Report na Saray Manangiyabawag na Panarian

Say Manamasimbalon Pakayari na Salita na Dios

DIAD dilin impanako to, sikato so datin “sakey a manag-ayew tan manamasegsegang tan malangas a too.” (1 Timoteo 1:13) Balet sikatoy anguman! Say inkapasimbalo nen apostol Pablo so abalbaleg a diad saginonor et nideklara ton: “Magmaliw ya umaalig ed siak, singa siak met ed si Kristo.”​—1 Corinto 11:1.

Natan, nilasus nilibo a masimoon a managdayew ed interon mundo so manggagawa na mipadparan pananguman. Antoy amasarag ed sikaran gawaen itan? Sikaray mangaala na pikakabat ed Salita na Dios tan iyaaplika itan ed kabibilay da. Ipapabitar na ontumbok ya eksperiensia so manamasimbalon pakayari na Salita na Dios.

Diad Slovenia, walay maedad lan sanasawan manaayam a bukbukor ed paway na sakey a purok. Say asawan laki, si Jože, so ngalngali la manedad na 60 tan sakey ya alkoholiko. Siansia, aasikasoen to so mansasakit ya asawa to, si Ljudmila. Sakey ya agew inasinggeran na duaran manangiproklama na Panarian si Jože. Inimbitaan toray Tastasi ed ayaman to, a diman akabat da so asawa to. Kaleganan a narerengelan so mensahe na Panarian, inmagus so lua nen Ljudmila lapud gayaga. Nanggayagaan met nen Jože so nadngel to tan nantepet na amayamay. Kayari impakapalima na pigaran literatura na Biblia ed sanasawa, inmalis la iray Tastasi.

Sakey bulan ed saginonor akapawil iray Tastasi, tan naimano ra ed tapew na lamisaan so libro a Makapambilay Kayo na Ando lan Ando ed Paraiso diad Dalin. Sanen tinepetan no iner so angalaan to ed satan, inkuan nen Jože: “Anengneng ko so anunsyo ed beneg na sakey ed saray magasin ya intilak yo ed siak. Kanian sinulat ko so opisina yo ed Zagreb tan kinmerew na libro.” Lapud interes to, sikatoy inimbitaan ya onatendi ed onsasabin Memoryal na impatey nen Kristo a nagawa ed Kingdom Hall. Ontanlay gayaga na Tastasi lapud sikatoy inmatendi!

Ag-abayag nigapo so panagaral na Biblia, tan nagmaliw a maaligwas. Alimbawa, nipanengneng ed si Jože manlapud Biblia ya “agmo nepeg so manggawa parad inkasika na niukit ya imahen odino . . . ondakmomo ed saratan nisay naayat kan panlingkoran iratan,” tampol ton tinipon ya amin so relihyoson imahen a wala ed abung, pati iray litrato, tan imbantak iratan.​—Exodo 20:4, 5.

Napepenek so inkapgaan ed espiritual a katuaan nen Jože. Anggaman, makapaermen, siansian sikatoy walaan na sananey nin kapgaan. Diad loob na masulok a 18 taon, makakaupot na ngalngali 10 litro na alak ed kada agew. Lapud panag-inum to, agto naiimanon maong so itsura to. Balet kayari impakaaral to ed panmoria na Dios ed lingon panag-usar ed de-alkohol, sikatoy determinadon manguman.

Nanbanikelan ton talonaan a kalnakalna so problema to ed panag-inum to, ya irerekord no pigara so naiinum to ed inagew-agew. Ag-abayag sikatoy agla aaripenen na alak. Diad panaaral to na Biblia, naaralan to met a kakaukolanen ed saray tuan Kristiano so panmantini na personal a kalinisan ed laman. Kanian, angiter na kuarta ed Tastasi tan kuanto: “Bueno, lakayo tan manaliw na antokaman a kaukolan ko pian magmaliw a presentabli ed Kristiano iran miting tan diad lawak a serbisyo!” Pinmawil iray Tastasi ya awit-awit so kawes a pandalem, medyas, sapatos, kamisedentros, saray terno, korbata, tan sakey a porpolyo.

Kayari sakey taon ya impanaral na Biblia, kualipikado lan miulop si Jože tan Ljudmila ed Tastasi diad panagkabkaabungan. Taloy bulan ed saginonor insimbolo ray dedikasyon da ed Dios diad panamegley na bautismo ed danum diad distriton kumbension na Tastasi nen Jehova. Anggaman ed inkamasiken tan kaleteyan na bunigas, regular a mibibiang si Jože ed panangipulong na maong a balita tan diad saginonor, anggad impatey to nen Mayo 1995, so sitotoor a nanlingkor bilang ministeryal ya aripen ed kongregasyon. Say positibon resulta ya agawa ed bilay na sayan mapaabeban too tan say asawa to so mamapaneknek ed say manamasimbalon pakayari na Salita na Dios!