Apocalipsis—Asingger la so Engranden Kapantokan To!
Katuloyan na Kapitulo 18
“Say Tawen” So Naandi
21. Diad pasingawey to, anto so anengneng nen Juan nipaakar ed “say tawen” tan “ed kada palandey tan kada pulo”?
21 Ituloy na pasingawey nen Juan: “Tan say tawen so naandi a singa sakey a lukot a nalukot, tan kada palandey tan kada pulo so nakal ed saray pasen da.” (Apocalipsis 6:14) Malinew, saraya so aliwan literal a katawenan odino literal a kapalandeyan tan pulpulo. Balet anto so isimbolo ra?
22. Diad Edom et anton nengneng na “katawenan” so “alukot, a singa sakey a lukot na libro”?
22 Nipaakar ed “say tawen,” natulongan itayo ed pantalos diad panamegley na miulibay a propesiyan mangibabaga ed sanok nen Jehova a sumpad amin a nasyones: “Tan amin na saray inayuraan na katawenan so nabulok. Tan saray katawenan so nalukot, a singa sakey a lukot na libro.” (Isaias 34:4) Say Edom ed partikular so manirap. Panon? Sikato so gineba na saray taga-Babilonia kayarin tuloy na impanderal ed Jerusalem nen 607 K.K.P. Diad saman a panaon, anggaporay matalonan agawgawan nikurit a singa agawa ed literal a katawenan. Balet walaray makadesyang ya agawgawa ed “katawenan na Edom.”a Saray atooan a ginogobiernon pakayari to so niyurak a manlapud nipaatagey, singa-tawen a posisyon. (Isaias 34:5) Sikara so “alukot” tan nibasileng, a singa panangibaga, a singa say daan a lukot ya andian la na usar ed siopaman.
23. Anto so “tawen” a ‘naandi a singa sakey a lukot,’ tan panon a saray salita nen Pedro so mamekder ed sayan pakatalos?
23 Sirin, “say tawen” a ‘naandi a singa sakey a lukot’ so manutukoy ed sumpa-ed-Dios iran gobierno a manuuley ed sayan dalin. Sikara so ekalen ed kasampotan na lawas-mananalon Managkabayo ed amputin kabayo. (Apocalipsis 19:11-16, 19-21) Saya so pinekderan na samay imbaga nen apostol Pedro sanen sikato so ninmengneng ed arapen diad saray nagawan mangituturo diad kilukas na komanem a tatak: “Saray katawenan tan say dalin a wala natan so nigana ed apuy tan nitarya ed agew na panangukom tan ed kaderal na agmaridios a totoo.” (2 Pedro 3:7) Balet anto so nipaakar ed balikas a, “kada palandey tan kada pulo so nakal ed saray pasen da”?
24. (a) Kapigan, ed propesiya na Biblia, a saray kapalandeyan tan pulpulo so nibagan nayugyog odino nageba? (b) Panon a ‘saray kapalandeyan so ayugyog’ sanen nagba so Nineve?
24 Diad propesiya na Biblia, saray kapalandeyan tan pulpulo so nibagan nayugyog odino nakusbo diad saray panaon na baleg a kaguloan ed pulitika. Alimbawa, sanen ipapasakbay to so saray panangukom nen Jehova a sumpad Nineve, insulat nen propeta Nahum: “Saray kapalandeyan a mismo so ayugyog lapud sikato, tan saray mismon kapukdolan so natunaw. Tan say dalin so ontagey a nisesengeg ed lupa to.” (Nahum 1:5) Anggapo so rekord na anggan anton inkabuyak na saray literal a kapalandeyan sanen say Nineve so aktual a nagba nen 632 K.K.P. Ingen say sakey a pakayari na mundon diad akauna et pinmatnag a singa palandey ed biskeg to so tampol a nagba.—Ipareng so Jeremias 4:24.
25. Diad onsasabin anggaan na sayan sistema na bengabengatla, panon a “kada palandey tan kada pulo” so naekal a manlapud saray pasen da?
25 Sirin, “kada palandey tan kada pulo” a singa atukoy diad impangilukas ed komanem a tatak so makatunongan a saray mapulitikan gobierno tan dependente iran organisasyon na sayan mundo a pinmatnag a maligen ed dakel a katooan. Sikara so nayugyog a naandi ed pasen, diad katalagnaw tan kakigtot na saraman so akaunan nanmatalek ed sikara. A singa itultuloy ya ibinsabinsa na propesiya, anggapoy suppiat a say agew na sanok nen Jehova tan say Anak to—say ultimon kayegyeg a mangekal ed amin ya organisasyon nen Satanas—so sinmabi tekep na panangibales!
“Pelag Kayo ed Sikami tan Iyamot Yo Kami”
26. Panoy ikiwas na saray totoon onsusumpa ed inkasoberano na Dios diad kakebbiewan da, tan anton balikas na katalagnaw so ibalikas da?
26 Itultuloy na saray salita nen Juan: “Tan saray arari na dalin tan saray atatagey-betang a totoo tan saray manunaan ya inayuraan tan saray mayaman tan saray mabibiskeg tan kada aripen tan kada bulos a too so mangiyamot na inkasikara ed saray ungib tan ed saray bato na kapalandeyan. Tan itultuloy dan ikuan ed saray kapalandeyan tan ed saray bato: ‘Pelag kayo ed sikami tan iyamot yo kami a manlapud lupa na samay Sakey ya akayurong ed trono tan manlapud sanok na Kordero, lapud say baleg ya agew na sanok da so sinmabi, tan siopa so makayarin ontalindeg?’”—Apocalipsis 6:15-17.
27. Anton kelyaw so imbalikas na saray malamang ya Israelitas ed Samaria, tan panon so inkasumpal na saratan a salita?
27 Sanen si Oseas so mangibebesngaw na panangukom nen Jehova ed Samaria, say kabisera na baybay a panarian na Israel, inkuanto: “Saray atatagey a pasen na Beth-aven, say kasalanan na Israel, so peteg a naderal. Saray sabit tan tala so onsapat ed saray altar da. Tan saray totoo so diad tua et mangikuan ed saray palandey, ‘Tabonan yo kami!’ tan diad saray kapukdolan, ‘Pelag kayo ed sikami!’” (Oseas 10:8) Panon so inkasumpal na sarayan salita? Bueno, sanen say Samaria so naplag ed saray maruksan Asirio nen 740 K.K.P., anggapo so pasen a nabatikan na saray Israelitas. Saray salita nen Oseas so angibalikas na liknaan na inkapakaskasi, kakebbiewan tan inkakaindanan ya alikna na saray kinonkestan totoo. Nisay saray literal a kapukdolan nisay saray singa-palandey a paalagey na Samaria so makasalimbeng ed sikara, anggaman sikara so singa pinmatnag a permanente ed apalabas.
28. (a) Anton pasakbay so inter nen Jesus ed saray bibii ed Jerusalem? (b) Panon so inkasumpal na pasakbay nen Jesus?
28 Miulibay, sanen si Jesus so ipapaarap na saray sundalon Romano ed ipapatey to, sikato so nansalita ed saray bibii ed Jerusalem tan kuanto: “Saray agew so onsabi ya ikuan na saray totoo, ‘Maliket iray bibiin lepes, tan saray panag-anakan ya agmangiyanak tan saray pagew ya agmanpasuso!’ Insan igapo ran ikuan ed saray kapalandeyan, ‘Pelag kayo ed sikami!’ tan diad saray kapukdolan, ‘Tabonan yo kami!’” (Lucas 23:29, 30) Say impaneral na saray Romano ed Jerusalem nen 70 K.P. so dokumentadon tuloy, tan mapatnag a saray salita nen Jesus so walaan na miulibay a kabaliksan ed saray salita nen Oseas. Anggapo so amotan a pasen ed saman na saray Judios a nansiansia ed Judea. Inerman a sinali ran amotan ed Jerusalem, odino anggan sano sikara so binmatik ed tuktok na palandey na Masada, sikara so ag-akayarin makaliktar ed maramsak a balikas na panangukom nen Jehova.
29. (a) Sano onsabi so agew na sanok nen Jehova, anto so pansumpalan na saraman so manusuporta ed sayan sistema na bengabengatla? (b) Anton propesiya nen Jesus so nasumpal sano ibalikas nen Jehova so sanok To?
29 Natan, say panangilukas ed komanem a tatak so angipanengneng a nagawa so bengatlan miulibay kaleganan na onsasabin agew na sanok nen Jehova. Diad unor a kayegyeg na sayan mangaraldalin a sistema na bengabengatla, saraman so nansuporta ed satan so pakaskasin mananap na amotan a pasen, balet ag-ira makaromog. Say palson relihyon, Babilonia a Baleg, so miserablen anaew ed sikara. Nisay saray ungib ed literal a kapalandeyan nisay saray simbolikon singa-palandey a pulitikal tan komersyal ya organisasyon so makapangiter na pinansyal a kaligenan odino anggan anton arum a nengneng na tulong. Anggapo so makasalimbeng ed sikara a manlapud sanok nen Jehova. Say kakigtot da so insalaysay a maong nen Jesus: “Insan say Anak na too so ompatnag ed tawen, tan insan amin na saray tribu ed dalin so mandugal ed pantagleey, tan nanengneng da so Anak na too ya onsasabi ed saray lurem ed tawen a tekep na pakayari tan baleg a gloria.”—Mateo 24:30.
30. (a) Anto so tutukoyen na tepet a: “Siopa so makayarin ontalindeg?” (b) Kasin wala so anggan siopan makayarin ontalindeg diad panaon na panangukom?
30 On, saraman so agmalabay a mamidbir ed autoridad na mananalon Managkabayo ed amputin kabayo so napaskar a mangako ed kasalanan da. Saray totoon mabulbulos a kabiangan na Uleg so nidunget ed kadederal sano say mundo nen Satanas so napaso. (Genesis 3:15; 1 Juan 2:17) Say kipapasen na mundo ed satan a panaon so ontanla a dakel so, diad epekto, mangitepet: “Siopa so makayarin ontalindeg?” Mapatnag a bidbiren dan anggapo so makatalindeg a naabobonan ed arap nen Jehova ed satan ya agew na panangukom to. Balet ta sikara so lingo, unong ya ituloy ya ipanengneng na libro na Apocalipsis.
[Paimano ed leksab]
a Diad miulibay ya impangusar ed salitan “katawenan,” say propesiya ed “balon katawenan” diad Isaias 65:17, 18 so awalaan na ununan kasumpalan ed balon ginogobiernon sistema, ya anaglawi ed si Gobernador Zerubabel tan si Atagey a Saserdoten Jeshua, a niletneg ed Insipan a Dalin kayari impawil na saray Judios a nanlapud inkadestiero ed Babilonia.—2 Awaran 36:23; Esdras 5:1, 2; Isaias 44:28.