Panangabet ed Angat na Katooran
“Isulong [yo] so balon personalidad a pinalsa unong ed linawa na Dios diad tuan inkatunong tan katooran.”—EFESO 4:24.
1. Akin ya otang tayo ed si Jehova a Dios so pagmaliw a matoor?
DAKEL so nengneng na panangabet ed angat na katooran. Sankaimportantian et say pangabet ed angat na katooran ed si Jehova a Dios. Peteg, nisesengeg ed pangonsidera no siopa si Jehova tan no antoy nagagawaan to parad sikatayo, tan lapud dedikasyon tayo ed sikato, otang tayo ed sikato so pagmaliw a matoor. Panon tayon nipatnag so katooran ed si Jehova a Dios? Say sakey a manunan dalan et say pagmaliw a matoor ed saray matunong a prinsipyo nen Jehova.
2, 3. Anto so siglaotan ed baetan na katooran tan inkatunong?
2 Pian naabet itan ya angat, nepeg tayon talinengen iray salitan naromog ed 1 Pedro 1:15, 16: “Unong ed say Masanton Sakey ya anawag ed sikayo, sikayon mismo so magmaliw met a masanto ed amin a kondukta yo, lapud nisulat: ‘Nepeg a magmaliw kayon masanto, lapud Siak so masanto.’” Say katooran ed si Jehova a Dios so mamatulok ed sikatayo ed sikato ed amin a panaon, ya itunos ed masanton linawa to so kaisipan, salita, tan kakikiwas tayo. Kabaliksan na saya so kipreserba na maong a konsiensia, a singa ed niganggan ed sikatayo ed 1 Timoteo 1:3-5: “Peteg say getma na sayan manda, [ya agmangibangat na duman doktrina odino pangimano ed palson isistorya] et say aro a manlapud sakey a malinis a puso tan manlapud sakey a maong a konsiensia tan manlapud pananisia ya anggapoy pansimpisimpitan.” Tua, anggapo ed sikatayo so ayadyari, balet kaukolan a panggunaetan tayon gawaey anggaay nayarian tayo, agta ontan?
3 Say katooran ed si Jehova so mangamper ed sikatayo manlapud sinisiblet a pikompromiso ed matunong a prinsipyos. On, say katooran so mangipaliis ed sikatayo ed pagmaliw a mansimpisimpitan. Say katooran so walad kanonotan na salmista sanen inkanta ton: “Ibangat mo ak, O Jehova, nipaakar ed say dalan mo. Manakar ak ed katuaan mo. Pankasakey mo so pusok ya ontakot ed ngaran mo.” (Salmo 86:11) Kakaukolanen na katooran so matukoy ya inlitrato bilang “katutulok ed saray angiyimpuersa.”
4, 5. Amperen itayo na katooran manlapud panggawa na anto?
4 Say katooran ed si Jehova a Dios so mangamper met ed sikatayon manggawa na bengatlan mamabanday ed ngaran tan Panarian to. Alimbawa, onmanlay agpantatalosan na duaran Kristiano a sililingon binmaling ed minumundon korte. Tinmepet so huis, ‘Agta sikayon dua so Tastasi nen Jehova?’ Mapatnag ya agto natalosan no akin a sikaray wadman ed korte. Agaylan kabandayan iman! Say katooran ed si Jehova a Dios so nanggawa komon ed saraman ya agagin talinengen so konseho nen apostol Pablo: “No ontan, talagan mankabaliksan itan na pirmin pakataloan ed sikayo a mandedemandaan kayo ed sakey tan sakey. Akin ya agyo abuloyan a sikayo so palingo? Akin ya agyo abuloyan a sikayo so nasaul?” (1 Corinto 6:7) Peteg, say kurso na katooran ed si Jehova a Dios et say pakasagmak na personal a kalugi imbes nen say napabanday si Jehova tan say organisasyon to.
5 Say katooran ed si Jehova a Dios so manasaglawi met ed agpakatalonaan ed takot ed too. “Say panggiwgiw ed totoo so mangipapasen na patit, balet say manmamatalek ed si Jehova so naprotektaan.” (Uliran 29:25) Kanian, agtayo mikokompromiso sano nipaarap ed panamasegsegang, noagta tutumboken tayo so alimbawa na Tastasi nen Jehova ed datin Sobyet Union, ed Malawi, ed Etiopia, tan ed dakel nin daldalin.
6. Amperen itayo na katooran manlapud pilimog ed siopara?
6 No sikatayo so matoor ed si Jehova a Dios, arawian tayo so pikaaro ed amin a kakabusol to. Satan so rason no akin ya insulat nen babangatan a Santiago: “Mikakalugoran, agyo ta amta a say pikakaaro ed mundo so pibubusol ed Dios? Sirin, siopaman a labay to so mikaaro ed mundo et ibibilang toy inkasikato a kabusol na Dios.” (Santiago 4:4) Labay tayo so magmaliw a matoor a singa ed impatnag nen Arin David sanen inkuanto: “Agko ta bubusolen iraman so pirmin mamubusol ed sika, O Jehova, tan agko ta nalilikna so pandimla parad saramay onsusunggay sumpad sika? Tekep na interon gula busolen ko ira. Sikaray nagmaliw ed siak a peteg a kakabusol.” (Salmo 139:21, 22) Agtayo labay so midupongdupong ed siopaman a sigagalan mankasalanan, ta anggapoy pisiglaot tayo ed sikara. Agta say katooran ed Dios so mangamper ed sikatayo ed pilimog ed siopaman ed saratan a kabusol nen Jehova, direkta man odino diad panamegley na telebisyon?
Panangidepensa ed si Jehova
7. Say katooran so ontutulong ed sikatayon gawaen so anto no nipaakar ed si Jehova, tan panon iyan ginawa nen Elihu?
7 Say katooran so mamakiwas ed sikatayon idepensa si Jehova a Dios. Agaylan maabig so alimbawa nen Elihu! Ibabaga na Job 32:2, 3 ed sikatayo: “Say sanok nen Elihu . . . so pinmetang. Dinmalang so sanok to sumpad si Job lapud ta indeklara ton sikatoy matunong imbes a say Dios. Ontan met, dinmalang so sanok to sumpad taloran kaulop to ed bengatlan agda aromog so ebat noagta sikara so angigapon angibalikas a say Dios et marelmeng.” Diad Job kapitulo 32 anggad 37, indepensa nen Elihu si Jehova. Alimbawa, inkuanto: “Itepel moak na pigaran panaon ni, tan ideklarak ed sika a wala nira so salitan nibaga parad Dios. . . . Itupleg ko so inkatunong ed say Managgawa ed siak. . . . Agto ipaliis iray mata to ed say matunong.”—Job 36:2-7.
8. Akin a kaukolan tayon idepensa si Jehova?
8 Akin a kaukolan so pangidepensa ed si Jehova? Natan, say Dios tayo a si Jehova so naaayew ed dakerakel a paraan. Nibabagan sikato so anggapo, a sikatoy kabiangan na sakey a Trinidad, ya andi-anggaan ton paiirapen so totoo diad mangapuy-apuy ya impierno, a sikato so samet lambengat a manggugunaet a kombertien so mundo, ya agto iyaansakit so katooan, tan arum nira. Idedemostra tayo so katooran ed sikato diad panamegley na pangidedepensa ed sikato tan pamapaneknek a si Jehova et talagan wala; a sikato so makabat, maptek, makapanyarin-amin, tan maaron Dios; a sikato so walaan na panaon ed amin a bengatla; tan sano onsabi nigeter a panaon to, panganggaen ton amin so mauges tan pagmaliwen so interon dalin a paraiso. (Eclesiastes 3:1) Kakaukolanen na saya ya anamoten tayon amin so pankanawnawa pian tasian so ngaran tan Panarian nen Jehova.
Katooran ed Organisasyon nen Jehova
9. Diad antoran pamaakaran a nipanengneng na arum so pagmaliw dan agmatoor?
9 Onsabi tayo la natan nipaakar ed pamaakaran a pagmaliw a matoor ed nanengneng ya organisasyon nen Jehova. Talaga pan manepeg lambengat so pagmaliw tayon matoor ed satan, pati “say matoor tan makabat ya aripen,” diad panamegley na satan et napapakan ed espiritual so Kristianon kongregasyon. (Mateo 24:45-47) No bilang ta walay bengatlan nipatnag diad saray palapagan na Watch Tower ya agtayo natalosan odino piabobonan ed sayan bekta. Anto so gawaen tayo? Naopendi ta itayo tan taynan so organisasyon? Ontan so ginawa na arum sanen inyaplika na The Watch Tower, dakel lan taon so apalabas, so balon sipanan ed Milenyo. Arum so sinmanok ed inkuan ya aminsan na Say Panag-Bantayan ed isyu na neutralidad. No saraman so agapol ed sarayan pamaakaran so nanmatoor komon ed organisasyon tan ed agagi ra, inalagar da komon a palinewen nen Jehova irayan pamaakaran, a gagawaen to met ed nigeter a panaon to. Kanian, lalaktipen na katooran so siaanos a panalagar ya anggad pangipalapag na matoor tan makabat ya aripen pian lalon natalosan.
10. Say katooran so mangipaliis ed sikatayo manlapud pankaliktan ya amtaen so anto?
10 Say katooran ed nanengneng ya organisasyon nen Jehova et kabaliksan to met so pangipulisay ed saray apostata. Agkaliktan ya amtaen na saray matoor a Kristiano no antoy ibaga na saratan a totoo. Tua, ya ag-ayadyari iramay uusaren nen Jehova a Dios pian mangiwanwan ed kimey to ed dalin. Balet anto so ibabaga na Salita na Dios a nepeg tayon gawaen? Taynan so organisasyon na Dios? Andi. Kaukolan tayo so mansiansia ed saya lapud inaagin panamabli, tan makanepegan labat a mantultuloy tayon “aroen ya ampetapetang so sakey tan sakey manlapud puso.”—1 Pedro 1:22.
Katooran ed Matoor a Mamatatken
11. Tulongan itayo na katooran a manbantay sumpad anton negatibon kaisipan?
11 Sano naiirapan tayon talosan so sakey a bengatlan imbaga odino ginawa ed kongregasyon, agtayo ukomen iray motibo no walaan tayo na katooran noagta saya so ontulong ed sikatayo pian ipasen anganko iman et nisiglaot ed pangusar na dilin abilidad dan mangukom. Agta magmaong so pangonsidera ed maong iran kualidad na aturon mamatatken tan ed arum nin mananisia nen say pangonsidera ed kakulangan da? On, labay tayon arawian so ontan iran negatibon kaisipan, ta satan so nisiglaot ed pagmaliw ya agmatoor! Say katooran so ontulong met ed sikatayo a tuloken so bilin nen Pablo ya “agmansalitan makapasakit ed siopaman.”—Tito 3:1, 2.
12, 13. Antoran partikular ya angat so kaukolan ya arapen na mamatatken?
12 Lalon ipaparungtal na katooran so angat ed mamatatken. Sakey ed sarayan angat et say pamaakaran na pagmaliw a kompidensyal. Nayarin walay ipatua na sakey a membro na kongregasyon ed sakey a matatken. Say katooran ed satan a sakey so mangamper ed matatken ed panumlang ed prinsipyon pagmaliw a kompidensyal. Kaukolan ton talinengen so konseho ed Uliran 25:9: “Agmo ipaparungtal so kompidensiyal a tongtongan ed sananey.” Kabaliksan na saya so agpangiparungtal na saman a bengatla anggan ed dilin akulaw to!
13 Wala niray arum a subok ed katooran a kaukolan ya arapen na mamatatken. Kasin magmaliw ira a manamaliket ed totoo, odino sipapakpel tan siuuyamo ran aasistian iramay mankakaukolan na panangorihe, anggano sikaray kakanayon odino maapit a kakaaro? Say katooran ed organisasyon nen Jehova so managdag ed mamatatken ed sikatayon panggunaetan a tulongan so siopaman a mankaukolan na espiritual a tulong. (Galacia 6:1, 2) Anggaman sikatayo so mapangasi, say katooran so manggawa ed sikatayon prangka ed kapara tayon matatken, no panon a nagmaliw a prangka si apostol Pablo ed si Pedro. (Galacia 2:11-14) Diad biek a dapag, kaliktan na saray manangasikaso a magmaliw a maalwar, pian napaliisan so agmakabat ya ikiwas odino walay lalabien odino panangabuso ed autoridad da ed arum a paraan a nayarin mamairap ed sikaran mangasikason tekep na inkamatoor ed organisasyon na Dios.—Filipos 4:5.
14, 15. Antoran sengegan so nayarin manubok ed katooran na saray membro na kongregasyon?
14 Walaray arum ya aspeto na panangabet ed angat na katooran ed kongregasyon tan ed mamatatken to. No anggan panon et walaray magulon kipapasen ed loob na kongregasyon, mangiiter iya ed sikatayo na pankanawnawan ipanengneng so katooran ed si Jehova tan ed saramay mangirerepresenta ed sikato. (Nengnengen so The Watchtower, Hunyo 15, 1987, pahina 15-17.) Sano walay denispelosip, kakaukolanen na katooran a suportaan tayoray matatken, ya agpapalbengan no wala so magenap a rason parad inalan kundang.
15 Say katooran ed kongregasyon so mankakaukolan met ed sikatayon suportaan so amin a limaran sinimban miting anggad kalaknab ya iyaabuloy na sirkumstansya tan abilidad tayo. Aglambengat kakaukolanen na katooran a sikatayo so regular ya onatendi noagta manparaan met parad saratan tan mangiter na makapaalagey iran komento legan ya aabuloyan na pankanawnawa.—Hebreos 10:24, 25.
Katooran ed Panangasawa
16, 17. Antoran angat na katooran so kaukolan ya arapen na saray Kristianon walaay-asawa?
16 Siopa ni so nepeg tayon panmatooran? No sikatayo so walaay asawa, lapud samba tayo ed panangasawa, kaukolan tayon abeten so angat a pagmaliw a matoor ed asawa tayo. Say katooran ed asawa tayo so mangamper ed sikatayon nalingo ed pagmaliw a magmaong ed arum nen say diad dilin asawa tayo. Say katooran ed asawa tayo so mankakaukolan met ed sikatayon ag-iparungtal ed arum iray kaleteyan odino kakulangan na asawa tayo. Mas mainomay so panreklamo ed arum nen say kimeyan a pansiansiaen a lukas so pitatalosan ed asawa tayo, a kaukolan tayon gawaen a mitunosan ed Binmalitok a Ganggan. (Mateo 7:12) Diad tua, say pagmaliw a walaay-asawa so mangipaparungtal na seryoson angat ed Kristianon katooran tayo.
17 Pian naabet iyan angat na katooran, agtayo lambengat nepeg ya arawian so seryoson pankasalanan ed lingon kondukta noagta nepeg tayon bantayan met so mismon kaisipan tan liknaan tayo. (Salmo 19:14) Singa bilang, no say mapalikdon kapusoan tayo so maagum parad likeliket tan panliketan, alay inomay na sinisiblet a pagmaliw tayon pandinayewan so sakey a bengatla ed punton kaliktanen itan. Ipaseseg so katooran ed panamaley, sisimbawaen nen Arin Solomon iray asawan lalaki diad piguratibon paraan ya ‘uninom ed dili ran bobon.’ (Uliran 5:15) Tan inkuan nen Jesus: “Kada sakey a mantultuloy ya onnengneng ed sakey a bii pian nawalaan na panibeg ed sikato so akikalugoran la ed sikato ed puso to.” (Mateo 5:28) Say asawan lalaki a nigalet ed inkasikara ed pornograpiko iran materyal so mamepeligron nasagyat ed pikalugoran, sirin et sasaolen so asawa ra tan magmamaliw ya agmatoor ed sikara. Diad parehon rason, say asawan bii so nayarin nalanor a tuloy ed panagbantay na soap opera a walaan na saray eksenan nipaakar ed pikakalugoran a nayarin manukso ed sikaton magmaliw ya agmatoor ed si masiken to. Anggaman ontan, diad pagmaliw a talagan matoor ed asawa tayo, paeeleten tayo so bedber na panamaley, tan tutulongan tayo so sakey tan sakey diad pansasagpot tayon paliketen si Jehova a Dios.
Saray Katulongan ed Pantultuloy a Matoor
18. Say pakatalos ed anto so ontulong ed sikatayon magmaliw a matoor?
18 Anto ta so ontulong ed sikatayo diad pangabet ed angat na katooran diad sarayan apatiran lawak: katooran ed si Jehova, ed organisasyon to, ed kongregasyon, tan ed asawa tayo? Sakey a katulongan et say pakatalos a say panangabet ed angat na katooran so maapit a nisisiglaot ed kiyalangon na inkasoberano nen Jehova. On, diad pansiansian matoor et nipapanengneng tayo a momoriaen tayo si Jehova bilang Sankatalbaan a Soberano. Diad ontan et nawalaan itayo met na respeto’d-sarili tan ilalo ed andi-anggaan a bilay diad balon mundo nen Jehova. Natulongan tayo met so inkasikatayo a mansiansian matoor diad pangonsidera ed saray maabig ya alimbawa na katooran, manlapud si Jehova tan ontan met ed saramay asalambit ed Biblia tan ed saray palapagan na Watch Tower tayo, pati saray salaysay ed Yearbook.
19. Antoy betang a gawaen na pananisia ed pagmaliw tayon matoor?
19 Say mabiskeg a pananisia ed si Jehova a Dios tan say takot ya agnapaliket so ontulong ed sikatayon mangabet ed angat na katooran. Napabiskeg tayo so pananisia tan takot ed si Jehova diad sikukulin panaral ed Salitay Dios tan diad pibiang ed Kristianon ministeryo. Ontulong iya ed sikatayo pian onkiwas a mitunosan ed konseho nen Pablo a nirekord ed Efeso 4:23, 24: “Kaukolan a sikayo so napasimbalo ed puersan manamakiwas ed kanonotan yo, tan kaukolan yon isulong so balon personalidad a pinalsa unong ed linawa na Dios diad tuan inkatunong tan katooran.”
20. Manuna ed amin, anton kualidad so ontulong ed sikatayon magmaliw a matoor ed si Jehova tan ed amin niran pakakaotangan tayo na katooran?
20 Say apresasyon ed saray kualidad nen Jehova so ontutulong ed sikatayon manmatoor. Manuna ed amin, say agsinisiblet ya aro parad mangatatawen ya Ama tayo tan pisasalamat ed amin a nagagawaan to parad sikatayo, ya aaroen ed interon puso tan kamarerwa tan kanonotan tan biskeg tayo so ontulong ed sikatayon manmatoor ed sikato. Niarum ni, say pakawalaan ed aron imbaga nen Jesus a mangipaamta ed papatumbok to so ontulong ed sikatayon manmatoor ed amin a Kristianos ed loob na kongregasyon tan diad pamilya tayo. Diad arum a salita, satan so talagan pamaakaran a pagmaliw a balanglan masiblet odino agmasiblet. Say agkatooran et kabaliksan toy pagmaliw a masiblet. Say katooran et kabaliksan toy pagmaliw ya agmasiblet.—Marcos 12:30, 31; Juan 13:34, 35.
21. Panon a nayarin nasumaryo so nipaakar ed panangabet na angat ed katooran?
21 Bilang sumaryo: Say katooran so sankatagyan a kualidad ya ipapatnag nen Jehova a Dios, nen Jesu-Kristo, tan amin a tuan ariripen nen Jehova. Pian nawalaan na maong a siglaotan ed si Jehova a Dios, nepeg tayon abeten so angat na katooran ed sikato diad panbilay unong ed matunong iran kakaukolanen to, diad agpibabali ed kakabusol to, tan diad pangidepensa ed si Jehova ed pormal tan impormal a paraan a panagtasi. Nepeg tayo met ya abeten so angat ed katooran diad panmatoor ed nanengneng ya organisasyon nen Jehova. Nepeg tayo met so magmaliw a matoor ed kongregasyon tan matoor ed kaasawaan tayo. Diad sitatalonan pangabet ed angat na katooran, sikatayo so makapibiang ed kiyalangon na inkasoberano nen Jehova, tan makapidapag tayo ed sikato ed say isyu. Diad ontan et naala tayo so pabor to tan awaten so premyon andi-anggaan a bilay. Say inkuan nen apostol Pablo nipaakar ed maridios a debosyon so niyaplika met ed panangabet tayo ed angat na katooran. Satan so namparan makagungguna ed bilay natan tan diad arapen.—Salmo 18:25; 1 Timoteo 4:8.
Panon Yon Ebatan?
◻ Diad antoran paraan a nayari tayon abeten so angat na katooran ed Dios?
◻ Anto so kakaukolanen na katooran ed sikatayo ed organisasyon na Dios?
◻ Panon a nayarin abeten na mamatatken so angat na katooran?
◻ Anton angat a nasasaglawi so katooran so nepeg ya abeten na saray Kristianon walaay-asawa?
◻ Antoran kualidad so ontulong ed sikatayo diad pangabet ed angat na katooran?
[Litrato ed pahina 17]
Say katooran ed saray membro na kongregasyon so mangamper ed mamatatken a mangiparungtal ed kompidensyal iran bengatla
[Saray litrato ed pahina 18]
Papaeleten na katooran ed asawa so bedber na panangasawa