Say Sankabalgan a Toon Nambilay ed Kapiganman

Kapitulo 89

Sakey a Misyon na Panangasi ed Judea

Pigaran simba ed akadkauna, legan na Piesta na Dedikasyon ed Jerusalem, sinali na saray Judio a pateyen si Jesus. Kanian sikatoy nambaroy a mama-amianen, mapatnag a diad sakey a pasen ya ag-arawi manlapud Dayat na Galilea.

Agano ni, sikatoy mamapaarap ed abalaten lamet diad Jerusalem, a manpupulong ed dalan diad saray purok na Perea, sakey a distrito ed bukig na Ilog Jordan. Kayari impangisalaysay na ilustrasyon nipaakar ed mayaman a too tan si Lazaro, intultuloy toy nanbangat ed saray babangatan na saray bengatlan inbangat to ed akadkauna legan a sikatoy walad Galilea.

Alimbawa, inkuanto a magmaong ni’d sakey a too “no nisinger ed beklew to so sakey a bato na gilingan, et nibantak ed dayat” nen say parad sikaton pansengegan na kagapolan na “saraya ya ankekelag” na Dios. Indanet to met so pankaukolan na panamerdona, ya ipapaliwawa: “[Anggaman say sakey ya agi so] mamimpito ed inagewagew a mankasalanan sumpa ed sika, et mamimpito ya ompawil ed sika, a kuan to, Magbabawi ak: sikato so palabasen mo.”

Sanen kinerew na saray babangatan, “Aroman mo so pananisia mi,” inyebat nen Jesus: “No wala so pananisia yo a singa bukel na mostaza, ikuan yo ed saya a sikomoro, Nabagot ka, et nitanem ka ed dayat; et sikato onoren to kayo.” Kanian anggan say melag a pananisia so makagaway baleg iran bengatla.

Insan, angisalaysay si Jesus na sakey a tua-ed-bilay a situasyon a mangiyiilustra na suston awawey na aripen na makapanyarin-amin a Dios. “Siopa so wala ed sikayo, a walaan na aripen a manbabaka ono manpapastol na carnero,” inkuan nen Jesus, “ya ikuan to ed sikato, sano ompawil manlapu ed uma, Dago ka a tampol tan dongo ka ed pananganan; Et ag to ikuan ya onona ed sikato, Mantadia ka na pangdeman ko, tan apiger mo so kawes mo, et manlingkor ka ed siak, anga ed kayarik a mangan tan oninum; et insan mangan ka tan oninum ka? Misalamat kasi ed aripen lapu ed ginawa to so nanganganan? Ontan kayo met, sano agawa yo so amin a nigangan ed sikayo, kuan yo, Ariripen kami, ya andi kakanaan; ginawa mi so nepeg mi a gawaen.” Sirin, agbalot nepeg a liknaen na ariripen na Dios ya igagawaan day pabor so Dios diad panlingkor ed sikato. Imbes, nepeg dan lawas a nonoten so walan pribilihyo ran pandayew ed sikato bilang napanmatalkan a membro na sankaabungan to.

Mapatnag ya ag-abayag kayari na impangiter nen Jesus na sayan ilustrasyon a sinmabi sakey a mensahero. Sikato so imbaki nen Maria tan Marta, agagin bibii nen Lazaro, a manaayam diad Betania ed Judea. “Katawan, nia, saman so inararom agmakayari,” salaysay na mensahero.

Inyebat nen Jesus: “Saya a sakit ag nipaakar ed patey, ingen nipaakar ed kirayewan na Dios, pian say Anak na Dios narayew ed satan.” Kayari impansiansia na duay agew ed kawalaan to, inkuan nen Jesus ed saray babangatan to: “Onla itayo ed Judea lamet.” Anggaman ontan, sikatoy pinanonotan da: “Rabbi, saray Judios wala’ra natan a toloy a manaanap a manupak ed sika; et onlakad man lamet?”

“Ag ta labindua ya oras so wala ed sanagew?” intepet nen Jesus. “No say too manakar ed agew, agnagapol lapu’d nanengneng to so liwawa na saya’n mundo. Balet no say too manakar ed labi, nagapol, lapu’d say liwawa andi ed sikato.”

Mapatnag a labay ya ibaga nen Jesus a say ‘oras na sanagew’ odino say inggana na Dios a panaon parad mangaraldalin a ministeryo nen Jesus, so agni asabi tan sirin, anggapo so siopaman a mamasakit ed sikato. Kaukolan ton usaren a sigpot so antikey a panaon na “sanagew” a nakekeraan parad sikato, lapud kayari na satan et onsabi “labi” sano saray kabusol so kaukolan a mamatey ed sikato.

Inyarum nen Jesus: “Si kaaro tayo’n Lazaro naugip; ingen onla ak, pian sikato so liingen ko ed ugip.”

Mapatnag ya iisipen a manpapainawa si Lazaro ed ugip tan diad ontan et saya so positibon tanda a sikato so naliing, inyebat na babangatan: “Katawan, no naugip, onbangon naani.”

Insan prangkaan ya imbaga ed sikara nen Jesus: “Si Lazaro inatey. Et maliket ak nisengeg ed sikayo ya andi ak nensaman diman, pian manisia kayo; angaman ontan onla itayo ed sikato.”

Momoriaen a si Jesus so napapatey ed Judea, ingen ta mankaliktan a manuporta ed sikato, impaseseg nen Tomas ed kapara to’ran babangatan: “Onla itayo met, pian ompatey itayo a midamay ed sikato.” Kanian diad kapeligroan na bilay da, saray babangatan so angulop ed si Jesus ed sayan misyon na panangasi ed Judea. Lucas 13:22; 17:1-10; Juan 10:22, 31, 40-42; 11:1-16.

▪ Iner so panpupulongan nen Jesus ed agano ni?

▪ Antoran bangat so inulit nen Jesus, tan anton tua-ed-bilay a situasyon so deneskribe to pian iyilustra so anton punto?

▪ Anton balita so naawat nen Jesus, tan anto so labay ton ibaga ed “sanagew” tan say “labi”?

▪ Anto so labay ya ibaga nen Tomas sanen inkuanton, ‘Onla itayo pian ompatey itayo a midamay ed sikato’?