Susuportaan na Tongtong Nipaakar ed Delap so Salaysay ed Biblia

SAY englobon Delubio ed agew nen Noe so sakey a maawaran a katuaan. Saray bersyon na salaysay so naromog ed istorya na dakel a nanduruman sibilisasyon ed interon mundo. Diad bansa na Africa a Chad, say tribun Moussaye so walaan na onian salaysay nipaakar ed Delap:

‘Aminsan a panaon, diad arawdawin lugar, manaayam ditan so sakey a pamilya. Sakey ya agew, labay na ina na sayan pamilya a manparaan na daakan a tagano parad saray inad-aro to. Sirin inala to so lasong tan alo pian bayoen so butil pian pagmaliwen ya arina. Diad saman a panaon et mas abeba so tawen nen say natan. Diad tua et no igawat moy limam et nadiwit mo itan. Amasyan nambayo ed butil, tan say butil a binayo to so agangganon nagmaliw ya arina. Balet legan a manbabayo, say bii so agsiaasikason angitagey a maong ed alo, tan abutaw toy tawen! Tamtampol, dakel a danum so abalasubos ed dalin. Saya so aliwan ordinaryon uran. Inmuran na pitoran agew tan pitoran labi ya anggad say interon dalin so asaknaban na danum. Legan na ipepelag na uran, onaatagey met so tawen ya anggad say kawalaan to la natan​—agnaabot so tagey to. Agaylan inkadesyang ed sankatooan! Nanlapulad saman, andian tayo la na pribilihyon pakadiwit ed tawen.’

Sankapatnagan, saray istorya ed inmuunan panaon nipaakar ed englobon delap so naromog ed interon mundo. Saray akaunan totoo ed saray sibilisasyon na Amerika ontan met ed saray Aborigine na Australia et amin so walaan na istorya nipaakar ed satan. Nayarin nanduruma iray detalye, balet maslak ed salaysay so walaan na ideya a say dalin so asaknaban na danum tan pigpigara labat so totoon akaliktar ed sakey a ginaway-toon luluganan. Say malaknab ya inkiwala na onian tema so manusuporta ed katuaan a say sankamundoan a Delubio so talagan agawa, a singa nireport ed Biblia.​—Genesis 7:11-20.