Say Gilead School so Angibaki ed Koma-100 a Klase To
WALAAN na importantin betang so Watchtower Bible School of Gilead ed sankamundoan a kiproklama na Panarian na Dios diad modernon panaon. Nanlapulad inggapo na Gilead School a mangipapasal na saray misionero nen 1943, manseserbi iray nangraduar ed masulok a 200 daldalin. Nen Marso 2, 1996, nangraduar so koma-100 a klase.
Saray estudyante so naneskuela ed panaon sanen masulok a 2 metro na pinmelag a niyebe so walad Watchtower Educational Center diad Patterson, New York. Agpankelawan, manpelag so niyebe ed agew na impangraduar da. Anggaman kuan, napno so auditorium, tan apusek iran dumerengel so tinmalineng diad Patterson, Wallkill, tan Brooklyn—2,878 ya amin.
Nanserbi bilang tserman si Theodore Jaracz, sakey a membro na Teaching Committee na Mananguley ya Ulop. Kayari ampetang ya impangabrasa ed saray sankaili a wadman a nanlapud dakel a daldalin, inimbitaan to so amin ya onalagey tan kantaen so numero 52. Inmaniweng so auditorium na dayew ed si Jehova legan a kakantaen so “Our Father’s Name,” manlapud libron Sing Praises to Jehovah. Satan a kanta, tekep na saray salaysay na tserman nipaakar ed kauusar na edukasyon pian idayew si Jehova so amawala na emosyon ed ontumbok a programa.
Makasulatan a Simbawa Manlapud Mamasiken
Say inmunan parte na programa so tinugyop na antikey iran paliwawa parad saray mangraduar na pigaran abayag lan ariripen nen Jehova. Si Richard Abrahamson, sakey a membro na hedkuarter staff a ginmapo ed sigpot-panaon a serbisyo nen 1940, so amaseseg ed klase: “Mantultuloy a Magmaliw a Manangitukoy.” Pinanonotan tora a sikara lay akaeksperiensia ed nanduruman panaon na panangitukoy ed bilay da bilang Kristiano, laktip lay limaran bulan na impaneskuela ed Gilead. Kanian akin a mantultuloy iran magmaliw a regular a manangitukoy?
Impaliwawa na espiker a say balikas ya inusar nen apostol Pablo ed 2 Corinto 13:11 so “mangililitrato na progresibon kurang, mantultuloy a panpasakop ed panitibukel odino pamipino ed sakey nen Jehova, sakey a panangipetek, ta pian nadampot na sakey iray lalon mankakaukolan na panangimanon estandarte nen Jehova.” Diad saray asainmin da ed biek-taew, arapen na saray mangraduar iray balon angat ed pananisia ra. Nakaukolan dan aralen so balon lenguahe, mitukoy ed duman kultora tan kipapasen na panagbilay, tan onadapta ed nanduruman nengneng na teritorya. Kaukolan da met a pidenengan iray nanduruman personalidad ed panmisioneron ayaman tan balon kongregasyon da. No siaalwar dan iyaplika iray prinsipyo na Biblia ed sarayan amin a situasyon, tekep na inkamabulos a mitukoy, sirin, singa ed insulat nen apostol Pablo, sikara met so “mantultuloy a manliket.”
Si John Barr, sakey ed limaran membro na Mananguley ya Ulop ya akibiang ed programa, so angaon na tema to ed 1 Corinto 4:9. Pinanonotan toray dumerengel a saray Kristiano so babantayan na saray anghel tan totoo. “Say pakaamta ed saya,” inkuanto, so pirmin mangaarum na kaimportantian ed kurang na Kristiano ed bilay, nagkalalo la sano namoria to a diad panamegley na ibaga tan gawaen to, sikatoy nawalaan na amarkaan ya epekto ed saraman so manbabantay, nanengneng ontan met ed agnanengneng. Sisiaen kon sayan bengatla so maabig a tuloy parad sikayo iran pinablin agagi na koma-100 a klase na Gilead a tandaan diad iyakar yo ed sankasulinekan iran sukong na dalin.”
Pinaseseg nen Brother Barr iray 48 estudyante a lawas sinononot, a legan dan tutulongan iray mala-karneron naaralan so katuaan, a “niwala so gayaga ed limog na saray anghel na Dios ed managkasalanan a magbabawi.” (Lucas 15:10) Diad panutukoy ed 1 Corinto 11:10, impanengneng to a say awawey na sakey ed teokratiko iran areglo so mangaapekta aliwa lambengat ed agagi tayo a nanenengneng tayo noagta saray anghel met ya agtayo nanenengneng. Agaylan makagungguna so lawas pannonot ed sayan malalaknab a panmoria ed situasyon!
Si Gerrit Lösch, sananey nin membro na Mananguley ya Ulop, a mismon nangraduar ed Gilead School, so aningbat ed saray kasulatan, a singa say Salmo 125:1, 2; Zacarias 2:4, 5; tan Salmo 71:21 pian ipanengneng a ‘papaliberan [nen Jehova] so totoo to.’ Mangitatarya na proteksion ed sikara ed amin a dapag. Kasin mangitarya so Dios na ontan labat a proteksion legan na baleg a kairapan? “Andi,” so ebat na espiker, “ta si Jehova so sakey a ‘bakor na apuy’ la natan, sakey a proteksion ed totoo to. Kayari taon na impanbakal nen 1919, nalmoan a saray nakdaan na espiritual ya Israel so sigugunaet ed pilalek dan ipulong so maong a balita na Panarian ed sankamundoan bilang pantasi ed amin a nasyones. Sikaray manangilaman na piguratibon Jerusalem ed katawenan. Igagarantiya nen Jehova so madibinon proteksion ed sarayan manangilaman legay panaon na anggaan. Siopa so makapatunda ed sikara? Anggapo.” Agaylan panamaseguro ed sikara tan ed amin a maapapit a mililimog ed sikara diad panggawa na madibinon linawa!
Si Ulysses Glass, abayag lan membro na faculty, so amaseseg ed klase a ‘sumpalen so panggawa na puesto ra ed sankamundoan ya organisasyon nen Jehova.’ Say puesto et sakey a situasyon odino sakey ya aktibidad a nagkalalo lan matukoy ed abilidad odino ugali na too. “Sikayoran prospektibon misionero so akaromog na puesto yo ed sankamundoan ya organisasyon na Tastasi nen Jehova,” indeklara to. “Balet, bangta mabli itan natan, saya lambengat so gapoan na bilay yo bilang sakey a misionero.” Nakaukolan ya iyaplika ran maong ed inkasikara iray abilidad da tan pian onnepeg ed espisyal iran asainmin ya iter nen Jehova tan say organisasyon to ed sikara.
Inter nen Wallace Liverance so unor a paliwawa ed programa, membro na Gilead faculty ed loob la na 17 taon ed Bolivia. “Iyan yo ta ed subok so Dios?” so intepet to ed ulop na estudyante. Panon dan gawaen itan? Say nasyon na Israel so anubok ed Dios ed lingon dalan. (Deuteronomio 6:16) “Mapatpatnag, say pangiyan ed Dios ed subok diad panreklamo odino pannguronguro odino anganko diad pangipanengneng na kakulangay pananisia diad pangasikaso na saray pamaakaran so lingo,” so inkuan na espiker. “Sano onsabi kayo ed balon asainmin yo, resistian itan ya inklinasyon,” so impaseseg to. Anto sirin so dugan dalan ya iyan ed subok so Dios? “Satan et say panisia ed no anto so ibabaga to, diad panggawan eksakto ed no anto so ibabaga to, tan insan ipalima la ed sikato so pawayan,” so salaysay nen Brother Liverance. Singa nanengneng ed Malaquias 3:10, iimbitaan nen Jehova iray totoo to: “Suboken yo ak, ipangasi yo.” Insipan to a no sikaray sitotoor a mangitarok ed kakaplo ra ed simpenan na templo, bendisyonan to ira. “Akin ya agyo moriaen so panmisioneron asainmin yo ed mipadparan dalan,” so impaseseg na espiker. “Labalabay nen Jehova ya ontalona kayo ed satan, kanian suboken yo. Mansiansia ed asainmin yo. Manggawa na saray panangiyarunsa ed labay ton gawaen yo. Mansungdo. Nengneng yo no agto kayo bendisyonan.” Agaylan maabig a simbawa parad amin a manseserbi ed si Jehova!
Kayari kansion, say programa so nauman manlapud saray diskurso ed serye na makapaliket iran interbio.
Praktikal Iran Balikas Malapud Lawak
Si Mark Noumair, sakey a balon membro na Gilead faculty, so angimbita ed saray estudyante a mangisalaysay na saray eksperiensia ra ed lawak a ministeryo legan na paneeskuela ra. Saraya so angipabitar ed kablian na pangipanengneng na inkamabulos ed ministeryo tan angiter ed dumerengel na praktikal iran ideya a nayarin usaren da.
Legan na impaneskuela ra, saray estudyante ed sayan klase na Gilead so nagkalalon agunggunaan ed impakapilimog da ed membro na Branch Committee manlapud 42 a daldalin, a wadman met ed Patterson Educational Center parad nikaduman panangipasal. Dakel ed sikara so nangraduar ed Gilead ed linmabas iran taon. Diad programa, ininterbio iray manangilaman na komatlo, komalima, koma-51, tan koma-92 iran klase, ontan met ed Gilead Extension School ed Germany. Agaylan makagungguna iray komento ra!
Imbaga ra no panon so liknaan na saray misionero legan a nanenengneng da so idaraak na bilang na manangidayew nen Jehova ed asainmin da manlapud pigpigara ya anggad samplon nilibo. Imbaga ra so betang ya agawaan da diad pangipapasabi na maong a balita ed nanaarawian ya ayaman ed Andes Mountains tan saray purok ed saray lapuan na Ilog Amazon. Siningbat da so panagtasi ed agmakabasa tan agmakasulat a totoo. Imbaga ray dilin pipupuligesgesan da pian makaaral na balo iran lenguahe tan no anto so realistikon nailaloan na mangraduar ed no panon kagano so nayarin pantasi tan panpaliwawa ed lenguahe a singa say Intsik. Sikaray angiinsayo na saray presentasyon ed Español tan Intsik. Indanet da a saray misionero so sankaepektiboan sano agda lambengat aralen so lenguahe noagta ontan met ed kaslakan a panag-isip na totoo. Imbaga ra so nipaakar ed mabetbet a mairap a kipapasey panagbilay diad pobren daldalin tan insalaysay: “Kaukolan a bidbiren na saray misionero a saya so mabetbet a niwawalan situasyon lapud aanamoten iray totoo. Nagawaay anggaay nayarian na sakey a misionero no nalilikna toy singa alikna nen Jesus—awalaan na panangasi ed totoo, a singa ira karneron andian na pastol.”
Kayari na kansion et nantultuloy so programa ed sakey a diskurso nen A. D. Schroeder, sakey a membro na Mananguley ya Ulop. Sikatoy apribilihyoan a magmaliw a sakey ed saray orihinal ya instruktor ed Gilead School sanen nilukas nen 1943. Bilang matukoy a panangikapot, siningbat to so teman “Idayew si Jehova Bilang Soberanon Katawan.” Say makapnek a diskusyon nen Brother Schroeder ed koma-24 na Salmo 24 so angipaslep ed amin ya inmatendi ed no panon kabaleg a pribilihyo so pangidayew ed si Jehova bilang Soberanon Katawan.
Kayari inkibunog na saray diploma, tan kaunoran a kansion, sinampotan nen Karl Klein na Mananguley ya Ulop na masimoon a pikakasi. Agaylan sakey a praktikal tan makarepreskon espiritual a programa iman!
Diad inlabas na saray agew kayari na impangraduar, say 48 a membro na koma-100 a klase so ginmapon nanbiahe a mamaarap ed misioneron asainmin da ed 17 daldalin. Balet agda kagapogapo labat ed ministeryo ra. Walaan la ra na magenap a rekord ed sigpot-panaon na Kristianon ministeryo. Sanen nanpalista ra ed Gilead, diad promedyo et manedad ira na 33 tan akapangideboto na 12 a taon ed sigpot-panaon a ministeryo. Pigara ed sikara so membro na sankagloboan a pamilyay Bethel na Watch Tower Society. Arum so nanserbi bilang managbiahen manangasikaso. Pigara ed estudyante so akipibiang la ed pigaran nengneng na serbisyo ed biek-taew—diad Aprika, Europa, Abalaten Amerika, saray isla na dayat, tan ed limog na grupo na sankailin-lenguahe ed bansa ra. Balet natan et sikaray miuulop la ed dakel a misionero a maliket a makapangibaga, ‘Manserbi kami ed inerman ed mundo a sikami so nakakaukolan.’ Say impapuson pilalek da et say pangusar ed bilay da pian itandoro si Jehova.
[Kahon ed pahina 27]
Saray Istatistika na Klase:
Bilang na saray nirepresentan bansa: 8
Bilang na saray bansan angi-asainan: 17
Bilang na saray estudyante: 48
Promedyon edad: 33.75
Promedyon taon ed katuaan: 17.31
Promedyon taon ed sigpot-panaon a ministeryo: 12.06
[Litrato ed pahina 26]
Koma 100 a Klasen Nangraduar ed Watchtower Bible School of Gilead
Diad listaan ed leksab, saray dasig so anumeroan manlapud arap a pabeneg, tan saray ngaran so akalista manlapud kawigi a manpakawanan ed kada dasig.
(1) Shirley, M.; Grundström, M.; Genardini, D.; Giaimo, J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T.; Berg, J.; Garcia, N.; Fleming, K. (3) Whinery, L.; Whinery, L.; Harps, C.; Giaimo, C.; Berg, T.; Mann, C.; Berrios, V.; Pfeifer, C. (4) Randall, L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.; Shood, D. (6) Beets, L.; Pfeifer, A.; Berrios, M.; Pine, J.; Mann, L.; Randall, P.; Grundström, J.; Hansen, G.