Espiritual a Kawayangan ed Saray Priso

“ABAYAG mi kayo lan aalagaren.” “Diad apalabas iran labi et akugkugip koy isasabi yo.” “Pisalamatan mi so impangibaki yo na sakey ya ombisita ed sikamin regular.” “Labay min ibalikas so pisasalamat mi ed ed kada sakey tan ed amin a bendisyon ya agmi kanepegan ya awaten a manlapud si Jehova tan say organisasyon to tan ed espiritual a tagano a niiiter diad suston panaon.”

Anto kasi rason ed sarayan balikas na pisasalamat? Pigara ed sarayan balikas so nanlapud saray priso a nikulong ed nanduruman prisoan ed Mexico. Aapresyaen day panangimanon manlalapud Tastasi nen Jehova, a satan so angitarok ed sikara na espiritual a kawayangan anggaman apriso. Diad Mexico walaray 42 a prisoan a ditan et regular ya aasikasoen na Tastasi nen Jehova so espiritual a pankaukolan na saray priso. Sarayan pasen so atawag a Centro Readaptación Social (Social Rehabilitation Center). Pigara ed sarayan prisoan, nagagawa ni ingen a regular iray Kristianon miting a walaan na maabig iran resulta. Alimbawa, diad agano nin bilang, 380 a totoo so onaatendi ed sarayan panmimitingan. Diad satan a panaon nikokondukta so promedyon 350 a panangiyaral na Biblia. Talomplo tan pito so kinmualipikan manpulong, tan 32 so angidedika na bilay da ed si Jehova, ya insimbolo itan diad bautismo ed danum.

No Panon a Nagagawa so Kimey

Panon a nitutuloy na Tastasi nen Jehova so panagpulong da ed sarayan pasen? Unona et onla ra ed saray opisyal a mangaasikaso pian onkerew na nisulat ya autorisasyon a makaloob ed prisoan, ya ipapaliwawa so gagala na ibisita—pian ibangat iray priso no panon a napaaligwas so kualidad na bilay da tan manlingkor ed Dios diad paraan a makapaliket ed sikato.

Diad balang kaso inabuloyan ira na saray autoridad. Aapresyaen na sarayan opisyal so instruksion ed Biblia a niiter ed saray priso. Naiimano na saray autoridad na prisoan a tutuloken na Tastasi nen Jehova iray regulasyon ed seguridad a nipaakseb ed sarayan pasen. Inabuloyan da irayan ombibisitan ministro ya usaren iray opisina, pananganan, tan pantratrabahoan pian makapanmiting. Diad sakey a pasen et naabuloyan ni ingen iray Tasi a mangipaalagey na melag a Kingdom Hall, a singa ipanengneng na onggendan ya eksperiensian insalaysay na sakey a managbiahin manangasikaso diad abalaten a bukig na Mexico.

“Diad asasakbay na 1991 ginmapo kamin binmisita ed prisoan na Tehuantepec, Oaxaca, ya akaromogan mi na baleg ya eras ed espiritual. Ag-abayag nigapo mi so 27 a panangiyaral ed Biblia. Lapud interes na saray priso, niyeskedyul so limaran miting na kongregasyon. Sakey ed sarayan priso, ya angipanengneng na baleg a panangaro ed si Jehova et deneside to so mangipaalagey na melag a Kingdom Hall ed loob na prisoan pian walay napanmitingan. Sikatoy linma ed direktor na prisoan tan kinmerew na permiso, et saray autoridad so kooperatibon tuloy. Diad gapo na Disyembre 1992, anemiran priso so kinmualipika bilang manangipalapag na maong a balita. Lapud nipanengneng ya aligwas, agawa iray uksoyan pian man-Memoryal dia ed prisoan. Kinmerew kami permiso ed direktor na prisoan a mangawit ed saray emblema—say tinapay tan alak—tan kayari apat-oras a tongtongan, niiter so permiso.

“Nibanbana a nen Abril 3, 1993 (taloran agew sakbay na selebrasyon na Memoryal), pigaran priso so nibulos. Sanen sakey a manangipalapag et akaawat ed papeles na kibulos to, kinerew ton mitongtong ed direktor na prisoan pian naabuloyan a diman ni anggad kayari panselebra na Memoryal. Talagan anurprisa iya ed direktor, ta aliwan kaslakan itan a kerew, balet lapud baleg ya interes na priso a naatendiay Memoryal diman ed prisoan, sikatoy inmabobon. Say Memoryal so inatendian na 53 a totoo, ya akalua ed gayaga diad impakasumpal na programa. Nanpapaknaan min tawagen itan a grupo a ‘Kawayangan ed Cereso,’ lapud sikaray nibulos ed espiritual a pantalos.”

Say kimey na Tastasi nen Jehova so naapresyan maong ed sarayan pasen. Diad sakey ed sarayan panangipangawan, prangkaan ya irerekomenda na mangaasikaso so iyatendi ed saray miting na Tastasi nen Jehova a bilang “terapi” parad maples a pakapasimbalo na saray priso.

Sakey a Maaligwas a Pakapasimbalon Programa

Say kimey na Tastasi nen Jehova so nanresulta ed sigpot a pakapasimbalo na dakel a priso. Anggaman mabetbet a tua a saramay nipriso et pawilen day kabibilay bilang kriminal bektan sikaray nibulos, saramay peteg ya angawat ed mensahe na Salita na Dios so sigpot ya anguman. Say inkapasimbalo ra so mangipapanonot ed sikatayo ed saray salita nen apostol Pablo: “Anggan saray managlawan . . . , anggan saray matakew, anggan saray maagum, anggan saray managbuanges, anggan saray managpabanday, anggan saray managpatobo agda natawir so panariay Dios. Tan ontan so saray arum ed sikayo nensaman. Balet naurasan kayo la, balet apasantos kayo la, balet nibilang kayo la a matunong ed ngaran na Katawan a Jesu-Kristo tan dia ed espiritu na Dios tayo.”—1 Corinto 6:9-11.

Say matalonggaring ya impanguman ed personalidad da so napatnagan sanen imbalikas daray liknaan da. Si Miguel, a wala ed prisoan na Campeche ed Campeche City, so angibalikas na onia: “Natan nibagak la tekep na gayaga ya ibibilang koy inkasiak a kabiangan na arum a karnero a walaay ilalon nirekord diad 2 Pedro 3:13 tan Mateo 5:5.” Oniay komento nen José, a wala ed Koben, prisoan na Campeche: “Anggaman siak so priso tan say agawaan kon krimen so grabe, atalosan kon si Jehova so mapangpangasi tan tatalinengen toray pikakasi tan ey-ey ko. Naperdona toray impakaluksok tan ikdan toak na pankanawnawa ya usarey nakekeraan a bilay ko pian inabang so maong a balita nipaakar ed Panarian na Dios. Pisalamatan mi iray mamatatken mi ed panaon dan binmibisita ed sikami ed prisoan ta pian nagunggunaan kami ed saray sipan na Panarian na Dios. Agaylan makapaliket iran bendisyon! Nibagak kasi a siak et priso? Andi, inikdan ak nen Jehova na espiritual a kawayangan a nakakaukolan ko.”

Antoy akapanguman ed saray managpatey, managpasoot, managpool, managtakew, tan arum ni pian magmaliw a maptek kabibilay a Kristianos? Unong ed saraya lanlamang a lalaki, satan et say manamasimbalon pakayari na Salita na Dios tan say maong a pililimog ed tuan debosyonadon totoo. Iyiilustra na kipapasen nen Tiburcio, a nikulong ed panangipangawan ed Mazatlán, Sinaloa, so itatalona na sayan panamasimbalon programa. Abayag lan nikulong ed Concordia, Sinaloa, a walaan na saray problema lapud petang na ulo. Say akulaw to so sakey ed Tastasi nen Jehova, tan naynay ton mamaltratoen, anggan diad pambisita to’d sikato diad prisoan. Say akulaw to so maanos tan patuloy ton bibisitaen, kanian nampaawit ed sikato na libron Makapambilay Kayo na Ando lan Ando ed Paraiso diad Dalin, ya inaral ton bokor.a Insan to kinerew a wala so onlan mangiyaral ed sikato ed prisoan. Sikatoy ginmapon inmaligwas ed espiritual, tan say relasyon to ed arum so minmaong. Sikatoy niyalis ed prisoan na Mazatlán a wala ditan so grupon manaaral na Biblia, tan natan et sikato la so sakey a manangipalapag. Inkomento to: “Natan, kaibak so akulaw ko tan ananak ko tan saray kaibak a priso, misalsalamat ak a natalineng koray katuaan na Biblia ed sayan pasen, tekep na ilalo a diad asingger ya arapen, nibulos ak tan naatendian ko la so amin ya asamblea tan miting ed kongregasyon.”

Ontan met, wadtan si Condrado, a pisalamatan ton tuloy so agawaan na pananguman ed bilay to. Sikatoy walaan na baleg a problema ed panamaley a sengegay anaynanan na akulaw to. Kanian tinambayo toy inkasikato ed saray druga. Ag-abayag et sikatolay managlakoy druga. Sikatoy narel tan senintinsyaan a nakulong lapud pangipapatulor na marijuana tan cocaine. Diad prisoan walay grupo ya iyaaralan na Biblia kaiba na Tastasi nen Jehova, tan sikato met so inimbitaan a miaral. Imbalikas toy liknaan to ed onian dalan: “Pandinayewan ko so say inkauksoy na kikokondukta na saray miting, say programan panangusisa diad panamegley na saray palapagan, tan say bengatlan amin so nibasi ed Biblia. Tamtampol ya impaiyaralan ak na Biblia tan ginapoan ko met la’d satan so mimiting.” Satan et nen Enero 1993. Natan et akapaway la si Condrado ed prisoan tan mantutultuloy ya onaaligwas ed Kristianon kongregasyon.

Say Islas Marías

Diad Mexico wala so tatakotan a prisoan a tugyopen na apatiran isla a tatawagen ya Islas Marías. Makapanbiahi iray priso ed intiron panagdusaan iran isla ya akakulongan da. Pigara so manaayam ditan a kaiba iray asawa tan anak da.

Niletneg so sakey a melag a kongregasyon. Taloran agagi manlapud Mazatlán so manbiabiahi diman a binulan, ontutulong a mangikondukta na saray miting, mangitarya na literatura, tan mamaseseg. No maminsan bisitaen met ira na manangasikaso na sirkito. Say promedyon onaatendi so onla’d 20 tan 25. Walay apatiran bautismado tan duaran agbautismadon manangipalapag. Irereport na managbiahin manangasikaso a “pigara so manaakar na 17 kilometro [10 milya] pian makaatendi ed saray miting no Simba tan kaukolan a tampol ya ontaynan kayari miting pian diad ontan et makapawil parad pananawag ed nilistan kangaranan. Anggan masiglat so panakar et kaukolay masulok a duaran oras pian makapawil.” Oniay agano nin inkuan na sakey ya agi, ya akaaral na katuaan ed satan a prisoan: “Pantintindekan koy magano lan ipaway ko, balet natan anggan iner no linawa nen Jehova, ed antokaman a kipapasen walaan ak ni na dakel a kimey diad prisoan.”

Maliket tayon nanenengneng a say katuaan et aagamilen toy pakayari to pian ibulos iray masimoon a mananap na dalan a napaliket si Jehova. Masulok a sakey dosena ed saraya, ya akaaral na katuaan ed prisoan, so nibulos, abautismoan, tan natan magalang lan manbibilay bilang ariripen na Dios, pigara ni ingen so nagmaliw a mamatatken ed kongregasyon. Makapasagyat lan nipanengneng so pakayari na Biblia a papaabigen so kapusoan tan papasimbaloen so totoo. Kaleganan a nipisok irayan lalaki lapud impakagawa na saray lingo so onloob ed basbas na liwawa na Salita na Dios, naeksperiensia ra so tuan kawayangan ya insipan nen Jesus sanen inkuanto: “Nakabatan yo so katuaan, et say katuaan sikayo so gawaen to a bulos.”—Juan 8:32; Salmo 119:105.

[Paimano ed leksab]

[Litrato ed pahina 23]

Dakel so agunggunaan manlapud saray Kristianon katuaan a naaralan da ed prisoan