Apocalipsis​—Asingger la so Engranden Kapantokan To!

Katuloyan na Kapitulo 41

Say Sanlibon-Taon ya Agew na Panangukom

5. Kayarin say daan a dalin tan daan a tawen so linmabas, sioparay natilak a naukom?

⁵ Sioparay atilak a naukom kayarin say daan a dalin tan daan a tawen so linmabas? Aliwan say nakdaan ya alanaan na 144,000, ta saraya so naukom tan atatakan la. Saramay mabilay ni ed dalin kayari na Armagedon so agmanbayag et ompatey tan makawat na mangatatawen a tumang na kioli. (1 Pedro 4:17; Apocalipsis 7:2-4) Anggaman ontan, say minilmilyon a baleg ya ulop a pinmaway la natan ed baleg a kairapan so sankanengneng ya akaalagey ed “arap na trono.” Saraya la so nibilang a matunong para’d kililiktar lapud pananisia ra ed nipaagos a dala nen Jesus, balet say pangukom ed sikara so mantultuloy ed loob na sanlibon taon legan a mantultuloy ya ipapaarap ira nen Jesus ed “saray subol na danum na bilay.” Insan, diad kipawil ed atooan ya inkayadyari tan kayarin asubok, sikaray niyabawag a matunong ed sankanagnapan a pantalos. (Apocalipsis 7:9, 10, 14, 17) Saray anak a makaliktar ed baleg a kairapan tan siopaman ya ugugaw a niyanak na baleg ya ulop legan na Milenyo so mipadparan nakaukolan a naukom legan na sanlibon taon.​—Ipareng so Genesis 1:28; 9:7; 1 Corinto 7:14.

6. Anton baleg a grupo so anengneng nen Juan, tan anto so ipanengneng na saray salitan “say baleg tan say melag”? (b) Panon a saray agnabilang a minilmilyon ed pakanodnonotan na Dios et agpanduaruwaan a nitarok?

⁶ Anggaman ontan, naimano nen Juan so baleg a grupon dakdakel nen say makaliktar a baleg ya ulop. Manbilang iya na nilibon nilaksa! “Tan anengneng ko iray inaatey, say baleg tan say melag, a manaalagey ed arap na trono tan saray lukot so alukasan.” (Apocalipsis 20:12a) “Say baleg tan say melag” so manayakop ed prominente tan agtanton prominente iran katooan a nambilay tan inatey ed sayan dalin legan na apalabas ya 6,000 a taon. Diad Ebanghelyon insulat nen Juan kayari na Apocalipsis, inkuan nen Jesus ed Ama: “Et sikato so initdan to [Jesus] na pakauley a mangukom, lapud sikato so Anak na too. Agkayo mankelaw ed saya ta onsabi so oras ya amin na saray wala ed pakanodnonotan a lubok narengel da so boses to et ompaway ira.” (Juan 5:27-29) Agaylan makapakelkelaw a proyekto​—saya so kasonian na amin ya ipapatey tan pangiponpon ya agawa ed interon awaran na too! Agpanduaruwaan a saramay agnabilang a minilmilyon ed pakanodnonotan na Dios so kalkalnan napaoli say baleg ya ulop​—a daiset a tuloy ed bilang no ikumpara ed sikara—​so makayarin mangasikaso ed saray probleman onlesa lapud ikiling na saray apaoli ya ontumbok ed datin estiloy-bilay da, a tekep na silalaman a kaleteyan tan awawey.

Siopara so Napaoli tan Naukom?

7, 8. (a) Anton lukot so nalukasan, tan anto so nagawa kayari to? (b) Diad siopa ya anggapo so kioli?

⁷ Inyarum nen Juan: “Tan sananey a lukot so alukasan; a sikato so lukot na bilay. Tan saray inaatey so naukom ed saraman so bengatlan nisulat ed lukot unong ed gawa ra. Tan say dayat so angiter ed saray inaatey, tan say patey tan Hades so angiter ed saray inaatey to, tan sikara so naukom a sinansakey unong ed saray gawa ra.” (Apocalipsis 20:12b, 13) Peteg a makapakelkelaw a nenengnengen itan! ‘Say dayat, patey tan Hades’ so sinansakey a walay betang, balet imanoen a sarayan termino so agmanarawiay kabaliksan.a Si Jonas, sanen walad dalem na eges na sira tan ed pegley na dayat, so nansalita nipaakar ed inkasikato a bilang walad Sheol, odino Hades. (Jonas 2:2) No say sakey a too et niiyan ed pangemgem na Adamikon-patey, no ontan sikato met so walad Hades. Sarayan mapropetikon salita so mangiiter na mabiskeg a paseguro ya anggapo so siopaman ya agnaimano.

⁸ Siempre, walara so, agkabat a bilang a napaoli. Isakop na saraya iray agmanbabawin eskribas tan Pariseo ya angipulisay ed si Jesus tan saray apostol, say relihyoson “too na kaugsan,” tan alanaan iran Kristiano, “a walan tinmaynan.” (2 Tesalonica 2:3; Hebreos 6:4-6; Mateo 23:29-33) Sinalita met nen Jesus so kinmanding a totoo ed anggaan na mundo a mamaarap ed “andi-anggaan ya apuy a niparaan para’d Diablo tan saray angheles to,” salanti, “andi-anggaan a kapegpeg.” (Mateo 25:41, 46) Anggapoy kioli na saraya!

9. Panon a si apostol Pablo et angipanengneng ya arum so nagkalautlan napaboran ed kioli, tan siopa so isakop na saraya?

⁹ Diad biek a dapag, arum so nikadkaduman napaboran ed kioli. Impanengneng nen apostol Pablo iya sanen inkuanto: “A wala so ilalok ed Dios, a sikato met so aalagden a dili na saraya, a wala naani kioli ed bilay na saray matunong tan agmatunong.” (Gawa 24:15) No nipaakar ed mangaraldalin a kioli, “say matunong” so mangisakop ed matoor a lalaki tan bibii ed inmunan panaon​—si Abraham, Rahab, tan dakel ni—​a niyabawag a matunong bilang kakaaro na Dios. (Santiago 2:21, 23, 25) Nisakop met ed sayan grupo iray matunong ya arum a karnero ya inatey a matoor ed si Jehova ed modernon panaon. Maseguron amin na manamenben na katooran so napaolin masasakbay ed Milenyon Uley nen Jesus. (Job 14:13-15; 27:5; Daniel 12:13; Hebreos 11:35, 39, 40) Anggapoy panduaruwa a dakel ed sarayan apaolin matunong so napabtangan na saray nikadkaduman pribilihyo ed pangasikaso ed baleg a kimey na panangipawil ed Paraiso.​—Salmo 45:16; ipareng so Isaias 32:1, 16-18; 61:5; 65:21-23.

10. Diad saramay napaoli, siopara so “agmatunong”?

¹⁰ Siopara, sirin, so “agmatunong” ya asaglawi ed Gawa 24:15? Saraya so mangisakop ed baleg a kabiangan na katooan ya inatey ed interon awaran, nagkalautla ed saramay nambilay ed ‘panaon na andi-pikakabat.’ (Gawa 17:30) Saraya, lapud pasen na inkiyanakan da odino panaon na impanbilay da et andian na pankanawnawa pian aralen so katutulok ed linawa nen Jehova. Nilikud ed saya, nayarin walara so akadngel ed mensahe na kilalaban balet agsigpot kinmiwas ed saman a panaon odino inatey sakbay a sikaray inmaligwas ed dedikasyon tan bautismo. Diad kioli, saratan so manggawa na kaaruman a panangiyarunsa ed panagnonot da tan kurso na panag-bilay da no labay dan nagunggunaan manlapud sayan pankanawnawan makagamor na andi-anggaan a bilay.

Say Lukot na Bilay

11. (a) Anto so “lukot na bilay,” tan siopan kangaranan so nikurit ed sayan lukot? (b) Akin a say lukot na bilay so nalukasan ed Sanlibon Taon ya Uley?

¹¹ Sasalitaen nen Juan so “lukot na bilay.” Saya so rekord na saramay akalinya a mangawat na andi-anggaan a bilay a manlapud si Jehova. Saray kangaranan na alanaan ya agagi nen Jesus, ed baleg ya ulop, tan ed matoor iran totoo ed inmunan panaon, a singa si Moises, so nikurit ed sayan lukot. (Exodo 32:32, 33; Daniel 12:1; Apocalipsis 3:5) Anggad natan, anggapo so nisulat ed lukot na bilay a kangaranan na saray “agmatunong” a napaoli. Kanian say lukot na bilay so nalukasan legan na Sanlibon Taon ya Uley pian naabuloyan so pangisulat na kangaranan na saray arum ya onkualipika. Saramay say kangaranan da et agnisulat ed lukot, odino libro, na bilay so “nibantak ed dayat na apuy.”—Apocalipsis 20:15; ipareng so Hebreos 3:19.

12. Anto so manetermina no balanglan say sakey a too et nisulat so ngaran to ed alukasan a lukot na bilay, tan panon a say aturon Ukom nen Jehova so angiletneg na alimbawa?

¹² No ontan, anto sirin so manetermina no kasin say sakey et nisulat so ngaran to ed alukasan a lukot na bilay ed saman a panaon? Say manunan basiyan so mipadpara ed saray agew nen Adan tan si Eva: say katutulok ed si Jehova. Unong ya insulat nen apostol Juan ed inadaron kaparan Kristianos: “Say mundo so mangangga tan saray penel to, balet say manggawa na linawa na Dios so mansiansia lawas.” (1 Juan 2:4-7, 17) Diad pamaakaran na katutulok, inletneg na aturon Ukom nen Jehova so alimbawa: “Anggan sikato [Jesus] so Anak, inaral to so katutulok lapud saray bengatlan intepel to; tan sanen agawa ya ayadyari nagmaliw a responsable ed andi-anggaan a kilalaban ed saray amin ya ontutulok ed sikato.”​—Hebreos 5:8, 9.

Panangilukas na Arum Iran Lukot

13. Panon a saray apaoli so mangidemostra na katutulok da, tan anto iran totontonen so nepeg a tomboken?

¹³ Panon so nepeg a pangidemostra na sarayan apaoli so katutulok da? Imbangat nen Jesus iray duaran ganggan, a kuanto: “Say ununa et, ‘Dengel mo, O Israel, si Jehova a Dios tayo so saksakey a Jehova, tan nepeg mon aroen si Jehova a Dios mo ed interon pusom tan ed interon kamarerwam tan ed interon kanonotan mo tan ed interon biskeg mo.’ Say komadua et ‘Aroen mo so kaparam a too a singa sikan dili.’” (Marcos 12:29-31) Wadtan met laray datin niletneg a maabig iran totontonen a nepeg dan tomboken, a singa ed iyarawi ed panagtakew, panagtila, panagpatey, tan imoralidad.​—1 Timoteo 1:8-11; Apocalipsis 21:8.

14. Antoran arum a lukot so nalukasan, tan anto so karga na saraya?

¹⁴ Anggaman ontan, kapkapanbitla nen Juan so arum iran lukot a nalukasan legan na Milenyon Uley. (Apocalipsis 20:12) Anto iraya? No maminsan, si Jehova so angiter na espesipikon bilin para’d nikadkaduman kipapasen. Alimbawa, ed panaon nen Moises intarok to so detalyadon serye na saray ganggan a mankabaliksay bilay para’d saray Israelita no sikaray ontulok. (Deuteronomio 4:40; 32:45-47) Legan na inmunan siglo, balo iran bilin so niiter pian ontulong ed saray matoor ya ontumbok ed saray totontonen nen Jehova ed silong na Kristianon sistema na bengabengatla. (Mateo 28:19, 20; Juan 13:34; 15:9, 10) Irereport natan nen Juan a saray inatey et “naukom ed saraman so bengatlan nisulat ed lukot unong ed saray gawa ra.” Mapatnag, sirin, a say pangilukas ed sarayan lukot so mangiparungtal ed detalyadon kakaukolanen nen Jehova para’d katooan legan na sanlibon taon. Diad pangiyaplika ed saray totontonen tan ganggan na saraman a lukot ed saray bilay da et naparukey na matulok a katooan iray agew da, a diad kaunoran et makadampot na andi-anggaan a bilay.

15. Anton klase na edukasyonal a kampanya so nakaukolan legan na kioli, tan panon a say kioli so nayarin nagawa?

¹⁵ Agaylan sakey a malaknab a kampanya na teokratikon edukasyon so nakakaukolan! Nen 1987 saray Tasi nen Jehova ed sankamundoan so mangikokondukta, ed promedyo, a 3,005,048 iran panangiyaral na Biblia ed nanduruman paspasen. Balet kaleganan na kioli, agnabilang iran minilmilyon a panagaral, a nibased Biblia tan balo iran lukot, so agpanduaruwaan a nikondukta! Amin a totoo na Dios so nakakaukolan a magmaliw a managbangat tan nepeg dan panggunaetan. Saray apaoli, legan a sikara so onaaligwas, so andi-duaruwan mibiang ed sayan malaknab a programa na panagbangat. Mipadpara, say kioli so mantultuloy ed paraan a saramay mabilay so makapangayaga ed pangabrasa tan panbangat ed dati iran membro na pamilya tan kabkabat, a, sikara met, so mangabrasa tan mamilin ed saray arum. (Ipareng so 1 Corinto 15:19-28, 58.) Say masulok a taloran milyon a tastasi nen Jehova ya aktibo ed panangilaknab na katuaan natan so mangileletneg na maabig a pundasyon ed saray pribilihyon iilaloan da legan na kioli.​—Isaias 50:4; 54:13.

16. (a) Sioparan kangaranan so nisulat ed lukot, odino libro, na bilay? (b) Siopa iramay say kioli ra et apaneknekan “ed bilay”?

¹⁶ No nipaakar ed mangaraldalin a kioli, inkuan nen Jesus a ‘saramay manggawa na maabig iran bengatla so napaoli ed bilay, saramay nanggawa na mauges a bengabengatla so kioli ed kaukom.’ Dia say “bilay” tan “kaukom” so mansonian ed balang sakey, mangipapanengneng a saramay apaolin “mangagamil na kabanday” kayarin imbangat ed apuyanan a Kasulatan tan luko-lukot so naukom ya agmakana ed bilay. Saray kangaranan da so agnisulat ed lukot, odino libro, na bilay. (Juan 5:29) Saya met so tua ed siopaman a datin manumbok ed matoor a bakat balet, diad arum a rason, et sinmuawi legan na Sanlibon Taon ya Uley. Say ngaran so nabura. (Exodo 32:32, 33) Diad biek a dapag, saramay situtulok ya ontumbok ed saray bengatlan nisulat ed saray lukot et napansiansia ra iray ngaran da ed nisulat a rekord, say lukot na bilay, tan mantultuloy a manbilay. Para’d sikara, say kioli so napaneknekan a sakey “ed bilay.”

Say Anggaan na Patey tan Hades

17. (a) Anton makapakelaw a kiwas so deneskribe nen Juan? (b) Kapigan a naandian so Hades? (c) Kapigan a say Adamikon ipapatey so “nibasileng ed dayat na apuy”?

¹⁷ Insan, insalaysay nen Juan so bengatlan tuan marakep! “Tan say patey tan say Hades nibasileng ed dayat na apuy. Kabaliksan na saya so komaduan ipapatey, say dayat na apuy. Niarum ni, siopaman ya agnaromog a nisulat ed libro na bilay so nibasileng ed dayat ya apuy.” (Apocalipsis 20:14, 15) Diad kasampotan na milenyon Agew na Panangukom, “say patey tan Hades” so kompleton naekal. Akin a nakaukolan ni na saya so sanlibon taon? Say Hades, say komon a lubok na amin a totoo, so naekalan na karga sano say kaunoran a too ed pakanodnonotan na Dios so napaoli. Amin na saramay napaoli ed dalin, tan ontan met ed baleg ya ulop ya akaliktar ed Armagedon, so kaukolan ya ontulok ed no antoy nisulat ed saray lukot ya anggad say meriton bagat nen Jesus so niyaplika a nagnap ed pangekal na sakit, inkatatken, tan arum ya atawir a kaleteyan. Insan say Adamikon ipapatey, a pati Hades, so “nibasileng ed dayat na apuy.” Saraya so napaandi ed ando lan ando!

18. (a) Panon a deneskribe nen apostol Pablo so intalona na uley nen Jesus bilang Ari? (b) Anto so gawaen nen Jesus ed apayadyarin atooan a pamilya? (c) Antoran arum a bengabengatla so nagawa ed sampot na sanlibon taon?

¹⁸ Diad ontan nagawa la ed sankanagnapan so programan sasalaysayen nen apostol Pablo ed sulat to ed saray taga Corinto: “Ta sikato [Jesus] so nepeg a manuley a bilang ari ya anggad pangipasen to ed saray kabusol ed silong na saray sali to. Say kaunoran a kabusol, [Adamikon] patey so naekal naani.” Anto so ontumbok a nagawa? “Sano amin a ganagana et nisakup ed inkasikato na Sakey ya amasakup na amin a ganagana ed leksab na pakayari to, sirin say Anak met a dili pauleyan ed samay Sakey ya anguley ed amin a ganagana.” Diad arum a salita, si Jesus so “mangipalima ed panarian ed Dios tan Ama to.” (1 Corinto 15:24-28) On, si Jesus, ya aneral ed Adamikon patey diad panamegley na meriton dondon bagat to, so mangipalima na apayadyarin atooan a pamilya ed Ama to, si Jehova. Mapatpatnag itan ed sayan punto, ed kasampotan na sanlibon taon, a si Satanas so nibulos tan onggapo so kaunoran a subok pian nadetermina iray kangaranan a mansiansian permanentin nirekord ed lukot na bilay. “Panpilitan yo so onloob” pian say ngaran yo et nisakop met!​—Lucas 13:24; Apocalipsis 20:5.

[Paimano ed leksab]