Kasin Iyuuna na Pamilya Yo so Dios?
“Nepeg mon aroen si Jehova a Dios mo ed interon pusom.”—MARCOS 12:29, 30.
1. Kaunongan kaimportanti ya aroen tayo si Jehova?
“ANTON ganggan so ununa ed amin?” intepet na sakey ya eskriba ed si Jesus. Imbes ya ibalikas so dili ton opinyon, inebatan nen Jesus so tepet to diad impangaon manlapud Salita na Dios ed Deuteronomio 6:4, 5. Inyebat to: “Say ununa et, ‘Dengel mo, O Israel, si Jehova a Dios tayo so saksakey a Jehova, tan nepeg mon aroen si Jehova a Dios mo ed interon pusom tan ed interon kamarerwam tan ed interon nonot mo tan ed interon biskeg mo.’”—Marcos 12:28-30.
2. (a) Anton isusumpa so kaukolan ya arapen nen Jesus? (b) Anto no maminsan so mamapairap ed pamaliket ed si Jehova?
2 Pian natulok so tatawagen nen Jesus ya ununan ganggan—say sankaimportantian a sakey—kakaukolanen ton naynay tayon gawaen so makapaliket ed si Jehova. Ontan so ginawa nen Jesus, anggaman aminsan et sinuppiat nen Pedro so kurang nen Jesus, tan diad sananey nin inkagawa et ontan met so ginawa na dilin maapit a kakanayon to. (Mateo 16:21-23; Marcos 3:21; Juan 8:29) Anto no naimanom so inkasikan wala ed mipadparan situasyon? Iyan la bilang a kaliktan na saray membro na pamilyam ya itundam so panagaral na Biblia tan pilimog ed Tastasi nen Jehova. Iyunam ta so Dios diad panggawa na panliketan to? Iyuunam ta so Dios, anggano susumpaen na saray membro na pamilya iray sagpot mon sikatoy panlingkoran?
Say Patit na Isusumpay Pamilya
3. (a) Antoray nayarin pansumpalan na saray bangat nen Jesus ed pamilya? (b) Panon a nipanengneng na saray membro na pamilya no sioparay pangipapaarapan day babaleg a panamabli?
3 Agnileglemew nen Jesus so kairapan a nayarin pansumpalan sano susumpaen na arum ed pamilya so membron mangaawat ed bangabangat to. “Say magmaliw a kakabusol na too et saray totoo ed dilin sankaabungan to,” inkuan nen Jesus. Ingen, anggaman ed satan a maermen a pansumpalan, impanengneng nen Jesus no siopa so nepeg ya unaen diad impangibagan: “Say walaay babaleg a panamabli ed ama odino ina nen say siak so agmakana ed siak; tan say walaay babaleg a panamabli ed anak a laki odino ed anak a bii nen say siak so agmakana ed siak.” (Mateo 10:34-37) Iyuuna tayo si Jehova a Dios diad panutumbok ed saray bangat na Anak to, si Jesu-Kristo, a sikatoy “eksakton representasyon na dilin indengan [na Dios].”—Hebreos 1:3; Juan 14:9.
4. (a) Anto so imbaga nen Jesus a nalalanor ed pagmamaliw a patumbok to? (b) Diad anton pantalos a gugulaen na saray Kristiano iray membro na pamilya?
4 Diad sakey nin inkagawa sanen sisingbaten nen Jesus no antoy talagan nalalanor ed pagmaliw a tuan patumbok to, inkuanto: “No siopaman ya ondago ed siak tan agto busolen so ama to tan ina tan asawan bii tan ananak tan agagin lalaki tan agagin bibii, on, tan anggan say dilin kamarerwa to, sikatoy agnayarin magmaliw a babangatan ko.” (Lucas 14:26) Mabitabitar ya aglabay ya ibaga nen Jesus a saray patumbok to so nepeg a literal a mamusol ed saray kapamilyaan da, ta inganggan to ed totoo ya aroen day anggan kakabusol da. (Mateo 5:44) Imbes, say labay ya ibaga dia nen Jesus et say aro na papatumbok to ed saray membro na pamilya so nepeg ya agnagkalalo ed aro ed Dios. (Ipareng so Mateo 6:24.) Mitukoyan ed satan a pantalos, kuan na Biblia a “kagula” nen Jacob si Leah bangta inaro to si Raquel, a say labay ton ibaga et agto inaro si Leah a singa ed panangaro to ed agi to, si Raquel. (Genesis 29:30-32) Anggan say dilin “kamarerwa” tayo, odino bilay, inkuan nen Jesus, so nepeg a busolen, odino agnagkalalon aroen, nen say si Jehova!
5. Panon a sisisilib ya aabusoen nen Satanas so uksoyan a panpamilya?
5 Bilang Manamalsa tan Manangiter-Bilay, makanepegan si Jehova na nagnap a debosyon manlapud amin ya ariripen to. (Apocalipsis 4:11) “Ontatalimukor ak ed Ama,” insulat nen apostol Pablo, “a pakakaotangan na ngaran na kada pamilya diad tawen tan ed dalin.” (Efeso 3:14, 15) Inletneg nen Jehova so uksoyan a panpamilya ed sakey a pandinayewan a paraan a saray membro na pamilya et walaan na natural a panamabli parad balang sinansakey. (1 Arari 3:25, 26; 1 Tesalonica 2:7) Balet, sisisilib si Satanas a Diablo a mangaabuso ed sayan natural a panamabli ed pamilya, a laktipen toy pilalek a paliketen iray inad-aro. Paluluoren toy isusumpa na pamilya, tan diad iyarap ed saya et nalmoan na dakel a sakey ya angat so italindeg a malet parad katuaan na Biblia.—Apocalipsis 12:9, 12.
Iyaarap ed Angat
6, 7. (a) Panon a natulongan iray membro na pamilya a natalosan so kaimportantian na panagaral na Biblia tan Kristianon panlilimog? (b) Panon tayon nidemostra a talagan aaroen tayoray membro na pamilya tayo?
6 Anto so gawaen mo no sika so napaskar a manpili ed pamaliket ed Dios odino ed pamaliket ed sakey a membro na pamilya? Kasin ikatunongan mo ya agmet pa iilaloan na Dios ya aralen tayo so Salita to tan iyaplika iray prinsipyo to no say panggawa ed ontan et mamalesay agpantatalosay pamilya? Balet isipen pa itan. No onsuko ka tan ontunda ed panagaral na Biblia odino ed pililimog ed Tastasi nen Jehova, panon ni kasin natalosan na saray inad-arom a say suston pikakabat ed Biblia et lalanoren toy bilay tan patey?—Juan 17:3; 2 Tesalonica 1:6-8.
7 Niyilustra tayo so situasyon ed onian dalan: Iyan la bilang a sakey a membro na pamilya so alablabas a mainum na alak. Kasin say panangibaliwala odino panangonsenti ed problema ton panag-inum so talagan mangungguna ed sikato? Agta mas maabig ya abuloyan la tan agla manggawa na antokaman nipaakar ed problema to ta pian napansiansia so kareenan? Andi, anganko ta onabobon ka a say sankaabigan et say panggunaet a panulong ed sikaton natalonaan so problema ton panag-inum, anggano mankabaliksan itan na makpel ya itatalindeg anggaman ed sanok to tan saray panamagyaw to. (Uliran 29:25) Mipadpara, no talagan inarom iray membro na pamilyam, agka onsuko ed saray sagpot dan patundaen ka’d panagaral mo na Biblia. (Gawa 5:29) Dia lambengat ed mapekder ya itatalindeg a natulongan mo iran makatalos a say panbilay unong ed saray bangat nen Kristo et kabaliksan toy mismon bilay tayo.
8. Panon tayon nagugunggunaan manlapud bengatlan sitotoor a ginawa nen Jesus so linawa na Dios?
8 Say panangiyuna ed Dios so nayarin mairap a tuloy no maminsan. Balet tandaan, pinairap met nen Satanas so panumpal nen Jesus ed linawa na Dios. Balet ta agbalot sinmuko si Jesus; sinungdoan to ni ingen so ot-ot ed panamairapan a palitek parad sikatayo. Si “Jesu-Kristo [so] Manangilaban tayo,” kuan na Biblia. “Sikatoy inatey parad sikatayo.” (Tito 3:6; 1 Tesalonica 5:10) Agta misalsalamat tayo ya agsinmuko si Jesus ed isusumpa? Lapud sinungdoan to so masakripisyon ipapatey, walaan itayo na ilalon andi-anggaan a bilay ed mareen a balon mundo na inkatunong diad pangagamil na pananisia ed nipaagos a dala to.—Juan 3:16, 36; Apocalipsis 21:3, 4.
Nagamoran a Mayaman a Tumang
9. (a) Panon a nayarin makapibiang iray Kristiano ed panangisalba ed arum? (b) Anto so kipapasen na pamilya nen Timoteo?
9 Kasin amoriam a sika met so nayarin makapibiang ed panangisalba ed arum, pati saray pinabpablin inad-arom a kanayon? Pinaseseg nen apostol Pablo si Timoteo: “Mansiansia ka ed sarayan bengatla [ya ibabangat ed sika], ta diad panggawa ed saya namparan nilaban mo so inkasika tan saramay ontatalineng ed sika.” (1 Timoteo 4:16) Nambilay si Timoteo ed sakey a naapag a sankaabungan, lapud agmananisia so ama ton Griego. (Gawa 16:1; 2 Timoteo 1:5; 3:14) Anggaman agtayo amta no kasin say ama nen Timoteo et nagmaliw a mananisia odino andi, say posibilidad a nayarin ontan et naimpluensyaan a tuloy na matoor a kondukta na asawa ton si Eunice tan nen Timoteo.
10. Anto so nagawaan na saray Kristiano nisesengeg ed saray agmananisian asawa ra?
10 Ipaparungtal na Kasulatan a saray asawan lalaki tan bibiin mapekder ya amenben ed katuaan na Biblia so makatulong ed panangisalba ed aliwan-Kristianon kapareha ra diad panulong ed sikaran magmaliw a mananisia. Insulat nen apostol Pablo: “No siopaman ya agin laki so walaan na agmananisian asawa, tan ingen miabobon a miamong ed sikato, agto kakaindanan; tan say sakey a biin walaay asawan agmananisia, tan ingen miabobon a miamong ed sikato, agto kakaindanan so asawa ton laki. Ta, asawan bii, panon so pakaamtam no nilaban moy asawam a laki? Odino, asawan laki, panon so pakaamtam no nilaban moy asawam a bii?” (1 Corinto 7:12, 13, 16) Diad segek et deneskribe nen apostol Pedro no panon a nisalba na asawan bibii so kaasawaan da, diad impamaseseg: “Manpasakop kayo ed dilin kaasawan yon lalaki, pian, no siopaman ya agmatulok ed salita, sikaray napatulok ya andi salita diad panamegley na kondukta na kaasawaan dan bibii.”—1 Pedro 3:1.
11, 12. (a) Anton tumang so agamoran na nilibon Kristiano, tan anto so ginawa ra pian nagamoran itan? (b) Mangisalaysay na sakey ya eksperiensia na sakey a membro na pamilya a natutumangan lapud matoor a panagsungdo to?
11 Diad agano niran taon et nilibo so nagmaliw a Tastasi nen Jehova kayari na saray bulan tan anggan taon ni ingen ya isusumpa ed Kristianon aktibidad na kakanayon dan Tasi. Agaylan tumang iya parad Kristianos a nansiansian mapekder, tan alay bendisyon ed saray datin sumusumpa! Diad tekep na ma-emosyon a boses to, oniay salaysay na sakey a mantaon na 74 a Kristianon matatken: “Mabetbet kon pisasalamatan so asawak tan saray anak ko lapud impansiansia ra ed katuaan ed saray taon a susumpaen kora.” Inkuanto a diad loob na taloran taon et sipapasang ton impulisay so anggan say pangitongtong na asawa to ed sikato nipaakar ed Biblia. “Balet inusaran toak na sikolohya,” inkuanto, “tan ginapoan toak a pulongan legan ton mamasahien so sali-salik. Agaylay pisalsalamat ko ya agton balot sinmuko ed isusumpak!”
12 Oniay insulat na sakey nin asawan laki a sinmumpa ed pamilya to: ‘Siak so sankaugsan a kabusol na asawak lapud kayari impakalmo to ed katuaan et pinagyaw ko, tan inagew-agew kamin mankokolkol; say labay kon ibaga et naynay a siak so mangigagapoy kolkolan. Balet amin et anggapoy kana; say asawak et pinmeket a malet ed Biblia. Diad ontan et labinduan taon so linmabas ed graben pilalaban ko sumpad katuaan tan ed asawak tan anak ko. Parad sikaran dua et siak so Diablo a nankinon-too.’ Diad kaunoran et ginapoan na lakin usisaen so bilay to. ‘Amoriak no panon lay inkasebeg ko,’ insalaysay to. ‘Babasaen ko so Biblia, tan misalamat ak ed saray instruksion to, natan et bautismado ak lan Tasi.’ Isipen pa so engranden tumang na asawan bii, on, diad impakatulong ed ‘kisalba na asawa ton laki’ diad sitotoor ya impansungdo ed isusumpa to ed loob na 12 taon!
Pakaaral ed si Jesus
13. (a) Anto so manunan leksion a nepeg a naaralan na saray asawan lalaki tan bibii manlapud kurang na bilay nen Jesus? (b) Panon a nagunggunaan manlapud uliran nen Jesus iray totoon naiirapan a manpasakop ed linawa na Dios?
13 Say manunan leksion a nepeg a naaralan na saray asawan lalaki tan bibii manlapud kurang na bilay nen Jesus et say katutulok ed Dios. “Naynay kon gagawaen iray bengatlan makapaliket ed sikato,” inkuan nen Jesus. “Aanapen ko, aliwan say dilin linawak, noagta say linawa na samay angibaki ed siak.” (Juan 5:30; 8:29) Anggan sanen nalmoan nen Jesus a sakey ed partikular ya aspektoy linaway Dios et agmarakep, sikato so tinmulok. “No labay mo, ekalen mo iyan kopa ed siak,” impikasi to. Balet ta inyarum ton tampol: “Anggaman kuan, komon ta, say nagawa et aliwan say linawak, noag say kien mo.” (Lucas 22:42) Agkinerew nen Jesus ya umanen na Dios so linawa To; impanengneng to a talagan inaro to so Dios diad situtulok a panagpasakop ed antokaman a linawa na Dios parad sikato. (1 Juan 5:3) Lawas a say panangiyuna ed linawa na Dios, a singa ed ginawa nen Jesus, so importantin tuloy ed itatalona aliwa lambengat diad bilay a walad kasuloan noagta ontan met ed bilay na walay asawa tan say pamilya. Konsideraen pa no akin ya ontan.
14. Panon ya akikatunongan ed lingon paraan so arum a Kristiano?
14 A singa ed asaglawi la, sano say Dios so iyuuna na saray mananisia, panggugunaetan day agpisian ed agmananisian kapareha ra tan mabetbet a makatutulong ira ed sikara a nilinya parad kilalaban. Anggano say sanasawa et namparan mananisia, nayarin say panamaley da so agnapanuliranan. Lapud makasalanan ya inklinasyon, saray sanasawa so aliwan naynay a manaaroan ed sakey tan sakey. (Roma 7:19, 20; 1 Corinto 7:28) Arum ni ingen so unaabot ed punton pananap na sananey ya asawa, anggano anggapoy Makasulatan a basiyan da pian mandiborsyo. (Mateo 19:9; Hebreos 13:4) Ikatunongan da a saya so sankaabigan parad sikara, a say linawa na Dios a pansiansian saniba na sanasawa so talagan mairap. (Malaquias 2:16; Mateo 19:5, 6) Saya so anggapoy suppiat a sananey a kaso na pakakawalaan na kanonotay too imbes a kanonotan na Dios.
15. Akin a sakey a proteksion so pangiyuna ni ed Dios?
15 Agaylan proteksion so pangiyuna ni ed Dios! Saray sanasawa a manggagawa na onia so manggunaet a mansiansian saniba tan resolbien iray problema ra diad panangiyaplika ed konseho na Salita na Dios. Diad ontan et napaliisan dan amin so nengneng na sakit na puso a resulta sano nibabaliwala so linawa to. (Salmo 19:7-11) Saya so iyiilustra na malangwer a sanasawa, a sanen ngalngali lara mansian et deniside ran tumboken so konseho na Biblia. Pigaran taon ed saginonor sanen nanonotan na asawan bii so gayagan niwala’d panamaley to, inkuanto: “Napapayurong ak tan manugaog sano nanonotan ko so posibilidad a nayarin siak so akapisian ed asawak ya anggad sarayan taon. Insan ak manpikasi ed si Jehova a Dios tan pisalamatan so konseho tan panangiwanwan to ya amakasakey ed sikami ed ontan a maliket a panuulopan mi.”
Asawan Lalaki, Asawan Bibii—Aligen si Kristo!
16. Anton uliran so impanengneng nen Jesus ed saray sanasawa?
16 Si Jesus, a naynay a mangiyuuna ed Dios, so angipanengneng na pandinayewan ya uliran parad namparan asawan lalaki tan bibii, tan marakep no imanoen dan maong itan. Papasesegen iray asawan lalaki ya aligen so matamoy a paraan ya inkaulo nen Jesus ed saray membro na Kristianon kongregasyon. (Efeso 5:23) Tan saray Kristianon asawan bibii so makaaral manlapud naspot ya uliran nen Jesus nipaakar ed panagpasakop ed Dios.—1 Corinto 11:3.
17, 18. Diad antoran dalan ya angipanengneng na maabig ya alimbawa si Jesus parad saray asawan lalaki?
17 Igaganggan na Biblia: “Asawan lalaki, mantultuloy ya aroen yoray kaasawaan yo, no panon ya inaro met nen Kristo so kongregasyon tan insaklang to so inkasikato nipaakar ed satan.” (Efeso 5:25) Say sakey ya importantin dalan a ditan et impanengneng nen Jesus so panangaro to parad kongregasyon na papatumbok to et diad impagmaliw ton maapit a kaaro ra. “Tinawag ta kayo lan kakaaro,” inkuan nen Jesus, “lapud amin a bengatlan nadngel ko manlapud Amak so impaamtak la’d sikayo.” (Juan 15:15) Isipen pa so amin a panaon ya inusar nen Jesus ed impitongtong ed saray babangatan to—say dakel, dakerakel ya impidiskusyon to ed sikara—tan ed panagmatalek ya impabtang to ed sikara! Agta satan so ekselentin uliran parad asawan lalaki?
18 Peteg ya interesado si Jesus ed saray babangatan to tan talagan laba-labay tora. (Juan 13:1) Sano agmalinew iray bangat to ed sikara, siaanos ton angilugar na panaon pian ipalinew iratan a bengatla diad sikara lambengat. (Mateo 13:36-43) Asawan lalaki, kasin parehon kaimportanti espiritual a pankaabigan na asawa yo ed sikayo? Kasin mangilulugar kayo na panaon a kaiba yo, a seseguroen a malinew ed kanonotan tan kapusoan yon dua iray katuaan na Biblia? Inibaan nen Jesus iray apostol to diad ministeryo, anganko ta impapasal so balang sakey ed sikara. Kasin iibaan yoy asawa yo ed ministeryo, a sanulop ed ibibisita ed kabkaabungan tan diad panangikondukta na saray panangiyaral na Biblia?
19. Panon a say pidedeneng nen Jesus ed naulit-ulit iran kakapuyan na saray apostol to so angiletneg na alimbawa parad saray asawan lalaki?
19 Si Jesus so nagkalautlan angitarok na makapasagyat ya alimbawa na pidedeneng ed ag-inkayadyari na apostoles to parad saray asawan lalaki. Legan na kaunoran a pangdem a kaibay apostoles to, alikas to so nauli-ulit ya awawey na panlalaslasan. Kasin siruruksa toran binano ed satan? Andi, noagta sipapaabeban inurasan toray sali na balang sakey. (Marcos 9:33-37; 10:35-45; Juan 13:2-17) Kasin ipapanengneng mo so ontan ya anos ed asawam? Imbes a manreklamo ed naulit-ulit a kakapuyan, kasin sika so siaanos a mangugunaet a tulongan tan sabien so puso to diad panamegley na alimbawam? Maseguron saray asawan bibii so onkiwas ed ontan a maaron panangabagey, a singa ginawa na apostoles ed kaunoran.
20. Anto so kaukolan ya agbalot lingwanan na Kristianon asawan bibii, tan siopa so itatarok bilang alimbawa parad sikara?
20 Kaukolan ya ikonsidera met na asawan bibii si Jesus, ya agton balot nilingwanan a “say ulo nen Kristo et say Dios.” Sikatoy lawas nampasakop ed mangatatawen ya Ama to. Mipadpara, kaukolan ya agbalot lilingwanan na bibii a “say ulo met na bii et say laki,” on, a say asawa ra so ulo ra. (1 Corinto 11:3; Efeso 5:23) Pinaseseg nen apostol Pedro so Kristianon asawan bibii a nonoten so alimbawa na “saray masantan bibii” na asasakbay a panaon, nagkalautla ed si Sara, a “tinulok to si Abraham, a tatawagen to a ‘katawan.’”—1 Pedro 3:5, 6.
21. Akin a sakey ya itatalona so panamaley nen Abraham tan si Sara balet inkasaew ed si Lot tan say asawa to?
21 Malinew a tinaynan nen Sara so marakep ya ayaman to diad maaligwas a syudad pian manayam ed saray tolda diad sankailin dalin. Akin? Lapud mas labay to itan a kabibilay? Maseguron andi. Lapud satan so kerew na asawa to? Anggapoy duaruwan saya so sakey a rason, lapud inararo tan rerespetoen nen Sara si Abraham lapud maridios iran kualidad to. (Genesis 18:12) Balet say manunan rason no akin ya akiulop ed asawa to et say panangaro to parad si Jehova tan say impapuson pilalek ton tumboken so panangiderihe na Dios. (Genesis 12:1) Maliket ya ontulok ed Dios. Diad biek a dapag, say asawa nen Lot so masuyat a manggawa ed linawa na Dios tan sirin et linmingaw tekep na panpirawat ed bengabengatlan atilak ed dilin baley ton Sodoma. (Genesis 19:15, 25, 26; Lucas 17:32) Agaylan makapasinagem ya anggaan ed satan a panamaley—amin et lapud itutunganga to ed Dios!
22. (a) Anton dilin-panangusisa so sikakabat a nagawaan na saray membro na pamilya? (b) Anto so ikonsidera tayo ed ontumbok a panagaral tayo?
22 Kanian bilang sakey ya asawan laki odino sakey ya asawan bii, kaukolan mon itepet ed inkasika, ‘Iyuuna ta na pamilya mi so Dios? Kasin talagan panbabanikelan kon sumpalen so betang ed pamilyan impagamor na Dios ed siak? Kasin sisisimoon kon panggugunaetan ya aroen so kaparehak tan sikatoy tulongan a makagamor odino mamasiansia na maong a relasyon ed si Jehova?’ Maslak a pamilya et walaan na ananak. Ontumbok tayon konsideraen so betang na atateng tan say parehon pankaukolan da tan saray anak da ya iyuna so Dios.
Kasin Natandaan Yo?
◻ Antoray nayarin pansumpalan na saray bangat nen Jesus ed dakel a pamilya?
◻ Anton tumang so agamoran na nilibon mapekder iran Kristiano?
◻ Anto so makatulong ed saray sanasawa a naarawian so imoralidad tan diborsyo?
◻ Anto so naaralan na saray asawan lalaki manlapud alimbawa nen Jesus?
◻ Panon a makatulong iray asawan bibii ed pakawalaan na sakey a maliket a panamaley?
[Litrato ed pahina 10]
Panon ya akatulong si Sara ed itatalona na panamaley to?