Say Sankabalgan a Toon Nambilay ed Kapiganman

Kapitulo 119

Inawit ed si Annas, Insan ed si Caifas

Si Jesus, ataker bilang sakey a kabanyakan a kriminal, so inawit ed si Annas, say maimpluensyan datin atagey a saserdote. Si Annas so atagey a saserdote sanen si Jesus bilang ugaw a mantaon na 12 et amakelaw ed saray rabinikon managbangat diad templo. Pigarad lalakin ilalak nen Annas so diad saginonor et nanlingkor bilang atagey a saserdote, tan diad kaplesan et say manugang ton laki a si Caifas so walad satan a posisyon.

Mapatnag ya inmunan inawit si Jesus ed abung nen Annas lapud say manunan saserdote so abayag lan prominenti ed relihyoson panagbilay na saray Judio. Sayan insamar a minengnengan ed si Annas so angiter na pankanawnawa parad Atagey a Saserdote a si Caifas pian tugyopen so Sanhedrin, say 71-membron Judion atagey a korte, ontan met pian manugyop na palson tastasi.

Tinepetan natan na Manunan saserdoten si Annas si Jesus nipaakar ed saray babangatan to tan nipaakar ed bangat to. Anggaman ontan, bilang ebat et inkuan nen Jesus: “Mapubliko ak a nansalita ed mundo. Lawas ak a nanbangat ed sinagoga tan ed templo, a pantitiponan na saray Judio; tan anggapoy bengatlan sinalitak a maamot. Akin a tetepetan mo ak? Tepetan mo iramay akarengel ed imbagak ed sikara. Nengneng mo! Amta na saraya so imbagak.”

Tamtampol, sakey ed saray opisyal a manalalagey ya asingger ed si Jesus so anampal ed sikato, ya ibabaga: “Ontan ta so kakaebat mo ed manunan saserdote?”

“No sililingo ak a nansalita,” ebat nen Jesus, “tasian mo so nipaakar ed lingo; balet no matua, akin et tinampal mo ak?” Kayari na sayan ebatan, ataker a pinataynan nen Annas si Jesus a mamaarap ed si Caifas.

Maseguro a diad sayan bekta et amin a manunan saserdote tan mamasiken tan eskribas, on, say interon Sanhedrin, so ginmapon mantitipon. Mapatnag a diad abung nen Caifas so panmitingan da. Malinew a sumpad Judion ganggan so ontan a panusay ed labi na Paskua. Balet saya so ag-anebel ed saray relihyoson pangulo manlapud mauges a gagala ra.

Pigaran simba ed kasakbayan, sanen pinaoli nen Jesus si Lazaro, dinisisyonan la na Sanhedrin diad limog da a sikatoy nepeg ya ompatey. Tan duay agew lambengat ed asasakbay, nen Mierkoles, nannononong iray relihyoson autoridad ya erelen si Jesus ed masilib a paraan pian pateyen. Isipen pa, aktual a sikatoy kinondena la sakbay a nausay.

Nansagpotan la natan so pananap na tastasi a mangitarok na palson ebidensya pian makapawalay kaso sumpad si Jesus. Anggaman ontan, anggapoy naromog a tastasi a mantutunosay testimonya ra. Kaunoran, duara so inmarap tan angisangsang: “Arengel min inkuanto, ‘Igebak iyan templo a ginawa’d saray lima tan ed taloran agew et mamaalagey ak na sananey ya aliwan ginawa’d saray lima.’”

“Anggapo ta’y bengatlan iyebat mo?” tepet nen Caifas. “Anto itan so tetestigoan na saraya sumpad sika?” Balet nansiansian andi-esel si Jesus. Anggan sayan palson panamakasalanan, diad kababaingan na Sanhedrin et agnapankakasakey na tastasi iray istorya ra. Kanian sinali na atagey a saserdote so duman taktika.

Amta nen Caifas no panon kasensitibo iray Judio nipaakar ed siopaman a mangibabagan sikatoy mismon Anak na Dios. Diad duaran asasakbay ya inkagawa, bengat-bengat dan tinawag si Jesus a manag-ayew a makanepegay patey, aminsan lapud sililingon iisipen a sikatoy mangibabagan mipara’d Dios. Sisisilib natan ya imbaga nen Caifas: “Diad mabilay a Dios et ipapasen ta ka ed silong na samba pian ibagam ed sikami no sikay Kristo, say Anak na Dios!”

Antokaman so isipen na saray Judio, peteg a si Jesus so Anak na Dios. Tan say pansiansian andi-esel so nayarin ibaga ra’d satan a panangiburi na inka-Kristo to. Kanian sipapakpel ya inyebat nen Jesus: “Siak; tan nanengneng yon totoo so Anak na too a manyudyurong diad nikawanan tekep na pakayari tan onsasabin tekep na saray lurem na tawen.”

Diad saya, si Caifas, diad sakey a dramatikon panengneng, so amilat ed kawes to, tan kinmelyaw: “Sikatoy nan-ayew! Anto ni kaaruman a nakaukolan tayon tastasi? Nengneng yo! Natan ta arengel yo so panangayew. Antoy nibaga yo?”

“Sikato so makanepegan ed patey,” inyabawag na Sanhedrin. Insan sikatoy naneelekan da, tan angibaga na dakel a bengatlan sumpad sikato diad panangayew. Sikatoy tinampal da tan nilukdaan. Arum so anakbong ed interon lupa to tan binunbuntalan da tan niludlurey ya inkuan: “Manpropesiya ka’d sikami, sika a Kristo. Siopa ta so anampal ed sika?” Sayan panangabuso, sumpad-ganggan ya awawey so agawa legan na labin panangusay. Mateo 26:57-68; 26:3, 4; Marcos 14:53-65; Lucas 22:54, 63-65; Juan 18:13-24; 11:45-53; 10:31-39; 5:16-18.—NW.

▪ Iner so inmunan angipaarapan ed si Jesus, tan anto so agawa’d sikato diman?

▪ Iner so sinmublay ya angawitan ed si Jesus, tan parad anton gagala?

▪ Panon ya agawaan nen Caifas a niyabawag na Sanhedrin a si Jesus so makanepegan na patey?

▪ Anton panangabuso, sumpad-ganggan ya awawey so agawa legan na panangusay?