Say Sankabalgan a Toon Nambilay ed Kapiganman

Kapitulo 99

Nanbangat si Jesus ed Jerico

Ag-abayag et si Jesus tan saray karaklan a manbabaroy a kaiba to so akasabi ed Jerico, sakey a syudad a ngalngalin sanagew a baroyen manlapud Jerusalem. Mapatnag a say Jerico so doblen syudad, say daan a Judion syudad a ngalngalin sakey tan kapalduan kilometro manlapud mas balon Romanon syudad. Legan a papaway iray karaklan manlapud daan a syudad tan mamapaarap ed balo, duaran bulag a mipapayabol so akarengel ed gulo. Sakey ed sikara so manngaran na Bartimeo.

Diad impakaamta a si Jesus iman so ondadalan, ginmapon inkelyaw nen Bartimeo tan say kakaiba to: “Kasian mo kami komon sika anak nen David!” Sanen mapeget ya imbaga na saray karaklan ed sikaran manpareen, sikara so lalon kinmelyaw na maksil: “Kasian mo kami komon sika anak nen David!”

Diad impakarengel ed saman a gulo, si Jesus so tinmunda. Kinerew to’d saramay kalimog to a tawagen iraman so onkekelyaw. Saraya so inmasingger ed saray bulag a mipapayabol tan inkuan ed sakey ed sikara: “Mangayaga ka, alagey ka, tatawagen to ka.” Diad inkaliketan a tuloy, say bulag a laki so angibantak ed akinpaway a kawes to, nanapuran inmalagey, tan inmasingger ed si Jesus.

“Anto so labay mo ya gawaen ko ed sika?” tepet nen Jesus.

“Saray mata mi nalukasan komon,” kerew na duaran lalaki.

Apakiwas tekep na panangabagey, diniwit nen Jesus iray mata ra. Unong ed salaysay nen Marcos, inkuan nen Jesus ed sakey ed sikara: “Onla ka la, say pananisiam pinaabig to ka.” Tampol a saray bulag a mipapayabol so akanengneng, tan andi-duaruwan sikaran dua so ginmapon angigloria ed Dios. Sanen anengneng na amin a totoo so agawa, sikara met so angidayew ed Dios. Anggapoy panangipaleen, si Bartimeo tan say kakaiba to so ginmapon tinmumbok ed si Jesus.

Legan na idadalan nen Jesus ed Jerico, dakel a tuloy so totoo. Balang sakey so mankaliktan a makanengneng ed samay sakey ya akapaabig ed bulag a lalaki. Nanleletletan iray totoo ed si Jesus manlapud amin a direksyon, kanian, sikatoy aglambengat napasikmatan na arum. Sakey ed saraya et si Zaqueo, a hepe na saray managsingil na buwis ed loob tan ed kaliber-liber na Jerico. Sikato so pandak a tuloy pian nanengneng so nagagawa.

Kanian si Zaqueo so binmatik ed unaan tan kinmalab ed kiew na igos a nadalanan nen Jesus. Manlapud sayan pasen, nayarian ton nabantag a maong so amin a bengatlan nagagawa diman. Legan na iyaasingger na saray karaklan, si Jesus so tinmangwa ed kiew tan kuanto: “Zaqueo, manganat ka, tan onepas ka; ta natan kaokolan ya ondawes ak ed abung mo.” Si Zaqueo so linmeksab tekep na panliket tan nanapuran sinmempet pian itaryaan so bantog a bisita to.

Anggaman ontan, sanen anengneng na totoo so nagagawa, sikaran amin so ginmapon nanmeremere. Ipapasen dan agmanepeg parad si Jesus pian magmaliw a bisita na ontan a too. Imanoen pa, si Zaqueo so nagmaliw a mayaman diad masaol ya impantipon na kuarta ed trabaho ton panagkolekta na buwis.

Dakel so totoon tinmumbok, tan sanen linmoob si Jesus ed abung nen Zaqueo, sikara so nanreklamo: “Linmoob a dinmawes ed sakey a toon managkasalanan.” Ingen anengneng nen Jesus ed si Zaqueo so potensyal ed panagbabawi. Tan si Jesus so ag-adismaya, ta si Zaqueo so inmalagey tan inyabawag to: “Nia, Katawan, say kapaldua na saray kayarian ko iter ko ed saray duruka; et no wala so daiset ya anaolan ko ed siopaman a too, ipawil ko so mamipat a tobo.”

Pinaneknekan nen Zaqueo a say panagbabawi to so peteg diad pangiiter na kapaldua’d saray kayarian to ed saray mairap tan diad panguusar na sananey a kapaldua pian bayaran iramay sinaol to. Mapatnag a nakalkula to manlapud saray rekord to no piga so utang to ed sarayan totoo. Kanian sinambaan ton ipawil so mamipat, diad panumbok ed ganggan na Dios a mangibabaga: ‘No say sakey a too et mantakew sakey a karnero, nepeg to a bayaran na apatira a karnero so sakey a karnero.’

Aliketan si Jesus ed insipan nen Zaqueo nipaakar ed gawaen to’d saray kayarian to, ta inkuan To: “Natan ya agew sinmabi kilalaban ed saya’n abung, bangta sikato so anak met nen Abraham. Ta say Anak na too linma dia a mananap tan mangilaban ed saray abalang.”

Agano ni, inyilustra nen Jesus so kipapasen na ‘abalang’ diad istorya to nipaakar ed managdarak ya anak. Natan et walaan tayo na tua-ed-bilay ya alimbawa na sakey ya abalang insan aromog. Anggaman saray relihyoson pangulo tan saramay ontutumbok ed sikara so manmemeremere tan manrereklamo nipaakar ed panangimano nen Jesus ed totoon singa si Zaqueo, si Jesus so nantultuloy a mananap tan ipawil iratan ya abalang ya anak nen Abraham. Mateo 20:29-34; Marcos 10:46-52; Lucas 18:35–19:10; Exodo 22:1.

▪ Mapatnag, iner so akaabetan nen Jesus ed saray bulag a mipapayabol, tan anto so ginawa to parad sikara?

▪ Siopa si Zaqueo, tan akin a sikato so kinmalab ed kiew?

▪ Panon a pinaneknekan nen Zaqueo so panagbabawi to?

▪ Anton leksion so naaralan tayo manlapud pidedeneng nen Jesus ed si Zaqueo?