Anggapoy Kareenan Parad Palson Mensaheros!
“Saray manggawa na mauges napater ira . . . Ingen ta saray mauyamo tawiren da naani dalin, tan manliket ira a dili ed inkadaakan na kareenan.”—SALMO 37:9, 11.
1. Akin a nailaloan tayo a walaray mensahero, namparan tua tan palso, diad “panaon na kasumpalan”?
MENSAHEROS—palso odino tua? Parihon wala iratan ed panaoy Biblia. Balet komusta ed agew tayo? Diad Daniel 12:9, 10, nabasa tayo ditan ya imbaga na mangatatawen a mensahero ed propeta na Dios: “Saray salita nakapotan ira tan natatakan ira angga ed panaon na kasumpalan. Dakel naani so managogol na inkasikara lanlamang, tan paputien da so inkasikara lanlamang, tan nalinisan ira; balet saray marelmeng manggawa ra naani na mareldelmeng; et anggapo ed saray marelmeng so makatalos naani; balet saray makabat so makatalos ira naani.” Manbibilay itayo la natan ed satan a “panaon na kasumpalan.” Naiimano tayo ta so mapatpatnag a pandumaan na “saray marelmeng” tan “saray makabat”? Maseguron naiimano tayo la!
2. Panon so kasusumpal natan na Isaias 57:20, 21?
2 Diad kapitulo 57, bersikulo 20 tan 21, nabasa tayoray salita na mensahero na Dios a si Isaias: “Balet saray marelmeng singa ra saray nagulo a dayat; ta agto nayarian so onlinak tan saray danum to mangibontok ira na pitek tan dutak. ‘Anggapo so deen,’ kuan na Dios ko, ‘ed saray marelmeng.’” Agaylan matukotukoy irayan salita a maniskribi ed sayan mundo legan ya iyaasingger to’d koma-21 siglo! Itetepet ni ingen na arum, ‘Nasabi tayo ni kasi itan a siglo?’ Anto kasi kaukolan ya ibaga ed sikatayo na makabat a mensaheros?
3. (a) Anton pandumaan so naagwat ed 1 Juan 5:19? (b) Panon so kadidiskribi na “saray makabat” ed kapitulo 7 na Apocalipsis?
3 Walaan si apostol Juan na aralem a pakatalos ya impuyan na Dios. Diad 1 Juan 5:19, nabasa ditan: “Amta tayo a kien itayo na Dios tan say sankamundoan mandokdokol ed kaugsan.” Misunian ed sayan mundo et wadtan iray 144,000 ya espiritual ya Israelitas, ontatatken a nakdaan a wala ni ed limog tayo. Kaiba da natan et say “baleg ya ulop . . . nanlapu ed balang nasyon tan amin na saray kailalakan,” a walaay bilang natan a masulok a limaran milyon, a walaan met na aralem a pakatalos. “Saraya sikara so nanlapu ed baleg ya irap.” Tan akin a sikaray ontanlan atumangan? Lapud “inorasan da [met] so kawekawes da, tan sikara so pinapoti ra ed dala na Kordero,” diad pangaagamil na pananisia ed dondon bagat nen Jesus. Bilang mensaheros na liwawa, “panlilingkoran da [met so Dios] ed agew tan labi.”—Apocalipsis 7:4, 9, 14, 15.
Mankuan a Mensaheros na Kareenan
4. (a) Akin a saray mankuan a mensahero na kareenan ed mundo nen Satanas so niganan onsaew? (b) Panon ya onaplika natan so Efeso 4:18, 19?
4 Balet komusta iramay mankuan a mensaheros na kareenan diad minumundon sistema nen Satanas? Diad Isaias kapitulo 33, bersikulo 7, oniay nabasa tayo: “Nia, saray mabayani ra manakis ira ed paway; saray embahador na panpapakna mannangis ira na ampaipait.” Agaylan tua iya ed saramay natatarantan onloob manlapu ed sakey a kabisira na mundo anggad sananey a manggugunaet ya itarok so kareenan! Agaylan kaapaan! Akin? Ona a ta say aasikasoen da et saray sintoma na sakit na mundo imbes komon a say lamut. Unona ed amin, bulag ira ed kiwawala nen Satanas, a didiskribien nen apostol Pablo bilang “say dios na sayan panaon.” (2 Corinto 4:4) Angitanem si Satanas na bini na karelmengan ed sankatooan, a sengegay dakel natan, pati ed dakel a manuley, ya ontukoy ed ibabaga na Efeso 4:18, 19: “Abilungetan so kalakal da, a niarawi ra ed bilay [a kien, NW] na Dios, lapu ed agpikakabat a wala ed sikara, a nisengeg ed yaawet na puso ra. A diad inkamaunor da ed liknaan et inter da so inkasikara a dili ed kaalakan na laman, pian gawaen da a siaagap so amin a nengneng na karumsisan.”
5. (a) Akin ya onsasaew iray organisasyon na too bilang manamawalay kareenan? (b) Anto so makaligliwan mensahen ipapasabi na Salmo 37?
5 Agnaekal na dinanman ya ahensya na ag-ayadyarin totoo ed kapusoan na too so agum, inkasiblet, tan say gula ya ontanlan kasmak natan. Say Manamalsa tayo labat, say Soberanon Katawan a Jehova, so makagawa ed satan! Sakey ni, saray mauyamo labat, pigpigara labat ed limog na katooan, so mabulos a paigigiya ed sikato. Say pansumpalan da tan ed saray marelmeng na say mundo so impankomparaan na Salmo 37:9-11: “Saray manggawa na mauges napater ira; balet saray manalagar ed Jehova tawiren da so dalin. Ta wala ni so daiset, et say bagel onandi . . . Ingen ta saray mauyamo tawiren da naani dalin, tan manliket ira a dili ed inkadaakan na kareenan.”
6, 7. Anton rekord na saray relihyon ed mundo so mangipapanengneng a sinmaew a manlingkor bilang mensaheros na kareenan?
6 Kanian, naromog kasi iray mensahero na kareenan ed saray relihyon na sayan mansasakit a mundo? Bueno, anto ta so rekord la na relihyon anggad kaplesan? Ipapanengneng na awaran a dakel lan siglon mibibiang so relihyon, on, sikato ni ingen so manangisugsug ed dakel a panagpaagos-na-dala. Alimbawa, nipaakar ed report na gulo dima’d datin Yugoslavia, oniay kuan na The Christian Century ed simba na Agosto 30, 1995: “Diad Bosnia a kontrolado na saray Serb, manyudyurong iray pari ed arap a dasig na parliamento, tan sikara met so manunaan a mamebendisyon ed saray sundalo tan ontan met ed saray ayura sakbay na panbabakal.”
7 Agmet marakep so resulta na sakey siglon kimey na saray misioniro na Kakristianoan ed Aprika, a singa apaneknekan a tuloy na agawa ed Rwanda, sakey a dalin a manga 80 porsiento so Katoliko. Impakabat na The New York Times a Hulyo 7, 1995: “Plano na Golias, sakey a liberal, Katoliko a magasin a nipalapag diman ed Lyons [Pransya], ya iwalwal iray 27 nin papari a taga-Rwanda tan apatiran madre ya inkuanton amatey odino angisugsug na panagpatey diad Rwanda ed imbeneg a taon.” Oniay komento na African Rights, organisasyon na saray kanepegan na too dima’d London: “Aliwa lambengat a say impanpareen na saray iglesia so eebatan da, noagta aktibo nira ingen so arum ed pibabali na papari, pastor tan madre ed palanit a panagpatey.” Miparpara iya ed samay situasyon dima’d Israel sanen say tuan mensahero nen Jehova a si Jeremias so aniskribi ed ‘kababaingan’ na Israel, pati saray manuley, saserdote, tan propeta to, insan to inkuan: “Ed saray kawes mo naromog so dala na saray kamarerwa na saray duka ya andi kasalanan.”—Jeremias 2:26, 34.
8. Akin a naibaga a si Jeremias et sakey a mensahero na kareenan?
8 Mabetbet a natatawag si Jeremias a propeta na panangukom, balet matukoy met a sikatoy natawag a mensahero na kareenan na Dios. Tinukoy to so kareenan a singa kabetbet na impanukoy nen Isaias ya akauna nen sikato. Inusar nen Jehova si Jeremias, a mangukom ed Jerusalem, a kuanto: “Saya a syudad sikato nensaman ed sika so makasagyat na sanok ko tan petang ko a nanlapu ed agew ya inpangipaalagey da ed sikato angga ed saya lanlamang ya agew; pian ekalen ko komon ed arap na lupak, lapu ed amin ya inkauges na saray anak na Israel tan saray anak na Juda, a sikato so ginawa ra a panagyat ed siak a manpasnok, sikara, saray ar-ari ra, saray prinsipi ra, saray saserdote ra, tan saray propeta ra, tan saray totoo na Juda, tan saray manayam ed Jerusalem.” (Jeremias 32:31, 32) Inlitrato na saya so panangukom nen Jehova ed saray manuley tan klero na Kakristianoan natan. Pian niwala so tuan kareenan, nepeg a naekal irayan manangisugsug na kaugsan tan karawalan! Maseguron aliwa iran mensahero na kareenan.
Say NU Manamawala Ta na Deen?
9. Panon a nibabaga na NU a sikatoy sakey a mensahero na kareenan?
9 Agta nayarin magmaliw a tuan mensahero na kareenan so Nayones Unidas? Tutal, unong ed preambulo na karta to, a nisubmiti nen Hunyo 1945, 41 agew labat sakbay a dineral na bomba atomika so Hiroshima, so angibagan say gagala to: “pian isalba so manutumbok iran kailalakan manlapud ot-ot na guerra.” Apanpapaknaan na 50 iran prospektibon bansa na Nasyones Unidas a “pankakasakeyen so biskeg [da] pian napansiansia so internasyonal a kareenan tan kaligenan.” Natan et 185 a nasyon so membro na NU, a nikuan a didikado ed parihon gagala.
10, 11. (a) Panon a nibebesngaw na saray relihyoson pangulo so pananuporta ra ed NU? (b) Diad anton dalan a lingon inrepresinta na saray papa so “Maong a Balita na Panariay Dios”?
10 Diad ilalabas na taotaon, makmakbaw so pangidadayew ed NU, nagkalalolan manunaan iray relihyoson pangulo. Nen Abril 11, 1963, pinirmaan nen Papa Juan XXIII so sulat to ed saray obispon apauloan na “Pacem in Terris” (“Kareenan ed Dalin”), ya angikuanan to: “Impapuson pirawat min ontalonay organisasyon a Nasyones Unidas—say pinagkasangal tan paraan to—a mangipakurang ed dakerakel tan atagey a trabaho to.” Diad saginonor, nen Hunyo 1965, sinelebraan na saray relihyoson pangulo, a nikuan a mangilalaman ed kapalduay populasyon na mundo, so koma-20 inkiyanak na NU dima’d San Francisco. Ontan met nen 1965, diad impanbisita ed NU, inkuan nen Papa Pablo VI a satan so “say kaunoran ya ilalo na pankakasakey tan kareenan.” Nen 1986, akikoopera si Papa Juan Pablo II ed pangiyalibansa ed UN International Year of Peace.
11 Aminsan ni, diad indalaw to nen Oktubre 1995, inyabawag na papa: “Seselebraan tayo natan so Maong a Balita na Panarian na Dios.” Balet peteg ta a sikatoy mensahero na Dios ed maong a balitay Panarian? Nipaakar ed saray problema na mundo, intuloy ton inkuan: “Legan ya aarapen tayo irayan ankakabaleg ya angat, sarag tayo ta ya agbidbiren so betang na Organisasyon na Nasyones Unidas?” Say NU, imbes di say Panariay na Dios, so labay na papa.
Saray Rason ed ‘Pannangis ya Ampaipait’
12, 13. (a) Panon so inkiwas na NU ed dalan na impakadiskribi ed Jeremias 6:14? (b) Akin a say panangidaulo na NU so nilaktip ed deskripsion na Isaias 33:7?
12 Diad impanselebra ed koma-50 ya anibersaryo na NU, anggapo so niparungtal a peteg ya ilalon “kareenan ed dalin.” Say sakey a rason et lapud insalaysay na managsulat na The Toronto Star na Canada, a kuanto: “Say N.U. so sakey a leon a ngileb, a managlem sano nipaarap ed inkaruksa na too, balet ta kaukolan ton alagden iray membro ton mangiyan ed postiso to sakbay a mangetket.” Agmakaketket a maong tan matantan a tuloy. Saray mensahero na kareenan ed peles a sistema na mundo, tan nagkalalo la ed saramay walad Kakristianoan, so mangikekelyaw ed saray salita na Jeremias 6:14: “Tinambal da met so babag na baley ko ed alenlemew, a kuan da, ‘Deen, deen; anta anggapo so deen.’”
13 Anggapoy duaruwan masimoon ya amasya iray nantutumbokan a sekretaryo-heneral na NU ta pian ontalona so NU. Balet ag-ontalona ta naynay a pansusuppiatan na 185 a membron walaay nanduruman panaglimita ed saray ayura, totontonen, tan panangusar ed pundo to. Diad tinaon a report to nen 1995, insulat na peles a sekretaryo-heneral a say pamapakepa ed “takot na sankagloboan a nuklear a bakal” so mangiter ed “saray nasyon [na pankanawnawa] a mantutulongan ed iyaligwas na ekonomiko tan sosyal parad intiron sankatooan.” Balet inyarum to ni: “Makapaermen, saray agawgawa ed mundo ed apalabas a pigaran taon et ginawa ran pabes iramay iilaloan.” Peteg, ‘manangis ya ampaipait’ iyan nikuan a magmaliw a mensaheros na kareenan.
14. (a) Akin a naibaga a say NU et namparan lugi ed pinansyal tan moral? (b) Panon so kasusumpal na Jeremias 8:15?
14 Sakey a paunan-balita diad The Orange County Register na California so pakabasaan na onia: “Lugi So N.U. Ed Pinansyal Tan Moral.” Inkuan na artikulo a diad baetan na 1945 tan 1990, wala la so masulok a 80 bakal, ya anigway ed masulok a 30 milyon a bilay. Inaon to so sakey a managsulat ed Oktubre 1995 a paway na Reader’s Digest a “nandiskribi ed saray operasyon militar na NU bilang pakabidbiran na ‘anggapoy nayarian iran komander, anggapoy aral a sundalo, alyansa ed saray managlusob, isasaew a pangamper ed karumsisan tan no maminsan et manataktakot ni ingen ed sikara.’ Niarum ni, ‘alabas lay laknab na panagdarak, panagtila, tan panangabuso.’” Diad sakey a seksion ya apauloan na “Say N.U. Kayari 50 Taon,” walaay paunan-balita so The New York Times na “Lingon Panangimaneho tan Panagdarak so Manederal ed Saray Sankarakpan a Gagala na N.U.” Say The Times na London, England, ya apauloan na sakey ya artikulon, “Makapkapuy so Taon a Limamplo—Kaukolan a man-ehersisyo so NU pian ombiskeg.” Diad tua, ontan so nabasa tayo ed Jeremias kapitulo 8, bersikulo 15: “Inanap tayo so deen, balet anggapo so maong a sinmabi; tan panaon na katatambal, et nia, kapunaw!” Tan siansian kasesesgaan na katooan so nuklear a pakapalanit. Malinew, aliwan say NU so mensahero na kareenan a nakakaukolan na katooan.
15. Panon a napapaneknekan a say Babilonia tan saray relihyoson ilalak to et namparan makaderal tan makaelew?
15 Anto so pawayan na sayan amin? Malinlinew so ebat na mapropetikon Salita nen Jehova. Unona ed amin, anto so manatalaran ed palson relihyon ya ontanlan pirmin mikakaaro ed NU? Saksakey so nanlapuan na sarayan ilalak, kadaanan a Babilonia. Matukotukoy, nadidiskribi ira diad Apocalipsis 17:5 bilang “Babilonia a Baleg, ina na saray balangkantis tan saray karimdimla dia ed dalin.” Diniskribi nen Jeremias so pakaderal na sayan mansimpisimpitan ya organisasyon. Singa sakey a balangkantis, lalarakan toray politiko na dalin, aamoyoten so NU tan mirerelasyonan ed saray akimembron mapolitikan pakayari. Akibiang a tuloy ed saray bakal ed awaran. Inkuan na sakey a komentarista nipaakar ed relihyoson panbabakal ed India: “Tinukoy nen Karl Marx so relihyon ya opium na totoo. Balet aliwan tua itan ta say opium et makaelew, paugipen toray totoo. Imbes say relihyon so singa say puron cocaine. Mangipapaway na makaderal a karawalan tan makaderal a tuloy a puersa.” Balet aliwan tanton susto iman a managsulat. Namparan makaelew tan makaderal so palson relihyon.
16. Akin a kaukolan a taynan la natan na matuan impanpuson totoo so Babilonia a Baleg? (Nengnengen met so Apocalipsis 18:4, 5.)
16 Anto sirin, so kaukolan a gawaen na matuan impanpuson totoo? Oniay ebat na mensahero na Dios a si Jeremias: “Ibatikan yo so pegley na Babilonia, tan ilaban na balang sakey so bilay to. . . . Ta panaon la na pangibales nen Jehova.” Alay liket tayo ta minilyon so tinmaynan la manlapud pangegemgem na Babilonia a Baleg, say imperyo na palson relihyon. Kasin sakey ka ed saraya? Sirin natalosan mon maong no panoy pangaapekta na Babilonia a Baleg ed nasyones na dalin: “Saray nasyon ininum da so alak to, kanian saray nasyon naatiwel ira.”—Jeremias 51:6, 7.
17. Anton panangukom so ipaakseb ed Babilonia a Baleg, tan antoy ontumbok kayari na satan a kiwas?
17 Agla mabayag, imaneobra nen Jehova so pangataki na saray “ambagel” a membro na NU ed palson relihyon, a singa inlitrato na Apocalipsis 17:16: “Busolen da so balangkantis, tan sikato so gawaen da a maermen tan labos-lakseb, tan kanen da so laman to, tan sikato so lablabasen dan poolan ed apuy.” Saya lay panandaan na gapo na baleg ya irap a tutukoyen na Mateo 24:21 tan mamantok itan ed Armagedon, say baleg ya agew na Makapanyarin-amin a Dios. Singa ed kadaanan a Babilonia, awaten na Babilonia a Baleg so dusa a nibalikas ed Jeremias 51:13, 25: “‘O sika a manayam ed tapew na na saray dakel a danum, a daakan iray kayamanan mo say kasumpalan mo sinmabi la, say sukat na inkaagum mo. Nia, sumpa ak ed sika, O bantay a manamagbag,’ kuan nen Jehova, ‘sika a maneral ed amin a dalin; et yunat ko naani so limak ed sika, tan ipelag ta ka naani a sakey a palandey a napoolan.’” Ontumbok met ed satan iray mauges, mahilig ed bakal a nasyones na palson relihyon ya onarap ed kadederal ed agew na panangibales nen Jehova ed sikara.
18. Kapigan tan panon so kasumpal ni na Isaias 48:22?
18 Nipaakar ed saray marelmeng, oniay kuan na 1 Tesalonica 5:3: “Sano ibabaga ray, ‘Kareenan tan andi paga!’ insan biglan kaderal so onsabi ed sikara, a singa pasakit na bii a malukon; tan ag ira makaliktar.” Saraya imay angibagaan nen Isaias: “Nia! . . . saray embahador na panpapakna mannangis ira na ampaipait.” (Isaias 33:7) Peteg itan, a singa nabasa tayo ed Isaias 48:22, “‘anggapo so deen,’ kuan nen Jehova, ‘ed saray marelmeng.’” Balet anton arapen so manatalaran ed saray mensahero na maridios a kareenan? Ibaga ed sikatayo na ontumbok ya artikulo.
Tepetepet a Panrepaso
◻ Diad antoran mabiskeg a salita ya inwalwal na saray propeta na Dios iray palson mensahero?
◻ Akin a saray organisasyon na too so sinmaew ed panasali ed magnayon a kareenan?
◻ Panon a midumaan iray tuan mensahero na kareenan ed saramay manusuporta ed NU?
◻ Anto so nepeg a gawaen na saray mauyamo pian napanggayagaan so insipan nen Jehova a kareenan?
[Saray litrato ed pahina 15]
Impasakbay di Isaias, Jeremias, tan Daniel so isaew na saray sagpot labat na too parad kareenan
[Litrato ed pahina 16]
“Say intiron mundo so mandukdukol ed pakayari na mauges.”—Say apostol Juan
[Litrato ed pahina 17]
“Wala ra ed kabilungetan.”—Say apostol Pablo