Sakey a Baleg ya Ulop na Tua Iran Managdayew​—Iner so Nanlapuan Da?

“Nia, so sakey a baleg ya olop, . . . a nanlapu ed balang nacion tan amin na saray kailalakan, tan binaleybaley, tan salita, ya manalalagey irad arap na trono, tan ed arap na Cordero.”​—APOCALIPSIS 7:9.

1. Akin a saray mapropetikon pasingawey diad Apocalipsis so makapainteres a tuloy ed sikatayo natan?

DIAD pansampo-sampot na inmunan siglo K.P., anengneng nen apostol Juan iray pasingawey na makapakelaw iran ebenton mitukoyan ed gagala nen Jehova. Arum ed saray bengatlan anengneng to ed pasingawey so nasusumpal la natan. Say arum so niganan nagawa’d asingger ya arapen. Amin na saraya so onliliber ed dramatikon kapantokan na engranden gagala nen Jehova pian itandoro so ngaran to ed arap na amin a pinalsa. (Ezequiel 38:23; Apocalipsis 4:11; 5:13) Niarum ni, lalanoren daray ilalo na balang sakey ed sikatayo nipaakar ed bilay. Panon ya ontan?

2. (a) Anto so anengneng nen apostol Juan ed komapat a pasingawey to? (b) Antoran tepet nipaakar ed sayan pasingawey so kunsideraen tayo?

² Diad komapat a serye na saray pasingawey ed Apocalipsis, anengneng nen Juan iray anghel a mamupuger ed saray dagem na kadederal anggad katatakan na kamolingan na “saray aripen na Dios tayo.” Insan anengneng to so makapasagyat a tuloy ya agawa​—“sakey a baleg ya olop, a sikato so ag nayari a bilangen na too a nanlapu ed balang nacion tan amin na saray kailalakan, tan binaleybaley, tan salita,” a nankakasakey ed panagdayew ed si Jehova tan mamapagalang ed Anak to. Saraya, unong a nibaga ed si Juan et totoon ompaway manlapud baleg a kairapan. (Apocalipsis 7:1-17) Sioparamay nadedeskribi bilang “saray aripen na Dios tayo”? Tan siopa so manugyop ed “baleg ya olop” na saray makaliktar ed kairapan? Kasin sakey ka ed sikara?

Siopa so “Saray Aripen na Dios Tayo”?

3. (a) Diad Juan 10:1-18, panon ya inyilustra nen Jesus so pisiglaotan to ed saray patumbok to? (b) Anto so ginawan posibli nen Jesus parad saray karnero to diad panamegley na masakripisyon impatey to?

³ Ngalngali apat bulan sakbay na ipatey to, sinaglawi nen Jesus so inkasikato bilang “say maabig a pastol” tan saray patumbok to bilang “karnero” a kibagatay bilay to. Nikadkadumay impanaglawi to ed karneron aromog to ed loob na piguratibon kasimpokokan tan nanlapulad saman et nikadkaduman inasikaso to. (Juan 10:1-18, NW)a Tekep na aro, talagan insuko nen Jesus so kamarerwa to nisesengeg ed saray karnero to, ya itatarok so kablian na dondon a nakakaukolan ta pian sikaray nibulos manlapud kasalanan tan patey.

4. Sioparay inmunan atipon bilang karnero a mitunosan ed inkuan dia nen Jesus?

⁴ Anggaman ontan, sakbay a gawaen itan, si Jesus bilang Maabig a Pastol so personal ya anugyop na saray babangatan. Saray inmuna et inparungtal ed sikato nen Juan a Bautista, say “bantay pinto” ed ilustrasyon nen Jesus. Aanapen nen Jesus so totoon maapabor ya onkiwas ed pankanawnawan magmaliw a kabiangan na atugyop a ‘bini nen Abraham.’ (Genesis 22:18; Galacia 3:16, 29) Binayuboan to ed kapusoan da so apresasyon parad Panarian na katawenan, tan pinaseguroan tora a sikatoy mangiparaan na pasen parad sikara diad abung na mangatatawen ya Ama to. (Mateo 13:44-46; Juan 14:2, 3) Matukotukoy ya inkuanto: “Nanlapu’d saray agew nen Juan a Bautista ya anga ed natan say panarian na tawen mantetepel na panamasoot, et saray totoo a manamasoot sikato’y alaen da’d biskegan.” (Mateo 11:12) Ta pian nadampot itan a kalat, sarayan anumbok ed sikato so apaneknekan a walad limog na kasimpukokan a sinaglawi nen Jesus.

5. (a) Sioparay ‘aripen na Dios tayo’ a tutukoyen na Apocalipsis 7:3-8? (b) Anto so mangipapanengneng a dakel ni so miulop ed espiritual ya Israelitas a mandayew?

⁵ Diad Apocalipsis 7:3-8, saramay sitatalonan onaaligwas parad mangatatawen a kalat so natutukoy met bilang “saray aripen na Dios tayo.” (Nengnengen met so 1 Pedro 2:9, 16.) Kasin saray 144,000 ya asaglawi ditan so Judio lambengat ed laman? Kasin saramay walad piguratibon kasimpokokan ed ilustrasyon nen Jesus so Judios lambengat? Peteg ya andi; sikaray membro na espiritual ya Israel na Dios, ya amin da et mililimog ed si Kristo diad espiritual a bini nen Abraham. (Galacia 3:28, 29; 6:16; Apocalipsis 14:1, 3) Siempre, diad kaunoran et onsabi panaon sano say ageteran a bilang so nakumpleto. Insan antoy nagawa? Unong ya impasakbay na Biblia, say arum​—sakey a baleg ya ulop ed limog da—​so miulop ed sarayan espiritual ya Israelita ed panagdayew ed si Jehova.​—Zacarias 8:23.

Say ‘Arum a Carnero’​—Kasin Hentil Iran Kristiano?

6. Diad anton aligwas so idadanet na Juan 10:16?

⁶ Kayari impanaglawi ed sakey a kasimpukokan ed Juan 10:7-15, inlaktip nen Jesus so sananey a grupo ed saray agawgawa, a kuanto: “Wala ni ray arum a carneroc, ya ag ira taga dia ed saya a panangipokokan; kaokolan ya awiten ko ra met, et dengelen da so voces ko; et magmaliw ira’n saksakey a polok, saksakey ya pastor.” (Juan 10:16) Siopa iratan ya ‘arum a carnero’?

7, 8. (a) Akin a say ideyan arum a karnero et Hentil a Kristianos so nibase’d lingon padesir? (b) Antoran katuaan nipaakar ed gagala na Dios parad dalin so nepeg a walaan na epekto ed pantalos tayo no sioparay arum a karnero?

⁷ Momoriaen na saray komentarista na Kakristianoan ed inkalapagan a sarayan arum a karnero et Hentil a Kristianos tan saramay walad kasimpukokan a tinukoy ed asasakbay so Judios, saramay nisilong ed Ganggan a sipanan, tan saratan a namparan grupo so onlad tawen. Balet si Jesus so niyanak a Judio tan diad kiyanak et nisilong ed Ganggan a sipanan. (Galacia 4:4) Sakey ni, saramay manmoria ed arum a karnero bilang Hentil a Kristianos a natumangan na mangatatawen a bilay so onsasaew a mangunsidera ed importantin kabiangay gagala na Dios. Sanen pinalsa nen Jehova so inmunan totoo tan impasen ira ed tanamanan na Eden, impalinew to a say gagala to et say dalin so namakmakan, a say interon dalin so magmaliw a sakey a paraiso, tan say manangasikason too to so mangayaga ed bilay ed ando lan ando​—diad kondisyon a respetoen tan tuloken da so Manamalsa ra.​—Genesis 1:26-28; 2:15-17; Isaias 45:18.

⁸ Sanen nankasalanan si Adan, say gagala nen Jehova so agnaamper. Simamaaron nanggawa so Dios na probisyon parad kailalakan nen Adan a nawalaan na pankanawnawan pangayagaan so bengatlan ag-inapresya nen Adan. Impasakbay nen Jehova a mamatalindeg na sakey a manangiliktar, sakey a bini, a diad panamegley to et nagamoran na amin a nasyon iray bendisyon. (Genesis 3:15; 22:18) Agkabaliksan na satan a sipan ya amin a too ed dalin so onla’d tawen. Imbangat nen Jesus ed saray patumbok to a manpikasi: “Onsabi komon so panarian mo. Nagawa komon so linawam, onong ed tawen, ontan met ed dalin.” (Mateo 6:9, 10) Ag-abayag sakbay na impanaglawi to ed ilustrasyon a nirekord ed Juan 10:1-16, imbaga nen Jesus ed saray babangatan to a “daiset a papastolan” lambengat so inabobonan nen Ama ton ikdan na mangatatawen a Panarian. (Lucas 12:32, 33) Kanian sano basaen tayo so ilustrasyon nen Jesus a mismo bilang say Maabig a Pastol ya angisuko ed kamarerwa to nisesengeg ed saray karnero to, lingo so agpangunsidera ed kaslakan na saramay itatarok nen Jesus ed silong na maaron panangasikaso to, saramay magmamaliw a mangaraldalin ya uuleyan na mangatatawen a Panarian to.​—Juan 3:16.

9. Sakbay ni 1884, anto so atalosan na saray Estudyante na Biblia ed pakabidbiran ed arum a karnero?

⁹ Sakbay ni na 1884, impabidbir na Watch Tower so arum a karnero bilang totoon naikdan na pankanawnawan manbilay ed sayan dalin diad silong na saray kondisyon a manumpal ed orihinal a gagala na Dios. Saraman ya akaunan Estudyante na Biblia et akamorian arum ed sarayan arum a karnero so totoon nambilay tan inatey sakbay na mangaraldalin a ministeryo nen Jesus. Anggaman ontan, walaray pigaran detalye ya agda atalosan a maong. Alimbawa, isipen dan say pananugyop na arum a karnero so nagawa lambengat kayari pakaawat na amin ya alanaan ed mangatatawen a tumang da. Siansia, agda ni pihon amoria a say arum a karnero et aliwan basta Hentil a Kristianos. Say pankanawnawan magmaliw a sakey ed arum a karnero so lukas ed namparan saray Judio tan Hentil, ed totoo na amin a nasyon tan rasa.​—Ipareng so Gawa 10:34, 35.

10. Pian sikatayo so magmaliw ed saramay tuan momoriaen nen Jesus bilang arum a karnero to, anto so nepeg a tua ed sikatayo?

¹⁰ Pian ontukoy ed deskripsyon ya inter nen Jesus, say arum a karnero so nepeg a totoo ed antokaman a rasa odino minor a rasan abenegan, a bibidbiren da si Jesu-Kristo bilang say Maabig a Pastol. Anto so lalaktipen na saya? Nepeg dan ipatnag so inkaulimek tan inkamabulos a paiwanwan, a saratan a kualidad so kalareker na karnero. (Salmo 37:11) Unong a tua ed melag a pulok, nepeg a “kabat da so voces” na maabig a pastol tan agda abuloyan so inkasikaran isuwawi na arum a nayarin magunaet a mangimpluensya ed sikara. (Juan 10:4; 2 Juan 9, 10) Nepeg dan apresyaen so kaimportantian na impangitalaga nen Jesus ed kamarerwa to nisesengeg ed saray karnero to tan mangagamil na sigpot a pananisia ed satan a probisyon. (Gawa 4:12) Nepeg dan “dengelen” so boses na Maabig a Pastol sano pasesegen toran mangisaklang na sagradon serbisyo ed si Jehova lambengat, pian niyarawi manlapud mundo, tan mangipanengneng na dilin-panagsakripisyo a mangaro ed balang sinansakey. (Mateo 4:10; 6:31-33; Juan 15:12, 13, 19) Kasin ontukoy kayo ed satan a deskripsyon na saramay momoriaen nen Jesus ya arum a karnero to? Kasin labay yo? Agaylan mablin siglaotan so nilukas ed amin na saramay magmamaliw ya arum a karnero nen Jesus!

Panrespeto’d Autoridad na Panarian

11. (a) Diad tanda na kiwawala to, anto so imbaga nen Jesus nipaakar ed saray karnero tan saray kanding? (b) Sioparay agagin tutukoyen nen Jesus?

¹¹ Pigaran bulan kayari impangiter ed ilustrasyon ed tagey, si Jesus so wala lamet ed Jerusalem. Sanen akayurong ed Palandey na saray Olibo a mamabantag ed pasen na templo, tinarokan toray babangatan to na saray detalye na ‘say tanda na kiwawala to tan ed konklusyon na sistema na bengabengatla.’ (Mateo 24:3, NW) Sinaglawi to lamet so pananugyop ed karnero. Nilikud ed satan, inkuanto: “Balet sano onsabi so Anak na too ed gloria to, tan kaolop to ray amin ya angeles saman la onyorong ed trono na gloria to. Tan natipon naani ed arap to so saray amin a nacion, tan panbibiiganen to ra naani sakey tan sakey, a singa say pastol ibiig to so saray kanding. Tan ipasen to ’ray carnero ed nikawanan a lima to, balet saray kanding ed nikawigi.” Diad sayan parabolo, impanengneng nen Jesus a saramay inimano sirin na Ari so naukom ed basiyan no panon so pantrato ra ed “agagi” to. (Mateo 25:31-46) Siopa irayan agagi? Sikaray atagibi-ed-espiritun Kristiano, diad ontan et “ananak na Dios.” Si Jesus so panguloan ya Anak na Dios. Kanian, sikaray agagi nen Kristo. Sikara so “ariripen na Dios tayo” a sasaglawien na Apocalipsis 7:3, sikaray pinili’d limog na katooan pian minabang ed Kristo ed mangatatawen a Panarian to.​—Roma 8:14-17.

12. Akin a say paraan na pidedeneng na totoo ed agagi nen Kristo so walaan na baleg a kaimportantian?

¹² Say paraan na pidedeneng na arum a totoo ed sarayan mananawir na Panarian so walaan na baleg a kaimportantian. Kasin momoriaen yora unong ed panmoria nen Jesu-Kristo tan si Jehova? (Mateo 24:45-47; 2 Tesalonica 2:13) Say awawey na sakey ed sarayan alanaan so mangisisindag na awawey to ed si Jesu-Kristo a mismo tan ed Ama to, say Sankatalbaan a Soberano.​—Mateo 10:40; 25:34-46.

13. Diad anton kalaknab ya atalosan na saray Estudyante na Biblia nen 1884 so parabolo na saray karnero tan saray kanding?

¹³ Diad paway to ya Agosto 1884, dugaruga so impangituro na Watch Tower a saray “carnero” ed sayan parabolo et saramay angiletneg ed arap da na ilalon ayadyarin bilay ed dalin. Atalosan met a say parabolo so nepeg a walaan na aplikasyon sanen manuuley si Kristo manlapud maglorian mangatatawen a trono to. Ingen, ed satan a panaon et aliwan malinew so pakatebek no kapigan so gapo na panangibiig a kimey ya adeskribe ditan odino kaunongay ibayag to.

14. Panon a tinmulong so dikurso ed kumbension nen 1923 ed saray Estudyante na Biblia a mangapresya sano say mapropetikon parabolo nen Jesus et nasumpal?

¹⁴ Anggaman ontan, nen 1923, diad sakey a diskurso ed kumbension, si J. F. Rutherford, say presidenti ed saman na Watch Tower Society, so angipalinew ed panaon parad kasumpalan na parabolo na saray karnero tan saray kanding. Akin? Lapud, diad kabiangan et ipapanengneng na parabolo a saray agagi na Ari​—anggan panon la et pigara ed sikara—​so siansian wadia ni ed dalin. Diad limog na totoo, saray atagibi-ed-espiritu lambengat iran patumbok so peteg a natawag ya agagi to. (Hebreos 2:10-12) Saraya so anggapo ed dalin ed interon Milenyo, a mangiiter na pankanawnawa parad totoo a manggawa na maong ed sikara diad saray paraan a deneskribe nen Jesus.​—Apocalipsis 20:6.

15. (a) Antoran aligwas so tinmulong ed saray Estudyante na Biblia a suston nabidbiran iray karnero diad parabolo nen Jesus? (b) Panon a saray karnero so amaneknek ed apresasyon da parad Panarian?

¹⁵ Diad saman a diskurso nen 1923, agawa so sagpot ed pangipabidbir ed saramay mitukoyan ed deskripsyon na Katawan nipaakar ed saray karnero tan saray kanding, balet nakaukolan a talosan so arum niran pamaakaran sakbay a nipalinew so sigpot a kaimportantian na parabolo. Legan na onsasaginonor iran taon, kalkalnan impaimano nen Jehova irayan importantin detalye ed ariripen to. Nilaktip na saraya so malinlinew a pakatalos nen 1927, a “say matoor tan makabat ya aripen” et say interon ulop na alanaan-ed-espiritun Kristianos diad dalin; naapresya met nen 1932, so pankaukolan ya andi-takot a maapit a milimog ed saramay alanaan ya ariripen nen Jehova, a singa ginawa nen Jonadab ed si Jehu. (Mateo 24:45; 2 Arari 10:15) Diad satan a panaon, diad basiyan na Apocalipsis 22:17, sarayan kinmarnero so ispisipikon apaseseg a mibiang ed pangipasabi ed mensahe Panarian ed arum. Say apresasyon da parad Mesianikon Panarian so mamakiwas ed sikara aliwa lambengat lapud panginatnat na maka-toon panangasi ed saray alanaan na Katawan noagta pian idedeka daray bilay da ed si Jehova diad panamegley nen Kristo tan pian magmaliw a maapit a milimog ed saray alanaan to, a siseseseg a mibiang ed kimey a gagawaen da. Kasin gagawaen yo itan? Parad saramay manggagawa’d satan, ikuan na Ari: “Galidia, sikayo bendito nen Amak, tawiren yo’y panarian ya inparaan ed sikayo a nanlapu ed inletneg na mundo.” Diad arap da et wadtan so engranden ilalon andi-anggaan a bilay diad inkayadyari ed mangaraldalin a sakop na Panarian.​—Mateo 25:34, 36.

Say “Baleg ya Olop”​—Iner so Lalaen Da?

16. (a) Anton lingon-ideya so walad saray asakbay ya Estudyante na Biblia ed pamidbir ed baleg a karaklan, odino baleg ya ulop, ed Apocalipsis 7:9? (b) Kapigan tan ed anton basiyan a say panmoria ra so akorihe?

¹⁶ Diad pigaran panaon et sinisia na ariripen nen Jehova a say baleg a karaklan (odino, baleg ya ulop) ed Apocalipsis 7:9, 10 so duma manlapud arum a karnero diad Juan 10:16 tan saray karnero diad Mateo 25:33. Lapud ibabaga na Biblia a “manalalagey irad arap na trono,” inisip a sikaray onlad tawen, aliwan diad saray trono, a kaiban-mananawir nen Kristo, balet diad segundaryon pasen diad arap na trono. Sikaray minoria bilang agtanton matoor a Kristianos, ya ag-angipanengneng na awawey na tuan dilin-panagsakripisyo. Nen 1935 et satan a panmoria so akorihe.b Impalinew na impansukimat ed Apocalipsis 7:9 diad liwawa na saray teksto a singa say Mateo 25:31, 32 a saray totoo dia ed dalin so nayarin niwalad “arap na trono.” Indanet met a say Dios et andian na duaran estandarte na katooran. Amin a nawalaan na panangabobon to so nepeg a mansiansian matoor ed sikato.​—Mateo 22:37, 38; Lucas 16:10.

17, 18. (a) Antoy sengegan na baleg ya indaak, nanlapulad 1935, ed bilang na saramay maniilalo ed maandon bilay ed dalin? (b) Diad anton makanan kimey so siseseseg a pibibiangan na baleg ya ulop?

¹⁷ Diad loob na dakel a taon et tinongtong na totoo nen Jehova so nipaakar ed sipasipan na Dios nipaakar ed dalin. Lapud inilaloan dan nagawa ed saray taon na 1920, inyabawag da a “Minilyon La Natan a Mabilay so Agbalot Ompatey.” Balet anggapoy minilyon ya angabrasa ed saray probisyon na Dios parad bilay ed saman a panaon. Diad karaklan ya angawat na katuaan, say masanton espiritu so amawala na ilalo ed mangatatawen a bilay. Anggaman ontan, nagkalautla kayari 1935, sakey a makatantandan pananguman so agawa. Aliwan lapud say The Watchtower so angibaliwala ed ilalon maandon bilay ed dalin. Diad loob na saray dekada, intongtong na ariripen nen Jehova so nipaakar ed saya tan inanap iramay ontukoy ed deskripsyon na Biblia. Anggaman ontan, diad nigeter a panaon nen Jehova, indirehi toray pamaakaran ta pian sarayan prospektibon membro na baleg ya ulop so mangipatnag ed inkasikaran dili.

¹⁸ Saray walan rekord na inmatendi so mangipapanengneng a diad loob na dakel a taon et maslak ed saray inmatendi ed Memoryal so akibiang ed saray emblema. Balet diad loob na 25 taon kayari 1935, say inmatendi ed tinaon a Memoryal na impatey nen Kristo so biglan dinmaak ed masulok ya aminlasus a danay ed bilang na saramay mibibiang. Sioparayan arum? Saray prospektibon membro na baleg ya ulop. Malinew, asabi lay panaon nen Jehova pian manugyop ed sikara tan pian iparaan ira parad pakaliktar ed baleg a kairapan ya asingger lan onsabi. Singa nipasakbay, sikaray “nanlapu ed balang nacion tan amin na saray kailalakan, tan binaleybaley, tan salita.” (Apocalipsis 7:9) Sikaray siseseseg a mibibiang ed kimey ya impasakbay nen Jesus sanen inkuanton: “Saya ya evangelio na panarian nipulong naani ed sankamundoan ya onkanan pamintuaan ed saray amin a naciones; et saman la onsabi angaan.”​—Mateo 24:14.

[Saray paimano ed leksab]

Anto so Komento Yo?

◻ Akin a say pasingawey ed Apocalipsis kapitulo 7 so nagkalautlan makapainteres?

◻ Akin a say arum a karnero ed Juan 10:16 so aglimitado ed saray Hentil a Kristiano?

◻ Anto so nepeg a tua ed saramay ontukoy ed deskripsyon na Biblia ed arum a karnero?

◻ Panon a say parabolo na saray karnero tan saray kanding so mangipapabitar na panrespeto parad autoridad na Panarian?

◻ Antoy pakapatnagan ed impakasabi na panaon nen Jehova pian tugyopen so baleg ya ulop ed Apocalipsis 7:9?