Say Nagawaan na Sakey a Salitan Walaay Kaabigan
“Say sakey a puson nimedmer ed kapagaan, agaylan nayarin naligliwa iya na sakey a salitan walaay kaabigan!”—Uliran 12:5, Knox.
SARAY Kristiano so agsigpot a nasasalimbengan manlapud kairapan. No maminsan et sikaray makakasagmak na kapagaan lapud sikaray manbibilay ed sarayan “maatap a panaon a mairap a pidenengan.”—2 Timoteo 3:1, NW.
Sano manasagmak na ontan a kairapan, agaylan bendisyon so pakarengel na saray salitan walaay kaabigan manlapud sakey a matoor a kaaro! “Say tuan kaaro so mangaro ed saray amin a panaon, tan say sakey ya agi a nianak sano walay gonigon,” kuan na Biblia. (Uliran 17:17, NW) Say matoor a toon si Job so kabkabat ed impagmaliw ton onian nengneng na kaaro. Anggan si Elifaz so angibaga na onia nipaakar ed sikato: “Sano walay siopaman ya agapol, maletey tan naksawan, saray salitam so mamaseseg ed sikaton ontalindeg.”—Job 4:4, Today’s English Version.
Anggaman ontan, sanen si Job a mismo so mankaukolan na panamaseseg, si Elifaz tan saray kaiba to so agnambalikas na saray salitan walaay kaabigan. Tinetel da si Job lapud kairapan to, ya ipapatnag da ni ingen ompan sikato so walaan na iyaamot a kasalanan. (Job 4:8) Onia so komento na The Interpreter’s Bible: “Say kaukolan nen Job et sakey a maabagey a puson makatoo. Say naaala to et mantutumbokan ya absoluton ‘tua’ tan absoluton makaroyroyon relihyoso tan diparan ed moral.” Ontanlan tuloy so kapagaan nen Job sanen nadngel so panagsalita nen Elifaz tan saray kaiba to a sengegay inkelyaw to: “Kaunongan kabayag so pamaermen yo ed kamarerwak, tan pamuyak yo ed siak ed saray salita?”—Job 19:2.
Agtayon balot magmaliw komon a sengegan na ikelyaw ed kairapan na kaparan aripen na Dios lapud agmaalwar, makapasakit iran salita. (Ipareng so Deuteronomio 24:15.) Onia so pasakbay na Biblia: “Say ibabagam so nayarin mangiliktar odino maneral ed bilay; kanian nepeg mon awaten iray pansumpalan na saray salitam.”—Uliran 18:21, Today’s English Version.
Diad panamegley na pakayari na panagsalita, tumboken tayo so alimbawa nen apostol Pablo. Legan a walad Macedonia, sikato so ‘amaseseg ed saramay wadman na dakel a salita.’—Gawa 20:2, NW.