Pablien so Bilay a Peteg
KASIN onia labat so bilay? Diad pamapaseseg ed sikatayo “pian nabenbenan da so bilay, a sikato so bilay a peteg,” ipapatnag na Biblia a wala ni nagkalalo. (1 Timoteo 6:17-19) No say peles a bilay tayo et aliwan say bilay a peteg, anto ni sirin?
Say konteksto na satan a kasulatan so mangipapanengneng a satan et “bilay ya andi anga” a nepeg a benbenan a malet na matakot-ed-Dios a too. (1 Timoteo 6:12) Parad dakel, kabaliksan na saya so andi-anggaan a bilay diad dalin. Si Adan, say inmunan too, so awalaan na ilalon manbilay ed ando lan ando diad paraison dalin. (Genesis 1:26, 27) Sikatoy ompatey lambengat no mangan manlapud ‘kiew na pakaamtaay maong tan mauges.’ (Genesis 2:17) Balet lapud si Adan tan say asawa to, si Eva, so situtungangan angan manlapud saman a kiew, sinentensyaan ira na Dios na ipapatey. ‘Diad saman ya agew ya impangan da manlapud satan,’ inatey ira ed imaton na Dios tan ginmapoy kadederal da diad pisikal ya ipapatey. Say bilay da so aliwa lan singa inkaabig na nangayagaan da ed inmuna.
Say Dalan a Mamaarap ed “Bilay a Peteg”
Ta pian nagawan posibli so “bilay a peteg,” nanggawa si Jehova a Dios na uksoyan pian iliktar so katooan. Pian natulongan itayon natalosan iyan oksuyan, isipen tayo pa so nipaakar ed sakey a melag a pagawaan. Amin a makina a wadtan so walay depekto tan pansesengegan na problema parad saray managpakurang lapud saray datin komikimey so angibaliwala ed instruksyon a walad libro tan aneral ed amin a makina. Nagawaan lambengat na saray kaplesan a managpakurang so anggaay nayarian da ed saramay walan makina. Labay na akankayarian na pagawaan ya apigeren iray makina pian natulongan iray komikimey, tan sikatoy mangigaganay pundon nakaukolan parad satan a gagala.
Say inmunan ‘managpakurang na makina,’ si Adan et agto pinabli bilay ya inter ed sikato. Kanian, impasa to ed anak to so ag-ayadyarin bilay, mipadpara ed walaay depekton makina. (Roma 5:12) Singa saray balon managpakurang diad pagawaan, ya agmakaremedyo ed situasyon, agsarag na kailalakan nen Adan a dampoten so bilay a peteg parad inkasikara. (Salmo 49:7) Pian naayos iyan singano anggapoy-ilalon situasyon, imbaki nen Jehova so bogbogtong ya Anak to ed dalin pian nipawil so andi-anggaan a bilay parad katooan. (Lucas 1:35; 1 Pedro 1:18, 19) Diad ipapatey ed sakey a masakripisyon ipapatey nisesengeg ed katooan, say bogbogtong ya Anak na Dios, si Jesu-Kristo, so angitarok na saray pundo—say bilay a misimbangan ed abalang nen Adan. (Mateo 20:28; 1 Pedro 2:22) Tekep na sayan mablin bagat, si Jehova natan so walaay basiyan ed pangitarok na bilay a peteg.
Parad matulok a katooan, say dondon bagat nen Jesus et mankabaliksan na maandon bilay ed paraison dalin. (Salmo 37:29) Sayan ilalo so ninatnat ed amin a makaliktar ed “bakal na baleg ya agew na Dios, a Makapanyarin amin,” a tutukoyen bilang Armagedon. (Apocalipsis 16:14-16) Satan so mangekal ed amin a karelmengan manlapud dalin. (Salmo 37:9-11) Saraman so walad pakanodnonotan na Dios ya inaatey sakbay na satan a panaon so napaoli ed nipawil a Paraison dalin tan nawalaan na ilalon pangayagaan so bilay a peteg a nigana parad amin ya ontulok ed Dios.—Juan 5:28, 29.
Pankaukolan na Panamabli ed Peles a Bilay Tayo
Agkabaliksan na saya a makanepegan so pangibaliwala tayo ed inkasagrado na peles a bilay tayo. Kasin say akankayarian na pagawaan so mangusar na panaon tan kuarta ed pamaapiger ed makina parad sakey a komikimey ya agto mangasikaso ed satan? Imbes, agkasi imatalek na amo so naapiger a makina ed toon ginawa toy anggaay nayarian to ed pamantini ed daan a makina?
Say bilay so mablin regalon nanlapud si Jehova. Bilang say mabunlok a lapuan na satan a regalo, labay ton pablien tayo itan. (Salmo 36:9; Santiago 1:17) Nipaakar ed kapagaan nen Jehova parad totoo to, inkuan nen Jesus: “Angan saray buek na olo yo abilang ira’n amin.” (Lucas 12:7) Ginanggan nen Jehova iray Israelita ya agmamatey, a natural lambengat a lalaktipen to so agpamatey ed sarili. (Exodo 20:13) Saya so ontutulong ed sikatayo a paliisan so panmoria ed panbitkel bilang sakey a pili.
Diad pakaamta ed maaron interes nen Jehova ed pankaabigan tayo, iyaaplika na totoo iray prinsipyo na Biblia ed panangunsidera ed kaplesan-agew ya agagamil. Singa bilang, lapud nakakaukolan ed tuan Kristianos a ‘linisan so inkasikara ed ami tilol na laman tan espiritu, a yadyarien so kasantosan dia ed takot ed Dios,’ papaliisan da so tabako tan makaderal-kanonotan iran makaadik a druga.—2 Corinto 7:1.
Say interes na Dios ed bilay na too so nagkalalon naimano ed simbawa to a pansiansiaen so “mareen a puso” tan arawian so imoral a kondukta. (Uliran 14:30; Galacia 5:19-21) Diad itutumbok ed sarayan atagey ya estandarte, sikatayo so nasasalimbengan manlapud saratan a makaderal-na-bunigas a kagagawa tan makaalis iran seksual a sakit.
Say panangasikaso nen Jehova ed bilay na totoo to so napapatnagan met ed simbawa to ed itunda ed alabas a panangan tan panag-inum. (Deuteronomio 21:18-21; Uliran 23:20, 21) Papasakbayan iray Kristiano a saray maagum tan managbuanges et agda natawir so Panarian na Dios, salanti, agdan balot naeksperiensia so bilay a peteg. (1 Corinto 6:9, 10; 1 Pedro 4:3) Diad pangipapaseseg ed inkasimbang, babangatan itayo nen Jehova a nagunggunaan so inkasikatayo.—Isaias 48:17.
Sano tumboken tayoray estandarte na Dios, ipapanengneng tayo a papablien tayo so peles a bilay tayo. Siempre, nagkalalon makatantanda et say bilay a peteg. Lapud satan et andi-angaan a bilay, nagkalalon kaimportantian so pangipapasen ed satan na saray tuan Kristiano nen say peles a bilay da. Sanen imbagat nen Jesus so bilay to, impauleyan to so inkasikato ed linawa nen Jehova. Say katutulok ed Ama to et makabaliksan a tuloy ed sikato nen say bilay to dia ed dalin. Say kurso nen Jesus so nansumpal ed inkioli to tan ed impakaawat to na imortal a bilay diad tawen. (Roma 6:9) Say patey to so mankabaliksan met na andi-anggaan a bilay parad matulok a katooan a mangagamil na pananisia ed dondon bagat to.—Hebreos 5:8, 9; 12:2.
Importantin Ganggan Nipaakar ed Dala
Natalosan, isisindag na saray patumbok nen Jesus so panag-isip to. Kakaliktanen da so pamaliket ed Dios ed amin a bengatla, a singa ginawa nen Kristo. Sakey ni, isasalaysay na saya no akin ya ikakaindan da so panangiyalis na dala, a tatawagen na arum a doktor bilang manangiliktar-bilay. Nengnengen tayo no panon ya ipapanengneng na sakey a too a papablien to so bilay diad panangipulisay ed panangiyalis na dala.
Singa si Jesu-Kristo, panpipilalekan na tuan Kristianos so pagmaliw a mabilay diad imaton na Dios, tan kakaukolanen na satan so sigpot a katutulok ed Sikato. Igaganggan na Salita na Dios ed saray patumbok nen Kristo: “[Mantultuloy ya] onarawi kayo ed saray bengatla’n nibagat ed saray talintao, tan saray dala, tan ed bengatla a nalner, tan ed pilalawan.” (Gawa 15:28, 29) Akin a sayan ganggan nipaakar ed dala et nilaktip ed saray ganggan a nepeg a tumboken na Kristianos?
Kakaukolanen na Ganggan a niiter ed saray Israelita so iyaarawi manlapud dala. (Levitico 17:13, 14) Saray Kristiano so anggapo’d silong na Mosaikon Ganggan. Balet namoria ran say ganggan ya agpangan na dala so wala la sakbay na Ganggan; satan so asasakbay lan niiter ed si Noe kayari Delap. (Genesis 9:3, 4; Colosas 2:13, 14) Inmaplika iyan ganggan ed amin a kailalakan nen Noe, a nanlapuan na amin a nasyon ed dalin. (Genesis 10:32) Niyarum ni, tutulongan itayo na Mosaikon Ganggan a nanengneng so rason ed panangidanet na Dios ed inkasagrado na dala. Kayari impanebel ed saray Israelita ed pangan na dala na antokaman a klase, inkuan na Dios: “Ta say bilay na laman wala ed dala; tan inter ko ed sikayo ed tapew na altar, ya onkana ed pananakbung na kasalanan yo.” (Levitico 17:11) Inggana na Dios so dala parad panagbagat ed altar. Ipaparungtal na ganggan to ed inkasagrado na dala so autoridad to ed amin a bilay ed dalin. (Ezequiel 18:4; Apocalipsis 4:11) Diad inengneng tayo ed panmoria nen Jehova ed bilay tayo, namomoria tayo ya agtayo kayarian itan noagta satan so inmatalek lambengat ed sikatayo na Dios.
No panon a say managpakurang ed ilustrasyon tayo et responsabli ed makina, imamatalek ed sikatayo so peles a bilay tayo. Anto so gawaen mo no kaukolan na makinam so pangapiger tan isusuheri na sakey a mekanikon naapiger so makina diad pangusar na saray piyesan ispisipikon isesebel ed instruksyon a walad libro? Agta sika so ontupleg ed arum iran mekaniko pian nengnengen no kasin say makina so naapiger a mitunosan ed saray instruksyon na manual? Say bilay na too so nagkalalon tuloy ya importanti tan komplekado nen say makina. Diad apuyanan a Salita to, say manual parad pansiansian panbilay na too, isesebel na Managgawa tayo so panangusar na dala pian sustinien so bilay. (Deuteronomio 32:46, 47; Filipos 2:16) Agta makatunongan so itumbok ed saray kakaukolanen na satan a manual?
Peteg, saray Kristianon pasyenti ya onkekerew na andiay-dalan panagtambal ed kaso ra so agmangibabaliwala ed amin a medikal a panagtambal. Kekerewen da lambengat so panagtambal a mangipanengneng na respeto parad bilay da—namparan natan tan diad arapen. Saray doktor a sipapakpel a manrerespeto ed talindeg na Kristianos so mamaneknek ed saray gungguna na pantambal ed sikaran mitunosan ed kerew da. “Say pidedeneng ko’d Tastasi nen Jehova so mangitotonton ed siak ed balo iran letnegan na estandarte,” kuan na sakey a doktor a datin manguusar a tuloy ed dala. Natan et sasalien ton tambalen ya andiay dala so anggan aliwan-Tastasi.
Pablien so Bilay a Peteg
Antoray balon letnegan na saray totontonen ya aromog na sayan doktor ed Tastasi nen Jehova? Namomoria to natan a say panagtambal ed pasyenti et agto lambengat lalanoren so parti laman ya aapektoen na sakit noagta say interon persona. Agta nepeg ya abuloyan so pasyenti ya onkerew na sankaabigan a panangasikaso ed pisikal, espiritual, tan emosyonal a pankaabigan to?
Parad si Kumiko a mantaon na 15, say panangiyalis na dala ed panambal ed makapatey a leukemia to so sankaugsan a posiblin pilien. Say panalin pamarukey na bilay to diad panamegley na pigaran simba, bulan, odino anggan tao-taon so ag-ontalonggaring ed antokaman a panderyaan to ed kaunoran. Diad impangidedika ed peles a bilay to ed si Jehova a Dios bilang sakey ed Tastasi to, nirespeto to so inkasagrado na bilay tan dala. Anggaman say ama to tan arum ed kakanayon to so sumpan tuloy ed talindeg to, tinalindegan a malet nen Kumiko itan. Aminsan et tinepetan na doktor to: “No say Dios mo et peperdonaen toray kakulangan, agta perdonaen toka anggan awaten mo so panangiyalis na dala?” Inpulisay nen Kumiko so pikompromiso tan pangitalirak ed nibased-Biblian sisisiaen. “Diad malet a pangeegna ed salita na bilay,” impansiansia to so talindeg to. (Filipos 2:16, NW) Unong na inkuan na agmananisian bai to, “Ag-italirak nen Kumiko so pananisia to.” Ag-abayag say awawey na sumusumpan ama tan bai to tan saraman met so doktor so anguman.
Say mabiskeg a pananisia nen Kumiko ed si Jehova a Dios, a makapanpaoli ed sikato manlapud inaatey, so amakiwas ed kapusoan na dakel a totoo. Legan a mabilay ni, kinerew to’d ama to: “Anggan ompatey ak, siak so napaoli diad Paraiso. Balet no naderal kayo ed Armagedon, agta kayo napinengnengan. Kanian ipangasin aralen yo so Biblia.” Basta say ibabaga lambengat na ama to et: “Sano onabig ka la, manaral ak.” Balet sanen inatey si Kumiko ed agnapatundan beblay to, inyan na ama to so sakey a sulat ed longon to a kuanto: “Nengnengen ta ka ed Paraiso, Kumiko.” Kayari ponpon, sikatoy nansalita ed saramay inmatendi ed ponpon tan kuanto: “Insipan ko ed si Kumiko a nengnengen ko ed Paraiso. Anggaman agko ni manisia ed satan ta agmagenap so naaralan ko, determinado ak a maalwar a mangusisa ed satan. Ipangasin tulongan yoak.” Arum met ed pamilya to so ginmapon manaral ed Biblia.
Si Kumiko so awalaan na tuan respeto ed bilay tan malabay a manbilay. Inapresya to so amin a ginawa na saray doktor to pian nisalbay peles a bilay to. Anggaman ontan, diad itutumbok ed saray instruksyon ed manual na Manamalsa, pinaneknekan ton pinabli to so bilay a peteg. Parad minilyon, satan so andi-anggaan a bilay ed paraison dalin. Kasin magmaliw kan sakey ed sikara?