Tepetepet Manlapud Managbasa

Pinasakbayan na Dios si Cain a ‘say kasalanan so onkepkep ed pinto et say panpirawatan to dia ed sika,’ a singa mangipapanengneng na sakey ya atap ya ayep tan say biktima to. (Genesis 4:7) Akin ya usaren itan a balikas no sakbay na Delap, et say kakanen na ayayep et tantanaman labat?

Diad saray libro ya insulat nen Moises, naromog tayoray bersikulo a mangipapanengneng ed saray katuaan odino maawaran iran bengatla a singano agmitukoyan ed panaon a niwala iraya ed awaran.

Alimbawa, say salaysay ed Genesis 2:10-14 so mangiiter na heograpiko iran detalye nipaakar ed tanamanan na Eden. Nansulat si Moises nipaakar ed sakey ya ilog “a sikato so managos ya onarap ed bukig na Asiria.” Balet say ngaran ya Asirya so inala ed si Assur, say anak nen Sem ya niyanak kayari na Delap. (Genesis 10:8-11, 22; Ezequiel 27:23; Miqueas 5:6) Malinew, diad susto, impuyan a salaysay, inusar lambengat nen Moises so terminon “Asiria” pian tukoyen so sakey a rehyon a pamilyar ed saray managbasa to.

Kunsideraen so sananey ya alimbawa manlapud saray ununan kapitulo na Genesis. Kayari a si Adan tan Eva so nankasalanan tan pinataynan ed tanamanan, inamper ira nen Jehova ya ompawil diman. Panon? Kuan na Genesis 3:24: “Kanian pinapaway to so too; tan impasen to ed bukig na tanamanan na Eden samay Querubin, tan say dalang na sakey a kampilan a manpawilpawil, a mangasikaso na dalan na kiew na bilay.” Imanoen, “say dalang na sakey a kampilan.” Kasin say Dios so angimbento na saray kampilan?

Agtayo kaukolan ya ikuan a say maaron Manamalsa tayo so sankaunaan a nanggawa na kabkabat tayoran kampilan. Anengneng di Adan tan si Eva a diad arap na saray anghel so ontetelek a sakey a bengatlan walaay tarem a walaay dalang. Anton talaga iman? Nen panaon ya insulat nen Moises so libron Genesis, kabkabat iray kampilan tan uusaren ed pibabakal. (Genesis 31:26; 34:26; 48:22; Exodo 5:21; 17:13) Kanian saray salita nen Moises a “say dalang na sakey a kampilan” so ontutulong ed saray managbasa to ya iretrato iray bengatlan wala ed lolooban na Eden. Say impormasyon ya amta la ed agew nen Moises so tinmulong ed pakatalos ed saratan a pamaakaran. Tan say lenguahen inusar nen Moises so seguradon susto, lapud ta impailaktip itan nen Jehova ed Biblia.​—2 Timoteo 3:16.

Natan komusta met so Genesis 4:7? Ditan et pinasakbayan na Dios si Cain: “No mangawa ka na maong, agka ta nitandoro? et no agka mangawa na maong, say kasalanan onkepkep ed pinto. Et say panpirawatan to dia ed sika et angaman ontan sika’y​—manguley ed sikato.” Singa naimano, say balikas ya inusar so singano mangireretrato ed sakey a narasan ya atap ya ayep a manaalagar pian biglan manekmal tan maningkat ed biktima.

Anggaman kuan, ipapanengneng na say Biblia a si Adan ta si Eva so walaay pikakareenan ed amin ya ayep. Pigara ed ayayep so nayarin mididipongdipong ed totoo, nagugunggunaan ni ingen ed inkamaasingger da ed totoo. Arum so atap ya ayayep, ayayep a natural a manbilay ya arawi ed totoo. (Genesis 1:25, 30; 2:19) Ingen, ag-isusuheri na Biblia a walaray ayep a mangakan na arum niran ayep odino totoo. Diad gapo, saray tanaman so nitalagan kanen na parehon ayayep tan totoo. (Genesis 1:29, 30; 7:14-16) Satan so ag-anguman noagta kayari na Delap, a singa ipapanengneng na Genesis 9:2-5.

No ontan, komusta met so pasakbay na Dios ed si Cain, a singa nabasa tayo ed Genesis 4:7? Maseguron say retrato na sakey a maatap ya ayep ya akakebkeb tan akaparaan a manakmal na biktima so mainomay a natalosan ed agew nen Moises, tan anggan sikatayo et natalosan tayo itan. Kanian, lamet, nayarin inusar nen Moises iray salitan ontukoy ed saray managbasa to a pamilyar ed mundo kayari na Delap. Tan anggan agni akanengneng si Cain na onman ya ayep, natalosan to so pasakbay a say makasalanan a pilalek to so niretrato ed sakey a narasan, mangasiban ayep.

Saray manunan aspekto so walaan na baleg ya epekto ed sikatayo: Say kaabigan na Dios ed panamasakbay ed si Cain, say kablian na sipapaabeban panangawat na simbawa, no panon a magmainomay a mamauges so imon, tan no panon a seryoso so pangawat tayo na arum niran madibinon pasakbay ya inyan na Dios ed saray Kasulatan para’d sikatayo.​—Exodo 18:20; Eclesiastes 12:12; Ezekiel 3:17-21; 1 Corinto 10:11; Hebreo 12:11; Santiago 1:14, 15, Judas 7, 11.