Liket—No Panon Itan a Naromog
Katuloyan na Kapitulo 2
“Manunan Sengegan” na Uniberso
18-24. PUNTON NAPANTONGTONGAN: Anto so mangitotonton ed dakel a totoo a mangibaga a say uniberso so pinalsa na Dios?
18 Walay 3,000 taon lay apalabas, say lakin manngaran na Elihu diman ed Pegley Bukig so nankuan: “Tangay ka ed tawen tan konsideraen mo.”a
19 Ginawam ta la itan ed sakey a malinak, ambilunget a labi? Suboken komon na amin iya. Manga 5,000 bitewen labat so nanengneng na mata ya anggapoy katulongan. Anggaman ontan, say galaksy tayon Milky Way so walaan na masulok a 100,000,000,000 bitewen. Tan pigara ta so walan galaksy? Kuan na saray astronomo a walay nilibon minilyon ed saratan—aliwan bibitewen, noagta saray galaksy, a balang sakey so walaan na binilyon a bitewen! Agaylan kamelanting so too no ikompara ed saya! Iner so nanlapuan na sarayan amin?
20 Adiskrobe na saray sientista a saray galaksy so singano mantektekkiab a paarawi manlapu’d sakey a pinagka-sentro. Say teorya na dakel ya astronomo et nilibon milyon taon lay apalabas, sakey a baleg ya inbetag, say “big bang,” so angigapo’d ikayat na enerhiya tan materya a satan so anibukel ed nanengneng a talba a singa amta tayo. Ag-isasalaysay na teorya ra no antoy sengegan na inkagawa na saya. Balet makapainteres so ipapatnag na saya, salanti, walay punton ginapoan, walay panaon a say talba so nianak.
“Natan et nalilikas na sakey a nayeyegyeg so mundoy siensia lapud ondarakel ya ebidensya parad ‘big bang’ a gapoan na talba. Palelesaen to so tepet no antoy akauna ed saya, tan nayeyegyeg so sankaunaan a pananisia na saray sientista diad kipapaarap da ed pakaebat ed ultimo iran tepet.”—The Wall Street Journal.
21 On, parad totoon agmanisia ed Dios, walaray makawetwet a tepet: Anto odino siopa so angigapo na materya ed talba? Apalsa ta so uniberso manlapud anggapo? Lapud say materya so ipapasen bilang sakey a porma na enerhiya, anto so lapuan na sayan enerhiya?
22 Oniay inkuan nen Dr. Robert Jastrow, direktor na Goddard Institute for Space Studies na NASA: “Diad arap na amin na ontan ya ebidensya, say ideyan wala so Dios ya amalsa ed uniberso so singa sientipiko a singa met ed dakel niran ideya.”
23 Sinampotan na makatebek-a-tuloy a totoo ed kada kailalakan a talagan wala so intelihentin Manunan Sengegan, sakey a manamalsa a Sankatagyan a Persona. Ibabalikas na Biblia so liknaan da sanen kuanton: “Say katawenan so mangiyaabawag ed gloria na Dios; tan say liwang so mangibabaga ed say gawa na saray lima to.”b
24 Balanglan nibaga yo la odino andi ni a wala so Dios, say kinonsidera tayo nipaakar ed bilay, nipaakar ed inkasikatayo, tan nipaakar ed uniberso so ontulong a mangipaliwawa no akin a dakel a maisip a totoo so akombensin wala so Dios. Satan so mangitotonton ed sikatayo ed misiglaotan a pamaakaran: No say Manamalsa so peteg a wala, agta makatunongan labat a sikatoy mitalosan ed saray pinalsa to, tan ebatan iray tepet tayo: Akin a wadia itayo? Akin ya ompapalalo so karelmengan? Anto so wala ed arapen? Panon tayon naromog so liket?
[Saray paimano ed Leksab]
[Kahon ed pahina 26]
NANLAPUAN NA UKSOY?
Si Dr. Paul Davies, managpaliwawa ed matematika ed King’s College, Londres, so nansulat na onia ed “New Scientist”:
“Inerman so nengnengan tayo ed Talba, manlapud arawdawin tuloy a galaksy anggad sankadaleman a parti na atomo, naalmoan tayo so uksoy. . . . No say impormasyon tan uksoy so walaan na tendensyan naandi, iner sirin so nanlapuan na amin ya impormasyon a nanggawa ed mundo a nikadkaduman pasen nanlapulad gapo?”
Si Sir Bernard Lovell, na bantog a Jodrell Bank Observatory ed Inglatera, so nansulat a kuanton say nalilikna to so mipadpara’d si Albert Einstien:
“Say ontanlan pankelaw a tuloy ed pansisiglaotan na natural a ganggan, a mangipaparungtal ed ontan ya inkasuperyor na intelihensya, no ikompara ed satan, amin a sistematikon panag-isipan tan kiwas na totoo so melmelanting lambengat a pakasalmingan.”—“Centre of Immensities.”