Tepetepet Manlapud Managbasa

Kasin matukoy so pangawat na sakey a bakuna odino arum niran medikal a panag-iniksyon a walaay albumin ya inala manlapud dala na too?

Diad tua lambengat et kada Kristiano so personal a mandesisyon nipaakar ed saya.

Manepeg lambengat a kaliktan na ariripen na Dios a tuloken so ganggan a naromog ed Gawa 15:28, 29, ya arawian so dala. Kanian, saray Kristiano so agmangakan na karnen ag-aparalaan odino saray produkton singa say langonisan walaay dala. Balet say ganggan na Dios so onaaplika met ed lawak na medisina. Awit-awit na Tastasi nen Jehova so sakey a dokumenton mangipaparungtal ya ipupulisay da so ‘panangiyalis na dala, whole blood, red cells, white cells, platelets, odino plasma na dala.’ Anggaman ontan, komusta met so nipaakar ed panpainiksyon na suwero a walaay samet a protinan dala?

Abayag lan amoria na Tastasi a sayan pamaakaran et personal a dedesisyonan na sakey unong ed nipasal-ed-Biblian konsiensia. Saya so nipalinew ed “Tepetepet Manlapud Managbasa” na The Watchtower na Hunyo 1, 1990, a siningbat to so panpainiksyon na suwero a nayarin irekomenda na sakey a doktor no say sakey et niwalwal ed pigaran sakit. Say aktibon kabiangan na saratan ya iniksyon et aliwan say plasman dala a mismo noag saray antibodies manlapud plasma na dala na saramay akatibukel na pandepensa. Arum a Kristiano so makalikna a walaan na malinis a konsiensia a nayari ran awaten so ontan a panpainiksyon so akamorian say antibodies manlapud dala na sakey a biin malukon so ombabasil a mamaarap ed dala na agni niyanak a walad lukon to. Sinalambit na “Tepetepet Manlapud Managbasa” iya, ontan met ed katuaan ya arum ed albumin so onlalabas manlapud malukon ya ina a mamaarap ed agni niyanak.

Dakel so akaromog ed sayan makatantanda, lapud arum a bakuna ya agniparaan manlapud dala so nayarin mankarga na samet a tuloy a plasma albumin ya inusar odino inyarum pian pansiansiaen iray rekado na ispisipikon medisina. Natan et uusaren met so samet ya albumin ed saray panpainiksyon na sientipikon hormone ya EPO (erythropoietin). Arum a Tastasi so manpapainiksyon na EPO lapud papepelesen na saya so pamapawala na ambalangan selula na dala tan diad ontan et papainawaen to so doktor ed pakalikas a nayarin kaukolan so panangiyalis na dala.

Arum ya ispisipikon medisina so nayarin usaren ed arapen a mangilalanor ed samet ya albumin, lapud saray kompanya na tambal so manggagawa na saray balon produkto odino manguuman ed saray pormula na saray wala la. No ontan et ompan labay na sakey a Kristianon ikunsidera no say albumin et kabiangan na sakey a bakuna odino arum ya iyiiniksyon ya irerekomenda na doktor. No sikaray manduaruwa odino walaay rason pian manisian say albumin so sakey a kabiangan, nayarin sikaray mantepet ed doktor da.

Singa asaglawi la, dakel a Tasi so agsinmuppiat ed pangawat na iniksyon a mankarga na samet ya albumin. Siansia ni, siopaman a mankaliktan ya aralen so pamaakaran a malalaknab sakbay a manggawa na personal a desisyon so nepeg a manrepaso ed impormasyon a niparungtal ed “Tepetepet Manlapud Managbasa” na The Watchtower na Hunyo 1, 1990.