Report na Saray Manangiyabawag na Panarian

Napasegsegang Iray Tuan Kristiano

NANLAPULAD agew nen Abel, susungdoan na dakel ya ariripen nen Jehova so relihyoson panamasegsegang. (Lucas 11:49-51) Tan agpankelawan, ta ipapasakbay na Biblia ya “amin so saray malabay a manbilay ed sinasanto ed Cristo Jesus, manako’ra naani pamasegsegang”! (2 Timoteo 3:12) Mitukoyan, natan diad masulok a 25 bansa, sesebelan tan susungdoan na Tastasi nen Jehova so panamasegsegang.

Diad sakey a bansa a ditan et aglambengat napepegetan noagta napapasegsegang met so Tastasi nen Jehova na saray relihyonista, masulok a 12,000 a manangipalapag na maong a balita so mantultuloy a mankikimey a siseseseg, mangiyaaral na Biblia ed masulok a 15,000 a totoo. Siempre, say panagpulong da so nagagawa tekep na inkaalas. Kaslakan, gagawaen daray Kristianon miting da diad pribadon ayaman, tan sikaray siaalwar sano mangiimbita’d interesadon totoo ed saratan a miting.

Inadapta na gobierno diad agano ni so mas maabuloy ya awawey ed Tastasi, a natan et mas makapankimey ya anggapoy mibabali ed sikara. Anggaman ontan, uusaren na nanduruman relihyoson grupo so impluensya ra pian mamalesay gulo.

Diad sakey a syudad sakey a masanok ya ulop a tugyopen na 200 a relihyoson panatiko so linmusob ed sakey ya abung a ditan et ngalngali 50 Tastasi nen Jehova so manmimiting. Arum ed ulop so walay awit-awit iran bato tan kinmekelyaw na relihyoson balbalikas. Say mapatnag a gagala ra et pian lusoben so Tastasi tan deraley abung. Ompapaway ya abayag lan naiimano na relihyoson papangulo iray miting a nagagawa tan manalagar labat na dugan panaon ed pangataki. Asingger lan loobay ulop so abung sanen 15 pulis so sinmabi tan ginanggay ulop ya onalis. Nikelawan iray Tastasi, ta anggapo’d sikara so awalaay panaon a mangipaamta ed satan ed pulisya.

Anggaman diad arum niran inkagawa et saray sumusumpa so tinmalona. Pigaran Tastasi so inawit ed bista tan asentensyaan na pakapriso. Sakey a kaso’d korte so nipaleen ed pigara lan taon, tan mapatnag lapud saray prosecutor so andian na interes ed satan. Anggaman ontan, diad sugsug na lokal a klero, say pamaakaran so nipawil lamet ed korte, tan say Tasi so nipangaw bilang sentensya.

Diad sananey a pasen sakey a grupo na Tastasi so nanaabet ed sakey a pribadan ayaman pian ngilinan so Pangdem na Katawan. Diad saginonor ed saman a labi pigaran pulis so angerel ed unabong tan say matatken ya angikondukta ed miting. Diad istasyon na pulisya, sikaray aminpigan pinekpek. Sakey a maruksan panag-usay so nambayag ed loob na pigaran oras. Sakey ed Tastasi so nansungdo met na panamairap ed inkilebleb ed ambetel a bobon.

Akin a saray pulis so manggagawa na ontan a panaglusob? Lamet, sakey a grupo na saray relihyoson panatiko, tekep na tulong na lokal a klero, so walad benegan na kiwas na pupulis. Diad saginonor say hepe na pulisya so angiparungtal a saray impangerel so agawa ya anggapoy panangiyabuloy to. Sakey a pipupulangan so nipakseb tan saray sinansakey a responsabli ed impanpekpek so dinisiplina.

Diad interon mundo, mantultuloy so Tastasi nen Jehova a manpupulong ed maong a balita na Panariay Dios, anggan diad arap na marawal ya isusumpa. Tutumboken da so simbawa nen Jesus: “Nia, ibaki takayo a singa carnero ed nanleleetan na saray lobos; mankalkalakal [manlikas, NW] kayo sirin a singa saray uleg, tan maoyamo kayo a singa saray malapati.”​—Mateo 10:16.

[Litrato ed pahina 31]

Si Abel so sankaunaan a pinasegsegang