Say “Masanton Kawes na Trier”

TRIER, say sankabayagan a syudad ed Alemanya so maawaran ed loob lay 2,000 taon.a Diad loob na saray siglo et malet so pisisiglaotan na Trier ed Iglesia Katolika. Nen 1996 say katedral ed Trier so angiparayag na reliko ya apadisiran a kadaan na mismon syudad. Satan so atawag a Masanton Kawes na Trier.

Say kawes so 1.57 metro ed karukey tan 1.09 metro ed kaawang tan saray manggas to et kapaldua’d-dukey. Agawa itan ed kapes tan, unong ed si Hans-Joachim Kann ed libro ton Wallfahrtsführer Trier und Umgebung (Pilgrimage Guide to Trier and Surroundings), et nayarin insulong bilang akinpaway ya aysing. Papadisiran na arum a say petsa na orihinal ya aysing​—baleg a kabiangan to so inapiger tan pinaelet na arum iran abel ed loob na saray siglo​—ed linmabas a komadua odino inmunan siglo K.P. ni ingen. No susto so panagpetsa, antigo la itan sirin a kawes, makapainteres a piraso ed museum.

Balet, pepekderan na arum a satan ya aysing so aliwa labat lan nikadkaduma noagta masanto met​—kanian angaranan a Masanton Kawes. Lapud satan so andiay dait, a singa say pandalem ya insulong nen Jesu-Kristo. (Juan 19:23, 24) Ikuan na arum a say “Masanton Kawes” so diad tua et kien na Mesias.

Agnaseguro no panoy inkisabiy kawes ed Trier. Sasalambiten na sakey a palapagan a satan so “impresenta ed syudad nen emperatriz Helena, ina nen Konstantino a Baleg.” Isasalaysay nen Kann a say inmunan napanmatalkan a report ed inkiwala na kawes ed Trier so nanlapulad 1196.

Say kawes, a nisinop ed katedral, so mataltalag lan nipaparayag nanlapulad koma-16 siglo. Singa bilang, saya so agawa nen 1655, kayarin tampol na Talomplon Taon a Bakal, a satan so amairap ed Trier. Saray panaglako na pakanodnotan ed panagbiahi so naynay ya amarakel na kuarta.

Agawa so taloran panagbiahi ed “Masanton Kawes” ed sayan siglo​—nen 1933, 1959, tan 1996. Nen 1933 say panagbiahi et niyanunsio ed parehon agew ya inkaturo nen Hitler bilang chancellor na German Reich. Ipapaimano nen Kann a sayan impanbana ed duaran inkagawa a bansag so mangipapabitar ed kipapasey impanbiahi. Guaguardiaan na saray unipormadon tropa na Nazi iray managbiahi ed paway na katedral. Duara tan kapalduan milyon a totoo so akanengneng ed kawes ed satan a taon.

Impankompara nen Herbert, sakey a manaayam ed Trier ed loob na dakel a taon, so impanbiahi ed 1959 tan 1996. “Nen 1959 et apusek so karsada ed amin lawarin sukong, na saray puesto a manlalako na saray pakanodnonotan. Diad sayan taon say okasyon so mas mareen.” On, 700,000 labat so akanengneng ed kawes nen 1996, kulang na sakey milyon ed bilang nen 1959.

Akin ya Oonla Iran Onnengneng ed Kawes?

Idadanet na simbaan a say kawes so agnengnengen bilang bengatlan pandayewan. Ipapasen bilang simbolo so andiay-dait a kawes na pankakasakey na iglesia. Irereport na Frankfurter Allgemeine Zeitung a sanen inyanunsio so panbiahi, oniay inkuan nen Obispon Spital: “Say aggendat a situasyon ed mundo tayo so manasagyat ed sikatayon Kristiano a nawalaan na aggendat iran ebat. Kaukolan itayon sumpaey idaraak na panagbusol, karuksaan, tan karawalan.” Impaliwawa na obispo a say inengneng ed kawes so nepeg a mangipanonot ed sakey nipaakar ed pankakasakey.

Balet akin a nakaukolan ni so “Masanton Kawes” pian nipanonot ed sikatoy pankakasakey na iglesia? Panon to no naderal odino narotrot odino niwalwal so kawes bilang alig-alig labat? Nasigensigen kasi ed satan so pankakasakey na iglesia? Panon to iramay totoon agmakapanbiahi ed Trier? Agda kasi nononoten so pankakasakey ed limog na iglesia?

Anggapoy sasalambiten na Masanton Kasulatan a nakaukolan na saray Kristiano iray bengatlan mangipanonot ed sikara ed pankaukolan parad Kristianon pankakasakey. On, pinaseseg nen apostol Pablo iray Kristiano ed sarayan salita: “Manakar itayo lapu ed pananisia, aliwan lapud pakanengneng.” (2 Corinto 5:7) Say pankakasakey a panggagayagaan na tuan Kristianos so adiskribi bilang “pankakasakey na pananisia.”​—Efeso 4:11-13.

[Paimano ed leksab]