Say Biblia​—Kasin Salita na Dios Odino Too?

Kapitulo 14

Say Biblia tan Sikayo

Ibaga na saray modernon kritiko a say Biblia so aliwan sientipiko tan mansusumlangan, a sakey lambengat itan a koleksyon na saray mito. Diad sananey a dapag, inkuan nen Jesus: “Say salitam [Dios] so katuaan.” (Juan 17:17) Say ebidensya so manusuporta ed si Jesus imbes a saray kritiko. Ipanengneng na katuaan a say Biblia so susto unong ed awaran. Niarum ni say makatantandan impantunosan to, saray tuan propesiya to, say aralem a kakabatan to, tan say pakayari ton mamasimbalo ed saray bilay na totoo so amin et mangidemostra a say Biblia so insulat a Salita na Dios. Unong ya insulat nen apostol Pablo: “Amin a Kasulatan so impuyan na Dios tan makagungguna.”​—2 Timoteo 3:16.

1. (Ilaktip so introduksion.) (a) Anto so papaneknekan na saray katuaan nipaakar ed Biblia? (b) Antoray pamatnagan ed katuaan a say Biblia et impuyan a Salita na Dios?

¹ Say katuaan a say Biblia so Salita na Dios, aliwan too, so walaan na aralem iran pamatnagan. Kabaliksan ton say Dios so peteg ya akitalosan ed totoo. Inebatan to so dakel iran tepet tayo tan impanengneng to so solusyon ed dakel iran problema tayo. Kabaliksan to met a saray ilalo ed arapen ya adeskribe ed Biblia so peteg. Say Panarian na Dios so peteg a manuuley tan magano lan onkiwas a mangekal na amin ya ag-inkahustisya, panaglames, tan kairapan ed sayan dalin.

2. Say pikakabat a say Biblia et Salita na Dios so mamakiwas ed sikayon manggawa na anto?

² Natan, say tepet so: “Anto so gawaen yo ed sayan impormasyon? Komon, say pikakabat a say Biblia so Salita na Dios so nepeg a mamaseseg ed sikayon mangusisa ed atan. Insipan na salmista a magmaliw a maliket iramay manggawa na ontan sanen insulat to: “Maliket so toon agnanakar ed simbawa na saray marelmeng . . . ingen say gayaga to so walad ganggan nen Jehova, tan diad ganggan to dalepdepen to ed agew tan labi.”​—Salmo 1:1, 2.

Awaten so Tulong

3, 4. (a) Unong ya ipapanengneng na Biblia a mismo, anto so nepeg tayon gawaen sano makaromog tayoray bengatlan agtayo natalosan? (b) Sioparay lawas mabulos ya ontulong ed totoo pian lalon natalosan so Biblia?

³ Nayarin, diad pambabasa yo na Biblia et naromog yoray bengatlan agyo natalosan. (2 Pedro 3:16) Ipanengneng na sakey ya agawa a nikurit ed libro na Biblian Saray Gawa a saya so nailaloan. Ag-abayag kayari impatey nen Jesus, sakey ya Etiope so manbabasa ed saray propesiya ed libro na Biblian Isaias. Say laki so inabet na Kristianon manag-ebanghelyo a si Filipe tan intepet to: “Natatalosan mo ta so babasaen mo?” Agnatalosan na Etiope, kanian inimbitaan to si Felipe ya ontulong ed sikaton mantalos.​—Gawa 8:30, 31.

⁴ Sakey a bii ed Estados Unidos so wala met ed parehon kipapasen. Sikato so maparanay a managbasa na Biblia, balet ta walaray dakel iran importanten bangat na Biblia ya agto natalosan ed dilin pambabasa to. Dia lambengat ed impakapitongtong to ed saray Tasi nen Jehova a naaralan toray manunan katuaan na Biblia, a pati say kaimportantian na Panarian na Dios tan say dakel iran bendisyon ya itarok na Panarian ed katooan. No imbitaan yora, saray Tasi nen Jehova so maliket ya ontulong met ed sikayo pian lalon natalosan yo so babasaen yo ed Biblia.

Iyaplika so Konseho na Biblia

5. Unong ed Biblia, anton kurso so mangitarok na liket?

⁵ Sikatayo so apaseseg ya aglambengat manbasa na Biblia noagta onkiwas met unong ed babasaen tayo. (Salmo 119:2) Niarum ni, ipapaseseg na Biblia: “Tawayan tan nengnengen a si Jehova so maong, O sikayon totoo; maliket so makayarin too a mansalimbeng ed sikato.” (Salmo 34:8) Kanian, sikatayo so iimbitaan ton salien so Dios. Salien so manbilay unong ed saray prinsipyo na Dios, ya ipanengneng a panmamatalekan yo so Dios a makaamta na sankaabigan parad sikayo. Diad sayan paraan et nanengneng yon atan so peteg a suston dalan. Saramay walaan na ontan a talek ed Dios so peteg a maliket.

6. Kasin praktikal natan so panggunaet a manbilay unong ed saray estandarte na Biblia? Ipaliwawa.

⁶ Ikuan na arum ya anggapoy makapambilay unong ed saray prinsipyo na Biblia diad sayan agmatua, imoral, marawal a mundo. Anggaman kuan, diad tua et dakel la so akapanggawa na onia. Siopa? Sakey a tobonbalon laki ed Aprika so akaromog na sakey a grupo na saratan. Insulat to: “Diad apalabas iran taon et iimatonan ko diad Zimbabwe a sikayon totoo, Tastasi nen Jehova, so peteg a mangugunaet a manumbok ed dilin ehemplo nen Kristo . . . Anggad natan, sikayo so alenleneg a grupon akakumbinse ed siak ed panangaro na Dios tan ed pakayari na Ebanghelyo To, diad panamegley na panagbilay yo ya aliwa lambengat ed panamegley na saray paliwawa tan sulsulat. Sikayo so manbibilay tan mangipupulong na ebanghelyo bangta dakel, dakel a totoo so mangipupulong ed ebanghelyo ingen ta agmanbibilay unong ed atan.”

Awaten so Autoridad To

7. Antoran kaslakan ya ag-agamil natan so agmitunosan ed ibabaga na Biblia?

⁷ Inkuan nen apostol Pablo a say Biblia so “makagungguna ed panagbangat, panamaat, panametek ed saray bengatla.” (2 Timoteo 3:16) Anggaman kuan, no maminsan say ibabaga na Biblia so aliwan popular. Alimbawa, kokondenaen na Biblia so homoseksual iran kiwas, ingen say homoseksualidad so malaknab a minoria bilang naawat ya estilo na panagbilay. (Roma 1:24-27; 1 Corinto 6:9-11; 1 Timoteo 1:9-11) Ibabaga met na Biblia a say bilay na agni-niyanak ya ugaw so mabli tan agnepeg a gagalaen a pateyen, ingen ngalngalin 50 laksan aborsyon so nagagawa ed tinaon ed sankamundoan. (Exodo 21:22, 23; Salmo 36:9; 139:14-16; Jeremias 1:5) Anto no sikatayon mismo so nanairapan a mangawat ed ibabaga na Biblia ed saratan a pamaakaran?

8, 9. No diad unaan et nanairapan itayon mangawat ed sakey a punto ed Biblia, anto so nepeg tayon nonoten, tan siopa iran estandarte so nepeg a lawas awaten tayo?

⁸ Bueno, naaralan na saray Kristianos a lawas makabat so itumbok ed Salita na Dios. Akin? Lapud diad manbayag, say panumbok ed ibabaga na Biblia so lawas onkana ed pankaabigan na balang sakey. (Uliran 2:1-11) Diad katuaan to, ageteran a tuloy so kakabatan na too. Matalag dan natebek so kaunoran iran pansumpalan na saray kiwas da. Impatua nen propeta Jeremias: “O Jehova, amtak a tuloy a say dalan na mangaraldalin a too anggapo ed sikato lamlamang. Aliwa a walad too so panakar a mangitonton ed saray kurang to.”​—Jeremias 10:23.

⁹ Nakaukolan tayo lambengat so inengneng ed kaliberliber pian napaneknekan so inkasusto na saya. Kaslakan ed saray probleman mamapairap ed mundo so direktan resulta ed ag-intulok na totoo ed konseho na Salita na Dios. Say andukey, magonigon ya awaran na katooan so angipanengneng ya agnayarian na totoon desidien a maaligwas so moral iran pamaakaran parad inkasikara. Say Dios so andi-geter a mas makabat nen sikatayo. Akin ya ag-awaten so ibabaga to, imbes ya onsaral ed dilin kakabatan tayo?​—Uliran 28:26; Jeremias 17:9.

Anggapoy Siopaman ya Ayadyari

10, 11. (a) Antoran katuaan nipaakar ed inkagawa tayo tan ed mundon pambibilayan tayo so mamalesa na saray problema sano panggunaetan tayo so manbilay ed saray estandarte na Biblia? (b) Anton nengneng na pililimog so ipapaseseg na Biblian anapen tayo, tan iner so pakaromogan tayo na ontan a pililimog?

¹⁰ Papasakbayan itayo na Biblia ed sananey a lawak a nakaukolan tayo so tulong. Amin tayo so walaan na atawir a makasalanan a kilingan. “Say pimorekdek na too so mauges manlapud inkaugaw to.” (Genesis 8:21; Roma 7:21) Sayan problema so napapabiskeg lapud manbibilay itayo ed sakey a mundon agmanutumbok ed saray prinsipyo na Biblia. Kanian, kaukolan tayo so tulong aliwa lambengat pian natalosan so Biblia noagta pian agamilen met iray bengatlan aaralen tayo. Sikato no akin a papasesegen itayo na Biblian milimog ed saray arum a mankaliktan a manbilay unong ed maridios iran estandarte. Insulat na salmista: “Ginulak so muyong na saray managgawa na mauges, tan aggak akiyurong ed saray marelmeng. . . . Diad saray muyong igalang ko si Jehova.” Tan ikuan na sananey a salmo: “Alay abig tan alay ligliwa so panayam na sanaagi ed inkasaksakey!”​—Salmo 26:5, 12; 133:1.

¹¹ Say pilimog a mankakasakey so sakey a makanan kabiangan na panagdayew parad saray Tasi nen Jehova. Walaan ira na pigaran pantitipon ed kada simba, ontan met ed panapanaon iran kumbension, a ditan et aaralen dan mankakasakey so Biblia tan sisingbaten da no panon ya iyaplika iray prinsipyo to ed saray bilay da. Tugyopen da so sankamundoan ya “impanaagi” a ditan et balang sakey so napaseseg tan natulongan a mamasiansia ed sarayan atagey iran estandarte na Biblia. (1 Pedro 2:17) Akin ya ag-atendian so sakey ed saray pantitipon da tan nengnengen no panon a say ontan a pantitipon so makatulong met ed sikayo?​—Hebreos 10:24, 25.

Manbilay Unong ed Salita na Dios

12. Antoran bendisyon so onsabi diad pangamtan say Biblia so Salita na Dios?

¹² Kanian, say pikabat ed Biblia bilang Salita na Dios so mangitarok na saray bendisyon tan responsabilidad. Nabebendisyonan itayo lapud nagagamoran tayo so panangiwanwan ed inagew-agew a kondukta tayo ya agnagamoran ed inerman. Niarum ni, naaralan tayo so panangaro na Dios diad impangitarya na dilin Anak to a manondon ed sikatayo pian nawalaan itayo na ilalon andi-anggaan a bilay. (Juan 3:16) Amoria tayon si Jesus so manuuley la a bilang Ari tan magano lan onkiwas a mangekal na karelmengan diad dalin. Tan sitatalek itayon manaalagar ed matunong a “balon katawenan tan sakey a balon dalin” ya insipan a mismo na Dios.​—2 Pedro 3:13.

13. Antoran responsabilidad so onsabi ed sikatayo sano awaten tayo so Biblia a bilang Salita na Dios?

¹³ Anggaman kuan, tandaan a walaan itayo na responsabilidad a manaral na Biblia tan mangipapuso ed ibabaga to. Ipapaseseg a mismo na Dios: “Anako, agmo lingwanan so tunong ko, tan unoren komon na pusom iray ganggan ko” (Uliran 3:1) Anggaman moriaen na kaslakan a totoo a say Biblia et salita lambengat na too, nepeg a makpel itayon “mangiyabuloy a naromog komon so Dios a matua, anggaman balang too so matila.” (Roma 3:4) Abuloyan so kakabatan na Dios a mangiwanwan ed bilay yo. “Manmatalek ed si Jehova ed amin a pusom . . . Diad saray amin a dalan mo sikato so bidbiren mo.” (Uliran 3:5, 6) Say sikakabat ya itulok ed Salita na Dios ed onian dalan so ontulong a mamaabig na bilay yo namparan natan tan diad andi-anggaan. (Sampot)