Natan La So Panaon a Pananap ed si Jehova
“Diad biang nen Jehova, sikato so inmosdong a manlapud tawen a mismo ed saray anak na totoo, pian nengnengen no wala so siopaman a walaan na pakatebek, siopaman a manaanap ed si Jehova.”—SALMO 14:2.
1, 2. (a) Panon so panmoria na dakel ed tuan Dios? (b) Panon so pikabat tayo a si Jehova et agmikabat ed inkaindeperente na katooan?
NATAN, say tuan Dios, si Jehova, so inpulisay na saray ateistiko, agnostiko, managdayew ed palso iran dirios, tan minilmilyon a mangibabagan manisia ra ed Dios balet iburi ra diad panamegley na saray gawa ra. (Titus 1:16) Amayamay so manisia a singa say koma-19 siglon pilosopon Aleman a si Nietzsche a “say Dios so inatey.” Kasin si Jehova so agmikabat ed sayan alabas ya inkaindeperente? Andi, lapud pinuyanan to si David a mangisulat: “Inkuan na andi-kalakal ed puso to: ‘Anggapo so Jehova.’ Sikara so kinmiwas a makaderal, sikara so inmakto a makapadimla ed pidedeneng da. Anggapon balot so manggagawa na maabig.”—Salmo 14:1.
2 Intuloy nen David: “Diad biang nen Jehova, sikato so inmosdong a manlapud tawen a mismo ed saray anak na totoo, pian nengnengen no wala so siopaman a walaan na pakatebek, siopaman a manaanap ed si Jehova.” On, say Soberanon Katawan so mikabat ed saraman so malabay a mananap a mikabat tan manlinkor ed sikato. Kanian, say masimoon a pananap tayo ed sikato natan so importante. Kabaliksan to so pandumaan na bilay ya andi-anggaan tan andi-anggaan a kaandi.—Salmo 14:2; Mateo 25:41, 46; Hebreos 11:6.
3. Anto so walan potensyal ed arapen?
3 Kanian, nanengneng tayo no akin ya ontanlan importante a tulongan tayoray arum ya anapen si Jehova natan. Walaniray minilmilyon a totoo ya agnin balot akabet na sakey ed saray Tasi nen Jehova odino akadngel na say “maong a balita na panarian.” Tan no pigara nin karakel so pagmaliwan na bilang na say “baleg ya ulop” sakbay na “say baleg a kairapan,” et agtayo amta. Balet maseguron wala so potensyal parad dakel ni a mananap tan naromog si Jehova a Dios ed maganon arapen sakbay ya atrasadon tuloy. Say tepet natan so, Anto so nagawaan tayo pian natulongan tayoray nilaksalaksa ni a mananap ed Dios?—Mateo 24:14; Apocalipsis 7:9, 14.
4, 5. Diad pananap da ed sakey a dios, anto so mas-labay na dakel?
4 Dakel a totoo ed mundo natan so manaanap, balet aanapen so anto? Daiset a tuloy so manaanap ed tuan saksakey a Dios, si Jehova. Mas labay na dakel so sakey a dios ya ontukoy ed dilin personal iran pilalek tan pili. Unong a say mananugyop na boto na E.U. a si George Gallup, Jr., sinalita to: “Anggapo so peteg a naromog yon dakel a pandumaan na say naniglesia tan say ag naniglesia no nipaakar ed panagsaol, panagsaol ed buis, tan panagtakew, nagkalalo ta wala so dakel a sosyal a relihyon.” Iyarum to a “dakel so manusolong ed relihyon a makakomportable tan mamaliket ed sikara . . . Wala so nantawag ed satan a relihyon ya à la carte.”
5 Ikuan na saray arum, “Magenap la so relihyon ko parad siak.” Siempre, say tepet so peteg a nakaukolan a, “Kasin say relihyon ko so magenap lan maong ed Dios?” Tua, diad kaslakan a Kakristianoan tan ed Hinduismo so kontento a mandadayew ed saray imahin tan idolo ra. Maslak a mankuan iran Kristianos et makaromog a say andian-a-ngaran a Trinitaryan a dios so magenap la parad sikara. Tan masulok a 900 milyon a Muslim so manisia ed Allah. Diad biek a dapag, minilmilyon iran ateista so mangibabaga ya anggapo so Dios.
Saraman so Mankaukolan na Tulong
6. Anto so walan adiskobre na dakel a bumabasa na The Watchtower?
6 Balet anto so nipaakar ed sikatayo a maparanay a manbabasa na sarayan magasin? Sikatayo so nananap ed tuan Dios tan sikatoy aromog tayo. Apaneknekan tayon tua iray salita ed Santiago 4:8: “Onasingger ed Dios, tan sikato so onasingger ed sikayo.” Diad panamegley na aktibon pililimog ed Kristianon kongregasyon, sikatayo so inmapit ed Dios, tan naeksperiensia tayo no panon ya inmasingger si Jehova ed sikatayo.—Juan 6:44, 65.
7. Panon tayon amta a walara ni so dakdakel a totoon interesado ed pagmaliw ya aktibo ed katuaan?
7 Anggaman ontan, kabat tayo a wala ni so dakdakel a maliket a mililimog a tunggal paminsan ed saray totoo nen Jehova balet ta agda ni inala so positibon kiwas ya onasingger ed si Jehova diad panamegley na dedikasyon tan bautismo. Panon tayon amta iya? Nen 1990 ngalngali samploran milyon a totoo so inmatendi ed Memorial ed impatey nen Jesus. Balet pigara so aktibo a mangipapalapag na maong a balita na Panarian? Masulok labat ya apatiran milyon. Kabaliksan na satan a walaan tayo na ngalngali anemiran milyon a makaaro ed katuaan a no maminsan et maliket a mililimog ed sikatayo balet agni ginmapo a mangirekomenda na puron lenguahe na katuaan diad panagpulong na maong a balita na Panarian. Anggapoy panduaruwa, a dakel so mansalita ed ag-ginagalan okasyon ed biang nen Jehova tan uley na Panarian to. Anggaman ontan, agda ni malinlinew ya inkabkabat so inkasikara bilang saray Tasi nen Jehova. Saraya met so labay tayon tulongan.—Sofonias 3:9; Marcos 13:10.
8, 9. (a) Anto so papasesegen nen Jehova ed sikatayon gawaen? (b) Akin ya agmakabat so agpangimano ed simbawa nen Jehova?
8 Labay tayon pasesegen iraya a magmaliw a maliket, aktibon Tastasi nen Jehova diad pinal a kabiangan na baleg a kimey a nasusumpal natan ed sankamundoan. Ipangasin imanoen so maaron imbitasyon nen Jehova ed Uliran 1:23: “Pawil kayo ed panamaat ko. Insan diad sikayo gawaen ko so espirituk a manliplipua; gawaen kon nakabatan yoray salitak.” (Ipareng so Juan 4:14.) Agaylan makapaseseg a naamtaan a si Jehova so onkiwas ed pangala tayo na positibo iran kundang ya ikabkabat so inkasikatayo ed ngaran tan dayew to! Petepeteg, ya agtayo labay a nibilang ed saramay adeskrebi ed Uliran 1:24, 25: “Tinmawag ak balet ta intultuloy yon angipulisay, inyunat ko so limak balet anggapo so angimaton, tan intultuloy yon agmangimano ed pananimbawak, tan agyo inawat so panamaat ko.”
9 Saraman so agmangimano ed simbawa nen Jehova a mananap ed sikato kaleganan a sikato so naromog ni tan mankuntang ed desisyon da anggad aktual a nanengneng da so baleg a kairapan ya onggagapo et makaromog ya abayag laran tuloy a manalagar. Mangipatnag itan a kurso na kakulangan na pananisia tan kakabatan tan mangileglemew ed agkanepegan a panangasi nen Jehova.—2 Corinto 6:1, 2.
10. Akin a say andian-na-pililikna tan inka-indeperente et mapeligro?
10 Pian niyulustra so pankaukolan na tampol ya aksyon, kasin tomboken yo lambengat so maabig a simbawa na doktor no sikayo la so walaan na doblen pulmonya? Odino, sano naimano yoray ununan sintomas na sakit? Kanian akin ya ipaleen so pangisiyan yo ed inkasikayo a manlapud mansasakit a mundo nen Satanas tan ondapag ed si Jehova tan Tastasi to? Saray pansumpalan na andian-na-pililikna, inkaindeperente, tan agpangimano so apalinew ed Uliran 1:26-29: “Siak met, diad biang ko, so onelek ed dilin kairapan yo, manludlurey ak sano onsabi so tatakotan yo . . . Diad satan a panaon sikara so ontawag ed siak, balet aggak onebat; mansiansia ra a mananap ed siak, balet agda ak naromog, ta binusol da so pikakabat, tan agda pinili so takot ed si Jehova.” Agtayo komon naromog a ‘mananap ed si Jehova’ sano atrasado la!
11. Anton tulong so wala ed saramay manaanap a manlinkor ed Dios?
11 Arum a manbabasa ed sayan magasin so nayarin walad kurso na panaanap ed tuan Dios. Sikami so maliket a sikayo so mantultuloy ed pananap yo. Ipikasi mi a say kakabatan yo ed Biblia so mamayubo ed sikayo a mangala na nagkalalon positibon aksyon ya ontalindeg a malet parad katuaan. Maseguro kayo a kada kongregasyon na saray Tasi nen Jehova so akaparaan ya ontulong ed pananap yo.—Filipos 2:1-4.
Panaon la na Seseg tan Aksyon
12, 13. Akin a nakaukolan tayo so mangala na aksyon nipaakar ed tuan panagdayew?
12 Akin a nakaukolan tayon amin a mangala na aksyon ya ibiang tayo so inkasikatayo ed Jehova a Dios tan tuan panagdayew to? Lapud saray nagagawa ed mundo so onpupugta ed kapantokan. Saray pahina na awaran so maples a nabubukay nen say pakabasa na too. Aliwan natan so panaon ya agpaneside tan pagmaliw a malainemem. Malinlinew a sinaglawi nen Jesus: “Siopaman ya anggapo ed dapag ko so sumpad siak, tan siopaman ya agmitipon ed siak nabuyak.” Inkuanto met: “Siopaman ya ibaing to ak tan saray salitak, ibaing na say Anak na too iyan sakey sano sikato so onsabi ed gloria to tan ed Ama tan ed masanton angheles.”—Mateo 12:30; Lucas 9:26.
13 Natan la so panaon na seseg tan aksyon! Kabat tayo no iner so pupogtaan na saray nagagawa ed mundo, tan onpepelnak so Armagedon ed horizon. Sirin, say belyaw so anapen natan si Jehova sakbay ‘na agew na sanok to,’ ambegyan sikato so naromog ni. Diad baleg a kairapan, atrasado lan tuloy.—Sofonias 2:2, 3; Roma 13:11, 12; Apocalipsis 16:14, 16.
14. Anto iran katunongan so wala ed panaanap ed Dios?
14 Peteg, amin a katooan so nepeg a mananap la natan na aprobasyon na Dios. Matukotukoy ya imbalikas itan nen apostol Pablo ed Gawa 17:26-28: “Tan [say Dios] so nanggawa na sakey a too ed balang nasyon na totoo, a manayam ed interon tapew na dalin, tan tinandaan to so aturon panaon tan panggangaan na panayaman da, pian anapen da so Dios, ompan sikato so nakarapas da tan peteg a naromog da, anggaman, diad tua, sikato so ag-arawi ed balang sinansakey ed sikatayo. Ta nisengeg ed sikato wala so bilay tayo tan ongalaw tan niwala.” Satan ya unor a balikas, “nisengeg ed sikato wala so bilay tayo tan ongalaw tan niwala,” so mangiter na magenap a rason ed panaanap ed Dios. Salamat ed agkanepegan a panangasi nen Jehova ta sikatayo so niwala ed mainget balet makanan napambilayan ed sayan melanting a dalin. Agta nepeg a misalamat tayo ed Soberanon Katawan na uniberso? Tan agta nepeg ya ipanengneng tayo so panamabli tayo ed sikato diad praktikal iran termino?—Gawa 4:24.
15. (a) Anto so liknaan nen manag-awaran a si Arnold Toynbee a gagala na atatagey a relihyon? (b) Anto so nepeg tayon gawaen pian makapangigloria ed Dios?
15 Aminsan a nansulat si manag-awaran ya Arnold Toynbee: “Say tuan gagala na atatagey a relihyon et pangidalangirang na espiritual iran simbawa tan katuaan a diad inkasikato ya akamayamay a kakamarerwa a nayarian ton sabien, pian kada sakey ed sarayan kakamarerwa so nayarin nanumpal so tuan gagala ed too. Say tuan gagala ed too et say pangigloria ed Dios tan Sikato so pangayagaan ed andi-anggaan.” (An Historian’s Approach to Religion, pahina 268-9) Pian nigloria so Dios, ununa nepeg a sikatoy anapen tayo tan mangala na suston kakabatan ed sikato tan saray gagala to. Diad ontan, say tawag nen Isaias so matukotukoy: “Anap yo si Jehova, sikayon totoo, leleg a naromog ni. Ontawag ed sikato legan a paneknekan ton asingger ni. Taynanan komon na mauges a too so dalan to, tan say mapasakit a too iray kanonotan to; tan komon ompawil ed si Jehova, a sikatoy mangiter na panangasi ed sikato, tan diad Dios tayo, lapud sikato so mamerdona ed baleg a dalan.”—Isaias 55:6, 7.
Anton Praktikal a Tulong so Niopresi Tayo?
16. (a) Anton anggat so kidungetan na Kristianon kongregasyon? (b) Anto so praktikal a dalan a makatulong tayo ed saray arum a manlinkor ed si Jehova?
16 Saray minilmilyon ya interesadon totoo ya aliwa niran aktibon manangipalapag so mangipaarap na sakey ya anggat ed sikatayon amin. Anto so gagawaen tayo ed praktikal a dalan bilang mamatatken, ministeryal ya ariripen, saray payunir, tan saray manangipalapag pian tulongan iramay makaaro ed say katuaan pian magmaliw ya aktibon mibibiang ed tuan panagdayew a kaiba tayo? Sakey a dalan na pangyopresi na tulong no iner a nakakaukolan et say idalaw ed panaayaman da tan itagar ira ed saray miting ed Kingdom Hall pian makapangayaga met ira ed saray gungguna na espiritu nen Jehova diad maparanay a basiyan. Say simbawa nen Pablo ed saray Hebreos, ed kapitulo 10, bersikulo 24 tan 25, so maganat natan a singa nen saman: “Komon a manpapasesegan itayo ed aro tan saray maabig a gawa, ya agpaulyanan so pantitipon tayo, a singa ugali na arum, balet manpapasesegan so balang sinansakey, tan nagkalalo la nisengeg ta nanenengneng yo a manasingger la so agew.” Pasesegen min amin a malabay a makaeskperiensia na abig-linawa nen Jehova a milimog ed saray Tasi nen Jehova a regular ed saray lokal a Kingdom Hall da.
17. No tulongan tayoray iyaaralan na Biblian onaligwas ed pananap da ed si Jehova, anto iran tepet so kaukolan ya eebatan?
17 No mangiyaaral tayo na Biblia ed siopaman a maparanay lan onaatendi ed saray miting, natulongan tayo kasin onkualipa bilang sakey a manangipalapag na maong a balita? (Nengnengen so Organized to Accomplish Our Ministry, pahina 97-9.) Tan bektan sikato la so nagmaliw a sakey ya agni-bautismoadon manangipalapag, kasin say imbitasyon et onlaknab ed pangitagar tayo a regular ed mapublikon panagpulong a kimey tan ed pigaran iyaaralan tan papawilen tayo? (Nengnengen so Disyembre 1, 1989, paway na The Watchtower, pahina 31.) Diad arum a salita, bektan onkualipika iratan a balo ni, kasin papasesegen tayora diad panamegley na pangipanengneng ed saray positibon resulta na say panagpulong a kimey tayo?—Mateo 28:19, 20.
Si Jehova so Makanan Anapen
18. Panon ya angipanengneng si Jehova na pangabagey ed katooan?
18 Nisengeg ed say dondon bagat nen Kristo Jesus, ag-ibilang a sumpad sikatayo nen Jehova iray inmunan kasalanan tayo tan mangipulisay ed sikatayo no sikatayo so manbabawi tan mangagamil na pananisia. Imanoen iray salita nen David: “Agto anggan ginawa unong ed saray kasalanan tayo; nisay unong ed saray lingo tayo a sikatoy angitarok no anto so kanepegan tayo. Ta unong ya atagtagey so katawenan nen say dalin, say maaron panangasi to so baleg ed saraman so ontakot ed sikato. Unong na kaarawi na letakan a manlapud selekan, ontan kaarawi so angipasenan to ed saray kasalanan tayo. A singa say ama mangipanengneng na pangabagey ed saray anak to, si Jehova angipanengneng na pangabagey ed saraman so ontatakot ed sikato. Ta kabkabat ton mismo so inkagawa tayo, a nononoten to a dabok tayo.”—Salmo 103:10-14; Hebreos 10:10, 12-14.
19. Anto so walan panamaseseg ed saramay walan sinmiwawi manlapud katuaan?
19 Si Jehova so peteg a maiter tan maabagey a Dios. No sikatayo so onasingger ed sikato ed kaumildian tan panagbabawi, sikatoy mamerdona tan manlingwan. Agto mamenben na andi-geter a sakit na linawa diad panamegley na andi-anggaan a manliob ya apuy a bilang pansumpalan. Andi, unong a sinalita nen Jehova: “Siak—siak so say Sakey a mamunas na saray inpakasumlang yo nisesengeg ed siak, tan saray kasalanan yo agko nodnonoten.” Agaylan panamaseseg ed siopaman a sinmiwawi a manlapud katuaan tan amaulyan ed relasyon da ed si Jehova! Sikara met so napaseseg a mananap ed si Jehova natan tan ompawil ed aktibon pililimog ed totoon ningaran ed sikato.—Isaias 43:25.
20, 21. (a) Anton makapaseseg ya alimbawa so wala ed kadaanan a Juda? (b) Anto so nepeg a gawaen na saray manaayam ed Juda pian naawat so bendisyon nen Jehova?
20 Nipaakar ed saya walaan tayo na makapaseseg ya alimbawa nen Arin Asa ed kadaanan a Juda. Inekal to so palson panagdayew ed panarian to, balet nansiansia iray pakatandaan na paganon panagdayew. Say salaysay ed 2 Awaran 15, bersikulo 2 ya anggad 4 et mangibaga ed sikatayo ed inkuan nen propetan Azarias ed si Asa bilang panonot: “Si Jehova so walad sika daput no sika so wala ed sikato; tan no sikato so anapen mo, abuloyan ton naromog mo, balet no taynanan mo taynanan toka. Tan dakel iray agew ya andian na tuan Dios so Israel . . . Balet sano sikaray nairapan sikaray ompawil ed si Jehova say Dios na Israel tan nananap ed sikato, insan inabuloyan to so inkasikato a naromog da.”
21 Ag akigalaw si Jehova ed si Ari ya Asa na onamot-tan-mananap noag ingen ‘inabuloyan to so inkasikaton naromog.’ Panon so ikiwas na ari ed sayan mensahe? Diad parehon kapitulo, onebat iray bersikulo 8 tan 12: “Tamtampol kayari na inpakadngel nen Asa ed saray salita . . . , sikato so nanpakpel tan ginapoan ton ekalen iray makapadimlan bengabengatla ed amin a dalin . . . tan amasimbalo ed altar nen Jehova a walad arap na pinto nen Jehova. Onarum ni, [say Juda] so linmoob ed sipan ed pananap ed si Jehova a Dios na saray atateng da ed amin a puso ra tan kamarerwa ra.” On, sisisimoon ya inanap da si Jehova “ed amin a puso ra tan amin kamarerwa ra.” Anto so nansumpalan na nasyon? Say bersikulo 15 ibaga to ed sikatayo: “Tan amin a Juda so nanliket ed saray bengatlan sinambaan; lapud ta diad amin a puso ra a sikaray nansamba tan tekep a napnon gayaga ed biang da a sikaray nananap ed sikato, pian abuloyan tora a naromog da; tan si Jehova intuloy toran itdan na painawa ed kaliberliber.”
22. Anto so mamaseseg ed sikatayon magmaliw ya aktibo natan ed linkor ed si Jehova?
22 Natan, agta satan et sakey a panamabiskeg ed sikatayon amin a mangala na positibon kiwas nipaakar ed puron panagdayew ed si Jehova? Kabat tayo a wala so potensyal para ed minilmilyon ni a mandayew ed si Jehova. Anggapo so duwaruwa a dakel ed saraya so mamasimbalo ed saray bilay da pian nakapet iray Makasulatan a nakakaukolan ed serbisyo ed si Jehova. Saray arum so ombabaleg ed pakatebek tan pananisia, so manaanap ed si Jehova, tan asingger lan napakiwas a minabang na puron lenguahe ed saray arum diad panamegley na pangipaamta ed sikara na aralem a pakatalos ed katuaan nipaakar ed si Jehova tan ed Panarian to. Tan akin a makanakana ya anapen tayon amin si Jehova natan ambegyan naromog ni? Lapud say nisipan a balon mundo to so asingger la!—Isaias 65:17-25; Lucas 21:29-33; Roma 10:13-15.
Kasin Nanonotan Yo?
◻ Siopa so angipanengneng na inkaindeperenti ed tuan Dios, si Jehova?
◻ Diad anton laknab a maparanay a mangapekta so relihyon ed kondukta?
◻ Anto so walan potensyal parad idaak na aktibon Tastasi?
◻ Akin a panaon la natan na seseg tan aksyon?
◻ Akin a makanan anapen si Jehova?
[Litrato ed pahina 16]
Dakel ed saray kakaaro na Tastasi nen Jehova ya inmatendi ed Memorial so potensyal ya ariripen na Dios
1990 inmatendi ed Memorial: 9,950,058
1990 pantok a manangipalapag: 4,017,213
[Litrato ed pahina 19]
Diad agew nen Ari ya Asa, inmarap so nasyon ed si Jehova