Atumangan na “Balanget na Bilay”
IMBAGA ed si apostol Juan a sulatan toy anghel na kongregasyon na Smyrna: “Mansiansia ka anga ed patey, tan siak iter ko ed sika so balanget na bilay.” (Apocalipsis 2:8, 10) Kanian, namparan maermen tan magayaga so impangiyanunsio nipaakar ed impakasumpal na mangaraldalin a kurso nen Frederick William Franz, presidente na Watch Tower Bible and Tract Society of Pennsylvania tan Watchtower Bible and Tract Society of New York, Inc., ontan met ed dakel niran teokratikon ulop ed kabuasan na Disyembre 22, 1992.
Saman so maermen ya anunsio unong ta ibabalikas to so impangangga na mangaraldalin ya aktibidades na inadaron tuloy tan matalonggaring a matoor ya aripen nen Jehova. Ingen, makapagayaga met ya anunsio lapud parad si inadaron Agin Franz et onaplika la natan iray salita ed Apocalipsis 14:13: “Mapalar so saray inatey ya ompatey ira ed Katawan a manlapu ed natan anga ed arapen: on, kuan na Espiritu, tan manpainawa ra ed saray sagpot da: ta saray gawa-ra ontombok ed sikara.” Si Agin Franz so mauyamo tan mapaabeba, makuli tan mabungan tuloy a ministron inusar a maong nen Jehova bilang membro na “matoor tan makabat ya aripen” pian mangasisti ed pangitarya na espiritual a tagano parad “sankaabongan” tan saray kakaiba ra.—Mateo 24:45-47.
Niyanak si Agin Franz nen Setyembre 12, 1893, diad Covington, Kentucky. Nadngelan to so nipaakar ed katuaan diad panamegley na kuya to. Diad saman et sikatoy maneeskuela ed University of Cincinnati, pian magmaliw a Presbeteryanon ministro. Imbes, sikatoy inmekal ed Presbeteryanon Iglesia tan akilimog ed saray Estudyante na Biblia, a singa inkatawag na saray Tasi nen Jehova ed saman. Sikatoy abautismoan nen Nobyembre 30, 1913, tan diad tinmumbok a taon tinaynan to so unibersidad tan linmoob ed kimey na colporteur (payunir). Nen Hunyo 1, 1920, sikatoy nagmaliw a membro na pamilyay Brooklyn Bethel. Ag-abayag, sikatoy nipasen a mangasikaso’d korespondensya tan saray rekord na aktibidades a colporteur, tan nen 1926 sikatoy niyalis ed departamentoy editorial, a ditan et sikatoy mabungan tuloy a nanlingkor. Nen 1945 sikatoy nagmaliw a bise-presidente na Watch Tower Society tan arum niran nisiglaot ya ulop. Kayari impatey nen datin presidenten Nathan H. Knorr nen 1977, sikatoy nagmaliw a presidente na Watch Tower Society. Sikatoy nanlingkor ed satan a kapasidad anggad impatey to. Diad impanbilay to, anengneng nen Agin Franz so indaak na bilang na Tastasi nen Jehova manlapud pigaran libo ya anggad ngangali apatira tan kapalduan milyon. Nangayagaan toy dakel iran pribilihyo ed serbisyo, pati say panagpaliwawa ed internasyonal iran kumbension tan ibibisita ed saray sanga tan ayaman na misioneros diad dakel iran parte na mundo. Say salaysay na bilay to so niparungtal ed Mayo 1, 1987, a paway na The Watchtower.
Nen labiy Lunes, Disyembre 28, 1992, agawa so memorial service ed Kingdom Hall ed Brooklyn Bethel. Sakey ya ampetang tan makapabiskeg ed espiritual a paliwawa so inter nen Agin Albert D. Schroeder na Mananguley ya Ulop. Nikonekta diad panamegley na telepono ed saray pamilya ed Watchtower Farms, Patterson, Mountain Farm, tan Kingdom Farm, ontan met ed pamilyay Bethel ed sanga na Canada.
Amin, nagkalautla’d saramay akapikimey a maapit ed sikato, so makailiw a tuloy ed si Agin Franz. Sikato so makatalos, makapaseseg, tan maanos ed amin a nanlingkoran tan nanbaroyan to. Peteg, a saray kapananisiaan so kinmiwas ed sikato diad espiritu na Hebreos 13:7: “Nonot yo so saray manuley ed sikayo, a sikara so nansalita ed sikayo na salitay Dios; tan motektek yo no anto so asumpalan na inpanbilay da, alig yo so pananisia’ra.”
Nen Disyembre 30, 1992, si Agin Milton G. Henschel so apilin komaliman presidente na Sosyedad ya onsalat ed si Agin Franz.
[Saray litrato ed pahina 31, 32]
Frederick W. Franz nen 1913
Diad pagawaan na Sosyedad ed Myrtle Avenue nen 1920
Kaiba nen Nathan H. Knorr diad Yankee Stadium nen 1953