Report na Saray Manangiyabawag na Panarian
Iyaabawag na Saray Kalangweran so Maong a Balita ed Aprika
Ag-abayag kayari inkioli nen Jesus, sakey ya Aprikano so binmisita ed Jerusalem. Ag-abitla’d Biblia so ngaran to. Sikatoy kabat lambengat a ‘lakin walaay baleg a pakauley ed lepsag nen Candace a reina na saray taga Etiopa, ya angimaton ed amin a kayarian to.’ Akin ya asaglawi ed Biblia? Lapud inderehi na sakey ya anghel so Kristianon ebanghelisador a si Filipe ya iyabawag ed sikatoy ‘maong a balita nipaakar ed Jesu-Cristo.’ Sayan Etiopen laki so sankaunaan a nirekord a nagmaliw a membro na Kristianon kongregasyon.—Gawa 8:26-39.
Natan, walaray nilasus nilibon Tastasi nen Jehova ed Aprika. Uusaren dan amin a pankanawnawan ipanabang ed arum so maong a balitan nipaakar ed si Jesus. Saray onggendan ya eksperiensia so mangipapanengneng ya anggan saray kalangweran diad Aprika et walaan na pibibiang ed panangipulong ed maong a balita.
◻ Si Sandy tan Priya, duaran bibiin mantaon na 11 ed Nairobi, Kenya, so sankaabay. Labalabay day manggalaw a dua tan mansalatay libro na saray istorya. Ginapoan na atateng nen Priya ya aralen so Biblia a kaiba iray Tasi nen Jehova. Natan et si Priya et walaan na seleksyon na balo iran libro a niyarum ed koleksyon to, pati say sakey a nagkalautlan nagmaliw a paborito to, say Listening to the Great Teacher, ya impalapag na Watchtower Bible and Tract Society. Impanabang toy libro ton Great Teacher ed amiga ton Sandy, tan sikaran duay ginmapon manaaral ed satan a regular.
Anggaman ontan, say ina nen Sandy, si Una, so onaatendi ed Anglican Church tan agto labay a say anak to so manbasa’d saray libron nanlapud Tastasi nen Jehova. Anggaman ed isusumpa na ina to, say panagaral so nantultuloy. Sakey ya agew et akikasi si Sandy ed ina ton ontalineng ed diskusyon da anggan maminsan lambengat. Say kapitulon binasa na bibii ed saman ya agew et apauloan a “Two Men Who Celebrated Birthdays.” Tinmalineng si Una tan nandinayewan ton tuloy itan. Tampol ton inasinggeray ina nen Priya tekep na dakel a tepet ed Biblia.
Inyarunsa na ina nen Priya parad sakey a Tasin mangiyaral na Biblia ed si Una. Ag-abayag et si Una a mismo so manginanabang ed naaralan to ed katrabahoan ton si Dolly. Kaleganan, say mantaon na 11 a Priya so nantultuloy ya inmaligwas tan deniside toy isimboloy dedikasyon to ed si Jehova diad bautismo ed danum diad sakey a distriton kumbension na Tastasi nen Jehova. Diad satan met a kumbension, diad gayaga nen Priya et abautismoan met si Una tan si Dolly!
◻ Walaray pigaran bansa ed Aprika a say kimey na Tastasi nen Jehova et agnirehistro. Diad sakey a dalin et wala so inkalapagan a kipapasen na panangiyabuloy ed relihyoson aktibidades tan sisisiaen na Tastasi. Diad sakey ya eskuelaan ed satan a dalin et sakey a pitoy-taon a laki tan say anemiran-taon ya agi to—ananak na Tastasi—so naabuloyan ya ag-onatendi’d klase legan na relihyoson pikakasi.
Sakey ya agew, ingganggan na balon maestro a saratan ya ugugaw so mibansag ed pikakasin kaibay arum niran ugugaw. Say mas panguloan so agtinmulok tan pinekpek na maestro. Say yogtan ya agi to, say anem-taon a Shadrack, so angipilit a labay toy minengnengan ed headmaster diad opisina to. Say headmaster tan say balon maestro so tinmepet no akin ya agto labay so miulop ed arum. Tinepetan da no antakot a napekpek na atateng to. Sikatoy inmebat ed maong a tuloy ya Arabiko: “Andi, say Dios a dadayewen ko et aliwan sakey a Dios na gutgutan noagta uksoy. Agko nayarian so magmaliw a sakey ed Tastasi nen Jehova ed ayaman tan sananey a relihyon diad eskuelaan!” Bilang resulta, sikatoy naikdan na exemption.
Kayari bautismo, say Etiopen lakin asaglawi ed libro na saray Gawa et “intuloy to so dalan to a malikeliket.” (Gawa 8:39) Ontan met natan, saray manangiyabawag na Panarian diad maawang a kontinenti na Aprika so manggagayaga ed pribilihyon ‘pangiyabawag na maong a balita nipaakar ed si Jesus.’—Gawa 8:35.