Panangebat ed Palson Panamakasalanan ed Pransya
AGANO NIN puntirya na palso iran panamakasalanan iray Tastasi nen Jehova diad Pransya. Diad impanganamot ed makapaermen iran ebento a kalalanoran na relihyoso iran kulto ed Europa tan Hapon, angikayat so media na pikewet ya impormasyon nipaakar ed Tastasi. Sikaray sililingon inlitrato bilang sakey ed sankabalgan tan sankapeligroan iran kulto.
Diad gunaet a napetek iray pamaakaran, angipalapag so Tastasi nen Jehova na sakey a tract ya angebat ed oniaran tepet: Sioparay Tastasi nen Jehova? Kristiano ta ira? Manpapatambal ta ira? Akin a mankakabkaabungan ira? Panon a gagastosan so kimey da? Panon a gugunggunaan na Tastasi nen Jehova so komunidad?
Say makaibangat a tract ed lenguahen Pranses so atituloan na Jehovah’s Witnesses—What You Need to Know. Ta pian makapangitilak na tract ed dakel a totoo no posibli, naorganisa so sakey a kampanya. Manlapud Mayo 13 ya anggad Hunyo 9, 1996, masulok a siameran milyon a kopya so nibunog.
Nandinayewan na dakel iyan tract, pati publikon opisyales. “Say panamalaw ya impaarap ed Tastasi nen Jehova so amasanok a tuloy ed siak,” insulat na konsehal ed rehyon kayari impakabasa ed tract. “Lawas kon aapresiaen so maaro tan andi-siblet ya ugali ed kimey yo.” Bilang ebat ed say tract, onia so insulat na sakey a membro na European Parliament: “Nibiig a maong na karaklan so grupo na Kristianos a pakabibilangan yo sumpad saramay kulto.”
Diad Brittany impanengneng na sakey a Tasi so tract ed sakey a pari, a mabulbulos ya angawat ed satan. “Nakomendaan ta kayo ed gagawaen yo,” inkuan na pari. Insan to inyarum: “Pasesegen ko ray mimimisa a patuloyen da kayo ed saray ayaman da tan pankapien da kayo. Saglawien yo ni ingen ed saraman so nakatongtong yo a sikayoy nanlapu ed abung ko. Labay ko met ya ibaga ed sikayon labalabay kon basaen iray publikasyon yo.”
Kayari impakaawat ed tract, sinulatan na sakey a lakin Protestanin taga-Alsace so Watch Tower Society pian paiyaralan na Biblia. “Abalang lay kompiyansak ed relihyon ko,” insulat to, “Onnenengneng ak ed arapen ed balon gapo na espiritualidad ko.” Anggaman ed palso iran panamakasalanan a no maminsan et nipapaarap ed sikara, saray Tastasi nen Jehova ed Pransya—on, diad amin a parti ed mundo—so mantutultuloy ya ontutulong ed totoo pian nawalaay suston pikakabat ed saray gagala na Dios, unong a nidatak ed Biblia.—2 Timoteo 3:16, 17.