sikato so ninonot to ed sikaton dili. Say kipaakaran na pamaakaran a pakasumpal na saray panaon, say panagtipon ed saray amin a bengatla ed Kristo, na saray bengatlan wala ed tawen, a singa met saray wala ed tapew na dalin; dia ed sikato, kuanko.” (Efeso 1:9, 10) Lalon ispisipikoy Pablo nipaakar ed klase na “sagradon sekreto” sanen indanet to so pankaukolan ta “pian nakabatan da so misteryo na Dios, a salanti si Kristo.”—Colosas 2:2.
5. Anto so sasaglawien na “sagradon sekreto”?
5 Balet, dakel ni nasasaglawi, ta say “sagradon sekreto” et sakey a sekreton walaan na dakel a nengneng. Aliwa labat lan panangipaamtan si Jesus so insipan a Bini odino Mesias; lalaktipen toy betang a nipabtang ed sikaton sumpalen ed gagala na Dios. Lalanoren toy mangatatawen a gobierno, say Mesianikon Panarian na Dios, a malinlinew ya insalaysay nen Jesus sanen imbaga to ed saray babangatan to: “Ed sikayo niiter ya amtaen yo so saray misteryos na panarian na tawen, ingen ed sikara agniiter.”—Mateo 13:11.
6. (a) Akin a susto so pangibagan say “sagradon sekreto” so “nisimpen ed kaitlekan na ando lan ando a panaon”? (b) Panon itan a kalkalnan niparungtal?
6 Andukey a peryodo na panaon so kaukolan ya onlabas manlapud inmunan impanalambit ed gagala na Dios a mangitarok na basiyan parad Mesianikon Panarian anggad “say misteryo na Dios . . . so nasumpal.” (Apocalipsis 10:7; Genesis 3:15) Say kitatarok to’d kasumpalan so nagawa diad kiletneg na Panarian, a papaneknekay pangikompara’d Apocalipsis 10:7 tan 11:15. Diad tua et 4,000 taon lay linmabas manlapud inkiiter na sankaunaan a sipan diad Eden a nipaakar ed Panarian anggad kiyapireng na Nidesignan-Ari nen 29 K.P. Sananey nin 1,885 a taon so linmabas sakbay a niletneg so Panarian ed katawenan nen 1914. Kanian say “sagradon sekreto” so kalkalnan niparungtal ed loob na peryodon ngalngali 6,000 taon. (Nengnengen so pahina 16.) Talagan susto si Pablo ed impangibaga to nipaakar ed “inkipuyan na misteryo a nisimpen ed kaitlekan na ando lan ando a panaon. Bangbalet nipatnag natan.”—Roma 16:25-27; Efeso 3:4-11.
7. Akin a nawalaan tayo na sigpot a kompiyansa ed matoor tan makabat ya aripen a klase?
7 Miduma ed totoo, a limitado labat lay bilay da, agbalot nagigipit si Jehova lapud panaon pian iparungtal laray sekreto a mas masasakbay. Sayan katuaan so mangamper ed sikatayo ed pagmaliw ya agmakankaanos sano walaray tepet ed Biblian agni nipaliwawa ed kaplesan unong ed panlabayan tayo. Say inkamapaabeba ed biang na matoor tan makabat ya aripen a klase, a niganggan a managano ed Kristianon sankaabungan ed dugan panaon, so mangaamper ed sikaran sipapalakbat ya unaan tan bengatbengat a palbengan iray bengatlan aliwa nin malinew. Panbabanikelan na aripen a klase a paliisan so pagmaliw a dogmatiko. Mapaabeban tuloy so aripen a klase ed pangaksobi ran agda naebatan ya amin so tepet, a lawas sinononot ed Uliran 4:18. Balet ta makapaliket a naamtaan a si Jehova, diad dilin panaon tan paraan to et ituloy toy pangiparungtal ed saray sekreto to no nipaakar ed saray gagala to! Agtayon balot magmaliw ya agmakankaanos ed uksoyan nen Jehova, a palpalaran ya uunaan lay Manangiparungtal na saray sekreto. Agaylan makapaseguro so pakaamtan say uusaren nen Jehova a paralanan et agto gagawaen itan! Satan so namparan matoor tan makabat.—Mateo 24:45; 1 Corinto 4:6.
Say Sekreton Niparungtal so Kaukolan a Nibaga!
8. Panon tayon amta a say “sagradon sekreto” et naipakabat?
8 Ag-ipaparungtal nen Jehova so “sagradon sekreto” to insan iyamot labat na saray Kristiano. Kaukolan itan a naipakabat, a mitunosan ed indatak nen Jesus a prinsipyo parad amin a papatumbok to—aliwa lambengat parad pigaran klerigo: “Sikayo so silew na mundo. Say sakey a syudad a nipasen ed tapew na sakey a pokdol agnayarin yamot. Tan agmet selselan na totoo so sakey a lamparaan, et insan da iyan ed silong na salop, noag dia ed panangitoonan; et sindagan toray amin a wala ed loob na abung. Ontan met pasindagen yo komon so silew yo ed arap na saray totoo; pian nanengneng da so saray maong a gawa yo, et galgalangen da so Ama yo a wala ed tawen.”—Mateo 5:14-16; 28:19, 20.
9. Anto so mamapaneknek a si Jesus et aliwan rebeldi, a singa ibabaga na arum?
9 Si Jesus so andiay getman onsumpa a magunaet a mamorma na maamot ya organisasyon na papatumbok ed pangegemtan na saray nisekreton gagala. Diad libron Early Christianity and Society, insulat nen Robert M. Grant so depensa nipaakar ed asasakbay a Kristianos na komaduan-siglon apolohistan Justin Martyr: “No saray Kristianos et rebeldi ra, manamot-amot ira komon ta pian nadampot day kalat da.” Balet panon a saray Kristiano et “nanamot-amot” tan kabansag na satan et sikaray singa “sakey a syudad . . . ed tapew na sakey a pokdol”? Agdan balot sinalin iyamot so liwawa ra ed silong na panagsukat a baskit! Kanian, agkaukolan a takotan na gobierno so kimey da, sayan managsulat so manidiskribi’d sikara bilang “sankaabigan ya alyado na empirador diad kipaakaray kareenan tan maong ya uksoy.”
10. Akin ya agkaukolan ya iyamot na Kristianos so pakabidbiran da?
10 Aglabay nen Jesus ya isekreto na saray babangatan to so pakabidbiran da bilang membro na nikuan a relihyoson sekta. (Gawa 24:14; 28:22) Say agpakapangisindag na liwawa tayo natan so agmakapaliket ed si Kristo tan ed Ama to, say Manangiparungtal na saray sekreto, tan ag-itan mamaliket ed sikatayo.
11, 12. (a) Akin a pilalek nen Jehova a say Inkakristiano et naipakabat? (b) Panon ya impanengneng nen Jesus so suston alimbawa?
11 “Aglabay [nen Jehova] a wala so siopaman a natawtaw noag ingen amin komon nagegemtan da so panagsibkel.” (2 Pedro 3:9; Ezequiel 18:23; 33:11; Gawa 17:30) Say basiyan na kaperdonay kasalanan na magbabawin totoo et say pananisia ed dondon bagat nen Jesu-Kristo, ya inter toy inkasikato bilang dondon parad amin—aliwa lambengat a parad pigara—ta pian “siopaman a manisia ed sikato agnatawtaw, noag ingen wala so bilay ton andi-anggaan.” (Juan 3:16) Importantin tulongan iray totoo a mangala na nakakaukolan a kundang ta pian onkualipika ira ed kaukom bilang karnero, ya aliwan kanding, diad onsabin panangukom.—Mateo 25:31-46.
12 Agkaukolan ya iyamot so tuan Inkakristiano; kaukolan ya ipakabat itan diad amin a matukoy a paraan no nayari. Impanengneng a mismo nen Jesus so suston alimbawa. Sanen tinepetan na atagey a saserdote nipaakar ed saray babangatan to tan ed bangat to, inkuanto: “Nansalita ak dia ed maparungtal ed mundo; nanbangat ak a naynay ed saray sinagogas, tan ed templo, a diman so pantitiponan na saray amin a Judios; et anggapo so sinalitak ed amot.” (Juan 18:19, 20) Nisesengeg ed sayan akauna lan agawa, anto ni nayarin isipen na toon matakot-ed-Dios pian iyamot toy mensahen inyabawag na Dios a nepeg ya iyabawag ed publiko? Siopa so makpel a mangiyamot ed “tombok na kakabatan” a mamaarap ed magnayon a bilay? No ontan et pagmaliwen toran singa relihyoson mansimpisimpitan ed inmunan siglo.—Lucas 11:52; Juan 17:3.
13. Akin a manpulong tayo ed amin a pankanawnawa?
13 Komon ta anggapon balot so makapangibagan sikatayon Tastasi nen Jehova et inyamot tayoy mensahe na Panarian! Balanglan awaten odino andi so mensahe, nepeg a naamtaan na totoo a satan so nipupulong la. (Ikompara so Ezequiel 2:5; 33:33.) Anamoten tayo sirin so amin a pankanawnawan isalita so mensahe na katuaan ed amin, inermay pakaabetan tayo ed sikara.
Pangyan na Saray Taga ed Panga nen Satanas
14. Akin ya agtayo masuyat ed pagmaliw a maparungtal ed panagdayew tayo?
14 Diad dakel a pasen et saray Tastasi nen Jehova so magmamaliw a lalon sentro na medya. Mipadpara’d agawa ed asasakbay a Kristianos, mabetbet a nababaloan ira tan nibibilang ira ed kategoryay kuestionablin relihyoson kulto tan maamot ya organisasyon. (Gawa 28:22) Agta say maparungtal a panagpulong tayo et lalon sengegay pakaataki ed sikatayo? Maseguron agmakabat, tan agkatutulok ed konseho nen Jesus, ya iyan tayoy inkasikatayo ed leet na agnakakaukolan a kontrobirsya. (Uliran 26:17; Mateo 10:16) Balet, say makagunggunan kimey a panangipulong na Panarian tan pananulong ed totoon napaaligwas day bilay da so nepeg ya ag-iyaamot. Ta mangiglogloria itan ed si Jehova, a mangitatandoro ed sikato, nipapaarap so imano ed sikato tan ed niletneg lan Panarian to. Say agano nin makapalikliket ya ikikiwas ed katuaan na Biblia ed Mamabukig a Europa tan arum a kabiangay Aprika so nisesengeg ed apadaak ya inkamaparungtal na katuaan a nipupulong ditan.
15, 16. (a) Antoray gagalan kanaan na pagmamaliw tayon parungtalan tan iyaaligwas ed espiritual, balet kasin saya so panpagaan? (b) Akin a mangiiyan si Jehova na saray taga ed panga nen Satanas?
15 Tua a say parungtalan a panpupulong na Tastasi nen Jehova, say espiritual a paraison panggagayagaan da, tan say iyaaligwas da—nampara diad saray komikimey tan materyal a kaykayarian—et naiimano. Bangta manasagyat ed saray matuan impanpuso, saraya balet so pansyodotan na saray sumusumpa. (2 Corinto 2:14-17) Diad tua, sayan iyaaligwas so diad kaunoran et sagyaten toray puersa nen Satanas a mangataki ed totoo na Dios.
16 Kasin saya so panpagaan? Andi no unong ed propesiya nen Jehova a naromog ed Ezequiel kapitulo 38. Ipapasakbay toy nipaakar ed Gog na Magog, a manidiskribi ed Satanas a Diablo nanlapulad inkibasileng to ed kabangibangan na dalin kayari inkiletneg na Panarian nen 1914, a mangidaulo’d panangataki ed totoo na Dios. (Apocalipsis 12:7-9) Oniay ibabaga nen Jehova ed Gog: “Et inkuan mo naani, ontatdang ak naani ed dalin ya agbinakoran a pulok; onla ak naani ed saray wala ed pampainawa, a manaayam a mataletalek, ya amin da manaayam ira ya andian na saray bakor, tan anggapo met so balbalewet odino wangwangalan. Pian alaen ko so samsam tan mangalaak na degkem; pian ipawil ko so limam a sumpa ed saray abagbag a pasen a napanayaman la natan, tan sumpa ed baley a natipon a manlapu ed saray nasyon, ya akagamor na saray baka tan kayarian, a manayam ed pegley na dalin.” (Ezequiel 38:11, 12) Balet, ipapanengneng na bersikulo 4 ya agkaukolan a takotan na totoo na Dios iyan panangataki, lapud gawa itan nen Jehova. Balet akin ya abuloyan itan na Dios—on, pasulagen ni ingen—so impasyan panangataki ed totoo to? Diad bersikulo 23 nabasa tayoy ebat nen Jehova: “Pasantoen ko so inkasiak lanlamang, tan ipakabat ko naani so inkasiak lanlamang ed pakanengneng na dakel a nasyon; et naamtaan da ak naani a siak si Jehova.”
17. Panon so panmoria tayo ed asingsingger lan pangataki nen Gog?
17 Kanian, imbes a manbilay a natatakot ed pangataki na Gog, maniilalo iray totoo nen Jehova tekep na panatalaran ed sayan kaaruman nin kasumpalan na propesiya na Biblia. Agaylan makapaliket so pakaamta a diad kiyaligwas tan kabendisyon na nanengneng ya organisasyon to et mangisesengat si Jehova na saray taga ed panga nen Satanas tan sikatoy nitotonton kaiba so militar a puersa to dia pakatalo ra!—Ezequiel 38:4.
Mas ni Natan nen say Kapiganman!
18. (a) Anto lanlamang so namomoriay dakel a totoo natan, tan akin? (b) Panon ya onkakanan mabiskeg a motibasyon ed sikatayo so reaksion natan ed panangipulong na Panarian?
18 Mas mapalaway so Tastasi nen Jehova ed modernon panaon ed pangibabalikas da ed saray nibase’d Biblian panmoria ra, anggaman saya so agnagmaliw a popular. Diad loob na saray dekada et impasakbay da laray kapeligroan na pansigarilyo tan panangabuso ed druga, say inkamakulangkulang ed mapaulyan a panangipasal ed anak, saray mauges ya epekto na panligliwaan ya aleteb na sebel a sekso tan karawalan, tan say kapeligroan ed panangiyalis na dala. Nidadanet da met so agpantutunosan na teoryay ebolusyon. Ondarakel a totoo natan so mangibabagan, “Duga iray Tastasi nen Jehova.” No agtayo prangka ed publiko ed saray panmoria tayo, di ag-ira kinmiwas na onia. Tan ag-ibabaliwala so katuaan a diad panggawa na ontan a balikas et mangaala ira na kundang ed direksyon ed pangibabagan, “Matila ka Satanas; si Jehova manaya so susto.” Agaylan mabiskeg a motibasyon parad sikatayo a mantultuloy a tumboken so alimbawa nen Jesus, a mapublikon sasalitaen so katuaan!—Uliran 27:11.
19, 20. (a) Anton determinasyon so imbalikas na totoo nen Jehova nen 1922, tan kasin siansia nin onaaplika irayan salita? (b) Panon so kaukolan a panmoria tayo ed “sagradon sekreto” nen Jehova?
19 Abayag lan atalosan na Tastasi so obligasyon da ed sayan pamaakaran. Diad sakey a makatantandan kombension nen 1922, si J. F. Rutherford, say presidenti ed saman na Watch Tower Society, so anagyat ed saray dumerengel to diad impangibagan: “Manseryoso, manlikas, manalisto, manpakpel. Magmaliw a matoor tan tuan tastasi parad Katawan. Onabantin mibakal anggad amin a pakabidbiran ed Babilonia so mankibalatar. Iyabawag so mensahe ed amin a lugar. Nepeg a naamtaan na mundo a si Jehova so Dios tan si Jesu-Kristo et Ari na arari tan Katawan na kakatawan. Saya so agew na amin ya agew. Nia, manuuley lay Ari! Sikayoray manangipalapag ya ahentes to. Kanian iyabawag, iyabawag, iyabawag, so Ari tan say panarian to.”
20 No panon ya importanti irayan salita nen 1922, agdi mas lalo diad 75 a taon ed saginonor, sanen say kiparungtal nen Kristo a bilang Ukom tan Manangibales so asingsingger la! Say mensahe na niletneg lan Panarian nen Jehova tan ed espiritual a paraison panggagayagaan na totoo na Dios so sakey a “sagradon sekreto” ya ontanlan importanti ta pian iyamot. No panon a si Jesus a mismo et malinlinew ton imbaga, nepeg a saray patumbok to, tekep na tulong na masanton espiritu et magmaliw a tastasi ed “angga ed kasampotan na dalin” nipaakar ed manunan pasen to’d magnayon a gagala nen Jehova. (Gawa 1:8; Efeso 3:8-12) Diad tua, bilang ariripen nen Jehova, say Dios a mangipaparungtal na saray sekreto, agtayo sasalien ya iyamot iyan sekreto ed inkasikatayo!
Panon Yon Ebatan?
◻ Anto so “sagradon sekreto”?
◻ Panon tayon amtan nepeg itan a nipalapag?
◻ Anto so sengegay pangataki nen Gog ed totoo nen Jehova, tan panon tayon moriaen iya?
◻ Anto so nepeg a determinadon gawaen na balang sakey ed sikatayo?
[Kahon ed pahina 16]
“Sagradon Sekreto” a Kalkalnan Niparungtal
◻ Kayari 4026 K.K.P.: Insipan na Dios a pawalaey sakey a Binin maneral ed si Satanas.—Genesis 3:15
◻ 1943 K.K.P.: Apekderan so Abrahamikon sipanan, ya isisipan a say Bini so manlapud Abraham.—Genesis 12:1-7
◻ 1918 K.K.P.: Kianak nen Isaac bilang mananawir ed sipanan.—Genesis 17:19; 21:1-5
◻ c. 1761 K.K.P.: Pinekderan nen Jehova a say bini et onsabi ed panamegley na ilalak nen Isaac, si Jacob.—Genesis 28:10-15
◻ 1711 K.K.P.: Impatnag nen Jacob a say Bini so onsabi diad panamegley na ilalak ton si Juda.—Genesis 49:10
◻ 1070-1038 K.K.P.: Naamtaan nen David a say Bini et sakey a poli to tan manuley a maando bilang Ari.—2 Samuel 7:13-16; Salmo 89:35, 36
◻ 29-33 K.P.: Nipaamta si Jesus bilang say Bini, say Mesias, say arapen ya ukom, tan say Nidesignan-Ari.—Juan 1:17; 4:25, 26; Gawa 10:42, 43; 2 Corinto 1:20; 1 Timoteo 3:16
◻ Imparungtal nen Jesus a walaray nakaiba ton manuley tan ukom, a say mangatatawen a Panarian so nawalaan na mangaraldalin ya uuleyan, tan amin a papatumbok to so kaukolan a magmaliw a managpulong na Panarian.—Mateo 5:3-5; 6:10; 28:19, 20; Lucas 10:1-9; 12:32; 22:29, 30; Juan 10:16; 14:2, 3
◻ Imparungtal nen Jesus a say Panarian so niletneg ed sakey a pihon panaon, a singa pepekderan na saray ebento ed mundo.—Mateo 24:3-22; Lucas 21:24
◻ 36 K.P.: Naamtaan nen Pedro a walaray aliwan-Judion magmaliw met a minanawir ed Panarian.—Gawa 10:30-48
◻ 55 K.P.: Isasalaysay nen Pablo a saray minanawir ed Panarian so napaoli ed inka-imortal tan ag-inkabulok legay kiwawala nen Kristo.—1 Corinto 15:51-54
◻ 96 K.P.: Si Jesus, a manuuley la ed alanaan a papatumbok to, so angiparungtal a say pinal a bilang da et 144,000.—Efeso 5:32; Colosas 1:13-20; Apocalipsis 1:1; 14:1-3
◻ 1879 K.P.: Ituturo na Zion’s Watch Tower so 1914 bilang taon a makatantanda ed kasumpal na “sagradon sekreto” na Dios
◻ 1925 K.P.: Isasalaysay na The Watch Tower a say Panarian et nianak nen 1914; say “sagradon sekreto” nipaakar ed Panarian so nepeg a nipalapag.—Apocalipsis 12:1-5, 10, 17
[Saray litrato ed pahina 15]
Singa say Lider da, si Jesus, mapublikon iyaabawag na Tastasi nen Jehova so Panarian nen Jehova