Mankikimey na “Milagro” so Salita na Dios
UNONG ED SALAYSAY NEN THÉRÈSE HÉON
Sakey ya agew nen 1965, linmoob ak ed sakey a puesto tan angiyopresi ak na saray kopya na Watchtower tan Awake! a magasin ed saray manlalako diman. Diad imbeneg ko et nadngel ko so sakey ya impamaltog. Sakey a bala so kinmena ed datal ya asingger ed salik. “Ontan so kaukolan a pideneng ed Tastasi,” kuan na manlalakon manusutil ed siak.
ANAKTAKOT ed siak itan ya eksperiensia—balet agmagenap a mamatunda ed sigpot-panaon a ministeryo. Saray naaralan kon katuaan na Biblia so mablin tuloy pian abuloyan so antokaman a sengegay ikaindan koy ministeryok. Abuloyan yoak pan ipaliwawa no akin ya oniay imbagak.
Kayari inkianak ko nen Hulyo 1918, nanpirmi iray ateng ko ed Cap-de-la-Madeleine, sakey a melag a baryo na Quebec, Canada, a kabkabat bilang The Place of Miracles. Ondadagsa iray bisita dia pian pagalangay altar nen Birhen Maria. Anggaman saray nikuan a milagro nen Maria so agnapaneknekan, nankimey so Salita na Dios ed ngalngali mamilagron bilay na dakel a totoo legan a say purok so binmaleg ya anggad impagmaliw ton sakey a baley na 30,000.
Sanen ngalngali ak la manedad na 20, anengneng na amak so interes ko’d relihyon tan inter to’d siak so Biblia to. Sanen ginapoan ko lan basaen itan, atalagnaw ak ta naamtaan ko ed Exodo kapitulo 20 a say panagdayew ed imahen so malinlinew a nakokondena. Abalang kon tampol so kompiyansak ed saray bangat na Iglesia Katolika tan agak la akimisa. Agko labay a dayewen iray estatua. Natandaan ko ni Amak ya angikuan, “Thérèse, agka ta mimisa?” “Andi,” inyebat ko, “babasaen koy Biblia.”
Say panagbasa na Biblia so nantultuloy a kabiangan na bilay ko anggan kayari impankasal ko nen Setyembre 1938. Lapud say masiken ko, si Rosaire, so mabetbet a say trabaho to et diad labi, inyugalik so panbasa na Biblia sano sikatoy mantratrabaho. Ag-abayag et inisip kon walaray totoo na Dios, tan ginapoan kon anapen ira.
Say Impananap Ko ed Totoo na Dios
Lapud naaralan ko ed simbaan, sanen ugaw ak ni, antakot ak ya onugip diad takot ompan kabangon ko et wala ak la ed impierno. Pian nalabanan itan a takot, lawas kon ibabaga ed inkasiak a say Dios na aro so agmangiyabuloy ed bengatlan ontanlan makapataktakot a nagawa. Sitatalek ya intultuloy kon basaen so Biblia, aanapen so katuaan. Singa ak samay Etiopen eunoko a manbabasa balet agto natatalosan.—Gawa 8:26-39.
Say agik a lakin si André tan say asawa to, a manaayam ed leksab na apartment a kawalaan mi, so ginmapon nanaral na Biblia a kaibay Tastasi nen Jehova ed ngalngali taon 1957. Binilin koy ayrok a pasakbayan toak diad panoktok ed gobida sano onsabi lay Tastasi a manpulong ed kawalaan min bilding. Diad ontan et amtak no lukasan ko so puerta odino andi. Sakey ya agew alibangan ton pasakbayan ak.
Diad saman ya agew a nilukasan ko so puerta tan akabat ko si Kay Munday, sakey a payunir, unong a tawag ed sigpot-panaon a ministros na Tastasi nen Jehova. Intongtong to ed siak so nipaakar ed ngaran na Dios, ya impaliwawa a walaan na personal a ngaran so Dios, a Jehova. Kayari impanpatanir to, ninengneng ko ed Biblia pian napekderan no kasin tuan say imbaga to et sinuportaan na saray teksto ed Biblia. Say impansukimat ko et amaliket ed siak.—Exodo 6:3, Douay Version, footnote; Mateo 6:9, 10; Juan 17:6.
Sanen binisita ak lamet nen Kay, nantongtongan mi doktrina na Katoliko a Trinidad, a mangibabagan say Dios et taloran persona ed sakey a Dios. Diad saginonor et maalwar kon inusisa so dilin Bibliak pian penekey inkasiak ya ag-ibabangat na satan so Trinidad. (Gawa 17:11) Say personal ya inpanusisak so amekder a si Jesus so agkasimbangan na Dios. Sikato so pinalsa. Sikatoy walaan na gapoan, bangta si Jehova et andian na gapoan. (Salmo 90:1, 2; Juan 14:28; Colosas 1:15-17; Apocalipsis 3:14) Napnek ed naaaralan ko, maliket ak a mangituloy ed saray diskusyon nipaakar ed Biblia.
Sakey ya agew nen 1958, legan na bagyoy nieve ed Nobyembre, inimbitaan ak nen Kay ya onatendi ed sirkiton asamblea ed saman lanlamang a labi diad sakey ya inupaan a hall. Inawat ko so imbitasyon tan nanggayagaan so programa. Kayari, diad impitongtong ed sakey a Tasin inmasingger ed siak, tinepet ko, “Nepeg ta a manpulong ed kabkaabungan so sakey a tuan Kristiano?”
“On,” so kuanto, “say maong a balita so nepeg a nideklara tan ipaparungtal na Biblia a say idadalaw ed totoo ed ayaman da so sakey ya importantin metodo na panagpulong.”—Gawa 20:20.
Agaylay liket ko ed ebat to! Angombensi itan ed siak ya aromog ko so totoo na Dios. No say imbaga to et, “Andi, agkapilitan itan,” panduaruwaan ko no kasin aromog ko so katuaan, ta amtak so ibabaga na Biblia nipaakar ed panagpulong ed kabkaabungan. Nanlapulad satan, maples so inyaligwas ko ed espiritual.
Kayari na satan a sirkiton asamblea, ginapoan kon atendian iray miting na Tastasi nen Jehova ya agawa ed kabangibang a baley na Trois-Rivières. Si Kay tan say kapareha to, si Florence Bowman, so mogmon Tastasin manaayam ed saman diad Cap-de-la-Madeleine. Sakey ya agew et inkuanko, “Mila ak ed sikayo a manpulong nabuas.” Maliket iran napiulopan ak.
Panagpulong ed Dilin Baley Ko
Say abaloan ko et amin so mangawat ed mensahe na Biblia, balet naaralan kon tampol ya aliwan ontan manaya. Sanen naasain si Kay tan Florence ed sananey a pasen, bukbukor ko lan manpupulong ed baley nipaakar ed saray katuaan na Biblia ed kabkaabungan. Sipapakpel, intuloy ko so nanpulong a bukor ed ngalngali duay taon ya anggad inkabautismoan ko nen Hunyo 8, 1963. Diad satan a mismon agew et nanpalista ak bilang vacation pioneer.
Nantultuloy ak bilang vacation pioneer ed loob na sakey taon. Ag-abayag et insipan nen Delvina Saint-Laurent ya onla ed Cap-de-la-Madeleine tan mikimey ed siak a maminsan ed sakey simba no siak so magmaliw a regular pioneer. Kanian pinirmaan ko so aplikasyon. Anggaman ontan, makapaermen ta duay simba sakbay ya igapok lay sigpot-panaon a ministeryo et inatey si Delvina. Anto so gawaen ko? Balet ta apirmaan ko lay aplikasyon tan agko labay a salatan iray planok. Kanian nen Oktubre 1964, ginapoan koy karerak a sigpot-panaon a ministeryo. Diad ontumbok ya apatiran taon, siak so nanbukbukor a nankabkaabungan.
Saray debosyonadon Katoliko ed Cap-de-la-Madeleine so mabetbet a maruksa. Arum so anawag ni ingen na pulis diad gunaet a patundaen ed panagpulong ko. Sakey ya agew, a singa asaglawi la ed kagapo, sakey a manlalako so analin manaktakot ed siak diad impamaltog ed salik. Bueno, saya so nansengegan na malaknab ya impakaalay imano na baley. Say lokal ya istasyon na telebisyon so anawag ed satan a krusada sumpad Tastasi nen Jehova. Say interon insidenti so nanresulta ed paborablin impantasi. Nibanbanan, samploran taon ed saginonor, sakey a kanayon na saman a managlako ya amaltog ed siak so nagmaliw a Tasi.
“Saray Milagro” ya Agawaay Salitay Dios
Diad loob na pigaran taon, anengneng ko so kalkalnan inkagba na say pader na isusumpa ed saray katuaan na Biblia diad Cap-de-la-Madeleine. Ngalngali 1968, arum a Tastasi so inmalis dia, tan saray lokal a residenti so ginmapon kinmiwas ed saray katuaan na Biblia. Diad asasakbay na 1970, diad ontan et bilang epekto et walay baleg ya indaak na bilang na panangiyaral na Biblia. Sinmabi itan ed punton mikasi ak la’d arum a Tastasin mangikondukta na pigara ed ikokonduktaan koy panangiyaral na Biblia ta pian nagawaan ko ni pibiang ed panagkabkaabungan a ministeryo.
Sakey ya agew, inawat na kalangweran a bii so katulongan ed panagaral na Biblian Say Katuaan a Mangitonton ed Bilay ya Andi Anggaan. Say kaiba to ed saman et say kalangweran a lakin manngaran na André, sakey a busangel a nengneng toy sakey a kriminal ya akiiba ed tongtongan mi. Say diskusyon so anagyat na interes nen André, tan nigapo so panagaral ed Biblia. Nanlapulad satan et ginapoan ton itongtong so naaaralan to ed kakaaro to.
Aminsan et iyaaralan ko na Bilbia so apatira ed saray membro na gang, say sakey et agmasyadon nansalita basta tinmalineng a maong. Say ngaran to et Pierre. Sakey a palbangon ed oras na ngalngali alas dos, sikami nen masiken ko so akadngel na toktok ed puerta. Isipen pay eksena: Apatiran membro na gang so akaalagey ed puerta tekep na tepetepet parad say siak. Maong ta agbalot manrereklamo si Rosaire ed ontan ya agnipanpanaon ya ibibisita.
Diad kagapo et inmatendi so apatiran lalaki ed saray miting. Balet si André tan si Pierre labat so nantultuloy. Intunos da so bilay da unong ed saray estandarte na Dios tan abautismoan. Diad masulok a 20 taon la natan, sikaran dua so sitotoor a manlilingkor ed si Jehova. Sanen ginapoan day panagaral, sikaray kabkabat lapud kriminal a gawa ra tan lawas babantayan na pulis. No maminsan et say pulis so onlan manaanap ed sikara kayari na sakey ed saray panagaral mi na Biblia odino legan na miting ed kongregasyon. Maliket ak ya akapanpulong ak ed “amin a nengneng na totoo,” tan diad ontan et anengneng kon mismo iray epekto na Salita na Dios ed pananguman ya ompatnag a talagan mamilagro.—1 Timoteo 2:4.
No diad kagapo na ministeryok et nibaga ed siak a diad kaunoran et niwala so Kingdom Hall diad Cap-de-la-Madeleine tan satan so napano na totoo nen Jehova, agko nasisia itan. Diad liket ko et samay melmelag a kongregasyon ed kaabay a syudad na Trois-Rivières so binmaleg ed anemiran maaligwas a kongregasyon a mantitipon ed taloran Kingdom Hall, pati say walad Cap-de-la-Madeleine.
Personal a nanggayagaan ko so impakatulong ed 30 totoo ya angidedika tan nanpabaustimo. Natan, diad edad lan 78, talagan nibagak a siak so maliket ta indedikak so bilay ko ed si Jehova. Anggaman ontan, talagan bidbiren kon walaray panaon a siak so adismaya. Pian sumbraan a sitatalona iratan a panaon, lawas kon lulukasan so Bibliak tan basaen so pigaran bersikulo a satan so abalbaleg a manrepresko ed siak. Imposibli parad siak so pamalabas na anggan sakey ya agew ya agbasaen so Salita na Dios. Nagkalalo lan makapaseseg et say Juan 15:7, a kuanto: “No mansiansia kayo ed siak, tan saray salitak mansiansia ra ed sikayo, kerew kayo na antokaman a laba’yo, ed nagawa ed sikayo.”
Iilaloan ko so pakanengneng ed si Rosaire diad balon mundo ya asingger la. (2 Pedro 3:13; Apocalipsis 21:3, 4) Sakbay a tuloy na impatey to nen 1975, sikatoy onaaligwas lan manpabautismo. Diad sayan bekta, siak so determinadon mantultuloy ed sigpot-panaon a ministeryo tan mantultuloy a manggayaga ed kimey nen Jehova.