“Mas Ni Nen say Sakey a Mabiskeg a Baley”

“DIAD saray peles a bilang, ngalngalin 40% na ananak ed E.U. so makatasi ed pangangga na panamaley na atateng da antis ya onsabi ira ed edad a 18.” (Science, Hunyo 7, 1991) Anton makapakebbiew ya estatistika! Akin a saya so agawa?

Si Judge Edward M. Ginsburg na korte na para’d pamilya tan probate court, diad sakey ya interbio na The Boston Globe, so angiter ed panmoria to. Inkuanto: “Sikatayo so masiblet a sosyedad. Say labay tayo et ‘siak.’ Say tepet tayo, ‘Anto so nagunggunaan ko’d satan?’ Labay tayon napasalamatan a tampol.”

Say ontan ya inuugaw a kasibletan so mangipapaarap ed balingaan tan kolkolan ed panamaley. Kuan nen Judge Ginsburg a sano saray sanasawa so diad kaunoran et makasabi ed korte na diborsyo, say sanasawa so mankakaliktan na panangiyalangon. Labay dan wala so mangibaga ed sikara a sikara so susto tan aliwa so asawa ra. Labay dan wala so mangibaga ed sikara a: “Analo ka ed labanan.”

Saray salita to so mangipapanonot ed sikatayo ed apuyanan a proverbio: “Say agi ya apaunong sikato so mamairap a patoloken nen say mabiskeg a ciudad; et saray ontan a pankokolkol sikara so singa saray balewet na castillo.” (Uliran 18:19) On, sano ombetag so balingaan ed panamaley, say mankokolkolan a dapag so nayarin magmaliw ya agmakatunongan tan mapekder. Mabetbet, sipepekder dan mangikaindan a nasaol, a singa sakey a “mas ni nen sakey a mabiskeg a baley” a nakukubkob.

Kaukolan ta ya onia so nagawa ed bengabengatla? Andi, wala so sakey a bengatlan nagawaan. Saray panangasawa so mabiskeg tan mansiansia sano say parehon dapag so diad gapo lambengat et ontatalineng ed saray salita nen apostol Pablo: “Manaanusan kayo ed sakey tan sakey, mapangasi, manpiperdonaan so sakey tan sakey, a singa met say Dios pinerdona to kayo ed Cristo.” (Efeso 4:32) Mainomay ta a bayuboan iratan a kalidad? Mabetbet ya andi. Balet kaonongan kainomay so diborsyo? Kaunongan so sakit a papawalaen na sakey a diborsyo ed liknaan tan pinansyal a pamaakaran na nagban panamaley? Tan komusta iray anak a mabetbet a manasagmak ed pait na pansian na atateng da anggad sikaray wala la’d suston edad?

Magmaong a tuloy para’d sanasawa a kimeyan so pamasiansia ed panamaley tan agmanpaawet ed sinansakey, a singa “mas ni nen sakey a baley.” Say simbawa nen Pablo ed saray Kristiano so onaaplikan nagkalalo la ed saray sanasawa: “Ikawes yo so aro, a sikato so singer yo ed inkayadyari.”​—Colosas 3:14.

[Picture Credit Line ed pahina 32]

Say Kompleton Ilustrasyon na Encyclopedia/J. G. Heck