Manilalo ed si Jehova Parad Ligliwa
“Natan say Dios na anos tan ligliwa yabuloy to komon ed sakey tan sakey ed sikayo so apasakey a kalakal unong ed Kristo Jesus.”—ROMA 15:5.
1. Akin a kada agew et mangitatarok na babaleg a pankaukolan na ligliwa?
DIAD kada ilalabas na agew et ombabaleg met so pankaukolan parad ligliwa. Singa ed imbaga na sakey a managsulat na Biblia 1,900 taon lay apalabas, a say “lapag a pinalsa maningel ira ya amin tan maniirap ira a mananak ya anggad natan.” (Roma 8:22) Diad panaon tayo et mapalalo so ‘paningel’ tan ‘panirap’ nen say kapiganman. Nanlapulad Guerra Mundial I et nasasagmak na katooan so agmaligen a kipapasen diad panamegley na bakabakal, krimen, tan saray natural a desyang a mabetbet a nitetel ed too lapud agsuston panangipakurang to ed dalin.—Apocalipsis 11:18.
2. (a) Siopa so natetel a maong ed kaplesan iran abagey na katooan? (b) Anton katuaan so mangiiter ed sikatayo na basiyan parad ligliwa?
2 Akin ya ontanlay kairapan ed panaon tayo? Oniay ebat na Biblia, diad panedeskribe ed inkibasileng nen Satanas manlapud katawenan kayari inkianak na Panarian nen 1914: “Kasi lara so dalin tan dayat, ta say Diablo inmakseb ed sikayo, a wala ed baleg a sanok to, ya amta to a daiset la so panaon to.” (Apocalipsis 12:12) Kabaliksan na satan a mapatpatnag so pakakasumpal na propesiya a ngalngali tayo la nasabi so anggaan na marelmeng ya uley nen Satanas. Agaylan makaligliwa so pakaamta a say bilay ed dalin so asingger lan nipawil ed samay datin mareen a kipapasen sakbay ya intonton nen Satanas so inmunan atateng tayo ed panrebelde!
3. Kapigan ya agkaukolan na totoo so ligliwa?
3 Diad kagapo et intarya na Manamalsa na too so sakey a marakep a parki a panayaman na inmunan sanasawan too. Saman so nipasen ed lugar a tatawagen ya Eden, a say kabaliksan to et “Sayaksak” odino “Panliket.” (Genesis 2:8, NW, paimano’d-leksab) Niarum ni, nanggayagaan di Adan tan Eva so naspot a bunigas, tekep na ilalon agbalot ompatey. Isipen pa labat iray dakel a pamaakaran a napaaligwas daray abilidad da—panaghardin, arte, konstruksion, musika. Isipen pa met so amin a gawa na palsa a naaral da komon legan a susumpalen day komisyon dan patuloken so dalin tan gawaen itan a paraiso. (Genesis 1:28) On, say bilay komon di Adan tan Eva so napno na, aliwan say paningel tan ot-ot, noagta panliket tan sayaksak. Malinlinew, anggapo komon so pankaukolan da na ligliwa.
4, 5. (a) Akin a sinmaew si Adan tan Eva ed subok a katutulok? (b) Panon ya asabin nakaukolan na katooan so ligliwa?
4 Anggaman ontan, say peteg a kaukolan di Adan tan Eva et say pamayubo na aralem a panangaro tan apresasyon ed mapangasin mangatatawen ya Ama ra. Ontan ya aro so amakiwas ed sikara komon ya ontulok ed Dios ed amin a sirkumstansya. (Ikompara so Juan 14:31.) Makapaermen, namparan say orihinal ya atateng tayo so agtinmulok ed makanepegan a Soberano ra, si Jehova. Imbes, inabuloyan da so inkasikaran nisilong ed marelmeng ya uley na naplag ya anghel, si Satanas a Diablo. Si Satanas so anukso ed si Eva pian mankasalanan tan mangan ed isesebel a bunga. Insan si Adan so nankasalanan sanen kinan to met so bunga na kiew a nipaakar ed satan et malinlinew lan impasakbay na Dios: “Dia ed agew a pangan mo ed satan ompatey ka.”—Genesis 2:17.
5 Diad onian dalan, say makasalanan a sanasawa et ginmapon ompatey. Sanen impaakseb so sentensyan patey, inkuan met na Dios ed si Adan: “Nisamba so dalin lapu ed sika. Dia ed kairapan mangan ka na nabodbor ed sikato ed leleg na amin ya agew a panbilay mo. Saray sabitan met tan saray sizañas a manbunga ra ed sika, tan kanen mo so saray tanaman na uma.” (Genesis 3:17, 18) Sirin et abalang di Adan tan Eva so ilalon pagmaliwen a paraiso so ag-abayuboan a dalin. Diad impakapatakyas manlapud Eden, kaukolan dan italikarkar so pantagano ra manlapud dalin a naayew. Saray kapolian da, lapud impakatawir ed sayan makasalanan, ompapatey a kipapasen, so walaan met na baleg a pankaukolan na ligliwa.—Roma 5:12.
Asumpal so Makaligliwan Sipan
6. (a) Anton makaligliwan sipan so ginawa na Dios kayari inkaplag na too ed kasalanan? (b) Anton propesiya nipaakar ed ligliwa so imbalikas nen Lamec?
6 Sanen sesentensyaan so manangigapo na impanrebelde na too, pinaneknekan nen Jehova a sikato so ‘Dios na ligliwa.’ (Roma 15:5) Agawaan to itan diad sipan ton mangibaki na sakey a “bini” a diad kaunoran et mangiliktar ed kapolian nen Adan manlapud makaderal iran epekto na impanrebelde nen Adan. (Genesis 3:15) Ag-abayag, initer met na Dios iray pagpauna ed onian panangiliktar. Alimbawa, pinuyanan to si Lamec, arawin kapolian nen Adan diad panamegley na ilalak ton Seth, a mangipropesiya nipaakar ed gawaen na ilalak nen Lamec: “Saya lanlamang so manligliwa ed sikatayo a nipaakar ed saray kimey tan sagpot na saray limalima tayo, nisengeg ed dalin ya insamba na Dios.” (Genesis 5:29) Mitunosan ed sayan sipan, say ugaw so nginaranan a Noe, a mabitar a kabaliksan toy “Painawa” odino “Tambayo.”
7, 8. (a) Anton situasyon so angipaarap ed si Jehova a panermenan to so impamalsa ed too, tan anto so ginagala To bilang ebat? (b) Panon a nambilay si Noe unong ed kabaliksan na ngaran to?
7 Kaleganan to, si Satanas so makakatangguyor na dakel a patumbok ed limog na mangatatawen ya angheles. Saraya so nankinon too tan angaala na magagangganan bibiin kapolian nen Adan bilang kaasawaan da. Saratan ya agkasiporan a pankasakey so lalon amauges ed sosyedad na too tan amawala na andiay-dios a rasan Nephilim, “manakar-akar,” a pinano ray dalin na karawalan. (Genesis 6:1, 2, 4, 11; Judas 6) “Si Jehova anengneng to a say kabaglan na too ed dalin abalbaleg . . . Et impangoli-oli so linawa nen Jehova a nanggawa na too ed dalin, tan sikato so amasinagel ed puso to.”—Genesis 6:5, 6.
8 Ginagala nen Jehova a deralen iman a marelmeng a mundo diad panamegley na englobon delap, balet inmuna et kinaukolan ton pamaalageyen si Noe na sakey a biong a mangisalba ed bilay. Diad ontan a paraan, nisalba so atooan a rasa tan saray klase na ayayep. Agaylan inawa parad Noe tan say pamilya to sanen kayari na Delap et pinmaway ira ed biong ya amaarap ed alinisan a dalin! Agaylan ligliwa so pakaimanon say ayew ed dalin so nakal, a manggawa’d panagdalos ya ontanlan mas mainomay! On, talagan tinmua so propesiya nen Lamec, et nambilay si Noe unong ed kabaliksan na ngaran to. (Genesis 8:21) Bilang matoor ya aripen na Dios, si Noe so instrumento ed impangitarok na sakey a sukat na “ligliwa” ed katooan. Balet, ag-angangga so marelmeng ya impluensya nen Satanas tan demonyon angheles to ed inkagaway Delap, tan say katooan so nantultuloy a maningel ed silong na belat na kasalanan, sakit, tan ipapatey.
Sakey a Babaleg Nen si Noe
9. Panon ya apaneknekan a si Jesu-Kristo so mananulong tan managligliwa parad magbabawin totoo?
9 Kabekta, diad kasampotan na ngalngali 4,000 taon na awaran na too, sinmabi so insipan a Bini. Apakiwas lapud baleg ya aro parad katooan, imbaki nen Jehova a Dios so bogbogtong ya Anak to ed dalin pian ompatey bilang dondon parad makasalanan a sankatooan. (Juan 3:16) Intarok nen Jesu-Kristo so baleg ya inawa ed saray agmagbabawin makasalanan a mangaagamil na pananisia ed masakripisyon ipapatey to. Amin ya angidedika na bilay to ed si Jehova tan nagmaliw a bautismadon babangatan na Anak to so makakaeksperiensia na magnayon a represko tan ligliwa. (Mateo 11:28-30; 16:24) Anggaman sikaray ag-ayadyari, panggagayagaan dan tuloy so panlingkor ed Dios tekep na malinis a konsiensia. Agaylan ligliwa parad sikara so pakaamta a no itultuloy day pangagamil na pananisia ed si Jesus, sikaray natumangan na andi-anggaan a bilay! (Juan 3:36; Hebreos 5:9) No lapud kakapuyan sikaray seryoson akapankasalanan, diad ontan et walaan ira na katulongan, odino managligliwa, diad panamegley na apaolin Katawan a Jesu-Kristo. (1 Juan 2:1, 2) Diad pangipatua ed ontan a kasalanan tan diad pangala na Makasulatan iran kundang pian paliisan so pangagamil na kasalanan, nagamoran da so inawa, diad pakaamtan say ‘Dios so matoor tan matunong a mamerdona na saray kasalanan da.’—1 Juan 1:9; 3:6; Uliran 28:13.
10. Anto so naaralan tayo manlapud saray milagron ginawa nen Jesus sanen wadia ed dalin?
10 Legan a wadiad dalin, intarok met nen Jesus so represko diad impangibulos ed aselepay demonyo, diad impanambal ed amin a nengneng na sakit, tan diad impamaoli ed saray inad-aron inaatey. Tua, saratan a milagro et temporaryo labat so gungguna ra, ta diad kaunoran et saramay abendisyonan so tinmatken tan inatey. Anggaman kuan, ipapabitar nen Jesus so permanenti iran bendisyon ed arapen ya ikalbo to ed amin a katooan. Natan bilang makapanyarin mangatatawen ya Ari, agmabayag et mas ni so gawaen to nen say basta pamagit ed dedemonyo. Ikalinsurong tora pati ed lider da, si Satanas, diad inka-inaktibon kipapasen. Insan onggapo’d satan so maglorian Sanlibon Taon ya Uley nen Kristo.—Lucas 8:30, 31; Apocalipsis 20:1, 2, 6.
11. Akin a tinawag nen Jesus so inkasikato bilang ‘Katawan na sabbath’?
11 Inkuan nen Jesus a sikato so ‘Katawan na sabbath,’ tan dakel so agawan impamaabig to ed agew na Sabbath. (Mateo 12:8-13; Lucas 13:14-17; Juan 5:15, 16; 9:14) Akin ya onia? Bueno, say Sabbath so kabiangan na Ganggan na Dios ed Israel tan ontan sirin kinmana bilang “anino na saray penel na bengatla ya onsabi.” (Hebreos 10:1) Say anemiran agew ed loob na simban impankimey so mangipapanonot ed apalabas ya 6,000 taon ya impakaaripen ed maruksan uley nen Satanas. Say agew na Sabbath ed sampot simba so mangipapanonot ed naeksperiensian makaligliwan painawa na katooan legan na Sanlibon Taon ya Uley na Babaleg a Noe, si Jesu-Kristo.—Ikompara so 2 Pedro 3:8.
12. Diad antoran makaligliwan eksperiensia so iilaloan tayo?
12 Alay inawan nalikna na mangaraldalin ya uuleyan na uley nen Kristo sano, diad kaunoran et naimano ray inkasikaran sigpot a bulos manlapud marelmeng ya impluensya nen Satanas! Kaaruman a ligliwa so onsabi legan a naeeksperiensia ra so pakakatambal da ed pisikal, emosyonal, tan mental iran beblay. (Isaias 65:17) Insan, isipen pa so agaylan liket legan ya aabrasaen daray apaolin inad-aron inaatey! Diad onia iran paraan et “punasen [na Dios] so amin a lua ed kamataan da.” (Apocalipsis 21:4) Legan a kalkalnan niyaaplika iray gungguna na dondon bagat nen Jesus, saray matulok ya uuleyan na Panarian na Dios so ombulaslas ed inkayadyari, sigpot a nibubulos manlapud amin a mauges ya epekto na kasalanan nen Adan. (Apocalipsis 22:1-5) Insan diad satan et nibulos si Satanas “ed daiset a panaon.” (Apocalipsis 20:3, 7) Amin a totoon sitotoor a mangitatandoro ed manepeg ya inkasoberano nen Jehova so natumangan na andi-anggaan a bilay. Isipen pa so agnibagan gayaga tan inawa ed pagmaliw a sigpot a “niliktar ed inkaaripen na kabulokan”! Diad ontan et say matulok a katooan so panggayagaan da so “kawayangan na gloria na saray anak na Dios.”—Roma 8:21.
13. Akin ya amin a tuan Kristianos et kaukolan da so ligliwan iiter na Dios?
13 Kaleganan to, mantultuloy tayon nisisilong ed say paningel tan ot-ot a kaslakan ed amin a manbibilay ed utel na marelmeng a sistema nen Satanas. Say idaraak na sakit tan emosyonal a diperensya so mangaapekta ed amin a nengneng na totoo, pati saray matoor a Kristiano. (Filipos 2:25-27; 1 Tesalonica 5:14) Niarum ni, bilang Kristianos et mabetbet tayon nasasagmak so agmakatunongan a panagmodmora tan panamasegsegang ya ibubunton nen Satanas ed sikatayo lapud ‘oonoren tayo so Dios bilang manuley imbes ed totoo.’ (Gawa 5:29) Kanian, ta pian makapansungdo itayo ed panggawa na linawa na Dios ya anggad anggaan na mundo nen Satanas, kaukolan tayo so ligliwa, tulong, tan biskeg ya itatarok To.
No Iner so Pakaromogay Ligliwa
14. (a) Anto so insipan nen Jesus ed labi sakbay na impatey to? (b) Anto so nakakaukolan ta pian nagunggunaan tayon tuloy manlapud ligliwa na masanton espiritu na Dios?
14 Diad labi sakbay na ipatey to, impalinew nen Jesus ed matoor ya apostoles to ya agmabayag et taynan to ra tan ompawil ed Ama to. Saya so angonigon tan amaermen ed sikara. (Juan 13:33, 36; 14:27-31) Diad impamidbir a talagan kaukolan day tuloy-tuloy a ligliwa, insipan nen Jesus: “Kerewen ko ed Ama tan ikdan to kayo na sananey a managligliwa ed sikayo ed maando.” (Juan 14:16, NW, paimano’d-leksab) Tutukoyen dia nen Jesus so masanton espiritu na Dios, a nikalbo ed saray babangatan to 50 agew kayari na inkioli to.a Sakey ni, niligliwa ira na espiritu na Dios legan na saray subok da tan amabiskeg ed sikara pian mantultuloy a nagawaan so linawa na Dios. (Gawa 4:31) Anggaman ontan, say ontan a tulong so agnepeg a moriaen a bengatlan automatiko. Pian sigpot a nagunggunaan ed satan, nepeg ya ipikasi na balang Kristiano so makaligliwan tulong ya iiter na Dios diad panamegley na masanton espiritu to.—Lucas 11:13.
15. Antoray arum a paraan a mangiiter si Jehova ed sikatayo na ligliwa?
15 Sakey nin dalan a mangiiter so Dios na ligliwa et diad panamegley na Salita to, say Biblia. Insulat nen Pablo: “Saray bengatla a nisulsulat nensaman, nisulat ira ya onkana ed kibangat tayo, ta pian lapu ed anos tan lapu ed panamaligliwa na saray Sulsulat wala so ilalo tayo.” (Roma 15:4) Ipapanengneng na saya so pankaukolan tayo parad regular a panagaral tan panagdalepdep ed saray bengatlan nisulat ed Biblia tan ed saray nibased-Biblian palapagan. Kaukolan met a sikatayo so regular ya onatendi ed amin a Kristianon miting, a ditan nipapanabang iray makaligliwan kaisipan a manlalapud Salita na Dios. Sakey ed manuna iran gagala na saratan a pandaragup et say pakapanpapasesegan.—Hebreos 10:25.
16. Anto so nepeg ya ipakiwas ed sikatayo na makaligliwa iran probisyon na Dios a gawaen?
16 Ipapanengneng na sulat nen Pablo ed saray taga-Roma iray maong a resultan naawat tayo lapud pangaanamot ed saray makaligliwan probisyon na Dios. “Say Dios na anos tan ligliwa,” insulat nen Pablo, “yabuloy to komon ed sakey tan sakey ed sikayo so apasakey a kalakal unong ed Kristo Jesus, pian dia ed inpankakasakey yo dia ed sakey a sangi so pangirayew ed Dios tan Ama na Katawan tayo a Jesu-Kristo.” (Roma 15:5, 6) On, diad sigpot a panganamot ed makaligliwa iran probisyon na Dios, sikatayo so magmaliw a singa say makpel a Lider tayo, si Jesu-Kristo. Saya so mamakiwas ed sikatayo a mantultuloy ya usaren iray sangi tayo pian igloria so Dios diad panagtasin kimey tayo, diad saray miting tayo, diad pribadon pitongtong tayo ed saray kapananisiaan, tan diad saray pikakasi tayo.
Diad Panaon na Mairap a Subok
17. Panon a niligliwa nen Jehova so Anak to, tan diad anton resulta?
17 Si Jesus so “naningel na baleg” tan “nanermen a tuloy” ed labin sakbay na makapaot-ot ya ipapatey to. (Mateo 26:37, 38) Kanian sikato so inmarawi daiset manlapud saray babangatan to pian manpikasi ed Ama to parad tulong. “Sikato so nadngel lapud masanton panaglikas to.” (Hebreos 5:7) Isasalaysay na Biblia a “pinmatnag ed sikato [Jesus] so sakey ya anghel a nanlapu ed tawen, ya amabiskeg ed sikato.” (Lucas 22:43) Say makpel tan lakilakin paraan ya inyarap nen Jesus ed saray sumusumpa to so paneknek a say dalan na impanligliwa na Dios ed Anak to so sankaepektiboan.—Juan 18:3-8, 33-38.
18. (a) Anton panaon ed bilay nen apostol Pablo so nagkalautlan makapasubok? (b) Panon tayon magmaliw a ligliwa ed saray makuli tan maabagey a mamatatken?
18 Si apostol Pablo met so akasagmak na saray panaon na mairap a subok. Alimbawa, say ministeryo to ed Efeso so atandaan na “saray lua, tan saray inkasalsali a sinmabi ed [sikato] lapu ed kasiliban na saray Judios.” (Gawa 20:17-20) Diad kaunoran, tinaynan nen Pablo so Efeso kayarin saray sumusuporta na diosan Artemis so anagyat ed syudad ya onsumpa ed panagpulong to. (Gawa 19:23-29; 20:1) Legan a mamapaarap si Pablo ed amianen ed syudad na Troas, wala so bengatlan mangaaburido ed sikaton maong. Sakbay na gulo ed Efeso, akaawat na makapagonigon a report. Say ugaw nin kongregasyon diad Corinto so sasaloten na inkaapag-apag, tan satan so maabuloy ed pilalawanan. Kanian manlapud Efeso et si Pablo so kaukolan a mansulat na sakey a sulat na mabiskeg a panamaat diad ilalon nakorehi ni so situasyon. Aliwan mainomay itan a bengatlan gawaen. “Ta dia ed saray dakel ya ermen tan irap na puso, insulat ko ed sikayo ed dakel a lua,” so imparungtal to diad saginonor ed onkomaduan sulat. (2 Corinto 2:4) Singa si Pablo, aliwan mainomay parad saray maabagey a mamatatken so pangiter na manangorehin konseho tan panamaat, on lapud sikaran mismo et amta daray kaleteyan da. (Galacia 6:1) Komon ta sikatayo sirin ya amin so magmaliw a ligliwa ed saramay mangidadaulo ed limog tayo diad tampolan ya ikiwas ed maaro tan nibased-Biblian konseho.—Hebreos 13:17.
19. Akin a tinmuloy si Pablo a manlapud Troas ya amaarap ed Macedonia, tan panon a sikato so nainawaan diad kaunoran?
19 Legan a walad Efeso, aglambengat sinulatan nen Pablo iray agagi ed Corinto noagta imbaki to met si Tito pian mangasisti ed sikara, ya inganggan ton ireport no antoy ebat da ed sulat. Labay ya amperen nen Pablo si Tito ed Troas. Diman ya abendisyonan si Pablo na saray maabig a pankanawnawa a manggawa na saray babangatan. Balet ta saya so ag-akapangekal ed kapagaan to lapud agni sinmabi si Tito. (2 Corinto 2:12, 13) Kanian sikato so nambiahe ya amaarap ed Macedonia, diad ilalon nasabian to diman si Tito. Lalon pinmaga si Pablo lapud pirmi impakasumpa ed ministeryo to. “Sanen sinmabi kami ed Macedonia,” isasalaysay to, “anggapo a balot so painawa na laman mi, noag ingen nairapan kami—dia ed paway saray kolkol, dia ed loob saray takot. Anggaman ontan, say manligliwa ed saray abeban linawa, salanti say Dios, niligliwa to kami lapu ed insabi nen Tito.” (2 Corinto 7:5, 6) Alay inawa sanen diad kaunoran et sinmabi si Tito a mangibaga ed si Pablo nipaakar ed positibon kiwas na saray taga-Corinto ed sulat to!
20. (a) Singa ed kaso nen Pablo, anto so sananey ya importantin paraan a mangiiter si Jehova na ligliwa? (b) Anto so konsideraen tayo ed ontumbok ya artikulo?
20 Say eksperiensia nen Pablo so makaligliwa ed ariripen na Dios natan, a dakel ed sikara so nipapaarap met ed saray subok a pansesengegan na “pakapaabeba,” odino “pakagonigonan” da. (Phillips) On, amta na ‘Dios a mangiyaabuloy na ligliwa’ iray pankaukolan tayo bilang indibidual tan nayarian ton usaren itayon manligliwa ed sakey tan sakey, no panon ya aligliwa si Pablo diad panamegley na report nen Tito ed magbabawin awawey na saray taga-Corinto. (2 Corinto 7:11-13) Diad ontumbok ya artikulo tayo, konsideraen tayo so ampetang a kiwas nen Pablo ed saray taga-Corinto tan panon itan a makatulong ed sikatayon magmaliw ya epektibon mananginabang na ligliwa na Dios natan.
[Paimano ed leksab]
a Sakey ed manunan ikukurang na espiritu na Dios ed inmunan-siglon Kristianos et say panlana ed sikara bilang atagibin espiritual ya ilalak na Dios tan agagi nen Jesus. (2 Corinto 1:21, 22) Saya so nigana labat ed 144,000 a babangatan nen Kristo. (Apocalipsis 14:1, 3) Natan say maslak a kabiangan na Kristianos so mapangasin naikdan na ilalon andi-anggaan a bilay ed paraison dalin. Anggan ag-alanaan, sikara met so natutulongan tan naliligliwa na masanton espiritu na Dios.
Kasin Naebatan Yo?
◻ Panon ya asabin kaukolan na katooan so ligliwa?
◻ Panon ya apaneknekan a si Jesus so babaleg nen say si Noe?
◻ Akin a tinawag nen Jesus so inkasikato bilang ‘Katawan na sabbath’?
◻ Panon a mangiiter so Dios natan na ligliwa?
[Mapa/Litrato ed pahina 10]
(Parad aktual a format, nengnengen so publikasyon)
Naeksperiensia nen Pablo so baleg a ligliwa diad panamegley na report nen Tito nipaakar ed saray taga-Corinto
MACEDONIA
Filipos
GRESYA
Corinto
ASIA
Troas
Efeso