Say Katuaan Nipaakar ed Impierno
ISASALAYSAY na sakey a report na komisyon parad doktrina na Church of England a say impierno et aliwa met manayan mandarlang a palbaan; imbes, satan so sakey teoritikal ya inkaanggapo. “Walaray dakel a rason ed sayan pananguman,” so insalaysay na report. “Balet say sakey ed saraya et say moral a panagprotesta manlalapud loob tan paway na Kristianon relihyon sumpad sakey a relihyon na katakotan, tan say liknaan ed inkilitrato na Dios a mangipapasen ed minilyon a magnayon a kapairap so misuniyan ed nipatnag ya aro na Dios a walad si Kristo.”
Sayan makapaalipanes a tradisyonal a panmoria ed impierno et aliwa labat lan diad Church of England. Naiirapan so totoo ed nanduruman denominasyon a pandayewan so sakey a manangibales a Dios a mamopool ed makasalanan. “Kaliktan na totoo so sakey a Dios a maabagey tan mililikna,” inkuan nen Jackson Carroll, propesor ed relihyon tan sosyedad diad Duke University’s Divinity School. “Suni itan ed modernon kaisipan so panongtong nipaakar ed kasalanan tan panetel.”
Abayag lan papanisiaan na Tastasi nen Jehova a say impierno, a singa ibabangat na Biblia, et basta say kaslakan labat a lubok na inaatey a katooan—aliwan pasen na mangapoy-apoy a pairapan. Momoriaen da iya, aliwan lapud satan so popular, noagta lapud ibabaga na Biblia: “Balet saray inaatey agda amta so bengatla . . . Anggapo so gawa, no kanonotan, no pakaamta, no kakabatan, dia ed Sheol [“impierno,” Catholic Douay Version].”—Eclesiastes 9:5, 10.
Tekep na sayan malinew a pakatalos nipaakar ed kipapasen na inaatey, insulat nen Charles Taze Russell, inmunan presidenti na Watch Tower Society, nen 1896: “Agmi aromog [ed Biblia] so andi-anggaan a kapairap a sililingon ibabangat na saray kredo tan himnon-libro, tan ontan met ed dakel a panagpulong. Ingen aromog mi ditan so ‘impierno,’ sheol, hades, ya akondenaan na amin a rasa tayo lapud kasalanan nen Adan, tan nisengeg ed satan ya amin so arondon diad impatey na Katawan tayo; tan say ‘impierno’ et pantyon—say kipapasen ya inatey.”
Kanian masulok lan sakey a siglo, ibabangat na Tastasi nen Jehova so katuaan na Biblia nipaakar ed impierno.
[Litrato ed pahina 32]
Charles T. Russell