Say Unor a Panangukom

“SANO sika so ompatey say kamarerwam lambengat so napairap; satan so sakey ya impierno ed sikato: balet diad agew na panangukom say laman mo so mikasakey ed kamarerwam, tan nawalaan ka na nankaduan-segsegang, say kamarerwam so manlinget na saray tedter na dala, tan say laman mo so napano na panpanabos.”

ONIA so impaneskribe nen koma-19 siglon managbangat a si C. H. Spurgeon ed panmoria na saray klero ed agew na panangukom tan say panirap na saray naayew. Say Italianon pintor a si Michelangelo so walaan na mipadparan makapataktakot a pananisia, a singa nanengneng ed impinta ton “Say Unor a Panangukom” (kabiangan to so pinawala ed tagey), diad dinding na simbaan na Sistine ed Roma. Inkuan na The New Encyclopædia Britannica ed sayan impinta: “Say Kristo ed Panangukom so sakey a sisasanok a dios imbes a sakey a Kristianon manangilaban, a lalon mapaga diad panusa ed atooan a rasa nen say pangabrasa ed saray abendito diad tawen.”

Say Doktrina na Kakristianoan

Diad apalabas iran siglo, say agew na panangukom tan impiernon-apuy so paboriton tema ed saray sermon. Manlapud saray pulpita ra, saray managbangat a singa si C. H. Spurgeon so angibando tekep na malinew iran deskripsyon ed saray makapakebbiew a kairapan a manaalagar ed saray managkasalanan. Natan, say ontan a nengneng na panagbangat so matalag lan narengel. Balet say impiernon-apuy tan say unor a panangukom so siansia nin napanisiaan a bangabangat na kaslakan iran iglesia.

Karaklan ed saray relihyon na Kakristianoan so kaslakan et mipakna ed bangat na Katoliko Romano a say panangukom na Dios so onsabi ed duaran pamaakaran. Ununa, wadtan so “nibiig a panangukom.” No ompatey so sakey a too, say inkuan ya ag-ompatey a kamarerwa to so tampol a naukom tan niawat ed andi-anggaan balanglan diad impierno odino diad tawen.a Insan onsabi so unor, odino lapag, a panangukom ed kasampotan na sano saray laman na panaon inaatey so napaoli tan nikasakey lamet ed saray ag-ompatey a kamarerwa ra.

Diad sayan agew na panangukom, saray kamarerwa ed tawen so mansiansia diman tan mikasakey lamet ed saray laman ya agawan agnabulok. Saramay maniirap ed impierno so mansiansia met diman, tan saray kamarerwa ra so nikasakey met ed apaoli, agnabulok iran laman. Unong ed arum, saya so sengegan na ipalalo na saray kairapan da. Saramay mabilay ni a bilang totoo so ag-ompatey. Sikaray naukom legan a mabilay ni, ya ompatnag a “laman tan kamarerwa” a mamaarap ed tawen odino impierno.

Say posibilidad na pakasungdo ed agnibalikas iran kairapan ed impiernon-apuy so nanggawa ed interon tema na pinal a panangukom ed lima nen Jesu-Kristo a bengatlan makapataktakot ya isipen. Diad panmoria ed saya, onkelaw ka ta a makaamta a, diad katuaan to et saray panangukom na Dios so mabetbet a sengegan na pangayaga tan say Agew na Panangukom so sakey ed saray sankaliketan a panaon ed amin ya awaran na too? Panon ya ontan?

[Paimano ed leksab]

[Picture Credit Line ed pahina 3]

Random/Sipa Icono