“Anggan Agyo Nanengneng Aroen Yo”

“Anggan agyo nanengneng aroen yo; a no sisiaen yo anggaman agyo nanengneng natan, panliketan yo na agnibalikas tan agnasabsabaan a gloria.”​—1 PEDRO 1:8.

1. Anggaman anggapoy anggan sakey ed dalin natan ya akanengneng ed si Jesus, panon a panbabanikelan na arum a relihyoson totoo so pangipanengneng na debosyon ed sikato?

ANGGAPOY mabilay natan ed dalin ya akanengneng ed si Jesu-Kristo. Ingen, minilyon a totoo so mankuan a mangaaro ed sikato. Kada taon ed Enero 9, diad Manila, ed Pilipinas, sakey a singa toon-kabaleg ya estatua nen Jesu-Kristo a manasakbat na krus so iguguyor diad saray kalsada ya ipapasen bilang sankalaknaban, sankatalonggaringan a panangipatnag na popular a relihyon ed bansa. Mantutulakan tan manleletletan so nalalagaan a karaklan; mantatapilan ni ingen iray totoo diad pirmin gunaet a nadiwit so imahen. Dakel ed presenti a mangiimaton ed saya so manunan nasasagyat ed makapaliket a libot. Ingen, arum ed sikara so andi-duaruwan totoon manliknan sisimoon ya asagyat ed si Jesus. Bilang ebidensia na satan, sikaray mangisulong na krus odino nayarin maparanay ya onla ed simbaan. Balet, kasin say ontan a panagtalintao so nipasen bilang tuan panagdayew?

2, 3. (a) Siopa so kaiba ed saraman so papatumbok nen Jesus ya aktual ya akanengneng tan akadngel ed sikato? (b) Siopa niray inmunan siglon angaro ed si Jesus tan anisia ed sikato, anggaman sikatoy agdan balot personal ya anengneng?

² Nen inmunan siglo, walaray nilibo ed saray probinsia na Roma a Juda, Samaria, Perea, tan Galilea a personal a talagan akanengneng tan akadngel ed si Jesu-Kristo. Sikaray tinmalineng legan ya ipapaliwawa to so makapaligsay puso iran katuaan nipaakar ed Panarian na Dios. Sikaray akatasi ed saray milagro a ginawa to. Arum ed saraya so nagmaliw a debotadon babangatan to, kombensido ira a sikato so “Kristo, ya Anak na Dios a mabilay.” (Mateo 16:16) Anggaman ontan, diad saramay angisulatan nen Pedro na unonan apuyanan a sulat to so anggapo ed limog na saraya.

³ Saraman so angipaarapan nen Pedro so walad saray probinsia na Roma a Ponto, Galacia, Capadocia, Asia, tan Bitinia​—amin so naromog diad lugar na modernon-agew a Turkey. Sikara so angisulatan nen Pedro: “Anggan agyo nanengneng aroen yo; a no sisiaen yo anggaman agyo nanengneng natan, panliketan yo na agnibalikas tan agnasabsabaan a gloria.” (1 Pedro 1:1, 8) Panon dan akabatan si Jesu-Kristo ya anggad punton sikatoy aroen tan pakaagamilay pananisia?

4, 5. Panon a saramay totoon agbalot akanengneng ed si Jesus so akaaral na magenap nipaakar ed sikato pian aroen tan manisia ed sikato?

⁴ Mapatnag, arum so wala ed Jerusalem sanen nantasi si apostol Pedro ed ulop ya onaatendi ed piyesta na Pentecostes nen 33 K.P. Kayari na piyesta et dakel a babangatan so nansiansia ed Jerusalem ta pian makaawat na nagkalalon instruksion manlapud apostoles. (Gawa 2:9, 41, 42; ikompara so 1 Pedro 1:1.) Diad naulit-ulit a misioneron impanbaroy to, ginawaan nen apostol Pablo so maseseg a ministeryo ontan met ed limog na totoo a nanayam ed lugar ya angipawitan ed saginonor nen Pedro na unonan Biblikon sulat a mangaakbibit ed ngaran to.​—Gawa 18:23; 19:10; Galacia 1:1, 2.

⁵ Akin a saraman a totoo, ya agbalot akanengneng ed si Jesus, so ontan lan asagyat a tuloy ed sikato? Diad agew tayo, akin a minilyon ni, ed intiron globo, so pirmin mangaaro ed sikato?

Saray Bengatlan Nadngelan Da

6. (a) No nadngelan yo komon so impantasi nen Pedro nipaakar ed si Jesus diad Pentecostes 33 K.P., anto komon so naaralan yo? (b) Panon ya angapekta iya ed ngalngalin 3,000 a presenti?

⁶ No wala kayo ed Jerusalem sanen nansalita si Pedro ed satan a manpiyepiyestan ulop nen 33 K.P., antoy naaralan yo komon nipaakar ed si Jesus? Diad labas na amin a panduaruwa, saray milagro a ginawa to so mangipapanengneng a sikatoy imbaki na Dios. Ya, anggaman say makasalanan a totoo so angipapatey ed si Jesus, sikato so anggapo la ed lubok noagta pinaoli la tan diad ontan et nitandoro ed tawen diad nikawanan na Dios. A si Jesus et talagan say Kristo, say Mesias a sengegay impansulat na saray propeta. A diad panamegley nen Jesu-Kristo, say masanton espiritu so nikalbo ed saray papatumbok to ta pian sikaray tampol a makapantasi ed totoo manlapud dakel a nasyon nipaakar ed makapakelkelaw iran bengatla a gagawaen na Dios diad panamegley na Anak to. Say kapusoan na dakel ya akadngel ed si Pedro ed satan ya okasyon so apakiwas a tuloy, tan ngalngali 3,000 so abautismoan bilang Kristianon babangatan. (Gawa 2:14-42) No wadman kayo, kasin alaen yo so ontan a desididon kiwas?

7. (a) No wadman kayo ed Antiokia sanen nanpulong si apostol Pablo diman, anto so nayarin naaralan yo? (b) Akin ya arum ed ulop so nagmaliw a mananisia tan anginabang na maong a balita ed arum?

⁷ No sakey kayo ed saraman so presenti sanen nanbangat si apostol Pablo ed Antiokia ed probinsia na Roma a Galacia, anto ni so naaralan yo komon nipaakar ed si Jesus? Nadngelan yo komon so paliwawa nen Pablo a say inkakondena nen Jesus ed ipapatey diad panamegley na saray manuley ed Jerusalem so impasakbay na saray propeta. Nadngelan yo met komon so nipaakar ed akatasi ed inkioli nen Jesus. Maseguron nandinayewan yo komon so eksplinasyon nen Pablo a diad inkioli nen Jesus manlapud saray inaatey, pinekderan nen Jehova a saya imay talagan Anak na Dios. Tan agta say puso yo so apaligsa legan a naamtaan yon say pakaperdona na saray kasalanan ya agawan posibli diad pananisia ed Jesus et mangitonton ed andi-anggaan a bilay? (Gawa 13:16-41, 46, 47; Roma 1:4) Diad pamibidbir ed kaimportantian na narerengelan da, arum ed Antiokia so nagmaliw iran babangatan, aktibon manginanabang ed maong a balita ed arum, anggaman say panggawa ed satan et mankabaliksay kipaarap da ed pirmin panamasegsegang.​—Gawa 13:42, 43, 48-52; 14:1-7, 21-23.

8. No wadman kayo ed miting diad kongregasyon na Efeso sanen naawat so sulat nen Pablo ed sikara, anto komon so naaralan yo?

⁸ Anto no akilimog kayo ed Kristianon kongregasyon ed Efeso, diad probinsia na Roma ya Asia, sanen naawat so apuyanan a sulat nen Pablo ed saray babangatan diman? Anto komon so naaralan yo ed satan nipaakar ed betang nen Jesus ed gagala na Dios? Impaliwawa nen Pablo ed satan a sulat a diad panamegley nen Kristo amin a bengatla ed tawen tan ed dalin so nipawil a mitunosan ed Dios, a say langkap na Dios diad panamegley nen Kristo so ninatnat ed totoo ed amin a nasyon, a saray indibidual ya inatey ed imaton na Dios lapud impakalukso ra so apabilay ed panamegley na pananisia ed Kristo, tan bilang resulta na sayan probisyon et posibli lamet a saray totoo so magmaliw ya inad-aron ananak na Dios.​—Efeso 1:1, 5-10; 2:4, 5, 11-13.

9. (a) Anto so makatulong ed sikayo pian natebek no kasin personal yon natatalosan so kabaliksan na insulat nen Pablo ed saray taga-Efeso? (b) Panon a saray agagi ed saray probinsia na Roma ya asalambit nen Pedro so akaapekta ed naaralan da nipaakar ed si Jesus?

⁹ Paaaralemen ta na panangapresia ed amin na saraya so panangaro yo ed Anak na Dios? Iimpluensiaan ta na satan a panangaro so inagew-agew a panagbilay yo, unong ya impaseseg nen apostol Pablo ed kapitulo 4 anggad 6 na Efeso? Kasin say ontan ya apresasyon so amakiwas ed sikayo a mangusisan maong ed dili yoran prayuridad ed bilay? Lapud panangaro ed Dios tan otang a linawa ed Anak to, manggawa kayo ta na nakakaukolan iran pananguman ta pian say panggawa ed linawa na Dios so petepeteg a sentro na bilay yo? (Efeso 5:15-17) Nipaakar ed inkaapektaan na saray Kristiano ed Asia, Galacia, tan arum a probinsia ed Roma lapud naaaralan da, sinulatan ira nen apostol Pedro na onia: “Anggan agyo nanengneng [Jesu-Kristo] aroen yo. . . . Sisiaen yo anggaman agyo nanengneng natan, panliketan yo na agnibalikas tan agnasabsabaan a gloria.”​—1 Pedro 1:8.

10. (a) Anto so maseguron angarum na panangaro na inmunan Kristianos ed si Jesus? (b) Panon itayon nagunggunaan met?

¹⁰ Wala ni bengatlan maseguron angarum ed panangaro na saraman so inmunan Kristianos ed Anak na Dios ya angipaarapan nen Pedro. Anto itan? Diad panaon ya insulat nen Pedro so inmunan sulat to, anggan panon et duaran Ebanghelyo​—say Mateo tan Lucas​—so nipapaliber la. Saray inmunan-siglon Kristiano ya agbalot akanengneng ed si Jesus so makabasa ed sarayan salaysay na Ebanghelyo. Nayarian tayo met. Saray Ebanghelyo so aliwan gawagaway-kanonotan iran salaysay; lugan na saratan so amin a pakatandaan ed napanmatalkan a tuloy ya awaran. Diad saraman ya apuyanan a rekord, dakel so naamtaan tayon mamaaralem na panangaro tayo ed Anak na Dios.

Say Impanengneng Ton Awawey

11, 12. Anto so awawey ya impanengneng nen Jesus nipaakar ed arum a totoo a manggawa ed sikayon mangaro ed sikato?

¹¹ Diad nisulat a rekord na impanbilay nen Jesus, naamtaan tayo no panon ton akidenengan so arum a totoo. Say impanengneng ton awawey so manetenyeg ed kapusoan na totoo anggan natan, masulok a 1,960 a taon kayari impatey to. Amin a mabilay so nabebelatan lapud epekto na kasalanan. Minilmilyon so nabibiktima na ag-inkahustisia, pipupuligesgesan ed sakit, odino ed arum a rason a pirmin makapadismaya. Diad amin na saratan, inkuan nen Jesus: “Dago kayod siak, amin yon nasasagpotan tan nabebelatan, et itdan ta kayoy pampainawa. Ala yoy pakok ed sikayo, tan manaral kayod siak; ta mauyamo ak tan mapaabeba ak a puso: et naromog yoy inawa nipaakar ed saray kamarerwa yo.”​—Mateo 11:28-30.

¹² Impanengneng nen Jesus so makatalos a paga to ed saray mairap, naeerasan, tan saraman so mandageyem. Sanen kapilitan lapud sirkumstansia, mamilagron pinakan to ni ingen so dakel a totoo. (Lucas 9:12-17) Imbulos tora manlapud manangaripen iran tradisyon. Pinabiskeg to met so pananisia ra ed probisyon na Dios a panganggaen so politikal tan ekonomikon panaglames. Agpinakapoy nen Jesus so espiritu na saraman so nalalames la. Tekep na inkatamoy tan aro, sidudunong ton pinaseguroan iray mauyamo. Niligliwa to iraman so singa abalbal a tanubong tan saraman so singa onkukuyep a pabilo. Nanlapulad saman ya anggad natan, say ngaran to so mamapailalo, anggan diad kapusoan na saraman so agbalot akanengneng ed sikato.​—Mateo 12:15-21; 15:3-10.

13. Akin a say paraan ya impideneng nen Jesus ed saray makasalanan so anagyat ed totoo?

¹³ Ag-inabobonan nen Jesus so gawan-mauges, ingen tinalosan to iraman so totoon akapanggawa na lingo ed bilay balet angipanengneng na pagbabawi tan binmaling ed sikato parad tulong. (Lucas 7:36-50) Sikatoy midungo ed totoo a pabpabandayen ed komunidad no liknaen ton saya so mangitarok na pankanawnawa a natulongan ira ed espiritual. (Mateo 9:9-13) Bilang resulta na impanengneng ton awawey, minilyon a totoo ed mipadparan sirkumstansya ya agbalot akanengneng ed si Jesus so apakiwas a mangamta ed sikato tan mangiteen na pananisia ed sikato.

14. Antoy makapasagyat ed sikayo nipaakar ed paraan ya impanulong nen Jesus ed totoo a mansasakit, agmakayari, odino inateyan?

¹⁴ Say paraan ya impideneng nen Jesus ed totoo a mansasakit odino agmakayari so mamapaneknek ed inkapetang tan panangabagey to ontan met ed abilidad ton mamainawa ed sikara. Sirin, sanen sakey a mansasakit a laki a napnoy kating so inmasingger ed sikato tan akikasin patulongan, si Jesus so agpinmaliis ed anengneng to. Tan agto imbaga ed too ya, anggaman sikatoy naabagey to, et grabe lay sakit to tan agto natulongan. Akikasi so laki: “Katawan, no labay mo, nayarian moak a gawaen a malinis.” Anggapoy suyat, inyunat nen Jesus so lima to tan diniwit so lakin akating, a kuanto: “Labay ko. Nalinisan ka komon.” (Mateo 8:2, 3) Diad sananey ya inkagawa sakey a bii so magunaet a natambal diad ag-impakaimanon impaniwit ed palagaygay na kawes nen Jesus. Sikatoy akidenengan nen Jesus diad sipapangasi tan manamaseguron paraan. (Lucas 8:43-48) Tan sanen nabet to so sakey a tulor, sikatoy apakiwas tekep na panangabagey ed maneermen a balon bii ya inatey so alenleneg ya anak ton laki. Anggaman impulisay nen Jesus ya usaren so inter-Dios a pakapanyari pian taryaan toy inkasikato na tagano diad mamilagron paraan, sibubulos ton inusar itan pian paolien itan ya inatey a laki tan ipawil ed ina to.​—Lucas 4:2-4; 7:11-16.

15. Panon a mangaapekta ed sikayo so panagbasa ed saray salaysay nipaakar ed si Jesus tan pandalepdep ed saratan?

¹⁵ Legan tayon babasaen irayan salaysay tan dalepdepen so impanengneng nen Jesus ya awawey, say aro tayo so napapaaralem parad sayan sakey ya angisaklang ed atooan a laman to ta pian makapambilay itayon maando. Anggaman sikatoy agtayon balot anengneng, natatangguyor tayo ed sikato, tan labay tayon tumboken iray bakat to.​—1 Pedro 2:21.

Mapaabeban Isasaral To ed Dios

16. Dinan so manunan angiyapasakeyan na imano nen Jesus, tan anto so impaseseg to ed sikatayon gawaen?

¹⁶ Nagkalalo ed amin ni, inyapasakey nen Jesus so imano to tan imano tayo ed mangatatawen ya Ama to, si Jehova a Dios. Impaamta to so sankabalgan a ganggan ed Ganggan, a kuanto: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.” (Mateo 22:36, 37) Binilin toray babangatan to: “Manisia kayo ed Dios.” (Marcos 11:22) Sanen nipaarap ira ed seryoson subok na pananisia ra, pinaseseg tora: “Manpuyat tan manpikasi.”​—Mateo 26:41.

17, 18. (a) Panon ya impanengneng nen Jesus so mapaabeban isasaral to ed Ama to? (b) Akin ya importanti so ginawa to ed sikatayo?

¹⁷ Inletneg a mismo nen Jesus so uliran. Say pikakasi so importantin kabiangan na bilay to. (Mateo 14:23; Lucas 9:28; 18:1) Sanen asabi so panaon parad sikato pian manpili na apostoles to, agbasta sinmaral si Jesus ed dili ton pakatalos, anggaman datin amin ya anghel ed katawenan et walad silong na panangasikaso to. Sipapaabeba ton inusar so sanlabi pian manpikasi ed Ama to. (Lucas 6:12, 13) Sanen nidunget ed pakaaresto tan ed makapaot-ot ya ipapatey, binmaling lamet si Jesus ed si Ama to, a masimoon a nanpikasi. Agto minorian kabat ton tuloy si Satanas tan mainomay ton benbenan so antokaman a patit na satan a marelmeng a sakey. Amorian nen Jesus no panon kaimportanti itan a sikatoy agsinmaew. Agaylan pakabalawan ed Ama to no sinmaew si Jesus! Tan agaylan baleg a kapirdian parad sankatooan, a say iilaloan dan bilay so mandedepende ed bagat ya iyapay nen Jesus!

¹⁸ Paulit-ulit a nanpikasi si Jesus​—sanen kaiba toray apostol to ed tagey a kuarto ed Jerusalem tan lalon masimoon diad harden na Getsemane. (Mateo 26:36-44; Juan 17:1-26; Hebreos 5:7) Sanen maniirap ed panamairapan a kiew, agto pinabanday iraman so nanbalaw ed sikato. Imbes, sikatoy nanpikasi nisesengeg ed saraman so onkikiwas ya ignoranti: “Ama, perdonam ira; ta agda amta so gawaen da.” (Lucas 23:34) Inyapasakey toy kanonotan to ed Ama to, “inmatalek to so laman to ed manangiter na tunong.” Saray unor a salita ya imbesngaw to ed panamairapan a kiew so sakey a pikakasi ed si Ama to. (1 Pedro 2:23; Lucas 23:46) Agaylan misalsalamat itayo ta, tekep na sigpot a panagmatalek ed si Jehova et sitotoor a sinumpal nen Jesus so asainmin to ya inmatalek ed sikato nen Ama to! Anggaman agtayo anengneng a balot si Jesu-Kristo, agaylay kaaralem na panangaro tayo ed sikato lapud ginawa to!

Panangibalikas na Panangaro Tayo ed Sikato

19. Diad pangibabalikas na panangaro ed si Jesus, antoran agamil so paliisan tayo bilang sigpot ya agmatukoy?

¹⁹ Panon tayon napaneknekan a say aro ya ibabaga tayo et mas ni nen say salita labat? Lapud isesebel nen Ama to, ya inad-aro nen Jesus, so panggawa na saray imahen tan insan tratoen irayan bengatla tekep na debosyon, maseguron ag-itayo makapangigalang ed si Jesus diad pangikolintas ed ontan iran imahen odino diad panamegley na pangawit na ontan diad saray kalsada. (Exodo 20:4, 5; Juan 4:24) Agpanamagalang ed si Jesus so iyatendi tayo ed saray relihyoson serbisyo, anggan gawaen itan a maminpigan danay ed sakey simba, no ag-itayo nambilay a mitunosan ed saray bangat to ed arum ya agew na sakey simba. Inkuan nen Jesus: “Say walaan na saray ganggan ko, et sumpalen to’ra, sikato so mangaro ed siak. Et say mangaro ed siak sikato so inaro nen Amak.”​—Juan 14:21, 23; 15:10.

20. Antoray bengatlan mangipanengneng no kasin talagan aaroen tayo si Jesus?

²⁰ Antoran ganggan so inter to ed sikatayo? Sankamanunaan, pian dayewen so tuan Dios, si Jehova, tan sikato labat. (Mateo 4:10; Juan 17:3) Lapu ed betang to ed gagala na Dios, imbangat met nen Jesus a nepeg tayoy mangagamil na pananisia ed sikato bilang Anak na Dios tan nepeg tayo ya ipanengneng itan diad ipaliis ed marelmeng iran kimey tan diad panakar ed liwawa. (Juan 3:16-21) Sinimbawa to itayo ya anapen nin unona so Panarian na Dios tan say inkatunong to, ya iyuuna iraya a panpagaan nen say nipaakar ed pisikal iran pankaukolan. (Mateo 6:31-33) Inganggan to a manaaroan itayo unong ya aaroen to itayo. (Juan 13:34; 1 Pedro 1:22) Tan ginanggan to itayo a magmaliw a tastasi nipaakar ed gagala na Dios, a singa ginawa to met. (Mateo 24:14; 28:19, 20; Apocalipsis 3:14) Anggaman agda anengneng a balot si Jesus, manga limaran milyon a Tastasi nen Jehova natan so papakiwasen na puron panangaro ed sikato pian sumpalen iratan a ganggan. Say agda personal ya impakanengneng ed si Jesus so peteg ya agmamakapoy na determinasyon da a magmaliw a matulok. Nanononotan da so inkuan na Katawan da ed si apostol Tomas: “Lapud anengneng moak, anisia ka? Mapalar so saray ag-akanengneng, et anisia’ra.”​—Juan 20:29.

21. Panon tayon nagunggunaan ed iyaatendi ed Memoryal na impatey nen Kristo, a nagawa ed sayan taon ed Simba, Marso 23?

²¹ Komon ta napibilang ka ed saraman so mantitipon ed sankamundoan diad saray Kingdom Hall na Tastasi nen Jehova kaselek na agew ed Simba, Marso 23, 1997, pian nonoten so sankabalgan a balikas na aro na Dios ed katooan tan pian ngilinan so impatey na matoor ya Anak to, si Jesu-Kristo. Say nibabaga tan nagagawa ed satan ya okasyon so mamaaralem na aro tayo ed si Jehova tan ed Anak to tan sirin mangarum na pilalek tayo a manumpal ed saray ganggan na Dios.​—1 Juan 5:3.

Panon Yon Ebatan?

◻ Panon a saraman so angipaarapan na unonan libro na Pedro so akapikabat tan angaro ed si Jesus?

◻ Antoray pigaran bengatla a nadngelan na inmunan Kristianos ya anagyat ed sikayo?

◻ Anto so walan awawey ya impanengneng nen Jesus ya amaaralem na panangaro yo ed sikato?

◻ Akin a say mapaabeban isasaral nen Jesus ed Dios so ontanlan importanti ed sikatayo?

◻ Panon tayon nidemostra so panangaro tayo ed si Jesu-Kristo?

[Saray litrato ed pahina 16, 17]

Nasasagyat itayo ed si Jesus lapud awawey ya impanengneng to