“Agkomon Onlaylay Iray Limam”

“Agkomon onlaylay iray limam. Si Jehova a Dios mo so walad leet mo. Bilang makapanyarin Sakey, sikato so mangisalba.”​—SOFONIAS 3:16, 17.

1. Anto so imbaga na sakey ya iskolar ed Biblia nipaakar ed propesiya nen Sofonias?

MAS ni nasasakopan na propesiya nen Sofonias nilikud ed inmunan kasumpalan to nen komapito tan komanem iran siglo K.K.P. Diad komentaryo to ed Sofonias, oniay insulat nen Propesor C. F. Keil: “Say propesiya nen Sofonias . . . so aglambengat onggagapo ed anunsyo na sankatalbaan a panangukom ed interon mundo, a ditan nanlapu so panangukom ya ipakat ed Juda nisesengeg ed saray kasalanan to, tan ed interon mundo na saray nasyon lapud pamubusol da ed totoo nen Jehova; balet manutukoy iya ed baleg tan makapakigtot ya agew nen Jehova.”

2. Antoray walan panpara ed baetan na saray kipapasen ed agew nen Sofonias tan ed situasyon ed loob na Kakristianoan natan?

² Natan, say hudisyal a desisyon nen Jehova et say pandagup ed saray nasyon parad mas malaknab a kadederal nen say diad agew nen Sofonias. (Sofonias 3:8) Saraman a nasyon a mangibabagan Kristiano so nagkalautlan mauges ed imaton na Dios. No panon a say Jerusalem so nambayar na baleg lapud impagmaliw ton agmatoor ed si Jehova, ontan met so nepeg a pangebat ed Dios na Kakristianoan lapud inka-alablabas a daladalan to. Saray madibinon panangukom a nibalikas sumpad Juda tan Jerusalem diad agew nen Sofonias so mas onaaplika ed saray iglesia tan sekta na Kakristianoan. Dinutakan da met so puron panagdayew diad saray doktrina ran ag-mamapagalang ed Dios, a dakel so walaan na paganon gapoan. Imbagat da ed modernon altar na bakal so minilyon ed mabunigas ya ananak da. Niarum ni, say tatawagen ya Inkakristiano so nilaokan na saray mibabaley na antitipikon Jerusalem na astrolohya, espiritistikon agagamil, tan mabanday a seksual ya imoralidad, a mangipapanonot ed panagdayew ed Baal.​—Sofonias 1:4, 5.

3. Anto so nibaga nipaakar ed dakel a sekular a pangulo tan mapulitika iran gobierno natan, tan anto so impropesiya nen Sofonias?

³ Dakel ed mapulitikan papangulo na Kakristianoan so malabalabay a magmaliw a prominenti ed iglesia. Balet singa “priprinsipi” na Juda, dakel ed sikara so anganamot ed totoon singa “onmuang iran lion” tan mangasiba “iran lobo.” (Sofonias 3:1-3) Saray mapulitikan patumbok na saratan a totoo “so mamapano na karawalan tan panamalikdo ed abung na saray katawan da.” (Sofonias 1:9) Say panagpasuksok tan inkabulok so kasmak. No nipaakar ed mapulitikan gobierno diad loob tan paway na Kakristianoan, sakey ya ondaraak a bilang da so ‘pirmin maragem’ sumpad totoo na saray armada nen Jehova, say Tastasi to, ya itratrato ra bilang abalaw a “sekta.” (Sofonias 2:8; Gawa 24:5, 14) Nipaakar ed amin na saratan a mapulitikan papangulo tan saray patumbok da, impropesiya nen Sofonias: “Anggan pilak nisay balitok da so makayarin mangiliktar ed sikara ed agew na ampetang a sanok nen Jehova; balet diad panamegley na apuy na seseg to say interon dalin so naakmon, lapud sikato so manggawa na panamaandi, peteg a sakey a teribli, ed amin na manaayam ed dalin.”​—Sofonias 1:18.

“Niyamot Kayo ed Agew na Sanok nen Jehova”

4. Anto so mangipapanengneng a walaray niliktar ed baleg ya agew nen Jehova, balet anto so nepeg a gawaen tayo?

⁴ Aliwan amin a manaayam ed Juda so naandi nen komapiton siglo K.K.P. Mipadpara, walaray makaliktar ed baleg ya agew nen Jehova. Diad saratan et inkuan nen Jehova diad panamegley na propeta ton si Sofonias: “Sakbay a mananak na antokaman a bengatla so ganggan, sakbay ya onlabas a singano taep so agew, sakbay ya onsabi ed sikayo so mandarlang a sanok nen Jehova, sakbay ya onsabi ed sikayo so agew na sanok nen Jehova, anapen yo si Jehova, amin yon mauyamo ed dalin, a nanagamil na dilin hudisyal a desisyon To. Anapen yo so inkatunong, anapen yo so kauyamoan. Ompan niyamot kayo ed agew na sanok nen Jehova.”​—Sofonias 2:2, 3.

5. Diad sayan panaon na anggaan, siopara so inmunan tinmalineng ed pasakbay nen Sofonias, tan panon iran inusar nen Jehova?

⁵ Diad sayan panaon na anggaan na mundo, saray unonan ontalineng ed mapropetikon imbitasyon et saray nakdaan ya espiritual ya Israelitas, alanaan a Kristianos. (Roma 2:28, 29; 9:6; Galacia 6:16) Lapud inanap da so inkatunong tan kauyamoan tan angipanengneng na respeto parad saray hudisyal a desisyon nen Jehova, niliktar ira manlapud Babilonia a Baleg, say sankamundoan ya imperyo na palson relihyon, tan nipawil ed madibinon pabor nen 1919. Nanlapulad saman, tan nagkalautla nanlapulad 1922, sayan matoor a nakdaan so andi-takot a mangiproproklama ed saray panangukom nen Jehova sumpad saray iglesia tan sekta na Kakristianoan tan sumpad mapulitika iran nasyon.

6. (a) Anto so impropesiya nen Sofonias nipaakar ed matoor a nakdaan? (b) Panon ya asumpal iyan propesiya?

⁶ Nipaakar ed sarayan matoor a nakdaan, oniay impropesiya nen Sofonias: “Petepeteg a paulyan kon natilak ed leet yo so sakey a baley na mapaabeba tan abeban tuloy, tan sikara so aktual a manalimbeng ed ngaran nen Jehova. No nipaakar ed saray nakekeraan na Israel, ag-ira manggawa na ag-inkatunong, nisay mansalita na tila, nisay naromogan iray sangi ra na masaul a dila; ta sikaran mismo so mangan tan aktual ya ondukol ya akaunat, tan anggapo so siopaman a mangiwgiw ed sikara.” (Sofonias 3:12, 13) Naynay ya ipapabitar na sarayan alanaan a Kristiano so ngaran nen Jehova, balet nagkalalo la itan nanlapulad 1931, sanen inadapta ra so ngaran a Tastasi nen Jehova. (Isaias 43:10-12) Diad pangipapabitar ed isyu na inkasoberano nen Jehova, pinagalangan da so madibinon ngaran, tan saya so napapaneknekan a salimbeng parad sikara. (Uliran 18:10) Sikaray daakan a tataganoen nen Jehova diad espiritual a paraan, tan sikaray manaayam ya andiay takot diad sakey ya espiritual a paraiso.​—Sofonias 3:16, 17.

“Sakey a Ngaran tan Sakey a Dayew Diad Limog na Amin a Totoo”

7, 8. (a) Anto nin propesiya so asumpal ed saray nakdaan na espiritual ya Israel? (b) Anto so abidbir na minilyon a totoo, tan anto so personal a liknaan yo nipaakar ed saya?

⁷ Agniyamot so maapit a siglaotan na saray nakdaan ed ngaran nen Jehova tan ed saray matunong a prinsipyo ed Salita to. Anengneng na masimoon a totoo so pandumaan ed baetan na kondukta na saray nakdaan tan say abulok tan mansimpisimpitan iran mapulitika tan relihyoson papangulo na sayan mundo. Bebendisyonan nen Jehova ‘iray nakdaan [na espiritual] ya Israel.’ Papagalangan tora tekep na pribilihyon pangakbibit ed ngaran to, tan sikato so nansengegan da a nawalaan na maabig a reputasyon ed limog na totoo ed dalin. Saya so singa ed impropesiya nen Sofonias: “‘Diad satan a panaon siak so mamaloob ed sikayon totoo, anggan diad panaon na panipon ed sikayon saniiba. Ta gawaen ta kayo a sakey a ngaran tan sakey a dayew ed limog na amin a totoo ed dalin, sano dagupen ko lamet iray kautibo yo ed arap na saray mata yo,’ inkuan nen Jehova.”​—Sofonias 3:20.

⁸ Nanlapulad 1935, literal a minilyon a totoo so akabidbir a saray bendisyon nen Jehova et walad saray nakdaan. Sigagayaga ran tutumboken irayan espiritual a Judio, odino Israelitas, diad pangibabagan: “Mila kami ed sikayon totoo, ta nadngel mi a say Dios so wala ed sikayo.” (Zacarias 8:23) Momoriaen na sarayan “arum a karnero” so alanaan a nakdaan bilang “say matoor tan makabat ya aripen,” a tinuro nen Kristo “ed amin a [mangaraldalin a] kayarian to.” Pisalsalamatan da so pinabang ed espiritual a taganon imparaan na aripen a klase “ed dugan panaon.”​—Juan 10:16; Mateo 24:45-47.

9. Anton “lenguahe” so naaralan a salitaen na minilyon a totoo, tan anton baleg a kimey so panlilingkoran a “benebenek” na arum a karnero a kaiba so alanaan a nakdaan?

⁹ Kaiba na saray nakdaan, sarayan minilyon ya arum a karnero so akaaral a manbilay tan mansalita a mitunosan ed “puron lenguahe.”a Oniay impropesiya nen Jehova diad panamegley nen Sofonias: “Insan iter ko ed totoo so pananguman a mamaarap ed puron lenguahe, ta pian sikaran amin so makatawag ed ngaran nen Jehova, ta pian napanlingkoran da a benebenek.” (Sofonias 3:9) On, say arum a karnero so nankakasakey a manlilingkor ed si Jehova a “benebenek” a kaibay alanaan iran membro na “melag a pulok” ed apuraan a kimey na panangipulong na “sayan maong a balita na panarian . . . parad pantasi ed amin a nasyon.”​—Lucas 12:32; Mateo 24:14.

“Onsabi Agew nen Jehova”

10. Nipaakar ed anto a kombensido iray alanaan a nakdaan, tan anto, bilang sakey a klase, so nanengneng da bilang mabilay?

¹⁰ Naynay a sinononot iray alanaan a nakdaan ed apuyanan a balikas nen apostol Pedro: “Si Jehova so agmatantan no nipaakar ed sipan to, a singa ipapasen na arum a totoo ya inkatantan, noagta sikato so maanos ed sikayo lapud agto pilalek a siopaman so naderal noagta pilalek ton amin so makadateng ed panagbabawi. Ingen say agew nen Jehova so onsabi a singa sakey a matakew.” (2 Pedro 3:9, 10) Saray membro na matoor ya aripen a klase so agbalot awalaan na antokaman a panduaruwa nipaakar ed isasabi na agew nen Jehova ed panaon tayo. Satan a baleg ya agew so onggapo ed kipakat na saray panangukom na Dios sumpad Kakristianoan, antitipikon Jerusalem, tan ed natitilak a kabiangan na Babilonia a Baleg.​—Sofonias 1:2-4; Apocalipsis 17:1, 5; 19:1, 2.

11, 12. (a) Anton arum a parti na propesiya nen Sofonias so nasusumpal ed saray nakdaan? (b) Panon a tinalineng na saray alanaan a nakdaan so tawag ya, “Agkomon onlaylay iray limam”?

¹¹ Panliketan na matoor iran nakdaan so inkiliktar da nen 1919 manlapud espiritual ya inkakautibo ed Babilonia a Baleg, say sankamundoan ya imperyo na palson relihyon. Naeksperiensia ra la so kasumpalan na propesiya nen Sofonias: “Sigagayagan onkelyaw, O anak a bii na Sion! Manligsa, O Israel! Manliket tan mansayaksak tekep na amin a puso, O anak a bii na Jerusalem! Inekal la nen Jehova iray panangukom ed sika. Impabeneg to so kabusol mo. Say ari na Israel, si Jehova, so walad leet mo. Agmo la takotan so kalamidad. Diad satan ya agew nibaga ed Jerusalem: ‘Agka natatakot, O Sion. Agkomon onlaylay iray limam. Si Jehova a Dios mo so walad leet mo. Bilang makapanyarin Sakey, sikato so mangisalba.’”​—Sofonias 3:14-17.

¹² Tekep na kombiksyon tan daakan a prueban si Jehova so manusuporta ed sikara, andi-takot ya inmabante iray alanaan a nakdaan ed panumpal na madibinon asainmin da. Ipupulong da so maong a balita na say Panarian tan ipapakabat daray panangukom nen Jehova sumpad Kakristianoan, say nakekeraan a kabiangan na Babilonia a Baleg, tan ed interon marelmeng a sistema na bengabengatla nen Satanas. Anggaman ed amin a kairapan, diad apalabas iran dekada nanlapulad 1919, tutuloken da so madibinon ganggan: “Agka natatakot, O Sion. Agkomon onlaylay iray limam.” Makulikuli ran imbunog so binilyon a tract, magasin, libro, tan bokleta a mangiyaabawag ed Panarian nen Jehova. Sikaray nagmaliw a makapasagyat-pananisian alimbawa ed arum a karnero a, nanlapulad 1935 et ondadagsa ed dapag da.

‘Agkomon Onlalay Iray Lima Yo’

13, 14. (a) Akin a sinmener ed panaglingkor ed si Jehova so pigaran Judio, tan panon a nipatnag iya? (b) Anto so agmakabat parad sikatayon gawaen, tan ed anton kimey ya agnepeg tayon ilaylay iray lima tayo?

¹³ Bangta “mansiasiansian mantalaran” ed baleg ya agew nen Jehova, panon tayon makaala na praktikal a tulong manlapud propesiya nen Sofonias? Unona, sikatayo so kaukolan a manalwar ed pagmaliw a singa saray Judio ed agew nen Sofonias ya agtinmumbok ed si Jehova lapud panduaruwaan da so kinaasingger na agew nen Jehova. Aliwan naynay pa ya ibabalikas na saratan a Judio so panduaruwaan da ed publiko, balet say inkiwas da so angiparungtal a sikara so talagan agmanisia a say baleg ya agew nen Jehova so asingger la. Inyapasakey da so imano ra ed panpayaman imbes a mansiansian mantalaran ed si Jehova.​—Sofonias 1:12, 13; 3:8.

¹⁴ Aliwan natan so panaon pian nilamot ed kapusoan tayo so panduaruwa. Aliwan makabat a tuloy so pangibaliwala ed kaisipan odino kapusoan tayo ed isabi agew nen Jehova. (2 Pedro 3:1-4, 10) Kaukolan tayon arawian so isener manlapud itumbok ed si Jehova odino ‘abuloyan ya onlaylay so kalimaan tayo’ ed panlingkor ed sikato. Lalaktipen na saya so ag “pankimey tekep na lima na inkatayam” diad panangipulong tayo ed “maong a balita.”​—Uliran 10:4; Marcos 13:10.

Pilalaban ed Inkaandi-Interes

15. Anto so nayarin mamatantan ed lima tayo diad serbisyo ed si Jehova, tan panon a sayan problema so nipasakbay ed propesiya nen Sofonias?

¹⁵ Komadua, kaukolan a magmaliw itayon alisto sumpad manamakapuy ya epekto na inkaandi-interes. Diad dakel a bansa ed Mamasagur, say panangibaliwala nipaakar ed espiritual iran pamaakaran so nayarin sakey a sengegan na pakadismaya ed pigaran managpulong ed maong a balita. Say ontan ya inkaandi-interes so wala ed agew nen Sofonias. Oniay sinalita nen Jehova diad panamegley na propeta to: “Siak so mangimano ed lalaki a . . . mangibabaga ed puso ra, ‘Agmanggawa na maong si Jehova, tan agto manggawa na mauges.’” (Sofonias 1:12) Diad pangokomento ed sayan teksto ed Cambridge Bible for Schools and Colleges, inkuan nen A. B. Davidson ya ontutukoy itan ed totoon walaan na “nimedmer ed inkaandi-interes odino anggan say agpanisia nipaakar ed antokaman ya apilanlanor ed atagtagey a pakayari diad saray pakurang na katooan.”

16. Anton kipapasen na kanonotan so wala ed limog na dakel a membro na saray iglesia na Kakristianoan, balet anto so iiter nen Jehova a panamaseseg ed sikatayo?

¹⁶ Say inkaandi-interes so kasmak ya awawey natan ed dakel a parti na dalin, nagkalautla ed mas mayaman iran nasyon. Anggan saray membro na saray iglesia na Kakristianoan so talagan agmanisia ya onsalet si Jehova a Dios ed saray pakurang na too ed agew tayo. Ibabaliwala daray sagpot tayon ipasabi ed sikara so maong a balita na Panarian balanglan diad alanganin ya imis odino diad antikey ya ebat ya “Agak interesado!” Diad sarayan kipapasen, talagan sakey ya angat so pananos ed panagtasin kimey. Susuboken to so panagsungdo tayo. Balet diad panamegley na propesiya nen Sofonias, papabiskegen nen Jehova so matoor a totoo to, diad pangibabagan: “Agkomon onlaylay iray limam. Si Jehova a Dios mo so walad leet mo. Bilang makapanyarin Sakey, sikato so mangisalba. Sikato so mansayaksak tekep na panliket. Sikato so mandeen ed panangaro to. Sikato so magmaliw a magayaga ed sika tekep na maliket iran kelyaw.”​—Sofonias 3:16, 17.

17. Anton maabig ya alimbawa so tumboken na saray balo ni ed arum a karnero, tan panon?

¹⁷ Sakey a katuaan ed modernon-agew ya awaran na totoo nen Jehova a saray nakdaan, ontan met ed saray maedad la ed limog na arum a karnero, so akasumpal na sakey ya abalbaleg a kimey na panagtipon ed sarayan kaunoran ya agew. Amin na sarayan matoor a Kristiano so angipanengneng na panagsungdo ed apalabas iran dekada. Ag-ira nadidismaya lapud inkaandi-interes na karaklan ed Kakristianoan. Komon ta ag-onletey iray balo ni ed arum a karnero lapud inkaandi-interes ed espiritual iran pamaakaran ya ontanlan kasmak natan ed dakel a daldalin. Komon ta agda abuloyan ‘ya onlaylay iray lima’ ra, odino ontantan. Anamoten da komon so amin a pankanawnawa pian ipresenta so Say Panag-Bantayan, Awake!, tan arum nin maabig a palapagan a nikaduman adesinyon ontulong ed mala-karneron totoo a manaral ed katuaan nipaakar ed agew nen Jehova tan ed saray ontumbok a bendisyon.

Onabante Legan A Manatalaran ed Baleg ya Agew!

18, 19. (a) Anton panamaseseg a mansungdo so naromog tayo ed Mateo 24:13 tan Isaias 35:3, 4? (b) Panon itayon nabendisyonan no mankakasakey itayon onabante diad serbisyo ed si Jehova?

¹⁸ Inkuan nen Jesus: “Siopaman a mansungdo angga ed kasampotan satan so nisalba.” (Mateo 24:13) Kanian, anggapoy “makapuy iran lima” odino ‘mankalog iran pueg’ legan a tatalaranan tayo so baleg ya agew nen Jehova! (Isaias 35:3, 4) Walay panamaseguron ibabaga na propesiya nen Sofonias nipaakar ed si Jehova: “Bilang makapanyarin Sakey, sikato so mangisalba.” (Sofonias 3:17) On, si Jehova so mangisalba ed “baleg ya ulop” diad panamegley na pinal a kabiangan na “say baleg a kairapan” sano iganggan to so Anak to a manmekmek ed saray mapulitikan nasyon a mansiasiansian “pirmin maragem” sumpad totoo to.​—Apocalipsis 7:9, 14; Sofonias 2:10, 11; Salmo 2:7-9.

¹⁹ Legan a manasingger so baleg ya agew nen Jehova, komon ta sikatayo so siseseseg ya onabante, a manlilingkor ed sikato a “benebenek”! (Sofonias 3:9) Diad ontan et sikatayon mismo tan agnabilang ya arum ni so nilinya ed saramay “niyamot ed say agew na sanok nen Jehova” tan tasian so kapasantos na masanton ngaran to.

[Paimano ed leksab]

Bilang Repaso

◻ Diad antoran paraan a say relihyoson situasyon ed loob na Kakristianoan so mipetekan ed samay agew nen Sofonias?

◻ Panon a mipara so dakel a mapulitikan papangulo natan ed sekular a “priprinsipi” ed panaon nen Sofonias?

◻ Antoran sipan diad Sofonias so nasusumpal ed saray nakdaan?

◻ Anto so abidbir na minilyon a totoo?

◻ Akin ya agtayo nepeg ya abuloyan ya onlaylay iray lima tayo diad serbisyo ed si Jehova?

[Saray litrato ed pahina 15]

Singa si Sofonias, saray matoor a nakdaan na alanaan a Kristiano so andi-takot a mangiyaabawag ed saray panangukom nen Jehova

[Saray litrato ed pahina 18]

Ag-inabuloyan na “arum a karnero” so inkaandi-interes na too pian nadismaya ira