Kasin Nanonotan Mo?

Kasin maalwar mon kinonsidera iray agano nin paway na Say Panag-Bantayan? Naromogan mon makapainteres so pannonot ed ongendan:

◻ Panon a say sakey et ‘ondago ed si Jesus’ a mitunosan ed say imbitasyon to ed Mateo 11:28?

Inkuan nen Jesus: “No say siopaman a too et labay to’y ontombok ed siak benegan to’y dili ya inkasikato, et alaen to’y [panamairapan a palitek, NW] to, tan tomboken toak.” (Mateo 16:24) Kanian, say iyasingger ed si Jesus ya ipapasakop na sakey so dilin linawa to ed say linawa na Dios tan Kristo, aawatey belat na responsabilidad tan gawaen itan a tuloy-tuloy.​—8/15, pahina 17.

◻ Akin a “daiset” lambengat so makaromog ed say ‘makisir a dalan a mamaarap ed bilay’ a sinaglawi nen Jesus ed Mateo 7:13, 14?

Lapud say mainget a basbas so pepegetan na saray ganggan tan prinsipyos na Dios. Makapaayat lambengat itan ed masimoon a manpilalek a mangitukoy na kabibilay to ed saray estandarte na Dios. Anggaman ompapatnag a mapeget, say ‘mainget a dalaan’ so mangibubulos ed sakey ed kada importantin pamaakaran. Saray ketegan to so gegeteran na “say ayadyarin ganggan a kien na kawayangan.” (Santiago 1:25, NW)​—9/1, pahina 5.

◻ Panon a say pakatebek so nabayuboan?

Say pakatebek so agmainomay odino aggendagendat ya onsasabi. Balet tekep na anos, pikakasi, masimoon a sagpot, makabat a piuulop, panagaral na Baiblia tan pandalepdep ed satan, tan panagmatalek ed masanton espiritu nen Jehova, sikayoy makapanbayubo met ed satan.​—9/1, pahina 21.

◻ Panon a say imon na too so nayarin onkana parad maong a gagala?

Satan so mamakiwas ed sakey a too a manalimbeng ed sakey ya inad-aro manlapud mauges iran impluensya. Niarum ni, susto so pakapangipanengneng na totoo na imon parad si Jehova tan say panagdayew to. (1 Arari 19:10)​—9/15, pahina 8, 9.

◻ Antoy kabaliksan na balikas diad Genesis 50:23 nipaakar ed saray apo-ed-pueg nen Jose: “Nianak ira ed saray pueg nen Jose”?

Kabaliksan lambengat na saya a bibidbiren nen Jose so ananak a bilang kapolian to. Satan so nayari met a mangipatnag a sikatoy simamaaron akigalaw ed saratan ya anak, imbwabo tora ed pueg to. Maabig ya ipanengneng met na kaamaan natan so parehon panamabli.​—9/15, pahina 20, 21.

◻ Anto so makanakanan importanti ed sakey a maaligwas a panangasawa tan bilay na pamilya?

Pian nadampot itan a panpilpilalekan iran resulta, saray sanasawa so nepeg a lawas mangiyuna ed linawa na Dios. Diad panggawa ed saya, saray sanasawa a manggunaet a mansiansian saniba tan resolbien iray problema ra diad panangiyaplika ed konseho na Salita na Dios. Diad ontan et napaliisan dan amin so nengneng na sakit na puso a resulta sano nibabaliwala so linawa to. (Salmo 19:7-11)​—10/1, pahina 11.

◻ Panon kaimportanti natan so maridios a pakatalos ed pankaganatan?

Say maridios a pakatalos ed pankaganatan so manunan kabiangan na interon-kamarerwan serbisyo tayo ed si Jehova. Iwagsil to tan ontutulong a manalona ed saray getma nen Diablo a manggawad saray ariripen na Dios a ‘nakesawan tan isuko ra so kakamarerwa ra.’ (Hebreos 12:3) Sasalimbengan to met ira manlapud agnakaukolan a pibabali ed say mundo tan say materialismo to, pansiasiansiaen day kaisipan da ed saray bengatlan wala ed tagey​—“say peteg a bilay.” (1 Timoteo 6:19)​—w-E 10/1, pahina 28.

◻ Diad parablo ed saray karnero tan kanding, kapigan a si Jesus onyurong ed trono to tan akin? (Mateo 25:31-33)

Say parablo et agto ipapanengneng so iyuyurong a diad pantalos a pagmaliw ya Ari. Imbes, sikatoy onyuyurong a bilang sakey ya Ukom. Satan a panangukom so agmantultuloy ed ninatnat a nigeter iran taon. Imbes ituturo na parabolo so arapen sano si Jesus so gawaen to ed limitadon panaon pian mangiparungtal tan mangipakat na panangukom ed nasyones.​—10/15, pahina 18.

◻ Anto so “kailalakan” a mabetbet a tinukoy nen Jesus?

Inusar nen Jesus so terminon “sayan kailalakan” ed say kapanaonan a karaklan a kaiba “iray bulag a managtabin” da a saniiban manugyop ed Judion nasyon. (Mateo 11:16; 15:14; 24:34)​—11/1, pahina 14.

◻ Dia ed pinal a kasumpalan na propesiya nen Jesus ed Mateo 24:34-39, diad anto so tutukoyen na balikas a “sayan kailalakan”?

Mapatpatnag a tutukoyen nen Jesus iray totoo ed dalin ya akanengneng ed tanda na kiwawala nen Kristo ingen sinmaew iran manguman ed saray dalan da.​—11/1, pahina 19, 31.

◻ Panon a say uksoyan ed saray syudad na salimbengan tan saray pananebel so angungguna ed totoo ed kadaanan ya Israel?

Nipaslep ed saray Israelita ya agnepeg a palpalaran odino mananginunang ed bilay na too. Nidanet met so pankaukolan na pangipanengneng na panangasi sano matukoy so panggaway ontan. (Santiago 2:13)​—11/15, pahina 14.

◻ Anto so antitipikon syudad na salimbengan?

Saya so probisyon na Diyos diad kaprotektaan tayo manlapud ipapatey lapud isusumlang ed ganggan to nipaakar ed inkasagrado na dala. (Genesis 9:6)​—11/15, pahina 17.

◻ Panon a makatulong so Kristianon impanaagi ed sikatayo a “napasimbalo so biskeg”? (Isaias 40:31)

Diad limog na Kristianon agagi tayo, walaray pigaran nipaarap ed parehon pananesdes tan subsubok tan walaan met na naeeksperiensian liknaan a singa sikatayo. (1 Pedro 5:9) Talagan makapaseguro tan makapabiskeg na pananisia a naamtaan a say nasasagmakan tayo so kaslakan tan saray liknaan tayo so nikadkaduma.​—12/1, pahina 15, 16.