Kasin Susumpalen Yoray Bilin?

SAY sakey a maaron ama so mamilin ed ilalak to pian sikaray maaligwas ed kabibilay tan maliket sano ontatken ira. Tan saray ananak a mangaro tan manrespeto ed kaatengan da et mangawat ed ontan a bilin lapud kabat da a parad pankaabigan da. Ontan met, say maaron mangatatawen ya Ama, si Jehova, et mangiiter ed saray ariripen to na panangiwanwan a mangitatarok ed sikara na aligwas tan gayaga ed saray panagbilay da. Kanian, makana a sumpalen iray bilin ya inter ed sikatayo na Dios ed panamegley na Salita to, say Biblia, tan say mangaraldalin ya organisasyon to.

Loob na Pamilya

Walaray nanduruman kabiangan a naikdan tayo na saray bilin. Sakey ed saya so diad loob na pamilya. Say panamaley tan pamilya so walaan ira na masanton lapuan. Ibabaga na Biblia ya impanasawa na Dios so inmunan toon sanasawa tan imbaga ed sikaran nawalaan na ananak. (Genesis 1:27, 28; 2:22-24) Inparaan na Amalsa iray bilibilin ya onkana ed amin a membro na pamilya no nipaakar ed saray totontonen na sakey tan sakey ed sikara. Alimbawa, say asawan laki tan ama so ulo na kaabungan, a kabaliksan ton sikatoy walaan na responsabilidad ed pangiparaan na bilin, tagano, kawesen, panayaman, salimbeng, tan disiplina. Sikatoy manggawa met na importanti iran desisyon ed pamilya. Bilang asawan laki, sikatoy kaukolan a mangipanengneng na konsiderasyon ed asawan bii tan ipabtang ed sikatoy galang a singa sakey a maletey a baseha. (Efeso 5:22, 23; 1 Timoteo 5:8; 1 Pedro 3:7) Say asawan bii so kaukolan a pasakup ed masiken to, ya ipanengneng ed sikatoy aralem a respeto, tan magmaliw a katulongan tan kapanoan to. Tan ituro na Kasulatan a saray anak et kaukolan a matulok ed saray kaatengan da.​—Genesis 2:18; Efeso 6:1-3; 1 Pedro 3:1, 2.

Antoy nagawa sano sarayan bilin et napaulian? Nagawa iray agpantutunosan tan suppiatan sano saray asawan lalaki et onkulang na konsiderasyon ed saray kaasawaan dan bibii, tan saray kaasawaan a bibii et mangipanengneng na samsamet a respeto ed panangipangulo na masiken. Diad tua, nansengegan iratan a bengabengatla na inkabuyak na dakel iran panamaley. Say inkabanggar tan inkatonganga na ananak so angitarok na baleg a kaermenan ed dakel iran atateng. Mabetbet, a baleg so pakatetelan ed saray atateng ed agpangitarok na ananak da unong ed manepeg a disiplina, a pasasanoken ira.​—Efeso 6:4.

Anggaman saray sosyal a komikimey, sikologos, tan arum nira so walan angiyopresi na malaknab a nanduruman suhestion no panoy panresolbe na saray problema na pamilya, anggapoy simbawa a mas epektibo nen saray bilibilin ya intarya na Biblia ed panamegley na Amalsa ed pamilya. Say panumbok ed saraya so mangitarok na tuan liket tan inkapenek.​—Salmo 19:​7-9.

Diad Kongregasyon

Nepeg tayon tumboken iray bilin na Ulo na Kristianon kongregasyon, si Jesu-Kristo, ya inter ed panamegley na “matoor tan makabat ya aripen,” say aturon dalan na organisasyon na Dios dia ed dalin. (Mateo 24:​45-47; Efeso 5:23) Pian walaan na deen tan pankakasakey ed kongregasyon, amin a membro to so nepeg ya onkiwas a mitunusan ed inter a giya. Singa bilang, saramay mangipapangulo diad panagbangat ed kongregasyon tan ed panulong na arum a totoo so kaukolan ya onsaral ed saray direksion a naawat da a manlapud organisasyon nen Jehova. Saya so ontulong ed inkaepektibo na kimey da. Saray bilin so nayarin nipaakar ed no panoy pibiang ed panagpulong a kimey, ed no panoy panresolbe ed problema diad kongregasyon, ed no panoy pangiter na simbawa tan panamaseseg, ed no panon a ligliwaen iray napapairap, tan arum nira. Walara met so panangiderihe no panon so pangiparaan ed manangitonton tan makapaseseg iran pantitipon parad amin a milimog ed Kristianon kongregasyon.​—Gawa 20:20; Roma 12:6-8; Galacia 6:1; 1 Tesalonica 3:1-3.

Saray matatken ed kongregasyon, odino manangasikaso, nagkalautla so nepeg a mangipanengneng na maabig ya ehemplo nipaakar ed saya. Say Mananguley ya Ulop so angipawit na saray bilin a nepeg a tomboken a maalwar tan matoor a tuloy na saray mamatatken. Nepeg dan iyadapta tan iyaplika iray bilin ed lokal iran sirkumstansya. Nepeg a sinononot tayo a say mangididirehi na Kristianon kongregasyon et si Jesu-Kristo. Natebek ton maong iray kakaukolanen na amin iray kogregasyon ed liber na mundo, tan sikatoy mangitarok na nakaukolan a panamaseseg tan tulong. Sirin, saray matatken so nepeg ya agmanduwaruwan mangiyaplika na anggan dinan a direksion a naaawat da a manlapud teokratikon organisasyon na Dios. Manserbi iyan sakey a maabig ya alimbawa parad amin ed kada kongregasyon tan ontulong ed sikaran mankakasakey ed limog na inkasikara tan ed amin a Kristianon sanaagi ed liber na dalin.​—Gawa 15:1-31; Hebreos 13:7; Apocalipsis 5:6.

Magayaga Iran Pansumpalan

Sano say sakey a managpaalagey so mangipaalagey na sakey a baleg a bilding, maalwar a tuloy ton tumboken so plano na arkitekto pian say ipalagey to et manbayag. Diad marawal ya agew sakbay na Delap, ingganggan si Noe a mangipaalagey na biong. Imbaga ed sikato no panon so pangipaalagey ed satan tan anto iran katooan tan ayayep so itarok ed kilalaban a manlapud onsasabin Delap. Panon so inyebat nen Noe? Ibabaga na Biblia: “Intuloy nen Noe a gawaen unong ed amin ya ingganggan na Dios ed sikato. Ginawa to unong ed imbaga to.” Si Noe lambengat tan saramay walad limog to ed biong so akaliktar ed Delap. (Genesis 6:5, 13-22; 7:23) Natan, manbibilay tayo ed panaon a mipadparan tuloy ed agew nen Noe, tan diad sayan sengegan a punasen na Dios so amin a mauges a totoo. Ibabaga na Biblia ed sikatayo iray kundang a nepeg tayon laen no labay tayoy sakey ed saramay makaliktar.​—Mateo 24:37-39; 2 Pedro 3:5-7, 11.

Sirin, awaten tayon tekep na panamabli tan agamilen iray inter nen Jehova iran bilibilin ed panamegley na nisulat a Salita to tan mangaraldalin ya organisasyon to. Say panggawa ed saya so makapangitarok na aligwas tan gayaga tan makapangiliktar met ed bilay tayo.