Anto so Sankamanunaanan ed Bilay Mo?

“Ipaamtam ed siak so dalan a nepeg ko a dalanan.”​—SALMO 143:8.

1. Anto so inkuan nen Arin Solomon nipaakar ed saray gegemtan tan agawaan na totoo?

NAYARIN amtam la a singa met ed arum a say bilay so napno na saray aktibidad tan kapagaan. Sano isipen mo itan, ibiig mon arum ed saratan so makana. Arum ya aktibidad tan kapagaan so agtanton importanti odino kaapaan ni ingen. Say bengatlan namomoriam iya et kabaliksan ton sika so mitunosan ed sakey ed sankakabatan a totoo ed kapiganman, si Arin Solomon. Kayari sigpot ya impangusisa ed aktibidades ed bilay, inkuanto: “Takotan mo so Dios, tan unoren mo so saray ganggan to; ta saya sikato so katipunan na kanepegan na too.” (Eclesiastes 2:4-9, 11; 12:13) Anto so walan kabaliksan na saya ed sikatayo natan?

2. Anton manunan tepet so kaukolan ya itepet na matakot ed Dios a totoo ed inkasikara, a mangitonton ed anton misiglaotan iran tepet?

2 No labay mon ‘takotan so tuan Dios tan unoren iray ganggan to,’ tepetan mo pay inkasika na sayan makapaangat a tepet, ‘Anto so sankamanunaanan ed bilay ko?’ Tua, nayarin agmo panumamengan itan a tepet ya inagew-agew, balet akin ya agkonsideraen itan natan? Diad tua, ipapanonot na satan so pigaran misiglaotan a tepet, a singa say, ‘Kasin iteteen koy agnakaukolan iran imano ed trabahok odino ed propesyon odino ed materyal iran bengatla? Panon kaimportanti ed bilay ko so ayaman ko, pamilyak, tan saray inad-arok?’ Nayarin itepet na sakey a tobonbalo, ‘Diad anton laknab ya aalaen na edukasyon so imanok tan panaon ko? Peteg, kasin say sakey a hobby, isport, odino arum a nengneng na panligliwaan odino teknolohiya so manunan paninteresan ko?’ Antokaman so edad odino kipapasen, kaukolan tayon itepet, ‘Anto so pasen na panaglingkor ed Dios ed bilay ko?’ Maseguron mipakna ka a kaukolan so panangiyuna. Balet panon tan iner so pakagamoran tayo na tulong pian niyuksoy iratan a sikakabat?

3. Anto so sasaglawien na panangiletneg na saray prayuridad parad Kristianos?

³ Say “sankamanunaanan” so walaan na manunan pantalos ed bengatlan kaukolan ya iyuna ni sakbay na amin nin arum odino nakaukolan a konsideraen ya unona. Balanglan sakey ka ed Tastasi nen Jehova odino sakey ka ed limog na minilyon a masimoon ya estudyante na Salita na Dios a mililimog ed sikara, konsideraen pa iyan katuaan: “Nipaakar ed amin a bengatla wala so sakey a panaon, tan sakey a panaon nipaakar ed balang pegdat ed leksab na tawen.” (Eclesiastes 3:1) Matukoy, lalaktipen na satan so pangipanengneng mo na maaron panagpaga no nipaakar ed relasyon na pamilya. (Colosas 3:18-21) Sasaglawien to so matuan panaglegpet ed sankaabungan mo diad panamegley na sekular a trabaho. (2 Tesalonica 3:10-12; 1 Timoteo 5:8) Tan pian walay panguman-uman met, nayarin mangipanaon ka parad sakey a hobby odino tunggal paminsan a manliket odino manligliwa. (Ikompara so Marcos 6:31.) Balet, diad panisip a maong, agmo ta naimano ya anggapo ed saraya so sankamanunaanan ed bilay? Wala ni so mas importanti.

4. Panon a misiglaotan so Filipos 1:9, 10 diad pangiletneg ed saray prayuridad?

4 Nabidbir mo anganko a saray manangigiyan prinsipyo na Biblia so mablin katulongan diad pangiletneg ed saray prayuridad tan panggaway makabat iran desisyon. Alimbawa, diad Filipos 1:9, 10, papasesegen iray Kristiano ya “ondaak a lalo nin lalo komon ed kakabatan dia ed amin a panangimano.” Diad anton gagala? Inyarum nen apostol Pablo: “Ta pian nayarian yo ya abobonan so bengatla ran sankaabigan.” Agta satan so makabaliksan? Diad basiyan na suston pikakabat, nadetermina na makatebek a Kristiano no anto so kaukolan ya unonan paninteresan​—sankamanunaanan​—ed bilay.

Sakey ya Uliran ed no Anto so Sankamanunaanan

5. Diad panideskribi ed uliran ya intilak parad Kristianos, panon ya ipapanengneng na Kasulatan no anto so sankamanunaanan ed bilay nen Jesus?

5 Naromog tayo iray mabmablin aspeto na pikakabat ed saray salita nen apostol Pedro: “Ta saya so inkatawag yo, ta si Kristo nairapan met lapu ed sikayo, dia ed impangitilak to na panuliranan, pian tumboken yo so baka’to.” (1 Pedro 2:21) On, parad pakatandaan no anto so sankamanunaanan ed bilay, nausisa tayo no anto so walad kaisipan nen Jesu-Kristo nipaakar ed satan. Mapropetikon imbaga na Salmo 40:8 nipaakar ed sikato: “Makaliket ak a mangunor na linawam, O Dios ko, on, say ganggan mo wala ed dalem na pusok.” Onia so impangisalaysay to ed parehon kaisipan: “Say kanen ko sikato so panggawak na linawa na saman so angibaki ed siak, tan manumpal na kimey to.”​—Juan 4:34; Hebreos 12:2.

6. Panon a niwala ed sikatayo so pareho iran resulta a singa ginawa nen Jesus ed impangiyuna ed linawa na Dios?

6 Imanoen so tombok​—say panggawa ed linawa na Dios. Idadanet na alimbawa nen Jesus no anto so nepeg a sankamanunaanan ed bilay na babangatan to, ta inkuanto a “balang sakey a nayadyari mipara ed managbanga’to.” (Lucas 6:40) Tan unong a nanakar si Jesus ed paraan a gagala nen Ama to, impanengneng to a wala so “kapnoan na gayaga” diad panumpal a sankamanunaanan ed linawa na Dios. (Salmo 16:11; Gawa 2:28) Natatalosan mo ta no antoy ipapatnag na satan? Legan a pinili na saray papatumbok nen Jesus so panggawa ed linawa na Dios bilang sankamanunaanan a bengatla ed bilay da, panliketan da so “kapnoan na gayaga” tan peteg a bilay. (1 Timoteo 6:19) Kanian wala so masulok a sakey a rason ed panggawa ed linawa na Dios diad pangiyuna ed bilay tayo.

7, 8. Antoran subok so inarap nen Jesus, tan anto so naaralan tayo manlapud saya?

⁷ Kayarin tuloy na impangisimbolo nen Jesus ed inkasikato ed panggawa na linawa na Dios, nanggunaetan nen Satanas a sikatoy pabenegen. Panon? Diad impanukso ed taloran paraan. Sansakey ya inebatan nen Jesus ed Makasulatan tan malinew iran termino. (Mateo 4:1-10) Balet manaalagar ni ed sikato so kaaruman a subok​—panamasegsegang, panaglurey, panangitapat nen Judas, palso iran akusasyon, tan insan ipapatey ed panamairapan a kiew. Siansia, anggapo ed sarayan subok so anenyeg ed katooran na Anak na Dios. Diad sakey a seryoson bekta nampikasi si Jesus: “Aliwan unong ed kaliktan ko, ingen unong ed kaliktan mo. . . . Say linawam komon so nagawa.” (Mateo 26:39, 42) Agta nepeg a balang sakey ed sikatayo so napakiwas a tuloy na sayan aspeto ed uliran ya intilak to parad sikatayo, manggawa ed sikatayon “mansiansia a malet ed pikakasi”?​—Roma 12:12.

⁸ On, sano nailetneg tayo iray prayuridad tayo ed bilay, nagkalautlan makatulong so madibinon panangigiya, nagkalalo la no nipaarap itayo ed kakabusol na katuaan tan sumusumpa ed linawa na Dios. Nonoten pay matoor a pikekerew nen Arin David parad panangigiya sanen asagmakan toy isusumpa na kakabusol. Natalosan tayo iya legan a konsideraen tayo so sakey a kabiangan na Salmo 143. Saya so nepeg ya ontulong ed sikatayon natebek no panon tayon napabiskeg so personal a relasyon tayo ed si Jehova tan napaelet pian mantultuloy a gawaen so linawa na Dios a sankamanunaanan ed bilay tayo.

Dedengelen tan Eebatan nen Jehova Iray Pikakasi Tayo

9. (a) Anggaman makasalanan si David, anto so ipaparungtal na saray salita tan kiwas to? (b) Akin ya ag-itayo ontunda ed panggawa no anto so maong?

9 Anggaman makasalanan a too, walaan na pananisia si David a dengelen nen Jehova so ey-ey to. Sikatoy sipapaabeban kinmerew: “Denglen mo so pikakasik, O Jehova, talineng mo so saray ey-ey ko. Dia ed katooran mo eselan mo ak pa, tan dia ed inkatunong mo. Tan agmo uukomen so aripen mo; ta dia ed matam anggapo so too a mabilay a matunong.” (Salmo 143:1, 2) Mapaga si David ed agto inkayadyari, ingen say puso to so sigpot ed Dios. Sirin, sikatoy matalek a sikatoy naebatan diad inkatunong. Agta saya so mamaseseg ed sikatayo? Anggaman sikatayo so makulang ed inkatunong na Dios, matalek itayo a dedengelen to itayo no say kapusoan tayo so sigpot ed sikato. (Eclesiastes 7:20; 1 Juan 5:14) Legan a mantutultuloy ed pikakasi, nepeg a getma tayon “say maong so panaeg ed mauges” ed sarayan marelmeng ya agew.​—Roma 12:20, 21; Santiago 4:7.

10. Akin ya awalaan na panaon na kapagaan si David?

¹⁰ Walaan na kakabusol si David, a singa sikatayo. Balanglan sakey a puganti manlapud si Saul, apilitan a mansalimbeng a manbukbukor, agnasabi iran pasen, odino bilang sakey ya ari a sisigensigenen na kakabusol, awalaan si David na saray panaon na kapagaan. Deneskribi to no panon iyan angapekta ed sikato: “Say kabusol pinasegsegang to so kamarerwak . . . Inpanayam to ak ed kabilungetan . . . Kanian say espirituk nalmay dia ed loob ko; say pusok dia ed loob ko atainan.” (Salmo 143:3, 4) Awalaan kayo ta na rason a manlikna na singa ontan?

11. Antoran panaon na kapagaan so aarapen na modernon-agew ya ariripen na Dios?

¹¹ Say desdes na kabusol, saray subok lapud pirmin kairapan ed ekonomiya, seryoson sakit, odino arum niran makapaaburidon problema so angitonton ed pigaran totoo na Dios a manliknan onkapoy. No maminsan et nalemay met so kapusoan da. Satan so singa indibidual dan iyaakis: “Sika, ya angipanengneng ed siak na abalbaleg tan maotot ira a gonigon, bilayen mo ak lamet . . . Pigar ka lamet tan ligliwaen mo ak.” (Salmo 71:20, 21) Panon irayan atulongan?

No Panon ya Arapen Iray Sagpot na Kabusol

12. Panon ya atalonaan nen Arin David so kapeligroan tan saray subok?

¹² Ipapanengneng na Salmo 143:5 no anto so ginawa nen David sanen nipaarap ed kapeligroan tan ankakabaleg a subok: “Nanodnonotan ko so saray inmuna ya agew; manumameng ak ed amin a gawagawam; mantaltaliwa ak ed gawa na limalimam.” Ninonot nen David iray pidedeneng na Dios ed ariripen To tan panon a sikaton mismo so akasagmak na panangiliktar. Dinalepdep to no anto so ginawa nen Jehova nisengeg ed baleg a ngaran To. On, nantultuloy a tinaliwa nen David iray gawa na Dios.

13. Sano nipaarap itayo ed saray subok, panon ya ontutulong so panmolimoli tayo ed saray alimbawa na kadaanan tan modernon agew a matoor ya ariripen pian makapansungdo?

¹³ Agta mabetbet tayon nanonotan iray pidedeneng na Dios ed totoo to? Talagan ontan! Lalaktipen na saya so rekord a ginawa na say ‘baleg a lurem na tastasi’ nen sakbay-Kristianon panaon. (Hebreos 11:32-38; 12:1) Pinaseseg met iray alanaan a Kristiano ed inmunan siglo a ‘nonoten da iray inmunan agew’ tan no antoy sinungdoan da. (Hebreos 10:32-34) Komusta met iray nasasagmakan na ariripen na Dios ed modernon agew, a singa saramay nisalaysay lamet ed Jehovah’s Witnesses​—Proclaimers of God’s Kingdom?a Nipapanonot ed sikatayo na saray salaysay a nirekord diman tan ed arum ni no panon a tinutulongan nen Jehova so totoo a sungdoan iray pananebel, kipriso, panlusob na pangkat, tan panangipangawan tan manangaripen iran kampo. Walaray subsubok diad natatabek na bakal a daldalin, a singa diad Burundi, Liberia, Rwanda, tan say datin Yugoslavia. Sano ompatnag a mismo so isusumpa, makapansungdo iray ariripen na Dios lapud panamantini na mabiskeg a relasyon ed si Jehova. Aantabayan ira na lima to iraman so manggagawa ed linawa to a sankamanunaanan ed bilay da.

14. (a) Antoy sakey ya alimbawa ed panangantabay na Dios ed sakey a too diad sakey a situasyon a nayarin mipara ed sikatayo? (b) Anto so naaralan tayo manlapud satan ya alimbawa?

¹⁴  Balet, nayarin ikuan mon agmo ni asagmak so ontan a maruksan panangabuso, tan nayarin liknaen mon satan so agmo nasagmakan. Balet, say panusuporta na Dios ed totoo to et aliwan naynay a moriaen bilang dramatikon sirkumstansya. Sinuportaan to so dakel a “kabanyakan” ya indibidual diad “ordinaryo” iran sirkumstansya. Nia so sakey labat ed dakel ya alimbawa: Nabidbir mo ta so litraton walad tagey, tan natutulongan to ka ta a nanonotan so pidedeneng na Dios ed totoo to? Pinmatnag iya ed Say Panag-Bantayan na Disyembre 1, 1996. Abasam ta la so insalaysay nen Penelope Makris? Agaylan napanuliranan ed Kristianon integridad! Nanonotan mo ta ni so sinungdoan to manlapud kakaabay, no panon ton tinalonaan so pirmin beblay, tan saray sagpot a nanbanikelan to pian makapansiansia ed sigpot-panaon a ministeryo? Komusta met so makatumang ya eksperiensia to diad Mytilene? Say punto et, Ikokonsideram ta iratan ya alimbawa bilang tulong parad sikatayon amin diad panangiyuksoy na prayuridad, panangiyuna ed linawa na Dios ed bilay tayo?

15. Antoray pigaran ginawa nen Jehova a satan so nepeg tayon dalepdepen?

¹⁵ Satan so mamapabiskeg ed sikatayon dalepdepen so aktibidades nen Jehova, a singa met ginawa nen David. Diad panumpal ed gagala to, angitarya si Jehova parad kilalaban diad panamegley na impatey, inkioli, tan inkigloria na Anak to. (1 Timoteo 3:16) Inletneg to la so mangatatawen a Panarian to, inekal to si Satanas tan saray demonyo to ed katawenan, tan impawil to so tuan panagdayew dia ed dalin. (Apocalipsis 12:7-12) Angibangon na espiritual a paraiso tan bebendisyonan to na daakan so totoo to. (Isaias 35:1-10; 60:22) Mangiiter la natan na kaunoran a pantasi so totoo to sakbay ya ombetag so baleg a kairapan. (Apocalipsis 14:6, 7) On, dakel so nakaukolan a pandalepdepan tayo.

16. Diad anto so nipapaseseg ed sikatayon taliwaen, tan anto so ipasepsep na satan ed sikatayo?

¹⁶ Say pansiansia tayon pantaliwa ed saray gawa na lima na Dios imbes a magmaliw ya okupado ed saray bunek na too so mangipasepsep ed sikatayo a say pakayari nen Jehova so agnaresistian. Anggaman, saratan a gawa so aglimitado ed makapakelaw iran pisikal a gawa na palsa diad katawenan tan dia ed dalin. (Job 37:14; Salmo 19:1; 104:24) Lalaktipen na saray makapakelaw a gawa to iray panangiliktar to ed totoo to ed manamairap a kakabusol, a singa nipanengneng ed saray asagmakan na pinilin kadaanan a totoo to.​—Exodo 14:31; 15:6.

Pangamta ed Dalan a Nepeg a Panakaran

17. Panon inkapeteg si Jehova ed si David, tan panon itayon napaseguroan na saya?

¹⁷ Impikasi nen David so tulong ompan namagaay bilay to: “Idandan ko so limalimak angga ed sika; say kamarerwak napgaan ed sika, a singa sakey a dalin a naksawan. Denglen mo ak a tampol, O Jehova. Say espirituk onkakapoy. Agmo isanib so lupam ed siak, ompano nialig ak ed saray onlasor ed dalem na lipnok.” (Salmo 143:6, 7) Si David, a sakey a makasalanan et kabat ton amta na Dios so kipapasen to. (Salmo 31:7) No maminsan nalikna tayo met a say espiritualidad tayo so nipabpaabeba. Balet say situasyon so walaay ilalo. Si Jehova, ya ondedengel ed pikakasi tayo, nayarin pelesan toy kipawil tayo lamet diad pamarepresko ed sikatayo diad tulong na maaron mamatatken, saray artikulo ed Say Panag-Bantayan, odino saray parti ed miting a singano nigana labat parad sikatayo.​—Isaias 32:1, 2.

18, 19. (a) Anto so nepeg a masimoon ya ey-ey tayo ed si Jehova? (b) Diad anto so pakaseguroan tayo?

¹⁸ Papakiwasen itayo na panagmatalek ed si Jehova pian oney-ey ed sikato: “Ipadngel mo ed siak so maaro ya abig na linawam no ontan a kabuasan; ta sika so panmatalkan ko. Ipaamtam ed siak so dalan a nepeg ko a dalanan.” (Salmo 143:8) Kasin sinaew to si Sister Makris, a sikatoy manbukbukor ed sakey a Griegon isla? Kanian kasin saewen to ka legan a gagawaen mo a sankamanunaanan ed bilay mo so panggawa ed linawa to? Say Diablo tan saray ahente to so malabay a manebel odino sigpot a mamatunda ed kimey tayon panangiproklama na Panarian na Dios. Balanglan manlilingkor itayo ed daldalin a say tuan panagdayew so inkalapagan a naaabuloyan odino manlilingkor itayo ed walay pananesdes, mitunosan iray nankakasakey a pikakasi tayo ed kerew nen David: “Iliktar moak, O Jehova, ed saray kakabusol ko. Ombatik ak ed sika pian yamot mo ak.” (Salmo 143:9) Mandidipindi so kaligenan tayo sumpad espiritual a kalamidad diad panayam tayo ed maamot a pasen na Sankatagyan.​—Salmo 91:1.

¹⁹ Niletneg komon a malet so kombiksyon tayo ed no anto so sankamanunaanan. (Roma 12:1, 2) Sirin, resistian so pansasagpot na mundo ya ipasakbat to ed sikatayo so iisipen ton importanti ed pakana na too ed bengabengatla. Mantultuloy komon ya isindag na kada aspeto na bilay mo so amtam a sankamanunaanan​—say panggawa ed linawa na Dios.​—Mateo 6:10; 7:21.

20. (a) Anto so naaralan tayo nipaakar ed si David diad Salmo 143:1-9? (b) Panon a nisisindag na Kristianos natan so awawey nen David?

²⁰ Idadanet na inmunan siameran bersikulo 1-9 na Salmo 143 so maapit a personal a relasyon nen David ed si Jehova. Sanen apaliberan na kakabusol, sikatoy sibubulos ya inmey-ey ed Dios parad panangigiya. Imbalikas toy liknaan to, patutulongan ed dugan dalan a panakaran to. Mipadpara met itan natan ed nakdaan na saray alanaay-espiritu ed dalin tan saray kaiba ra. Ikokonsidera ran mabmabli so relasyon da ed si Jehova legan a sikaray oney-ey ed sikato parad panangigiya. Pansiasiansiaen dan manunaan so panggawa ed linawa na Dios, anggaman ed pananesdes na Diablo tan say mundo to.

21. Akin ya importanti parad sikatayo so pangiletneg na maabig ya alimbawa no ibangat tayo ed arum no anto so nepeg a sankamanunaanan ed bilay da?

²¹ Nakaukolan a bidbiren na minilyon a manaaral na Biblia a kaibay Tastasi nen Jehova a sankamanunaanan so panggawa ed linawa na Dios. Natulongan tayo iran talosan iya sano sisingbaten so kapitulo 13 na libron Pikakabat a Mangitonton ed Andi-Anggaan a Bilay, a nidadanet ditan iray prinsipyon nalalanor ed pagmaliw a matulok ed Salita.b Siempre, nanengneng da komon a napanuliranan itayo ed say ibabangat tayo ed sikara. Kayari antikey a panaon, naamtaan da met so dalan a nepeg dan panakaran. Legan a personal a natetebek na sarayan minilyon no antoy nepeg a sankaimportantian ed bilay da, dakel so napakiwas ya ontundas ed dedikasyon tan bautismo. Kayari na satan, makatulong so kongregasyon ed sikara pian mansiansian manakar ed dalan na bilay.

22. Antoran tepet so singbaten ed ontumbok ya artikulo?

²² Dakel so akaparaan a mamidbir a say linawa na Dios so nepeg a sankaimportantian ed bilay da. Anggaman ontan, panon a progresibon babangatan nen Jehova iray aripen to pian gawaen so linawa to? Antoran gungguna so itatarok na saya ed sikara? Sarayan tepet so nakonsidera, tekep na paningbat ed sakey a manunan bersikulo, say Salmo 143:10, diad ontumbok ya artikulo.

[Saray paimano ed leksab]

Anto so Ebat Yo?

◻ Diad pangiyaplika ed Filipos 1:9, 10, panon tayon niletneg iray prayuridad?

◻ Panon ya impanengneng nen Jesus so sankamanunaanan ed bilay to?

◻ Anto so naaralan tayo manlapud saray kiwas nen David sanen sikato so nasusubok?

◻ Diad anton dalan a makakatulong ed sikatayo so Salmo 143:1-9 natan?

◻ Anto so nepeg a sankamanunaanan ed bilay tayo?

[Litrato ed pahina 10]

Pinaneknekan na saray kiwas nen David so panagmatalek to ed si Jehova

[Credit Line]

Kinopya manlapud Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s