Apocalipsis—Asingger la so Engranden Kapantokan To!
Katuloyan na Kapitulo 40
Saray Arum ya Inaatey
14. (a) Anton balikas so isisingit nen Juan nipaakar ed “arum ya inatey”? (b) Panon a saray balikas a ginawa nen apostol Pablo so mangisisindag na liwawa ed terminon “binmilay”?
14 Siopa, sirin, so ukomen na sarayan arin uko-ukom no, unong ed isisingit nen apostol Juan dia, “(saray arum ya inaatey so agpinmawil ed bilay ya anggad anampot so sanlibon taon)”? (Apocalipsis 20:5a) Lamet, say balikas a “pinmawil ed bilay” so nepeg a talosan unong ed konteksto to. Sayan balikas so nayarin walaan na nanduruman kabaliksan base ed nanduruma iran sirkumstansya. Alimbawa, inkuan nen Pablo nipaakar ed kaiba ton alanaan a Kristiano: “Tan sikayo so binilay na Dios anggaman sikayo so inatey ni ed saray lingo tan kasalanan yo.” (Efeso 2:1) On, saray alanaan ed espiritun Kristianos so “binilay,” anggan ed inmuna nin siglo, diad impangiyabawag ed sikaran matunong ed basiyan na pananisia ra ed bagat nen Jesus.—Roma 3:23, 24.
15. (a) Say sakbay-Kristianon tastasi nen Jehova so nangayaga ed anton talindeg ed Dios? (b) Panon a say arum a karnero so “binmilay,” tan kapigan a sikara so makatawir ed dalin ed sankagnapan a pantalos?
15 Mipadpara, say sakbay-Kristianon tastasi nen Jehova so niyabawag a matunong bilang kaaro na Dios; tan si Abraham, Isaac, tan si Jacob, so asalita bilang “mabilay” anggamano sikara so inatey ed pisikal. (Mateo 22:31, 32; Santiago 2:21, 23) Anggaman ontan, sikara tan amin na arum ya apaoli, tan ontan met ed baleg ya ulop na matoor na arum a karnero ya akaliktar ed Armagedon tan siopaman ya ananak a niyanak na saraya ed balon mundo, so nepeg a manbilay anggad nadampot da so atooan ya inkayadyari. Saya so nasumpal nen Kristo tan saray kaiba ton arari tan saserdote to legan na sanlibon-taon ya Agew a Panangukom, ed basiyan na dondon bagat nen Jesus. Diad sampot na satan ya Agew, “say arum ya inaatey” so ‘ompamawil [la] ed bilay’ diad pantalos a sikaray magmaliw ya ayadyarin totoo. Unong a nanengneng tayo, nepeg da nin ilabas so kaunoran a subok, balet arapen da itan a subok a bilang ayadyarin totoo. Sano nilabas da itan a subok, sikara so ideklara na Dios a makanan manbilay ed ando lan ando, matunong ed sankanagnapan a pantalos. Naeksperiensia ra so kumpleton kasumpalan na sipan: “Saray matunong a mismo so mangayarian na dalin, tan sikara so manayam ed tapew to diad ando lan ando.” (Salmo 37:29) Agaylan makapasagyat ya arapen so manaalagar para’d matulok a katooan!
Say Ununan Kioli
16. Panon a deneskribe nen Juan so kiolin naeksperiensia na saramay manuley a bilang ararin kaiba nen Kristo, tan akin?
16 Diad ipawil tayo ed saramay “binmilay tan nanuley bilang arari a kaiba nen Kristo,” isusulat nen Juan: “Saya so ununan kioli.” (Apocalipsis 20:5b) Panon ya ununa itan? Satan so “ununan kioli” unong ed panaon, ta saramay makaeksperiensia ed saya et saray “ununan bungabunga ed Dios tan ed Kordero.” (Apocalipsis 14:4) Satan met so ununa ed kaimportantian, tan saraman so mibiang ed satan so magmaliw a kaiban manuley nen Jesus ed mangatatawen a Panarian tan mangukom ed arum ed katooan. Kaunoran, satan so manunaan ed kalidad. Nilikud ed si Jesu-Kristo a mismo, saramay napaoli ed ununan kioli so saray palsa lambengat ya asalita ed Biblia a bilang makawat na imortalidad.—1 Corinto 15:53; 1 Timoteo 6:16.
17. (a) Panon a deneskribe nen Juan so abendisyonan ya ilalo para’d alanaan a Kristianos? (b) Anto so “komaduan ipapatey,” tan akin ya anggapo so “pakauley to” ed 144,000 a mananalo?
17 Agaylan abenditon ilalo para’d sarayan alanaan! Unong ya iyaabawag nen Juan: “Maliket tan masanto so siopaman a kabiangan na ununan kioli; ya anggapo so pakauley na komaduan ipapatey.” (Apocalipsis 20:6a) Unong ya insipan nen Jesus ed saray Kristiano ed Smyrna, sarayan mananalo a minabang ed “ununan kioli” so agnasigensigen a nipibali ed “komaduan ipapatey,” a mankabaliksan na pakaandi, kadederal ya andian na ilalo para’d kioli. (Apocalipsis 2:11; 20:14) Say komaduan ipapatey so “andian na pakauley” ed saratan a mananalo ta akapankawes lara na agkadederal tan ag-ipapatey.—1 Corinto 15:13.
18. Anto so ikuan natan nen Juan ed saray balon manuley na mundo, tan anto so sumpalen da?
18 Agaylan duman tuloy manlapud arari na dalin legan na panaon na uley nen Satanas! Diad sankarukeyan et makapanuley ira na 50 odino 60 a taon, tan dakel ed sikara ed loob na pigaran taon lambengat. Dakel ed sikara so nampairap ed katooan. Nilikud ed saya, panon a permanentin nagunggunaan so nasyones diad silong na saray lawas-nasasalatan a manuley dingan na lawas-nasasalatan iran totontonen? Miduma, ikuan nen Juan ed saray balon manuley ed dalin: “Balet sikara so magmaliw a saserdote na Dios tan ed si Kristo, tan manuley a bilang arari kaiba to ed loob na sanlibon taon.” (Apocalipsis 20:6b) Kaiba ira nen Jesus a mamorma na saksakey a gobierno ed loob na sanlibon taon. Say serbisyo ra bilang saserdote, ed pangiyaplika na merito na ayadyarin bagat nen Jesus bilang too, so mangitonton ed matulok a katooan ed espiritual, moral, tan pisikal ya inkayadyari. Say serbisyo ra bilang ari so mansumpal ed pangipaalagey na sankagloboan ya atooan a sosyedad a mangiretrato na inkatunong tan inkasanto nen Jehova. Bilang uko-ukom ed sanlibon taon, sikara, a pati si Jesus, so maaron mangiwanwan ed onkikiwas a katooan ed kalat ya andi-anggaan a bilay.—Juan 3:16.
Say Kaunoran a Subok
19. Anto so magmaliw a kipapasen na dalin tan too ed sampot na Sanlibon Taon ya Uley, tan anto natan so gawaen nen Jesus?
19 Diad sampot na Sanlibon Taon ya Uley, say interon dalin so mipadpara ed orihinal ya Eden. Magmaliw a tuan paraiso. Agla kaukolan na ayadyarin katooan so sakey a saserdoten mamegley para’d sikara ed arap na Dios, ta amin a bakat na Adamikon kasalanan tan say unor a kabusol, say patey, so napaandi. Nasumpal la na Panarian nen Kristo so gagala na Dios ed pamalsa na sakey a mundo a walaan na saksakey a gobierno. Diad sayan panaon, “iter” la nen Jesus “so panarian ed Dios tan Ama to.”—1 Corinto 15:22-26; Roma 15:12.
20. Anto so ibabaga nen Juan ed sikatayon nagawa sano panaon la na kaunoran a subok?
20 Panaon la para’d kaunoran a subok. Bilang kasuniyan ed inmunan sanasawa ed Eden, sayan ayadyarin mundo na katooan so makatalindeg kasin mabiskeg ed katooran to? Ibabaga nen Juan ed sikatayo no antoy nagawa: “Bektan nasumpal so sanlibon taon, si Satanas so nibulos ed kaaralman to, tan sikatoy ompaway pian mamalikdo ed saraman a nasyones ed apatiran suyok na dalin, ed Gog tan Magog, pian tiponen ira’d bakal. Say bilang na saraya so singa buer ed dayat. Tan onabante ra ed interon dalin tan niliktob so kampo na sasantos tan say inadaron syudad.”—Apocalipsis 20:7-9a.
21. Diad kaunoran a gunaet to, panon a tinmuloy si Satanas, tan akin ya agtayo nepeg a nasurpresa ya arum so ontumbok ed si Satanas kayari na Sanlibon Taon ya Uley?
21 Anto so ibunga na kaunoran a gunaet nen Satanas? Papalikdoen to so “saraman a nasyones ed apatiran suyok na dalin, ed Gog tan Magog,” pian ipaarap ira ed “bakal.” Siopa met kasi so mannonot a midapag ed si Satanas kayari na sanlibon taon na magayaga, makapaseseg a teokratikon uley? Bueno, aglilingwanan ya apalikdo nen Satanas so ayadyarin Adan tan Eva legan a pangagayagaan da so bilay ed Paraison Eden. Tan nisuwawi toray mangatatawen met ya angheles ya akatasi ed mauges iran nansumpalan na orihinal a rebelyon. (2 Pedro 2:4; Judas 6) Kanian agtayo nikelawan sano arum ya ayadyarin totoo et nalagyat ya ontumbok ed si Satanas anggan kayari na makapaliket a sanlibon taon ya uley na Panarian na Dios.
22. (a) Anto so ipanengneng na balikas a “saramay nasyon ed apatiran suyok na dalin”? (b) Akin a saray rebelde et atawag a “Gog tan Magog”?
22 Tutukoyen na Biblia irayan rebelde a “nasyones ed apatiran suyok na dalin.” Agkabaliksan na saya a say katooan so naapag-apag lamet ed nambibiigan a nasyonal iran muyongan. Mangipapanengneng lambengat iya ya ibiig da so inkasikara a manlapud saray matunong a manmamatalek ed si Jehova tan mangipatnag na parehon mauges ya espiritun ipapanengneng na nasyones natan. Sikaray “manisip na mauges a kanonotan,” a singa ginawa nen Gog ed Magog diad propesiya nen Ezequiel, ed kalat a deralen so teokratikon gobierno ed dalin. (Ezequiel 38:3, 10-12) Kanian, atawag ira na “Gog tan Magog.”
23. Anto so ipanengneng na say katuaan a say bilang na saray rebelde so “singa saray buer ed dayat”?
23 Say bilang na saramay miulop ed si Satanas ed isusumpa to so “singa buer ed dayat.” Pigara itan? Anggapo so nipasakbay a bilang na satan. (Ikumpara so Josue 11:4; Uko-ukom 7:12.) Say pinal a dagup a bilang na saray rebelde so mandependi ed no panon so ikiwas na balang sinansakey ed saray mapalikdon kurang nen Satanas. Anggaman ontan, maseguron wala so baleg a bilang, ta liknaen dan walaan ira na mabiskeg a tuloy a manalona ed “kampo na sasantos tan inadaron syudad.”
24. (a) Anto so “inadaron syudad,” tan panon a satan et naliktob? (b) Anto so ilalaman na “sasantos”?
24 Maseguron sayan “inadaron syudad” et say syudad a sinalita na niglorian Jesus-Kristo ed saray patumbok to ed Apocalipsis 3:12 tan tinawag a “syudad na Dios ko, say balon Jerusalem a linmeksab a nanlapud tawen a manlapud Dios ko.” Lapud mangatatawen iyan organisasyon, panon a saraman a mangaraldalin a puersa et ‘naliktob’ da itan? Diad dalan a liktoben da so “kampo na sasantos.” Say sakey a kampo et walad paway na sakey a syudad; sirin, “say kampo na sasantos” so mangilaman na saramay walad dalin ed paway na mangatatawen a pasen na Balon Jerusalem a sitotoor a manusuporta ed ginogobiernon oksuyan nen Jehova. Sanen inatake na saray rebelde ed silong nen Satanas iramay matoor, ipasen nen Katawan a Jesus itan a direktan panangataki ed sikato. (Mateo 25:40, 45) Panggunaetan na “saraman a nasyones” a deralen ya amin so agawaan na mangatatawen a Balon Jerusalem ed impangipawil na paraiso ed sayan dalin. Kanian diad pangataki ed “kampo na sasantos” et mangaataki met ira ed “inadaron syudad.”
Say Dayat na Apuy tan Asupre
25. Panon so impaneskribe nen Juan ed pansumpalan na pangatake na saray rebelde ed “kampo na sasantos,” tan anto so kabaliksan na saya para’d si Satanas?
25 Ontalona kasi iyan unor a gunaet nen Satanas? Maseguron andi—no panon ya ag-ontalona si Gog na Magog ed pangataki ed espiritual ya Israel ed agew tayo! (Ezequiel 38:18-23) Malinlinew a deneskribe nen Juan so pansumpalan: “Balet linmeksab so apuy nanlapud tawen tan sikaray naakmon. Tan say Diablo a mamapalikdo ed sikara so nibasileng ed dayat na apuy tan asupre, a no iner a parehon wadman la so atap ya ayep tan palson propeta.” (Apocalipsis 20:9b-10a) Imbes a nibasileng ed kaaralman lambengat, si Satanas say orihinal ya Uleg, so namekmek la ed kaandi, pulbosen, a kumpleton deralen a singa ed apuy.
26. Akin a say “dayat na apuy tan asupre” o agnayarin sakey a literal a pasen na panamairapan?
26 Naimano tayo la a say “dayat na apuy tan asupre” so agnayarin sakey a literal a pasen na panamairapan. (Apocalipsis 19:20) No si Satanas so makasagmak na andi-geter a makapaot-ot a panamairap diman, sirin kaukolan a pansiansiaen nen Jehova a mabilay. Ingen, say bilay et sakey a regalo, aliwan sakey a dusa. Say ipapatey so dusa para’d kasalanan, tan unong ed Biblia, agmakalikna iray inatey a palsa. (Roma 6:23; Eclesiastes 9:5, 10) Niarum ni, nabasa tayo diad saginonor et say patey a mismo so naandi, a pati say Hades, so nibantak ed sayan parehon dayat na apuy tan asupre. Maseguron, say patey tan Hades so agmakalikna na ot-ot!—Apocalipsis 20:14.
27. Panon a say agawa ed Sodoma tan Gomora so makatulong ed sikatayon natalosan so terminon say dayat na apuy tan asupre?
27 Paletan na sayan amin so pantalos ed dayat tan asupre a simboliko. Niarum ni, say impanaglawi ed apuy tan asupre so mangipanonot ed agawa ed inmunan Sodoma tan Gomora, a dineral na Dios lapud baleg a karelmengan da. Sanen sinmabi so panaon da, “impauran nen Jehova so asupre tan apuy a nanlapud si Jehova, a nanlapud katawenan, ed Sodoma tan ed Gomora.” (Genesis 19:24) Say agawa ed sarayan duaran syudad so atawag a “panangukom a dusa ed andi-anggaan ya apuy.” (Judas 7) Ingen, saraman a duaran syudad so agnanirap ed andi-anggaan a panamairap. Imbes, sikaray apaandi, abura ed amin a panaon, a kaibay mauge-uges a katooan. Anggapo la iratan a syudad natan, tan anggapoy makapangibaga ed dugan nipasenan na saratan.
28. Anto so dayat na apuy tan asupre, tan panon ya agmipareho ed patey, Hades, tan say kaaralman?
28 Mitunosan ed saya, isasalaysay a mismo na Biblia so kabaliksan na dayat na apuy tan asupre: “Kabaliksan na saya so komaduan ipapatey, say dayat na apuy.” (Apocalipsis 20:14) Malinlinew a mipadpara itan ed Gehena a sinalita nen Jesus, a pasen no iner a saray mauges so deralen, aliwan papairapen ed ando lan ando. (Mateo 10:28) Satan so kumpleton kadederal ya andian na ilalo na kioli. Sirin, ambegyan walaray tombok para’d patey, Hades, tan kaaralman, anggapo so abitlan tombok a makapangilukas ed dayat na apuy tan asupre. (Apocalipsis 1:18; 20:1) Agton balot ibulos iray adakep to.—Ipareng so Marcos 9:43-47.
Napairap ed Agew tan Labi ed Ando lan Ando
29, 30. Anto so ikuan nen Juan nipaakar ed Diablo tan ontan met ed atap ya ayep tan say palson propeta, tan panon a nepeg a natalosan iya?
29 Bilang panukoy ed Diablo tan pati ed atap ya ayep tan palson propeta, ibabaga natan nen Juan ed sikatayo: “Tan sikaray napairap ed agew tan labi ed ando lan ando.” (Apocalipsis 20:10b) Anto so kabaliksan na saya? Singa abitla la, agmakatunongan ya ikuan a saratan a simbolo, a singa say atap ya ayep tan palson propeta, tan ontan met ed say patey tan Hades, so manirap ed literal a dalan. Sirin, anggapoy sengegan a manisia tayon napapairap si Satanas ed ando lan ando. Sikato so sigpot a naderal.
30 Say Griegon salitan inusar ed “panamairap,” ba·sa·niʹzo et manunan mankabaliksan a “surien (iray metal) ed panamegley na sakey a managsurin bato.” “Tepetan ed panamegley na panamairap” so komaduan kabaliksan. (The New Thayer’s Greek-English Lexicon of the New Testament) Diad konteksto na saya, say usar na sayan Griegon salita so mangipapanengneng ed no antoy nagawa ed si Satanas et manserbi, ed andi-geter, a bilang panagsurin bato ed salisalan na inkakanepegan tan inkakatunongan na uley nen Jehova. Sayan salisalan na soberanon pananguley et maminpinsan ya aresolbe ed amin a panaon. Aglan balot kaukolan a surien so inkasoberano nen Jehova ed andukey a panat na panaon pian paneknekan iya ya aliwa.—Ipareng so Salmo 92:1, 15.
31. Panon a say duaran Griegon salita a mitukoyan ed sakey a mankabaliksan na “panamairap” so ontulong ed sikatayon mantalos ed dusa a nasagmak nen Satanas a Diablo?
31 Nilikud ed saya, say mitukoyan a salitan ba·sa·ni·stesʹ, “managpairap,” so nausar ed Biblia a mankabaliksan na “manangipangaw.” (Mateo 18:34, Kingdom Interlinear) Mitunosan ed saya, nipisok si Satanas ed dayat na apuy ed ando lan ando; sikato so agbalot nibulos. Kaunoran, ed Griegon Septuagint, a kabkabat nen Juan, say misiglaotan a salitan baʹsa·nos so nausar a manutukoy ed kababaingan a nipaarap ed patey. (Ezequiel 32:24, 30) Ontulong iya ed sikatayon mantalos a say dusan nasagmak nen Satanas so makapabaing, andi-anggaan ya ipapatey ed dayat na apuy tan asupre. Ompatey met iray kimey to a kaiba to.—1 Juan 3:8.
32. Anton dusa so nasagmak na saray demonyo, tan panon tayon amta?
32 Lamet, saray demonyo so ag-asalita ed sayan bersikulo. Kasin sikaray nibulos a pati si Satanas ed sampot na sanlibon taon tan insan makasagmak na dusa ed andi-anggaan a patey a pati sikato? Say paneknek so onebat na on. Diad parabolo na karnero tan kanding, inkuan nen Jesus a saray kanding so nipaarap “ed andi-angaan ya apuy a nitarya para’d Diablo tan saray anghel to.” (Mateo 25:41) Say balikas ya “andi-anggaan ya apuy” so nepeg ya ontukoy ed dayat na apuy tan asupre no iner a nibasileng si Satanas. Saray anghel na Diablo so nibantak a manlapud tawen a pati sikato. Mapatpatnag, a sikaray akiulop ed sikato ed kaaralman diad gapo na Sanlibon Taon ya Uley. Matukoy, sirin a sikaray napideral a kaiba to ed dayat na apuy tan asupre.—Mateo 8:29.
33. Anton pinal a detalye ed Genesis 3:15 so nasumpal ed satan, tan ed anton bengatla a tatangguyoren na espiritu nen Jehova so imano nen Juan natan?
33 Diad sayan dalan, say kaunoran a detalye na propesiyan nikurit ed Genesis 3:15 so nasumpal. Sano nibasileng si Satanas ed dayat na apuy, sikato so ompatey a singano sakey ya uleg a minekmek so ulo to na sakey a balatyang a mukor. Sikato tan saray demonyos to so naandi ed ando lan ando. Anggapo so kaaruman ya impamitla ed sikara ed libron Apocalipsis. Natan, kayariy mapropetikon pakaandi na saraya, say espiritu nen Jehova so mangipaarap ed imano ed makatangguyor na interes para’d saramay mangayaga ed mangaraldalin ya ilalo: Anto so pansumpalan na katooan ed mangatatawen ya uley na “Ari na saray arari” tan “saramay tinawag tan apili tan matoor ed sikato”? (Apocalipsis 17:14) Pian ebatan, ipawil itayo nen Juan lamet ed gapo na Sanlibon Taon ya Uley.