Agmanbayag, Anggapo Lay Duka!

“AG KAYO antakot; ta, nia, yakar ko ed sikayo so saray maong a balita na baleg a liket a nipaakar ed amin a totoo.” (Lucas 2:10) Sarayan makapabiskeg a salita so nadngel na nikelawan iran pastol ya asingger ed Betlehem ed labin inkiyanak nen Jesus. Mitunosan ed satan a deklarasyon, indanedanet nen Jesus so “maong a balita” legan na mangaraldalin a ministeryo to. Natan, sano mandependi itayon maong ed kuarta pian mangasikaso’d saray pankaukolan tayo, panon tayon gunggunaan na maong a balita nipaakar ed si Jesus?

Inyabawag nen Jesus so “maong a balita ed saray duruka.” (Lucas 4:18) Unong ed Mateo 9:35, “si Jesus niliberliber to ray amin a ciudad tan balbaley, a nanbangat ed saray sinagogas da, tan inpopulong to’y evangelio na panarian.” Say mensahe to so nagkalautlan amaseseg ed saray pakaskasi. “Et sanen anengneng to ray dakerakel a totoo, inabagey to ra, lapud maermen tan abuybuyak ira, a singa saray carnero ya angapoy pastol da.” (Mateo 9:36) Tua, ya inkuan nen Jesus a, “saray duruka walaran naynay ed sikayo,” balet agtayo nepeg a sampotan manlapud sarayan salita ya anggapoy ilalo parad saray mankaukolan. (Juan 12:8) Anggad agkaandi na sayan marelmeng a sistema, wadtan iray duka, antokamay sengegay kipapasen da. Ag-ibabaliwala na Salitay Dios so kapetegan na inkaduka, balet agto iyaapasakey ed saray negatibon pamaakaran. Imbes, iyoopresi to’d duruka so tulong pian natalonaan iray kapagaan ed bilay.

Tulong Parad Duruka

Makatantanda, nikuan ya: “Anggapo lay babaleg a pabelat a nasakbat na sakey nen say pakaamtan anggapoy mangimamalasakit odino makakatalos ed sikato.” Ingen, anggaman ed kakulangay panangabagey ed biang na karaklan, siansian walay maong a balita parad duruka​—namparan parad natan tan ed arapen.

Makapaermen, dakel so walaay samet ya interes ya ontulong ed duruka. Unong ed The World Book Encyclopedia, sisiaen na arum a “saray totoo ed sosyedad et manlalaslasan pian manbilay tan . . . saray superyor ya indibidual et magmamaliw a mabiskeg tan mayaman.” Saramay manisia ed sayan teorya, a tatawagen a social Darwinism, so nayarin manmoria ed saray duka bilang mangiras lambengat a totoo odino gastador. Ingen, saray komikimey ed kapugaroan, sankailin trabahadores, tan arum nira, anggaman ed abeban sueldo ra, so mabetbet a mamapasyan mankikimey pian napakan daray pamilya ra.

Diad dakel a daldalin et kaslakan lay inkaduka. Kanian, saray duka​—say karaklan—​so agmakakalikas na inka-saew. Anggaman kuan, diad saratan a daldalin et walaray totoon say kabibilay da et inlambak anggan sikaray walad inkaduka. Saray komportabli, masanting ya ayaman so naalmo’d aseksek, marutdutak iran kobongkobong. Mamanehoen na de-sueldoan a baleg iray ankablin kotsi ra ed saray kalyen kawalaay maiirap tan anggapoy trabaho. Diad saratan a daldalin et talagan kabat na durukay kipapasen da. Peteg, ya “aglambengat naiirapan iray duruka lapud agmasustansyan tagano, agmarakep a panayaman, tan kakulangay panangasikaso’d medikal, noagta nisesengeg met la’d mantultuloy a kapagaan ed kipapasen da,” kuan na The World Book Encyclopedia. “Lapud kairapay pakaalmo na trabaho, nalilikna ran andian iray dignidad tan dilin-respeto.” Panon, sirin, a pigara ed saray mairap a tuloy so makakatalona ed situasyon da? Anto so pisisiglaot na maong a balita nipaakar ed si Jesus ed itatalona?

Ununa, tandaan a say inkaduka et nayarin pinmalalo lapud agmakabat iran niyugali. Kunsideraen pay pigaran alimbawa. Aaksobien nen Valdecir a legan a daiset so naakan na akulaw tan ankekelag ya anak to, dadaraken toy kuarta a panmantini ed imoral ya istiloy-bilay. Kuanto: “Anggaman akaimpleyo, mabetbet ya anggapoy kuartak a parad pamilyak, balet lawas walaay kuartan parad tiket ed loterya.” Aperdi negosyo nen Milton, a walaay 23 empleado, lapud panagbuanges tan panagsigarilyo to. Inkuanto: “Dakel so inusar kon labi ed kalye, ya agmakasempet, tan nanirap a tuloy so pamilyak nisesengeg ed siak.”

Dinarak met nen João so sueldo to ed saray bisyo. “Walaray labin agak onsempet. Agmagenap so amin a sueldok parad saray bisyo tan panagbiik. Agla naanosan na akulaw koy situasyon kanian nilabay ton mansian kami.” Nilikud ni ed saray problema to ed pinansyal tan panamaley, wala niray arum. Kuanto: “Nagmaliw ak a problema na kakanayon tan kakaabay, tan lalon nagmaliw ak a problema ed trabaho. Bilang resulta et naynay ak ya anggapoy trabaho.” Si Júlio so sakey ya adik ed druga. Anggaman ontan, oniay salaysay to: “Lapud say sueldok et agmagenap ed bisyo a panagdruga, ginapoan koy nantrabaho bilang managlako na narkotiko ta pian agko la kaukolan a saliwey druga.”

Lapud binmaleg ed sakey a mairap a pamilyan walaay waloran anak, kinaliktan nen José a nawalaay bengabengatlan nakayarian to. Diad panisip ya anggapo met so nabalang to, ginmapon nantakew ed totoo a kaibay arum niran tobonbalo. Lapud inkaandi-ilalo, sakey nin tobonbalo so nagmaliw a membro na sakey a pangkat a tatawagen a Headbangers. Oniay salaysay to: “Lapud maslak ed sikami so masyadoy irap to, panliketan mi panderal na bengabengatla tan panlusob ed totoo.”

Ingen, natan et sarayan lalaki tan saray pamilya ra so agla maniirap lapud kakulangan odino liknaay pait tan sakit na linawa. Agda la naliliknay inkapakaskasi odino inkaandi-ilalo. Akin ya andi? Lapud naaralan day maong a balitan impulong nen Jesus. Inyaplika ray simbawa na Biblia tan akilimog ed totoon walaan met na ontan a disposisyon ed loob na saray kongregasyon na Tastasi nen Jehova. Tan naaralan daray pigaran importantin tuloy a bengatla nipaakar ed kayamanan tan inkaduka.

Tulong ed Panalonay Inkaduka

Ununa, naamtaan da a no iyaplika daray prinsipyo na Biblia, nakesayan iray mauges ya epektoy inkaduka. Kokondenaen na Biblia so imoralidad, panagbuanges, panagsugal, tan panangabuso ed druga. (1 Corinto 6:9, 10) Magastos iratan a bengatla. Gawaen dan onirap so toon mayaman, tan say duka a lalon onirap. Say pangikaindan ed sarayan bisyo tan arum niran singa saraya so mamaaligwas a tuloy ed kipapasey ekonomiya na sakey a pamilya.

Komadua, aromog dan walaray nagkalalon importantin bengatla ed bilay nen say kayamanan. Say asimbang a panmoria so nibabalikas ed sarayan impuyan a salita: “Say kakabatan sikato so sakey a sakorong, singa met say kuarta sakey a sakorong, balet say katageyan na pikakabat sikato, a say kakabatan kawaloen to so bilay na walaan ed sikato.” (Eclesiastes 7:12) On, kaukolay kuarta. Balet say nibased-Biblian kakabatan tan pikakabat ed saray gagala na Dios so nagkalalo nin tuloy a mausar. Peteg, ed sakey ya onkukulang na kakabatan, say pakawalaan na dakel a kuarta so magmaliw a lalon pabelat nen say pakawalaay daiset. Sikakabat ya impikasi na managsulat na Biblia: “Agmo iter komon ed siak so kadukaan ono saray kayamanan; taganoen moak ed kanen a nakaokolan ed siak. Ompan napesel ak, tan iburi ta ka, tan kuan ko, Siopa si Jehova? Odino ompan onduka ak, tan mantakew ak, tan agamilen ko a modmoraen so ngaran na Dios ko.”​—Uliran 30:8, 9.

Komatlo, nalmoan da a no say sakey so manbibilay unong ed impulong nen Jesus a maong a balita, agton balot naliknan pinaulyan. Lalanorey maong a balita so Panariay Dios. Say mensahe so natatawag ya “evangelio [maong a balita, NW] na panarian,” tan diad agew tayo et nipupulong ed amin a panaayaman a dalin. (Mateo 24:14) Imbaga nen Jesus ed sikatayo a sikatayoy nasuportaan no manilalo tayo ed satan a Panarian. Inkuanto: “Ingen anapen yo ni’n onona so panarian, tan say inkatonong [na Dios]; et amin iraya a bengatla niarum ira ed sikayo.” (Mateo 6:33) Agmangisisipay Dios na masasanting a kotsi odino magastos a kaabungan. Say sinaglawi nen Jesus et saray pankaukolan ed bilay, a singa say tagano tan kawesen. (Mateo 6:31) Balet minilyon natan so nayarin mamaneknek a napanmatalkay sipan nen Jesus. Say sakey a too, anggan panon lay irap to, so agsigpot a napaulyanan no iyuna toy Panarian.

Komapat, aromog dan say mangiyuuna ed Panarian na Dios so agnasasakitay linawa lapud kairapan ed ekonomya. On, kaukolan ya impasyan mankimey so duka. Balet no sikatoy manlilingkor ed Dios, sikato so walaay apribilihyoan a relasyon ed Manamalsa to, a nipaakar ed Sikato et ibabaga na Biblia: “Ta sikato agto minudmura nisay ginula so kaermenan na apaermen; agto insanib so lupa to ed apaermen; no ag say nen tinmagleey ed sikato, dinengel to.” (Salmo 22:24) Sakey ni, say duka so walaan na tulong ed panalona ed saray problema’d bilay. Panggagayagaan toy maapit a piuulop ed kaparan Kristianos tan walaay pikakabat tan talek ed niparungtal a linawa nen Jehova. Sarayan bengatla et “nagkalalo a panpirawatan nen say balitok, on, nen say dakel a polido a balitok.”​—Salmo 19:10.

Kaunoran et Anggapo Lay Inkaduka!

Kaunoran, naaralan na saray mangiimano’d maong a balita a gagala nen Jehova a Dios a maminpinsan ton resolbiey problema ed inkaduka diad panamegley na Panarian to. Isisipan na Biblia: “Ta say naokolan ag lawas nalingoanan, ni say ilalo na saray duruka naandi lawas.” (Salmo 9:18) Say Panarian et sakey a peteg a gobierno, niletneg ed katawenan tekep nen Jesu-Kristo bilang Manuley. Agla manbayag et salatan na satan a Panarian iray gobierno na too diad panangipakurang ed kurakurang na too. (Daniel 2:44) Insan, bilang nitronon Ari, si Jesus “ilagak to so makabos tan naokolan, tan ilaban to so kamarerwa na naokolan. Sikato dondonen to so kamarerwa ra a yarawi ed panamalingo tan panamasoot; et mabli naani dala ra ed mata to.”​—Salmo 72:13, 14.

Diad panilalo ed satan a panaon, ibabaga na Miqueas 4:3, 4: “Onyorong ira naani balang sakey ed silong na kiew to ya uvas tan ed silong na kiew to ya higos; et angapo naani manaktakot ed sikara; ta say sangi nen Jehova na saray ejercito sikato so sinalita to.” Siopa so sasalitaen dia? Siempre, amin iramay manpasakop ed Panarian na Dios. Satan a Panarian so manresolbi ed amin a probleman mamapairap ed katooan​—anggan say probleman sakit tan ipapatey. “Inakmon to so patey ed ando lan ando; et say [Soberanon] Katawan a Jehova punasen to naani so saray lua a onagus ed saray amin a lupa.” (Isaias 25:8; 33:24) Agaylan duman mundo itan! Tan tandaan, napanisiaan tayo irayan sipan lapud say Dios a mismo so angipuyan ed saratan. Kuanto: “Et say baley ko manayam naani ed mareen a panagayaman; tan dia ed maligen a paspasen, tan dia ed saray mareen a panpainawaan.”​—Isaias 32:18.

Say talek ed Panarian na Dios so manatalona ed inkaandi dilin-respeto a mabetbet a sengegay inkaduka. Kabat na dukan Kristiano a sikatoy importanti ed imaton na Dios a singa met ed mayaman a Kristiano. Namparan aaroen ira na Dios, tan walaan ira na parehon ilalo. Namparan maniilalo ira ed panaon sano, diad silong na Panarian na Dios et anggapo lay inkaduka. Agaylan maglorian panaon itan! Kaunoran, anggapo lay magmaliw a duka!

[Litrato ed pahina 5]

Akin a daraken iray kayarian diad panagsugal, panagsigarilyo, panagbuanges, panangabuso ed druga, odino diad imoral ya istiloy-kabibilay?

[Litrato ed pahina 7]

Solbaren nen Jehova a Dios iray problema na inkadukay too diad panamegley na Panarian to