“No Anto so Sinambaan Mo, Sumpalen Mo”
SAY samba so sakey a masimoon a sipan ed Dios pian gawaen so sakey a bengatla, mangiyapay odino manregalo, onloob ed sakey a panaglingkor odino kipapasen, odino onarawi manlapud pigaran bengatla a diad inkasikara et agsumpa ed ganggan. Say sakey a samba so mabulos a balikas na bulos linawa na sakey. Bilang sakey a masimoon a sipan, say sakey a samba et kabiskeg na sakey a pisipan odino sakey a sipan, tan no maminsan et saratan a duan salita so mankaiba ed Biblia. (Numeros 30:2; Mateo 5:33) Say “samba” so mas mangipapatnag na getma, bangta say “pisipan” so mangipatnag ed apelo ed atagtagey ya autoridad a mamapaneknek ed inkamatua odino inkapekder na say nipatnag. Saray pisipan so mabetbet ya uulopen na panamabiskeg na sakey a sipanan.—Genesis 26:28; 31:44, 53.
Say sankaunaan a rekord na sakey a samba so naromog ed Genesis 28:20-22, a ditan et insipan nen Jacob ya iter ed si Jehova so kakaplo na amin a kaykayarian to no ituloy nen Jehova a sikatoy ulopen tan ipawil a mareen, diad ontan et napaneknekan a Dios nen Jacob. Agmitatawalan si Jacob ed Dios, noagta labay to labat a seguroen a sikatoy walaan na abobon na Dios. Singa ipapanengneng na sayan alimbawa, saray patriarka so nanggawa na saray samba (nengnengen met so Job 22:27), tan singa met ed dakel nin kaugalian na saray patriarka, ipapalinew tan uuleyan iraya na Mosaikon Ganggan, imbes ya iyarap irayan dati laran kabiangan na panagdayew.
Dakel a samba so ginawa bilang apelo ed Dios parad pabor to tan itatalona ed sakey a kimey, a singa ed kaso nen Jacob. Say sakey nin alimbawa na ontan et say samba na Israel ya italaga ed kadederal na syudades na Canaanitan ari na Arad no ikdan nen Jehova so Israel na panbiktorya. (Numeros 21:1-3) Saray samba so ginawa met bilang balikas na debosyon ed si Jehova tan ed puron panagdayew to. (Salmo 132:1-5) odino pian ipatnag na sakey a too ya ibibiig to so inkasikato odino saray kayarian to parad nikaduman serbisyo. (Numeros 6:2-7) Saray atateng so makapanggawa na saray samban nisiglaot ed ananak da, a singa say ginawa nen Ana nipaakar ed si Samuel. (1 Samuel 1:11; ikompara so Uko-ukom 11:30, 31, 39.) Diad sarayan inkagawa akikoopera iray anak ed pakasumpal na samba.
Boluntaryo, Balet Napaletan Bektan Agawa
Saray samba ed interamenti so boluntaryo. Anggaman ontan, bektan agawa so samba, kapilitan so panumpal ed satan unong ed ganggan na Dios. Kanian say sakey a samba so nibabagan ‘nitekep ed kamarerwa to,’ ya ipapatnag na satan a say mismon bilay to so nagmaliw a garantiya ed kasumpalan na salita to. (Numeros 30:2; nengnengen met so Roma 1:31, 32.) Lapud say bilay so niiyan ed kapeligroan, natalosan no akin a sisimbawaen na Kasulatan so sakey a lalon manalwar sakbay a manggawa na sakey a samba, ya ikokonsideran maong iray obligasyon a sasayakupen to. Inkuan na Ganggan: “No bilang ta manggawa ka na sakey a samba ed si Jehova . . . anggapoy saew a kaukolanen ed sika na Dios, tan peteg a satan so magmaliw a kasalanan ed biang mo. Balet no bilang ta agka manggawa na samba, ag-itan magmaliw a kasalanan ed biang mo.”—Deuteronomio 23:21, 22.
Singa imbalikas na Managtipon diad saginonor: “No anto so sinambaan mo, sumpalen mo. Magmaong ya agka mangggawa na samba nen say manggawa ka na samba tan agmo sumpalen. Agmo abuloyan ya itonton ka na sangim a say laman mo a mankasalanan, nisay ibagam ed arap na sakey ya anghel a saman so sakey a lingo.” (Eclesiastes 5:4-6) Say sakey a samba a manapurastan ginawa lapud sagyat na temporaryon entusiasmo odino basta liknaan labat so nayarin napaneknekan a sakey a patit. (Uliran 20:25) Diad silong na Ganggan say sakey a manggawa na bastabasta samba so mankakasalanan ed arap na Dios tan kaukolan a mangiyapay parad kasalanan to. (Levitico 5:4-6) Bilang konklusyon, say sakey a samba so andian na kabaliksan ed saray mata na Dios no saya so agmitunosan ed matunong iran ganggan to tan ag-iya manlalapud maptek a nengneng na puso tan awawey.—Salmo 51:16, 17.