Sioparay Talagan Mensahero na Kareenan?

NEN Mayo 31, 1996, inyabawag na saray managbalita so pinmatnag bilang sakey a mensahe na kareenan. Diad agew sakbay to, impaway so sakey ya opisyal a balikas a mamepekder a si Benjamin Netanyahu, a ngalngali lan magmaliw a primo ministro na Israel, so “nigalet a tuloy ed pangituloy na tongtongan nipaakar ed kareenan, kareenan a walaay kaligenan, ed baetan na estado na Israel tan amin a kakaabay to, pati say Palestina.”

Say bantog ya inkapili nen Netanyahu so sengeg na panumameng na karaklan no kasin say kareenan ed Pegley Bukig so aliwan kugkugip labat. No ontan, onalig kasi arum a nasyon, a lingwanan la so agda panpapaknaan?

Siempre, magmainomay so pangisipan na kareenan nen say pandampot ed satan. Diad pakakamoria ed saya, dakel so manduaruwa. A singa inkuan nen dyurnalistan Hemi Shalev, “nalilikas na kapaldua ed ombaley na Israel ya asingger lay kipawil, tan say nakekeraan so manisian asukop ed sakey a makapataktakot a kipapasen tekep na pirmin irap tan anggapoy pawayan.” Bilang segek, inkuanto: “Arum so manggayaga; arum so managogol.”

Kanian ontan so situasyon sano sasalien na too ya itarok so kareenan. Say pambiktorya na sakey a lider tan saray mananuporta to so mankabaliksan na katalo na onsusumpan partido. Say agpakapenek so mansumpal ed pakadismaya, tan say pakadismaya, so mabetbet a mansumpal ed panagrebildi. Balanglan diad Pegley Bukig, Latin Amerika, Mamabukig a Europa, odino inerman nin pasen​—saray sagpot na katooan nipaakar ed kareenan so kugkugip.

Asingger Lay Peteg a Kareenan!

Legan na panaon ya ampetapetang nin tema na balita so kareenan ed Pegley Bukig, sananey nin mensahe na kareenan so nadngel. Aliwa iyan sakey a bantog a mapolitikan talumpati; nisay sakey itan a paknaan parad kareenan ed baetan na saray nasyon. Imbes, sayan mensahe so mangiyaabawag na kareenan ya onsabi diad panamegley labat na Panariay Dios. Iner so impakarengelan ed sayan mensahe? Diad ngalngali 1,900 a “Mensaheros na Maridios a Kareenan” a Distriton Kombension na Tastasi nen Jehova ed interon mundo legan na 1996/97.

Impalinew ed sarayan kombension ya anggapoy gobierno na too a makapangitarok na tuan kareenan tan kaligenan. Akin? Lapud kakaukolanen na saya so panampot na saray bengatlan manasamsam ed sikatayo na kareenan ed inagew-agew. Say tuan kareenan et kabaliksan toy ibangon ed kada kabuasan ya anggapoy katatakotan a bakal odino karawalan. Kabaliksan ton anggapo lay krimen, anggapo laray kandado na saray kapot tayo, anggapo lay takot ed panakar ed saray kalsada, anggapo laray asiyansiyan a pamilya. Dinan a gobierno ed mundo so makasumpal na amin na saratan? On, dinan a gobierno ed dalin so anggan manalin mangisipan ed satan?

Balet, nagawaan tan itarok na Panariay Dios irayan bengatla. Isisipan na Biblia: “Nia, so tabernakulo na Dios wala ed saray totoo, tan sikato so manayam naani ed sikara, tan sikara naani baley to. Tan say Dios met lanlamang so wala naani ed sikara tan Dios da. Tan punasen to so amin a lua ed kamataan da, tan anggapo la naani ipatey; tan anggapo la naani onnangis o dageyem, o ot-ot. Ta saray una a bengatla sikara so linmabas la.” (Apocalipsis 21:3, 4) Agaylan kainawaan so itarok na satan ed maniirap a katooan!

Say sipan nen Jehova a Dios so aliwan kaapaan. Papaseguroan itayo na Biblia: “Say Dios aliwan sakey a too, ta pian makapantila, nisay sikatoy anak na too, ta pian magbabawi. Inbaga to ta, et agto gawaen, odino inbaga to ta, et agto gawaen a maong?” (Numeros 23:19) On, antokaman ya insipan na Dios so nagawa​—diad kabendisyonan na amin ya ondadapag ed sikato.

Saray Mensahero na Kareenan na Dios

Kabkabat iray Tastasi nen Jehova ed maseseg a panangiyabawag da ed Panariay Dios. Kada taon, bilang interaminti et manguusar ira na masulok a sakey bilyon ya oras diad pananginabang ed makapaligsan mensahe na Biblia ed arum. Saya so pakakasumpalan na saray salita nen Jesus: “Saya ya ebanghelyo [maong a balita, NW] na panarian nipulong naani ed sankamundoan ya onkanan pamintuaan ed saray amin a nasyones; et saman la onsabi anggaan.” (Mateo 24:14) Say mensahe ya itatarok na Tastasi so talagan “maong a balita,” ta ipapaknol na satan so mangatatawen a Panariay Dios bilang say mogmon ilalo parad katooan. Tan agaylan malet ya ilalo itan parad arapen!

Anggan natan la et papawalaen na Panariay Dios ed saray sakop to so tuan bedber na kareenan tan inaagin aro. Inkuan nen Jesus: “Lapu ed saya amin a too nabirbiran da a sikayoray babangatan ko, no wala so aro yo ed sakey tan sakey.” (Juan 13:35) Panggugunaetan na Tastasi nen Jehova so panbilay unong ed sayan manunan kakaukolanen na tuan Inkakristiano. Bilang resulta, walad limog da so makapakelaw ya impanaagi a mamapakasakey ed saray Judio tan Arabo, saray Croatian tan Serbiano, Hutu tan Tutsi. Sayan kareenan a kugkugipen labat na karaklan ed katooan so kien la natan na minilyon a Tastasi nen Jehova ed intiron mundo.

Say panamaseseg ed pantultuloy a pambilay ed saray prinsipyo na Biblia tan pantultuloy ed panangipulong ed maong a balita na Panariay Dios so nipabitar ed programa ed “Mensaheros na Maridios a Kareenan” a Distriton Kombension. Iimbitaan mi kan basaen so onggendan a report ed say makapaligsan taloran-agew a kombension a panggagayagaan na minilyon.